1 Ngan yana ine nahitabo nga han igyakan ni Jesus ine nga mga nahuna-huna ngan iya iginisplikar ngadto han kadam-an; ngan iya iginisplikar an ngatanan nga nahuna-huna, ha ira, magin dako man o gutiay.

2 Ngan hiya in nagsiring: Ine nga mga baraan nga kasuratan, nga waray dida ha iyo, in iginsugo han Amay nga kaangayan ko ihatag ha iyo; tungod kay ine in iya kinaadman nga ighatag ine hadton mga tiarabot nga mga katulinan.

3 Ngan iya iginisplikar adton ngatanan nga butang, bisan pa han tinikangan ngada han takna nga hiya in maabot ha kahimayaan — ngan liwat, bisan an ngatanan nga butang nga kaangayan matuman ha bawbaw han tuna, bisan ngada hadton mga elemento nga natutunaw dara ha sobra nga kapaso, ngan an kalibutan in mapuputos sugad hin linikid nga papel, ngan an kalangitan ngan an tuna in maaanaw;

4 Ngan bisan an mahinungdanon ngan katapusan nga urhi nga adlaw, diin an ngatanan nga katawhan, ngan ngatanan nga katulinan, ngan ngatanan nga nasud ngan mga pinulungan in matukdaw ha atubangan han Diyos, agud paghukman subay han ira mga binuhatan, kun maupay ba o maraot —

5 Kun hira in magin maupay, ngadto ha pagkabanhaw ha waray katapusan nga kinabuhi; ngan kun hira in magraot, ngadto ha pagkabanhaw ha karat-an; ha magtupad, an usa ha usa nga butang ngan an iba ha iba nga butang, subay ha kaluoy, ngan hustisya, nga kabaraan nga aada kan Cristo, nga amo hiya san-o pa magtikang an kalibutan.

6 Ngan yana dire ngani mahisusurat hine nga libro bisan an ikausa ka gatos nga kaparte hadton mga nahuna-huna nga igintutdo ni Jesus ngadto han mga tawo;

7 Kundi kitaa an mga lamina ni Nephi in aadto an damo nga parte han mga nahuna-huna nga igintutdo niya ngadto han mga tawo.

8 Ngan ine nga mga nahunahuna in akon iginsurat, nga guru-gutiay hadton mga nahunahuna nga iya igintutdo han mga tawo; ngan akon iginsurat adto ha panuyo nga ine in madara liwat ngadto han mga tawo, tikang ha mga Gentil, subay han mga saad nga iginyakan ni Jesus.

9 Ngan kun ira na ine makarawat, nga kaangayan nga hira anay, in magkaada agud probaran an ira pagtuo, ngan kun masugad nga hira in tumuod hine nga mga nahuna-huna adton darodako pa nga mga nahunahuna in ighahatag ngadto ha ira.

10 Ngan kun masugad nga hira in dire tumuod hine nga mga nahuna-huna, adton darodako nga mga nahuna-huna in igtatago tikang ha ira, ngadto ha karat-an.

11 Kitaa, akon na unta igsusurat adto, an ngatanan nga iginokit dida ha lamina ni Nephi, kundi an Ginoo in nagdire ha akon, nagsiring: Akon proprobaran adton pagtuo han akon mga tawo.

12 Sanglit ako, hi Mormon, in nagsurat la hadton mga nahuna-huna nga iginsugo ha akon han Ginoo. Ngan yana ako, hi Mormon, in nagtatapos han akon mga pulong, ngan nagpadayon pagsurat hadton mga nahuna-huna nga iginsugo ha akon.

13 Sanglit, karuyag ko nga iyo pamatian nga tinuod gud nga gintutdoan han Ginoo an mga tawo, ha sakob hin tulo kaadlaw; ngan kahuman hadto iginpakita niya an iya kalugaringon hin masukot ngadto ha ira, ngan masukot nga hiya in nagpipinitpinit han tinapay, ngan ginbibendisyonan ito, nga iginhahatag ngadto ha ira.

14 Ngan ine nahitabo nga hiya in nagtutdo ngan nagserbi ngadto han mga anak han mga kadam-an nga nahidabihan, ngan iya ginbuhian an ira mga dila, ngan hira in nakagyakan ngadto han ira mga amay hin mahinungdanon ngan urusahon nga mga nahuna-huna, bisan darodako pa hadton iginpadayag ngadto han mga tawo; ngan iya ginbuhian an ira mga dila nga hira in nakakapagyakan.

15 Ngan ine nahitabo nga kahuman niya sumaka ngadto ha langit — ha ikaduha nga higayon nga nagpakita hiya ha ira, hiya in nagsingadto ha Amay kahuman magbulong hadton ngatanan nga mga magsakit, adton mga piay, ngan abrehan an mga mata han mga buta ngan kuhaon adton sarop han talinga han mga bungol, ngan buhaton adton ngatanan nga pagpaupay ha ira, buhion an patay nga tigurang nga lalaki tikang ha kamatayon, nga nagpakita han iya gahum ha ira, ngan sumaka ngadto ha Amay —

16 Kitaa, ine nahitabo nga kinabuwasan an kadam-an in nagkatitirok hin urusa, ngan ira nakita ngan nahibatian an mga bata; sugad man, bisan adton mga minasus-an in ginbuka an ira mga baba ngan nagyakan hin mga nahuna-huna nga mga urusahon; ngan an mga nahuna-huna nga ira ginluwas in igindire niya han mga tigurang nga lalaki nga igsurat adto.

17 Ngan ine nahitabo nga adton mga disipolo nga ginpili ni Jesus in nagtikang hadto nga takna hin pagbunyag ngan magtutdo hadton damo nga nadaop ha ira; ngan kadam-an hadton mga nabunyagan ha ngaran ni Jesus in napuno hin Espiritu Santo.

18 Ngan damo ha ira in nakakita ngan nakabati hin dire igyayakan nga mga kiritaon, ngan dire liwat subay ha balaod nga igsurat.

19 Ngan hira in nagtutdo, ngan nagserbi ha tagsa-tagsa; ngan mayada nira ngatanan nga butang nga gintatag-iya, kada tawo in nahatag subay ha igo ngadto han usa.

20 Ngan yana ine nahitabo nga ira ginbuhat adton ngatanan nga hitabo nga iginsugo ni Jesus ha ira.

21 Ngan adton mga nabunyagan ha ngaran ni Jesus in gintawag nga simbahan ni Cristo.