1 Ngan ine nahitabo han igyakan ni Jesus ine nga mga tugon ngadto kan Nephi, ngan hadton mga gintawag, (yana adton gintawag, ngan kumarawat hin gahum ngan katungod hin pagbunyag, in 12) ngan ungod, iya igin-unat an iya kamot ngadto han hugpo, ngan nagguliat ngadto ha ira, nga nagsisiring: Bulahan kamo kun kamo in manmati hadton mga tugon hine nga 12 nga akon ginpili tikang ha iyo nga mag-alagad ha iyo, ngan iyo magin mga taga alagad; ngan ngadto ha ira nga gintagan ko han gahum agud bunyagan kamo hin tubig; ngan kahuman kamo in bubunyagan ha tubig, kamatuoran, kamatuoran, bubunyagan ko kamo nga may kalayo ngan Espiritu Santo; sanglit bulahan kamo kun kamo in tumuod ha akon ngan mabunyagan, kahuman niyo ako makita ngan hibaro kamo nga hi Ako.

2 Ngan liwat, labaw hin kabulahan adton natuod hadton iyo mga tugon tungod kay kamo in nagpamatuod nga iyo ako nakita, ngan maaram kamo nga hi Ako. Oo, ngan bulahan adton natuod han iyo mga tugon, ngan lumusad hin duro nga pagpaubos ngan magpabunyag, kay hira in bibisitahon nga may kalayo ngan Espiritu Santo, ngan makakarawat han kapasayloan han ira mga sala.

3 Oo, ngan bulahan an mga kablas ha espiritu nga nadaop ha akon, kay ira an ginhadian han langit.

4 Ngan liwat, bulahan an ngatanan nga nabibido, kay hira in paglili-awon.

5 Bulahan adton mapainobsanon, kay ira panunundon a tuna.

6 Ngan bulahan adton nagugutom ngan nauuhaw ha katadungan, kay hira in mapupuno han Espiritu Santo.

7 Bulahan adton maloloy-on, kay hira in makakakarawat hin kaluoy.

8 Bulahan adton putli an kaburut-on, kay ira makikita an Diyos.

9 Ngan bulahan adton ngatanan nga nagbubuhat hin kamurayaw, kay hira in ngangaranan nga mga anak han Diyos.

10 Ngan bulahan adton gintitimaraot tungod han akon ngaran, kay ira an ginhadian han langit.

11 Ngan bulahan kamo kun kamo in pagdurugasan han tawo ngan pagtimaraoton, ngan kun pagyayaknan ha ngatanan nga maraot hin buwa kontra ha iyo, tungod ha akon;

12 Kay kamo in magkakamayada hin dako nga kalipay ngan duro nga karisyohan, kay dako an iyo pahalipay ha langit; kay ha sugad ira gintimaraot adton mga propeta nga nanhiuna ha iyo.

13 Kamatuoran, kamatuoran, nasiring ako ha iyo, iginhahatag ko ha iyo nga magin asin ha tuna; kundi kun an asin in mawarayan rasa hain daw la mapapag-ad an tuna? An asin kun masugad in mawawaray kapulsanan, kundi agud ilabog ha gawas nga agud tamakan ha tiil han tawo.

14 Kamatuoran, kamatuoran, nga nasiring ako ha iyo, iginhatag ko kamo nga magin lamrag hine nga katawhan. An usa nga siyudad nga nahabubutang ha usa nga tayod in dire matatago.

15 Kamatuoran, an tawo ba nagdadagkot hin kandila ngan ibubutang ha banga? Dire, kundi ha usa nga kandiliro, nga ine in maghatag hin kalamrag han ngatanan nga aada ha balay;

16 Sanglit himoa nga an iyo lamrag nga sumiga ha atubangan hine nga mga tawo, nga makita nira an iyo mag-upay nga mga binuhatan ngan paghimayaon an iyo Amay nga aadto ha langit.

17 Ayaw niyo paghuna-hunaa nga ako in nasinganhi agud gubaon an balaod o an mga propeta. Ako in waray masinganhi agud pagguba kundi agud magtuman;

18 Kay kamatuoran nga nasiring ako ha iyo, usa nga tulbok o usa ka bagis in dire mawawara ha balaod, kundi ha akon ine in ngatanan natuman.

19 Ngan kamatuoran, iginhatag ko ha iyo an balaod ngan an mga kasugoanan han akon Amay, agud kamo in tumuod ha akon, ngan agud kamo in magbasul han iyo mga sala, ngan dumaop ha akon nga may mabiduon nga kaburut-on ngan mabinasulon nga espiritu. Kamatuoran, aada ha iyo an mga kasugoanan, ngan an balaod in natuman na.

20 Sanglit daop kamo ha akon agud kamo in matalwas; kay kamatuoran nga nasiring ako ha iyo, nga labot la kun iyo sundon an akon mga kasugoanan, nga akon iginsugo ha iyo yana nga takna, bisan san-o dire kamo makakasulod han ginhadian han langit.

