1 Na nau em i kamap we long wanpela ten sikis krismas bihain long Krais i bin kam, Lakoneus, gavana long graun, i bin kisim wanpela pas i kam long lida na gavana long dispela stil lain, na ol toktok em i bin raitim i olsem:

2 Lakoneus, nambawan tru na het gavana bilong dispela graun, lukim, mi raitim dispela pas i go long yu, na mi apim nem bilong yu nogut tru, bikos long strong bilong yu wantaim strong bilong ol pipol bilong yu, long lukautim dispela samting yupela ting i rait na fridom bilong yupela, ye, yupela i sanap strong, olsem han bilong wanpela god i bin sapotim yupela, long pait long banisim fridom, ol samting na kantri bilong yupela, o long dispela samting yupela i kolim olsem.

3 Na i luk olsem mi sore, nambawan tru Lakoneus, olsem yupela mas giaman nating long ting olsem yupela ken strong long pait wantaim planti strongpela man tru em mi lidim, ol i redi wantaim ol samting bilong pait bilong ol nau long dispela taim, na ol i weit na samba i long harim toktok bilong mi olsem—Go daun na pait wantaim ol lain bilong Nifai na bagarapim ol.

4 Na mi save olsem ol lain em ol man bilong pait na win, bikos mi save long ol taim ol i save pait, na mi save long belhat oltaim oltaim bilong ol long yupela, bikos long planti rong bilong yupela i bin mekim long ol, olsem na, sapos ol i kam daun long pait wantaim yupela, em ol bai bagarapim yupela olgeta.

5 Olsem na mi raitim dispela pas, na pasim wantaim han bilong mi yet, na mi gat wari long sindaun bilong yupela, bikos yupela i strong long dispela samting we yupela bilip i rait, na long gutpela spirit tru bilong yupela long taim long pait.

6 Olsem na, mi raitim long yu, na laikim olsem yupela bai givim yupela yet long dispela ol pipol bilong mi, ol siti bilong yupela, ol graun bilong yupela na ol samting bilong yupela, nogut ol bai visitim yupela wantaim naip bilong pait na olsem bagarap bai kam long yupela.

7 O olsem, yupela mas givim yupela yet long mipela, na bung wantaim mipela na save long ol tok hait wok bilong mipela, na kamap lain brata bilong mipela inap long yupela bai kamap wankain olsem mipela—i no long kamap wok boi bilong mipela, tasol long kamap lain brata bilong mipela na skelim olgeta samting bilong mipela.

8 Na lukim, mi tok tru antap long yu, sapos yupela wok olsem wantaim tok tru antap, yupela bai i no inap kisim bagarap, tasol, sapos yupela i no wok olsem, mi promisim yu wantaim tok tru antap, olsem Mi bai tokim ol ami bilong mi long kam daun long pait wantaim yupela long mun bihain long dispela mun, na ol bai i no inap givim sans na larim yupela long i stap laip, tasol ol bai kilim yupela, na bai lusim naip bilong pait pundaun long yupela i go inap long yupela bai pinis olgeta.

9 Na lukim, Mi em Gidiani, na mi em gavana long dispela tokhait lain bilong Gadianton, na Mi save olsem dispela lain na wok bilong ol i gutpela, na dispela lain wantaim tokhait wok bilong ol i kam long bipo taim na ol i bin givim i kam daun long Mipela.

10 Na mi raitim dispela pas i go long yu, Lakoneus, na mi ting olsem yupela bai givim ol graun wantaim samting bilong yupela, na blut bai no inap kapsait, inap long dispela ol pipol bilong mi bai kisim bek ol rait na gavman bilong ol, ol i bin bruk i go long we long yupela bikos long pasin nogut bilong yupela long holim bek ol rait bilong ol long gavman, na sapos yupela i no wokim olsem, mi bai bekim bek rong bilong ol. Mi em Gidiani.

11 Na nau em i kamap we taim Lakoneus i kisim dispela pas, em i bin kirap nogut tru, bikos long strongpela askim tru bilong Gidiani long kisim graun long ol lain bilong Nifai, na tu long poret toktok long poretim ol pipol na long toktok long bekim bek long rong i nogat as, bikos em ol stil lain ol yet ol i bin rong na bruk i go nabaut long dispela nogut na les nogut tru stil lain bilong Gadianton.

12 Nau lukim, dispela Lakoneus, em i gavana, i wanpela stretpela man, na strongpela askim na ol poret toktok bilong wanpela stilman i no poretim em, olsem na, em i no harim long pas bilong Gidiani, gavana bilong ol stil lain, tasol em i bin tokim ol pipol bilong em long singaut long Bikpela long kisim strong long taim ol stil lain bai ol i kam long pait wantaim ol.

