1 Ngan ine nahitabo nga iya ginsugo hira nga igsurat adton mga tugon nga iginhatag han Amay ngadto kan Malakias, nga iya igsisiring ha ira. Ngan nahitabo nga kahuman ine igsurat iya ine igin-isplikar ha ira. Ngan amo ine an mga tugon nga iya iginsumat ha ira, nga nasiring: Amo ine an siring han Amay ngadto kan Malakias — Kitaa, igpapadara Ko an akon sinugo, ngan hiya in mag-aandam han dalan ha akon atubangan, ngan an Ginoo nga iyo ginpipinamiling in maabot hin tigda ngada han iya templo, bisan an sinugo han kaoyunan, nga iyo ikinalilipay; kitaa, hiya in makanhi, siring han Ginoo han mga Kasundaluhan.

2 Kundi hin-o an masunod han panahon han iya pag-abot, ngan hin-o an matukdaw kun hiya in magpakita? Kay hiya in sugad hin kalayo han hamili, ngan sugad han sabon han parapamunak.

3 Ngan hiya in malingkod sugad hin hamili ngan pagpuputlion nga salapi; ngan iya puputlion an mga anak nga lalaki ni Levi, ngan paglilimpiyohan sugad han bulawan ngan salapi, ngan hira in maghahalad ngadto ha Ginoo han halad ha pagkamatadong.

4 Ngan adto nga mga halad ni Juda ngan Jerusalem in matahom ngadto ha Ginoo, sugad hadto yana han kadaan, ngan han nakalabay nga mga katuigan.

5 Ngan ako in mahirani ha iyo ha paghukom; ngan ako in madagmit nga testigos kontra hadton mga barangan, ngan kontra hadton parapanlibog, ngan hadton paragsumpa hin buwa, ngan hadton magtalumpigos han suhol han magtratrabaho, hadton mga balo ngan mga ilo, ngan hadton iginbabale waray an estranghero, ngan hadton dire nahadlok ha akon, siring han Ginoo ha mga Kasundaluhan.

6 Tungod kay ako an Ginoo, nga dire nagbabag-o; sanglit kamo nga anak nga mga ni Jakob in dire mapupuo.

7 Bisan tikang hadton mga oras nga an iyo mga Amay in humirayo tikang han akon mga ordinansa, ngan waray pagsunod hadto. Balik ngadi ha akon ngan mabalik liwat ako ngadto ha iyo, siring han Ginoo han mga Kasundaluhan. Kundi kamo in masiring: Hain an amon igbabalik?

8 Matitikasan ba han tawo an Diyos? Kundi ako in iyo gintikasan. Kundi masiring kamo: Ha diin ikaw amon gintikasan? Ha ikapulo nga bahin ngan han mga halad.

9 Kamo in nahigabaan hin usa nga gaba, kay iyo ako gintikasan, bisan ine nga bug-os nga nasud.

10 Dad-on niyo ngatanan adton mga ikapulo nga bahin ngadto ha bodega, agud mamayada karaonon dida ha akon balay; ngan probare ako yana dayon hine, siring han Ginoo han mga Kasundaluhan, kun dire ko abrehan ngada ha iyo an mga bintana han langit, ngan igbuhos ko ngada ha iyo an bendisyon nga diin waray naigo nga sulod ha pagkarawat hito.

11 Ngan akon pagsasawayon tungod ha iyo adton mga kumaraon, ngan hiya in dire mangguguba han mga bunga han iyo tuna; ngan bisan an iyo ubasan in dire magkakapurak an mga bunga kun dire pa angay ha kapatagan, siring han Ginoo han mga Kasundaluhan.

12 Ngan an ngatanan nga nasud in matawag ha iyo nga bulahan, tungod kay kamo in magigin makalilipay nga tuna, siring han Ginoo han mga Kasundaluhan.

13 An iyo mga tugon in nagin madig-on kontra ha akon, siring han Ginoo. Kundi kamo in masiring: Ano an amon ginyakan kontra ha imo?

14 Kamo in nagsiring: Waray pulos an pagserbi ha Diyos, ngan ano an kapulsanan han aton pagtuman han iya mga ordinansa kun kita in naglalakat nga mabidoon ha atubangan han Ginoo han mga Kasundaluhan?

15 Ngan yana tatawagon naton adton palabi-labihon nga malipayon; Oo, ngan hira nga nagbubuhat hin karat-an in naghingaupay; Oo, ngan hira nga nagaayat han Diyos in natalwas pa.

16 Ngan adton mga nahadlok ha Ginoo in sukot nga nagkakarukayakan ha kada usa, ngan an Ginoo in nanmati ngan nakabati; ngan an libro han pagpahinumdum in iginsurat ha atubangan niya para hadton mga nahadlok han Ginoo, ngan nakakahinumdum hadton iya ngaran.

17 Ngan hira in magigin akon, siring han Ginoo han mga Kasundaluhan, hadto nga urhi nga adlaw nga akon hihimoon an akon mga alahas; ngan akon hira igsasalin sugad han tigurang nga lalaki nga nagsasalin hadton iya anak nga nagserbi ha iya.

18 Ngan kahuman kamo in mabalik ngan mahihibaro hadton magtadong ngan magraot, ngan hadton nagseserbi han Diyos ngan han dire.