1 Kamatuoran, yana ine nahitabo nga han igyakan ni Jesus ine nga mga tugon, sumiplat liwat hiya ha palibot han kadam-an, ngan hiya in nagyakan ha ira: Pamati, an akon oras in harani na.

2 Nahisabotan ko nga kamo in maluya, ngan waray niyo mahisabti adton ngatanan nga akon mga tugon nga iginsugo ha akon han akon Amay nga igyakan ha iyo.

3 Sanglit, pangoli kamo ngadto ha iyo mga panimalay, ngan panhuna-hunaa niyo adton mga nahuna-huna nga akon iginyakan, ngan pangaro ha Amay, pinaagi ha akon ngaran, nga iyo adto mahisabotan, ngan ig-andam adton iyo mga huna-huna buwas, ngan ako in mapasinganhi ngahaw ha iyo.

4 Kundi yana ako in mapakadto ha Amay, ngan agud ipakita liwat an akon kalugaringon ha mga nawawara nga mga tulin ni Israel, kay hira in dire nawawara ngadto ha Amay, kay maaram hiya kun hain niya hira gindara.

5 Yana ine nahitabo nga han pakagyakan hin sugad hine ni Jesus, iya iginsiplat adton iya mga mata ngadto han kadam-am, ngan nakikita niya nga hira in luhaan, ngan nakatutok ha iya an ira mga mata nga baga hin naghahangyo nga hiya in magiroiha pa hin gutiay ha ira.

6 Ngan hiya in nagyakan ha ira: Kamatuoran, an akon kaburut-on in napupuno hin kaluoy ha iyo.

7 Mayada ba magsakit dinhe ha iyo? Dad-a niyo nganhi. Mayada ba mga kimay, o buta, o piay, o baldado, o maysakit nga sangla, o mga nakuros, o mga bungol, o nagsasakit ha bisan ano nga hinungdan? Dad-a hira nganhi ngan akon hira pagtatambalon, kay ako in naloluoy ha iyo; ngan an akon kaburut-on in puno hin kaluoy.

8 Kay nahisabotan ko nga karuyag niyo nga naangay nga ipakita ko ha iyo an akon ginbuhat ha iyo mga kabugtoan ha Jerusalem, kay nakikita ko an iyo pagtuo in igo agud kamo in akon pagtambalon.

9 Ngan ine nahitabo nga han hiya in nakagyakan hin sugad hine, an ngatanan nga mga hugpo, ha pagkaurosa, in dumaop kaupod adton maysakit ngan an mga nagkukuri, ngan an mga kimay, ngan an ira mga buta, ngan an ira mga ngola, ngan an ngatanan nga sinasakitan ha bisan ano nga hinungdan; nga hira in iya gintambal kada usa nga gindadara ngadto ha iya.

10 Ngan ngatanan hira, nga ginpaupay ngan han waray sakit, in linmuhod ha iya tiilan, ngan hira in nag-ampo ha iya; ngan kadam-an in tikang ha ira nga hugpo in humarok ha iya mga tiil, nga nasugad nga nakarigosan an iya mga tiil han ira mga luha.

11 Ngan ine nahitabo nga iya ginsugo nga an ira mga gudtiay pa nga mga anak in naangay nga pagdad-on ha iya atubangan.

12 Salit ira gindara adton ira mga gudtiay pa nga mga anak ngan iginbutang ha tuna palibot ha iya; ngan hi Jesus in tumukdaw ha ira kabutngaan; ngan an kadam-an in naghatag hin dalan ngada nga an ngatanan in nadara ngada ha iya.

13 Ngan ine nahitabo nga han kadara han ngatanan, hi Jesus in tumukdaw ha kabutngaan, iya ginsugo an kadam-an nga angay na hira lumuhod ha tuna.

14 Ngan ine nahitabo nga han naluhod na hira dida ha tuna, hi Jesus in nagmasamdong ha iya kalugaringon, nga nagsisiring: Amay ko, ako in nababaraka tungod han mga sala han mga tawo han sulod balay ni Israel.

15 Ngan han igluwas niya ine nga mga tugon, hiya liwat in lumuhod ha tuna; ngan dagmit hiya in nag-ampo ngadto ha Amay, ngan adton mga nahuna-huna nga iya igin-ampo in dire mahisusurat, ngan an kadam-an in nagpamatuod nga nakabati hira tikang ha iya.

16 Ngan ha hine nga paagi hira in nagpamatuod: An mata in waray pa makakita, bisan an talinga in waray pa makabati, hadto, an sugad hin kadarayawon ngan urusahon nga mga nahuna-huna nga amon nakita ngan nabati nga hi Jesus in nakipagkayakan ngadto ha Amay;

17 Ngan waray dila nga poydi magluwas, ngan bisan hin-o nga tawo, nga bisan an abilidad han tawo in dire masabot hadton dako ngan mga urusahon nga mga nahuna-huna nga amon nahikit-an ngan nahibatian nga ginluwas ni Jesus; waray makakasabot han kalipay nga nakapuno han amon mga kalag hadto nga takna han makabati kami han iya pag-ampo tungod ha amon ngadto ha Amay.

18 Ngan ine nahitabo nga kahuman ni Jesus ha iya pag-ampo ngadto ha Amay, hiya in bumuhat; kundi duro in kadako han kalipay han kadam-an kay hira in napaluhod.

19 Ngan ine nahitabo nga hi Jesus in nagyakan ngadto ha ira, ngan ginsugo nga hira in tumukdaw.

20 Ngan hira in tumukdaw tikang ha tuna, ngan nagyakan hiya ha ira: Bulahan kamo tungod han iyo pagtuo. Ngan yana kamatuoran, an akon kalipay in bug-os.

21 Ngan han iya igyakan ine nga mga tugon, hiya in nagtangis, ngan an mga hugpo in nagpamatuod hine, ngan ginkuha niya an ira gudtiay nga mga anak, kada usa, ngan ginbendisyonan adto, ngan nag-ampo ngadto ha Amay para ha ira.

22 Ngan katima hine hiya in nagtangis hin otro;

23 Ngan hiya in nagyakan ngadto ha kadam-an, ngan nagsiring: Huna-hunaa an iyo mga gudtiay nga mga bata.

24 Ngan samtang nga hira in nagkikita, agud tan-awon ira iginsiplat an ira mga mata ha langit, ngan nakita nira nga naabri an langit, ngan ira nakita adton mga anghel nga linmusad ha langit nga baga ine hin aada ha butnga han kalayo; ngan hira in linmusad ngan ginpalibotan adton mga gudtiay nga mga bata, nga hira in napalibotan hin kalayo; ngan an mga anghel in nagserbi ha ira.

25 Ngan an kadam-an in nakakita ngan nakabati ngan nagpamatuod; ngan maaram hira nga an sinurat in tinuod kay an ngatanan ha ira in nakakita ngan nakabati, kada tawo ha iya kalugaringon; ngan hira in may kadamoon hin 2,500 nga mga kalag; nga nauupod hin mga tigurang nga lalaki, ngan mga babaye, ngan mga kabataan.