13 Ye, em i bin salim wanpela tok save i go namel long olgeta pipol, olsem ol bai bung wantaim ol meri, pikinini, bulmakau, sipsip na olgeta samting bilong ol long wanpela ples na lusim graun bilong ol.

14 Na em i bin givim oda olsem, strongpela banis tru mas kamap long raunim ol. Na em i bin tokim ol ami long ol lain bilong Nifai wantaim ol lain bilong Leman, o olsem olgeta pipol ol i bin kaunim ol wantaim ol lain bilong Nifai long putim ol wasman raunabaut long lukaut long ol, na long lukautim ol long ol stil lain long de na long nait.

15 Ye, em i bin tokim ol: Olsem Bikpela i stap, sapos yupela i no tanim bel long olgeta pasin nogut bilong yupela, na singaut long Bikpela, em bai i no inap seivim yupela long han long dispela ol stil lain bilong Gadianton.

16 Na nambawan na naispela ol toktok na profesi tru bilong Lakoneus inap long ol toktok i bin poretim olgeta pipol, na ol i bin strong nogut tru long bihainim ol toktok bilong Lakoneus.

17 Na em i kamap we Lakoneus i bin makim ol het kepten long olgeta ami long ol lain bilong Nifai, long kamap komanda bilong ol, long taim ol stil lain bai kam daun long ples we nogat man i stap long pait wantaim ol.

18 Nau nambawan tru het kepten bilong olgeta het kepten na nambawan tru komanda long olgeta ami long ol lain bilong Nifai i bin makim, na nem bilong em i Gidgidonai.

19 Nau em i kastam long olgeta lain bilong Nifai long makim het kepten bilong ol, (tasol sapos long taim long pasin nogut bilong ol, ol i no bin makim) man em i gat spirit bilong revelesen na profesi, olsem na, dispela Gidgidonai i wanpela nambawan profet namel long ol, wankain olsem het jas.

20 Nau ol pipol ol i bin tokim Gidgidonai: Beten long Bikpela, na yumi go antap long ol maunten na ples we nogat man i stap, olsem mipela bai kilim ol stil lain na bagarapim ol long graun bilong ol yet.

21 Tasol Gidgidonai i bin bekim ol: Bikpela i tambuim, dispela long wanem, Bikpela bai givim mipela long han bilong ol, sapos yumi go antap long pait wantaim ol, olsem na yumi bai redi yumi yet long namel tru long graun bilong yumi, na yumi bai bung wantaim olgeta ami bilong yumi, na yumi bai i no inap go long pait wantaim ol, tasol yumi bai weit i go inap long ol bai kam long pait wantaim yumi, olsem na, olsem Bikpela i stap, na em bai givim ol long han bilong yumi, sapos yumi wokim olsem.

22 Na em i kamap we klostu long arere long wanpela ten seven krismas, tok save bilong Lakoneus i bin go long olgeta hap long graun, na ol pipol bin kisim ol hos, hos ka, bulmakau, olgeta sipsip, animal ol i lukautim, rais nabaut, na olgeta samting bilong ol, na wokabaut long ol tausen na ol ten tausen, na olgeta i bin go long ples em i bin makim we ol bai bung wantaim ol yet, long pait long banisim ol yet long ol birua bilong ol.

23 Na graun em i bin makim em i graun bilong Jarahemla, na graun i stap namel long graun bilong Jarahemla na graun bilong Planti, ye, long arere long graun Planti na graun Bagarap.

24 Na planti tausen tru ol pipol em ol i bin kolim ol lain bilong Nifai, ol i bin bung wantaim ol yet long dispela graun. Nau Lakoneus i bin tokim ol long bung wantaim ol yet long graun long hap long saut, bikos long bikpela kes tru i bin kamap long graun long hap long not.

25 Na ol i bin banisim ol yet long birua bilong ol, na ol i stap long wanpela graun long wanpela bodi, na ol i bin poret long ol toktok Lakoneus i bin autim long ol, inap long ol i bin tanim bel long olgeta sin bilong ol, na ol i bin beten long Bikpela God bilong ol, olsem em bai seivim ol long taim birua bilong ol bai kam daun long pait wantaim ol.

26 Na ol i bin sore nogut tru bikos long ol birua bilong ol. Na Gidgidonai i bin tokim ol long wokim olgeta kainkain samting bilong pait, wantaim strongpela klospait, banis bilong pait na liklik raunpela banis bilong pait, olsem em i bin tok.