1 Ngan ine nahitabo nga ginsugo niya an kadam-an nga omukoy hin pag-ampo, sugad man an iya mga disipolo. Ngan ginsugo niya ha ira nga dire hira omukoy pag-ampo ha ira mga abilidad.

2 Ngan iya ginsugo hira nga bumuhat ngan tumukdaw ha ira mga tiil. Ngan hira in bumuhat ngan tumukdaw ha ira mga tiil.

3 Ngan ine nahitabo nga iya liwat ginpinit-pinit an tinapay ngan ginbendisyonan ine, ngan iginhatag ngadto ha mga disipolo para kumaon.

4 Ngan han hira in makakaon iya ginsugo hira nga angay nira pagpinit-piniton adton tinapay, ngan ighatag ngadto ha kadam-an.

5 Ngan han maihatag na ine ngadto han kadam-an iginhatag liwat niya ha ira an tubig agud imnon, ngan ginsugo hira nga ighatag ngadto han kadam-an.

6 Yana, waray gud tinapay, bisan ubig, nga gindara han mga disipolo o han kadam-an;

7 Kundi ungod nga iya iginhatag ha ira an tinapay agud kaonon, ngan sugad man adton tubig agud imnon.

8 Ngan hiya in nagsiring ha ira: Hiya nga makaon hine nga tinapay in nakaon han akon lawas ha iya kalag; ngan hiya nga nainom hine nga tubig in nainom han akon dugo ha iya kalag; ngan an iya kalag in dire magugutom o mauuhaw, kundi mabubusog.

9 Ngan yana, han an kadam-an in nakakaon ngan nakainom, dagmit, nga hira in na puno hin Espiritu; ngan hira in nanginyupo hin uusa la nga tingog, ngan naghatag hin himaya kan Jesus, nga diin ira nakita ngan nahibatian.

10 Ngan ine nahitabo nga han hira ngatanan in maghatag hin himaya kan Jesus, hiya in nagsiring ha ira: Kamatuoran yana nahuman ko na an mga kasugoanan nga ginsugo han Amay ha akon hiunong hine nga mga tawo, nga amo an salin han sulod balay ni Israel.

11 Nahinunumduman ba niyo, nga nagyakan ako ha iyo, ngan nagsiring nga adton mga panagna ni Isaias in matutuman — kamatuoran adto in iginsurat, kamo in mayada hadto, sanglit pamilnga niyo adto —

12 Ngan kamatuoran, kamatuoran, nasiring ako ha iyo, nga kun adto in matutuman adto in katumanan han mga kauyonan nga ginhimo han Amay ngada hine nga mga tawo, O sulod balay ni Israel.

13 Ngan adton mga nahisalin, nga nagsarang ha bawbaw han tuna, in titirokon tikang ha sinirangan ngan ha katundan, ngan tikang ha timogan ngan tikang ha amihanan; ngan hira in maabot ha hibaro han Ginoo nga ira Diyos, nga amo an nagtubos ha ira.

14 Ngan an Amay in nagsugo ha akon nga ighatag ko ha iyo ine nga katunaan, agud iyo panondon.

15 Ngan nasiring ako ha iyo, nga kun an mga Gentil in dire magbasul kahuman han mga bendisyon nga ira nakarawat, kahuman nira igpasarang adton akon mga tawo —

16 Ngan kun sugad kamo, nga nahisalin han tulin ni Jakob, in mapakadto ha ira; ngan kamo in mahingangadto han butnga nira nga kadam-an; ngan kamo in mahihiupod ha ira sugad hin usa nga leon ha butnga han mga hayop han kagurangan, ngan sugad hin batan-on nga leon ha butnga han mga karnero, nga diin, kun makasulod hiya in pagtatamakan ngan pagpinitpiniton, ngan waray makakatalwas.

