1 Ngan ine nahitabo nga han igyakan ni Jesus ine nga mga tugon, hiya in nanmulong ngadto han iya nga mga disipolo, kada usa, ngan nagsiring ngadto ha ira: Ano an iyo gin-uungara ha akon, kahuman nga ako in pumakadto ha Amay?

2 Ngan hira ngatanan in nagyakan, labot la han tulo, nagsiring: Karuyag namon nga kahuman namon mabuhi tubtub ha edad han katawhan, an amon pagserbi nga diin kami in tinawag, in matatapos, agud kami in madali nga makakadto han imo ginhadian.

3 Ngan hiya in nagsiring ha ira: Bulahan kamo tungod kay ginhingyap niyo ine nga nahuna-huna ha akon; sanglit, katapos niyo umabot ngada ha 72 katuig nga pangidaron kamo in mapakadi ha akon ginhadian; ngan ha akon iyo hiaagian an pagpahuway.

4 Ngan kahuman niya magyakan ngadto ha ira, lumingi hiya ngadto ha tulo, ngan nagsiring ngadto ha ira: Ano an karuyag niyo nga akon bubuhaton ngadto ha iyo, kun ako in pumakadto na ha akon Amay?

5 Ngan hira in nabido ha ira mga kaburut-on, tungod kay dire nira naisisiring ngadto ha iya an nahuna-huna nga ira gin-uungara.

6 Ngan hiya in nagsiring ngadto ha ira: Kitaa, maaram ako hadton iyo ginhihinuna-huna, ngan iyo ginhingyap adton nahuna-huna nga diin hi Juan, an akon hinigugma, ngan akon kaupod han akon pagministro, san-o ako ig-alsa han mga Judiyo, in gin-ungara ha akon.

7 Sanglit, kamo in labis ka bulahan, tungod kay kamo in bisan san-o pa man in dire makakatilaw hin kamatayon; kundi, kamo in mabubuhi agud makita an ngatanan nga buruhaton han Amay ngadto han anak han katawhan, bisan ngada han katuman han ngatanan nga nahuna-huna subay ha kaburut-on han Amay, kun diin ako in maabot han akon himaya upod han mga gahum ha langit.

8 Ngan dire niyo bisan san-o pa man aabaton an kaul-ol han kamatayon; kundi ha akon pagabot ha akon kahimayaan kamo in magbabag-o ha usa la nga pagpirok han mata tikang ha pagigin may kamatayon ngadto ha pagigin waray kamatayon; ngan kahuman kamo in pagbebendisyonan ha ginhadian han akon Amay.

9 Ngan liwat, dire kamo maabat hin kaul-ol samtang nga aada kamo ha unod, bisan kabido labot la tungod han mga sala han kalibutan; ngan ine ngatanan in akon bubuhaton tungod han nahuna-huna nga iyo gin-ungara ha akon, mahitungod kay karuyag niyo nga bangin makapagdara hin mga kalag hin tawo ngadi ha akon, samtang nga an kalibutan in aada pa.

10 Ngan hine nga hinungdan kamo in magkakaada hin bug-os nga kalipay; ngan kamo in malingkod ha ginhadian han akon Amay; oo, ngan puno kamo hin kalipay, bisan sugad han Amay nga naghatag ha akon hin bug-os nga kalipay; ngan kamo in magigin sugad ha akon, ngan ako in sugad han Amay; ngan an Amay ngan hi ako in uusa la;

11 Ngan an Espiritu Santo in nagpapamatuod han Amay ngan ha Akon; ngan iginhatag han Amay an Espiritu Santo ngadto han anak han katawhan, tungod ha akon.

12 Ngan ine nahitabo nga kahuman igluwas ni Jesus ine nga mga tugon, pagkapot niya adton iya mga tudlo ha kada usa ha ira labot hadton tulo nga mahibibilin, ngan hiya in lumakat.

13 Ngan kitaa, naabre adton kalangitan, ngan hira in nagtipalangit, nga nakita ngan nakabati hadton mga kiritaon nga dire angay pagyaknon.

14 Ngan adto in igindire ha ira nga ira pagyaknon; ngan waray liwat tagi hin gahum agud ira pagyaknon an mga kiritaon nga ira nakita ngan nahibatian;

15 Ngan kun hira man in aada ha lawas o waray ha lawas, dire nira maisisiring ine; tungod kay ine in para la ha ira nga nagbag-o an hulagway, nga hira in nagbag-o tikang han lawas nga may unod ngadto hin kahimtang nga waray kamatayon, salit ira nahikikit-an an mga butang han Diyos.

16 Ngan ine nahitabo nga hira in nagpadayon hin pagministro ha bawbaw han tuna; kundi waray hira pagministro hadton mga bisyon nga ira hinkit-an ngan nahibatian, tungod han kasugoan nga iginhatag ha ira han langit.

17 Ngan yana, kun hira man in mortal o imortal, tikang han adlaw han ira pagbag-o han hulagway, dire ako maaram;

18 Kundi ine la an nahibaroan ko, subay hadton sinurat nga iginhatag na — ngan hira in naglalakaton ha bawbaw han tuna, ngan nagministro ngadto han ngatanan nga mga tawo, gin-urosa ngadto ha simbahan nga natuo han ira pagpasamwak; pagbunyag ha ira, ngan adton kadam-an nga nabunyagan in kumarawat han Espiritu Santo.

19 Ngan hira in iginlabog ngadto ha prisohan hadton dire mga kaapi han simbahan. Ngan an prisohan in waray makagpugong ha ira, kay adto in natunga.

