1 Lukim, nau em i kamap we bihain Jisas i bin autim ol dispela toktok, em i bin lukluk raunabaut long ol pipol gen, na tokim ol: Lukim, taim bilong mi i klostu pinis long mi long go bek long Papa.

2 Mi lukim olsem yupela i no strong, olsem yupela i no inap save gut long olgeta toktok bilong mi, we Papa i bin tokim mi long autim long yupela long dispela taim.

3 Olsem na, yupela go bek long haus bilong yupela, na tingim long ol samting mi bin toktok, na askim Papa long nem bilong mi, olsem yupela bai save, na redim tingting bilong yupela long tumora, na mi bai kam gen long yupela.

4 Tasol nau mi go long Papa, na tu long soim mi yet long ol narapela hauslain bilong Israel ol i lus, long wanem, ol i no lus long ai bilong Papa, bikos em i save we em i bin kisim ol i go.

5 Na em i kamap we bihain Jisas i toktok olsem, em i bin lukluk raunabaut gen long ol pipol, na lukim ai wara bilong ol, na ol i lukluk stret long em olsem ol bai askim em long i stap wantaim ol long longpela taim liklik.

6 Na em i bin tokim ol: Lukim, bel bilong mi i sore long yupela.

7 Inap yupela gat wanpela husat i sik namel long yupela? Bringim ol i kam. Inap yupela gat wanpela husat i no save wokabaut gut, o i ai pas, o i no save wokabaut, o gat lek na han krungut, o i lepa, o, gat han, lek na skin idai, o i iyau pas, o gat olgeta kainkain pen? Bringim ol i kam, na mi bai hilim ol, long wanem, mi sore long ol, bel bilong mi i pulap long marimari.

8 Long wanem, mi lukim olsem yupela i laikim olsem mi mas soim long yupela wanem mi bin wokim long ol lain brata bilong yupela ol i stap long Jerusalem, long wanem, mi lukim olsem bilip bilong yupela i inap long mi long hilim yupela.

9 Na em i kamap we taim em i tok olsem, olgeta pipol ol i bin wan bel long go aut wantaim sik lain, lek krungut, ai pas na maus pas bilong ol na olgeta lain bilong ol husat gat olgeta kainkain sik, na em i bin hilim olgeta ol i bin kisim kam long em.

10 Na ol olgeta, ol i bin hilim na ol i no sik, bin stat daun long lek bilong em, na lotu long em, na planti ol i bin kam, long wanem, ol pipol i bin kis long lek bilong em, na ol i bin wasim ol lek bilong em wantaim ai wara bilong ol.

11 Na em i kamap we em i bin tokim ol olsem ol mas bringim ol liklik pikinini bilong ol.

12 Olsem na ol i bin bringim ol liklik pikinini bilong ol na putim ol long graun raunim em, na Jisas i bin sanap namel long ol, na ol pipol ol i klia i go bek na givim ples inap long olgeta liklik pikinini ol i bin kisim ol i kam long em.

13 Na em i kamap we taim olgeta liklik pikinini ol i bin kisim ol i kam, na Jisas i bin sanap namel long ol, em i bin tokim ol pipol olsem ol i mas brukim sukuru long graun.

14 Na em i kamap we taim ol i brukim sukuru long graun, Jisas i bin kisim pen insait long em yet na tok: Papa, mi gat pen bikos long pasin nogut long ol pipol long haus bilong Israel.

15 Na taim em i autim ol dispela toktok, em i bin brukim sukuru em yet long graun, na lukim, em i bin beten long Papa, na ol samting em i bin beten i no inap long raitim, na ol pipol ol i harim long em bin witnesim.

16 Na ol i bin witnesim olsem: Ai i no bin lukim bipo, na tu iyau i no bin harim bipo, ol traipela na naispela ol samting tru mipela i bin lukim na harim taim Jisas i bin toktok long Papa,

17 Na nogat wanpela tang ken autim, nogat wanpela man ken raitim kain tok, na tu nogat bel bilong ol man ken tingim ol samting i traipela na naispela tru mipela lukim na harim taim Jisas i bin tok, na nogat wanpela man ken tingim long amamas mipela i bin kisim long sol bilong mipela long taim mipela i bin harim em i beten long Papa long mipela.

18 Na em i kamap we taim Jisas i pinis long beten long Papa, em i bin kirap, tasol ol pipol i bin kisim traipela hamamas tru, na ol i nogat strong long kirap.

19 Na em i kamap we Jisas i bin toktok long ol, na tokim ol long kirap.

20 Na ol i kirap long graun, na em i bin tokim ol: Bles yu, bikos long bilip bilong yupela. Na nau lukim, mi amamas.

21 Na taim em i autim ol dispela toktok, em i krai, na ol pipol i bin witnes long dispela, na em i bin kisim wanwan long ol liklik pikinini bilong ol, na blesim ol, na beten long Papa long ol.

22 Na em i bin krai gen taim em i wokim dispela,

23 Na em i bin toktok long ol pipol, na tokim ol: Lukim, ol liklik pikinini bilong yupela.

24 Na taim ol i lukaut long lukim, ol i putim ai bilong ol long heven, na lukim ol heven i op, na ol i bin lukim ol ensel i kam daun long heven wankain olsem paia namel long ol, na ol lain kam daun na raunim ol dispela ol liklik pikinini, na paia bin raunim ol, na ol ensel i minista long ol.

25 Na ol pipol i bin lukim, harim na witnesim, na ol i bin save olsem rekot bilong ol i tru, long wanem, ol olgeta i bin lukim na harim, wanwan man long em yet, na namba bilong ol i klostu tu tausen na faiv handret sol, na em ol man, meri wantaim pikinini.