17 Ngan an iyo kamot in ig-aalsa ha iyo mga kaaway, ngan an ngatanan nga iyo kakontra in mamamatay.

18 Ngan akon titirokon an akon mga tigurang nga mga lalaki sugad han usa nga tawo nga nagtitirok han upong ha salog.

19 Kay hihimoon ko an akon mga tawo nga kan kanay nakig-uyon han Amay, oo, hihimoon ko nga an iyo sungay nga puthaw, ngan an iyo mga kulo nga tumbaga. Ngan iyo pagkakastigohon an damo nga mga tawo; ngan iglalain adton ira mga kapulsanan ha Ginoo, ngan an ira mga katigayonan ngadto ha Ginoo ha bug-os nga kalibutan. Ngan kamatuoran, Ako adto nga nagbuhat hito.

20 Ngan ine nahitabo, nga siring han Amay, ngan an espada han akon hustisya in ibibitay ha bawbaw han ira ulohan hadto nga tiarabot nga adlaw; ngan labot kun hira in magbasul ine in mahuhulog ha ira, siring han Amay, ngan liwat, magin ha ngatanan nga mga nasud han mga Gentil.

21 Ngan ine mahitatabo nga akon ititindog an akon mga tawo, O sulod balay ni Israel.

22 Ngan kamatuoran, akon ititindog ine nga mga tawo hine nga katunaan, ha katumanan han akon kauyonan nga ginhimo han iyo Amay nga hi Jakob; nga ine in magigin Bag-o nga Jerusalem. Ngan an mga gahum han kalangitan in mahingangada ha butnga hine nga mga tawo; sugad man, bisan ngani ako in mahingangada ha butnga niyo.

23 Kamatuoran, Ako adton iginyakan ni Moises, nga nasiring: Usa nga propeta an iaandam han Ginoo nga Diyos ha iyo tikang han iyo mga kabugtoan, sugad ha akon; hiya an iyo pamamatian han ngatanan nga pulong kun ano man an igsisiring niya ha iyo. Ngan ine mahitatabo nga kada kalag nga dire manmati hadto nga propeta in igbubulag tikang ha mga hugpo han mga tawo.

24 Kamatuoran nga nasiring ako ha iyo, sugad man, ngan ngatanan nga mga propeta tikang kan Samuel ngan han mga sumunod, pagkahuman kun ano an kadamo an nagyakan, in nagpamatuod ha akon.

25 Ngan tinuod, kamo in mga anak han mga propeta; ngan kamo in tikang han sulod balay ni Israel; kamo in api han kauyonan nga ginhimo han Amay ha iyo kaapoy-apoyan, nga ginsisiring kan Abraham: Ngan ha imo tulin in an ngatanan nga mag ugropod ha tuna in pagbibendisyonan.

26 An Amay in igin-andam ako para ha iyo ha una, ngan ginsugo ako agud mabendisyonan ko ha pagtalikod pahirayo han kada usa ha iyo han iyo mga karatan; ngan ine in tungod kay kamo in mga anak han kauyonan —

27 Ngan kahuman nga kamo in mabendisyonan tutumanon han Amay an kauyonan nga ginhimo niya kan Abraham, nga nasiring: Ha imo tulin an ngatanan nga mag-ugropod ha kalibutan in mabibendisyonan — ngadto ha paghatag han Espiritu Santo pinaagi ha akon ngadto han mga Gentil, ngan diin adton bendisyon para han mga Gentil in makakahimo nga hira in magin makusog labaw ha ngatanan, ngadto ha pagpasarang han akon mga tawo, O sulod balay ni Israel.

28 Ngan hira in magigin panlapdos ha mga tawo hine nga katunaan. Bisan pa man, kun ira kakarawaton adton kabug-osan han akon ebanghelyo, ngan kun hira in magmatig-a han ira mga kasingkasing kontra ha akon igbabalik ko an ira mga karaotan ha ira mga kalugaringon nga mga ulo, siring han Amay.

29 Ngan akon hinunumduman adton mga kauyonan nga ginhimo ko ha akon mga tawo; ngan ako in nakig-uyon ha ira nga akon hira titirokon ha akon kalugaringon nga takna, ngan akon ighahatag ha ira hin otro adton katunaan han ira mga kaapoy-apoyan agud panondon, nga amo an tuna han Jerusalem, nga amo an iginsaad nga katunaan ha ira hin kadayonan, siring han Amay.