21 Iyo nahibatian an iginsiring nira hadton mga kadaan, ngan ine liwat in iginsurat ha iyo atubangan, nga dire kamo magpatay, ngan hin-o man nga magpatay in maninilikado ha hukmanan han Diyos;

22 Kundi nasiring ako ha iyo, nga an hin-o man nga nasisina ha iya bugto in maninilikado han iya paghukom. Ngan hin-o man nga magsiring ngadto ha iya bugto, Raka, an maninilikado han konseho; ngan hin-o man nga magsisiring, nga lurong ka, in may kadilikadohan han kalayo ha empiyerno.

23 Sanglit, kun ikaw in dumaop ha akon, o maghingyap nga dumaop ha akon, ngan mahinumduman mo nga an imo bugto in may bisan ano man kontra ha imo —

24 Pasingadto ha imo bugto, ngan makigbalik ka anay ha imo bugto, ngan kahuman dumaop ka ha akon nga may bug-os nga panuyo, kay ikaw in akon kakarawaton.

25 Makig-upay ka dayon ha imo kaaway samtang nga ikaw in kaupod ha dalan, bangin kun ha ano man nga takna kuhaon ka niya, ngan ginlabog ka ngadto ha prisohan.

26 Kamatuoran, kamatuoran, nasiring ako ha iyo, kamo in dire ha ano man nga paagi in dire makakaiwas didto tubtub nga dire pa niyo nababaydan an pinakagutiay nga senine. Ngan samtang nga kamo in aadto ha prisohan mababayaran ba niyo bisan an usa nga senine? Kamatuoran, kamatuoran, nga nasiring ako ha iyo, Dire.

27 Kamatuoran, ine in iginsurat nira hadton una nga panahon, dire ka manlibog;

28 Kundi nasiring ako ha iyo, nga hin-o man nga nasiplat ha usa nga babaye, nga aada an pagkaipa ha iya, in nakasala hin panlibog ha iya kaburut-on.

29 Pamati, iginhahatag ko ha iyo an usa nga kasugoanan, ngan dire niyo pabay-an ine nga mga nahuna-huna nga sumulod ha iyo kaburut-on;

30 Kay mauroupay nga pagdid-an niyo an iyo mga kalugaringon hine nga mga nahuna-huna, ha diin iyo papas-anon an iyo krus, kontra nga hi kamo in iglabog ngadto ha impiyerno.

31 Adto in iginsurat, nga hin-o man nga mabulag han iya asawa, kinahanglan nga tagan niya hin kasuratan han pagbulag han kasal.

32 Kamatuoran, kamatuoran, nga nasiring ako ha iyo, nga hin-o man nga mabulag ha iya asawa nga babaye, labot la ha kawsa han panlibog, in naghahatag hin pasangil agud manlibog; ngan hin-o man nga makig-asawa ha iya nga bulag hin asawa in makakasala hin panlibog.

33 Ngan liwat ine in nahisurat, ayaw igsumpa an imo kalugaringon, kun dire tutumanon mo ha Ginoo an imo mga sumpa;

34 Kundi kamatuoran, kamatuoran, nga nasiring ako ha iyo, ayaw kamo pagsumpa; ma ha langit, kay amo adto an trono han Diyos;

35 O pinaagi ha tuna, kay ito an tungtungan han iya mga tiil;

36 Bisan manumpa kamo ha iyo ulo, kay dire niyo akus an paghimo hin bisan usa nga buhok nga magin maitom o magin mabusag;

37 Kundi pasagdi nga an iyo pamulong in magin, Oo, tuod; Dire, dire; kay ano man nga masobra hine in maraot.

38 Ngan kamatuoran, ine an nahisurat, mata ha mata, ngan ngipon ha ngipon;

39 Kundi nasiring ako ha iyo, ayaw kamo pakig-away ha maraot, kundi an hin-o man nga magtampalo ha iyo too nga nawong, ilingi liwat an imo kaluyo;

40 Ngan kun hin-o man nga tawo an magsumbong ha iyo ha balaod ngan kuhaon an iyo panapton, pabay-i nga magin iya liwat an kurugpos;

41 Ngan hin-o man ha iyo nga nagpipirit nga lumakat ha usa ka milya, umupod ka ha iya ha ika duha ka beses.

42 Tagi hiya nga nag-aaro ha imo, ngan hiya nga naghuhuram ha iyo ayaw pagtalikdi.

43 Ngan kamatuoran ine in nahisurat liwat, nga higugmaon mo an imo igkasi tawo ngan dire kauritan mo an iyo mga kaaway;

44 Ngan tinuod nasiring ako ha iyo, higugmaon niyo an iyo mga kaaway, bendisyoni niyo hira nga nagsusumpa ha iyo, buhati hin maupay hira nga nauurit ha iyo, ngan ig-ampo mo hira nga may maraot nga panuyo ha paggamit ngan pagtimaraot ha iyo;

45 Agud kamo in magin anak han iyo Amay nga aadto ha langit; kay ginpasirang niya an adlaw ha magraot ngan ha mag-upay.

46 Sanglit adton mga pulong hadton una nga panahon, nga aada ha ilarum han balaod, ha akon in ngatanan matutuman.

47 Adton daan nga mga butang in naglabay na, ngan ngatanan nga butang in nabag-o.

48 Sanglit karuyag ko nga kamo in magin hingpit nga sugad ha Akon, o han akon Amay nga aadto ha langit nga hingpit.