20 Ngan hira in iginlabog ngadto ha tuna; kundi ira ginsirotan an tuna han mando han Diyos, ngan tungod han iya gahum hira in nahigawas tikang han kahiladman han tuna; ngan sanglit waray hira pakahimo hin pag-okab hin buho nga igo nga bubutangan ha ira.

21 Ngan nakatulo nga hira iginlabog ngadto ha hudno ngan waray hira u-ul-uli.

22 Ngan nakaduha nga iginlabog hira ngadto ha lungib han maisog nga mga hayop; ngan kitaa hira in nakipagmulay han mga hayop sugad han bata ngan han nati nga karnero, ngan waray u-ul-uli.

23 Ngan ine nahitabo nga hira in nagsingadto ha butnga han ngatanan nga mga tawo han Nephite, ngan iginpasamwak adton ebanghelyo ni Cristo ngadto han ngatanan nga mga tawo dida ha bawbaw han tuna; ngan hira nakonbertir ngadto ha Ginoo, ngan nakig-usa ngadto han simbahan ni Cristo, ngan nasugad nga an mga tawo hadton nga katulinan in nabendisyonan, subay han mga saad ni Jesus.

24 Ngan yana ako, Mormon, gintatapos ko an akon pamulong mahitungod hine nga mga nahuna-huna yana nga takna.

25 Kitaa, akon na unta igsusurat adton mga ngaran han dire makakatilaw han kamatayon, kundi igindire ha akon han Ginoo; tungod hine waray ko na adto igsurat, kay adto in igintago na ha kalibutan.

26 Kundi kitaa, nakita ko hira, ngan nagsipagserbi ngadto ha akon.

27 Ngan kitaa hira in makadto ha mga Gentil, ngan an mga Gentil in dire makilala ha ira.

28 Hira liwat in aadto ha mga Judiyo, kundi an mga Judiyo in dire makilala ha ira.

29 Ngan ine nahitabo, nga an Ginoo ha iya kinaadman in kaangayan nga hira in magministro ngadto han nagsasarang nga mga tribu ha Israel, ngan ngadto han ngatanan nga mga nasud, mga katulinan, mga pinulungan ngan katawhan, ngan magdadara tikang ha ira ngadto kan Jesus hin damo nga mga kalag, ngan adton ira hingyap in matuman, ngan liwat tungod han gahum han pagkumbensir han Diyos nga aada ha ira.

30 Ngan hira in sugad han mga anghel han Diyos, nga kun hira in nag-aampo ngadto han Amay ha ngaran ni Jesus in mahihimo nira ipakita an ira mga kalugaringon ha hin-o man nga tawo nga kaangayan nira pakitaan.

31 Sanglit, dako ngan urusahon nga mga buruhaton in ira paghihimoon, san-o an mahinungdanon ngan tiarabot nga urhi nga adlaw diin an ngatanan nga katawhan in sigurado nga matukdaw ha atubangan han hukmanan nga lingkuran ni Cristo;

32 Oo ngan bisan ha butnga han mga Gentil in dako ngan urusahon nga buruhaton in paghihimoon nira, san-o an urhi nga adlaw han paghukom.

33 Ngan kun mayada kamo han ngatanan nga mga baraan nga kasuratan nga naghahatag han pangasoy han ngatanan nga mga urusahon nga mga buruhaton ni Cristo, kamo in kinahanglan, subay han mga tugon ni Cristo, in mahibabaro nga ine nga mga hitabo in piho nga maabot.

34 Ngan kairo niya nga dire mamati han mga tugon ni Jesus, ngan adto liwat nga iya mga pinili ngan ginpadara ngadto ha butnga nira; ngan kun hin-o man an dire makarawat han mga tugon ni Jesus ngan han mga tugon hadton iya iginpadara in dire nakarawat ha iya; ngan sanglit dire niya hira kakarawaton ha urhi nga adlaw;

35 Ngan maupay pa unta kun waray hira ig-anak. Kay kasiring ba niyo nga makakaiwas kamo han hustisya han pagtalapas ha Diyos, nga gintamak-tamakan ha ilarum han rapadapa han mga tawo, agud umabot la an katalwasan?

36 Ngan yana kitaa, magyayakan ako mahitungod hadton mga ginpili han Ginoo, ngan liwat, bisan adton tulo nga nadara ngadto ha kalangitan, ngan dire ako maaram kun nahugasan hira tikang han pagigin mortal ngadto ha pagigin imortal —

37 Kundi kitaa, tikang han akon pagsurat, nagpakiana ako han Ginoo, ngan hiya in nagpasabot ha akon nga kaangayan nga may mabag-o dida han ira mga lawas, o kun dire ginkikinahanglan nga ira matilawan an kamatayon;

38 Sanglit, para nira dire matilawan an kamatayon an ira mga lawas in kaangayan nga may pagbag-o, nga dire hira mag-antos han ul-ul ngan kabidoon labot la tungod hadton mga sala han kalibutan.

39 Ngan yana ine nga pagbag-o in dire pareho hadton mahinanabo ha urhi nga adlaw; kundi mayada pagbag-o nga nahinabo han ira mga lawas, nga diin hi Satanas in mawawaray gahum kontra ha ira, ngan dire hiya makakapagsulay ha ira; ngan hira in nahimo nga baraan ha unod, ngan hira in mga baraan, ngan an mga gahum han kalibutan in dire makakagkapot ha ira.

40 Ngan ha hine nga kahimtang hira in nagpabilin ngada han urhi nga adlaw nga paghukom ni Cristo; ngan hadto nga urhi nga adlaw hira in makakakarawat hin darodako pa nga pagbag-o, ngan kakarawaton ngadto han ginhadian han Amay nga dire na magawas, kundi mag-uukoy kaupod an Diyos nga waray katapusan didto ha kalangitan.