30 Ngan ine nahitabo nga maabot in takna, diin an kabug-osan han akon ebanghelyo in igpapasamwak ngadto ha ira;

31 Ngan hira in matuod ha akon, nga ako amo hi Jesucristo, an Anak han Diyos, ngan mag-aampo ha Amay pinaagi han akon ngaran.

32 Ngan sugad nga adton ira mga bantay in mag-aalsa han ira tingog, ngan ha usa nga tingog hira in magkakanta; kay hira in makita mata ha mata.

33 Ngan pagkahuman an Amay in urosa nga titirokon hira hin otro, ngan ighahatag ha ira an Jerusalem nga amo an katunaan nga ira panonondon.

34 Ngan hira in magkakalilipay — Magkanta hin urosa, kamo nga nakarag nga mga lugar han Jerusalem; kay an Amay in ginliaw an iya mga tawo, iya gintubos an Jerusalem.

35 Iginpakita han Amay an iya baraan nga butkon ha panan-aw han ngatanan nga nasud; ngan an ngatanan nga katubtuban han kalibutan in makikita an pagtalwas han Amay; Ngan an Amay ngan hi ako in uusa.

36 Ngan ha sugad mahihitabo adton nahisurat: Pagmata, pagmata ngahaw, ngan tiroka an iyo kusog, O Sion; igsul-ot an imo mahusay nga panapton, O Jerusalem, an baraan nga siyudad, kay tikang yana waray na mahirani ha iyo nga dire tore ngan malimpyo.

37 Paspasi an imo kalugaringon tikang ha tapo-tapo; tukdaw, lingkod, O Jerusalem; buhi-i an imo kalugaringon ha gapos han imo liog, O bariga nga anak nga babaye han Sion.

38 Kay sugad han siring han Ginoo: Iyo iginbaligya an iyo mga kalugaringon hin waray presyo, ngan kamo in tutubuson hin waray salapi.

39 Kamatuoran, kamatuoran, nga nasiring ako ha iyo, an ngaran ko in mahibabaroan han akon mga tawo; oo, ngan hadto nga tiarabot nga adlaw mahibabaroan nira nga Ako adto nga nagyayakan.

40 Ngan kahuman ira igsisiring: Ano an kahusay ha mga bukid an tiil hadton nagdadara han maupay nga mga sumat ha ira, ngan nagpapasamwak han kamurayaw; ngan nagdadara han maupay nga sumat ha ira nga mag-upay, ngan nagpapasamwak han katalwasan; nga nagsisiring ha Sion: An iyo Diyos in maghahadi!

41 Ha pagkahuman usa nga proklamasyon in mahibabatian: Lakat kamo, lakat kamo, kagawas kamo dida, ayaw kamo pagkamkam han butang nga mahugaw; gawas kamo ha butnga niya; magin malimpiyo kamo nga nagdadara han surodlan han Ginoo.

42 Kay dire kamo magawas nga nagdadali o malakat nga mapalagiw; kay an Ginoo in mag-uuna ha iyo, ngan an Diyos han Israel an magigin bantay niyo ha talikuran.

43 Kamatuoran, an akon suruguon in makikigsabot hin tiupay; ngan hiya in may hataas nga kahimtang ngan dadayawon ngan magigin duro hin ka labaw.

44 Kun ano hin kadamo han mahipapausa ha iyo — an iya pagkita in magraraot, labaw kontra han hin-o man nga tawo, ngan an iya hulagway in labaw han mga anak han tawo —

45 Salit hiya in magwiwirik ha damo nga mga nasud; an mga hadi in magtitik-om han ira mga baba ha iya, kay adton waray igsiring ha ira in ira makikita; ngan adton waray pa nira hibatii in ira paghuhuna-hunaon.

46 Kamatuoran, kamatuoran, nagsisiring ako ha iyo, ine ngatanan nga hitabo in sigurado maabot, bisan an iginsugo han Amay ha akon. Pagkahuman ine nga kauyonan nga ginhimo han Amay hine nga mga tawo in matutuman; ngan kahuman an Jerusalem amo an pagpupuy-an liwat han akon mga tawo, ngan ine in magigin katunaan nga ira panonondon.