1 Ngan yana ine nahitabo han mahuman ni Jesus igyakan ine nga mga pulong iya iginsiplat an iya mga mata ha palibot han mga kadam-an, ngan nagsiring ha ira: Kamatuoran, iyo nahibatian an mga nahuna-huna nga akon igintutdo san-o ako sumaka ha akon Amay; sanglit, an hin-o man nga makahinumdum han mga pulong nga akon iginluwas ngan ginbuhat adto, hiya in akon pabubuhaton ha urhi nga adlaw.

2 Ngan ine nahitabo nga han maisiring ni Jesus ine nga mga tugon nga iya nahisabotan nga may-ada iba ha ira dida nga nahipausa, ngan natingala kun ano an karuyag niya hiunong han balaod ni Moises; kay waray nira mahisabti an ginyakan nga an daan nga mga butang in lumabay na, ngan an ngatanan nga butang in nagin bag-o.

3 Ngan hiya in nagsiring ha ira: Ayaw kamo hipausa nga an ginyakan ko ha iyo nga an daan nga mga butang in nakalabay na, ngan an ngatanan nga butang in nabag-o.

4 Kundi, nasiring ako ha iyo nga an balaod nga iginhatag kan Moises in natuman na.

5 Kamatuoran, ako amo an naghatag han balaod, ngan ako an may kauyonan han akon mga tawo ha Israel; sanglit, an balaod in ha akon natuman, kay ako in napasinganhi agud tumanon an balaod; sanglit adto in nagkamay-ada hin katapusan na.

6 Kamatuoran, waray ko pagbungkaga an mga propeta, kay sugad nga an kadam-an in waray pa katuman ha akon, kamatuoran nga nasiring ako ha iyo, an ngatanan in matutuman.

7 Ngan kay nagsiring ako ha iyo nga an mga daan nga mga butang in nakalabay na, waray ko pagbungkaga adton mga iginyakan hiunong han mga butang nga tiarabot.

8 Kay kamatuoran, an kauyonan nga akon ginbuhat ha akon mga tawo in waray katumanan ngatanan; kundi an mga balaod nga iginhatag kan Moises in natapos ha akon.

9 Tinuod, ako an balaod, ngan an lamrag. Pagkita kamo ha akon, ngan mag-antos tubtub ha katapusan, ngan kamo in mabubuhi; kay hiya nga makakag-antos tubtub ha katapusan in ihahatag ko an kinabuhi nga waray katapusan.

10 Kamatuoran, iginhatag ko ha iyo an mga kasugoanan; sanglit sunda niyo an akon mga kasugoanan. Ngan asya ine an balaod ngan han mga propeta, kay ungod nga hira in nagpamatuod ha akon.

11 Ngan yana ine nahitabo nga han igyakan ni Jesus ine nga mga tugon, ginsiring niya adton 12 nga iya mga pinili:

12 Kamo an akon mga disipolo; ngan kamo an lamrag hine nga mga tawo, nga amo an nahisalin han sulod balay ni Jose.

13 Ngan kamatuoran, amo ine an tuna nga iyo sorondanon; ngan an Amay amo an naghatag hine ha iyo.

14 Ngan waray ha bisan ano nga takna an Amay naghatag hin kasugoanan nga igsumat ko ine ngadto han iyo kabugtoan nga aadto ha Jerusalem.

15 Ngan waray ha ano man nga panahon nga an Amay in naghatag ha akon hin kasugoanan nga akon igsumat ha ira mahitungod han iba nga mga tribu han sulod balay ni Israel, nga diin iginbulag han Amay tipagawas ha katunaan.

16 Ine la an iginsugo han Amay ha akon, nga angay ko igsumat ha ira:

17 Nga may-ada ako iba nga mga karnero nga waray dinhe hine nga panon; hira in angay ko liwat dad-on, ngan ira mahibabatian an akon tingog; ngan magkakamayada hin usa nga panon, ngan usa nga magbarantay.

18 Ngan yana, tungod han ira kamagtig-a ngan kawarayi hin pagtuo waray nira hisaboti an akon tugon; sanglit, ako in ginsugo han akon Amay nga dire na magyakan pa hiunong hine nga nahuna-huna ha ira.

19 Kundi, kamatuoran, nga nasiring ako ha iyo nga an Amay in nagsugo ha akon, ngan ginsisiring ko ine ha iyo, nga kamo in nahimulag ha hugpo nira tungod han ira karaotan; kay sanglit ito in tungod han ira karaotan nga waray nira hibaro-i an hiunong ha iyo.

20 Ngan kamatuoran, nga nasiring ako ha iyo ngahaw nga an iba nga mga tribu an iginbulag han Amay tikang ha ira; ngan ine in tungod han ira karaotan nga waray nira hibaroi an hiunong ha ira.

21 Ngan kamatuoran nga nasiring ako ha iyo, nga kamo adton iginyakan: Mayada ako iba nga mga karnero nga waray dinhe hine nga panon; hira in angay ko liwat dad-on, ngan ira mahibabatian an akon tingog; ngan magkakamayada hin usa nga panon, ngan usa nga magbarantay.

22 Ngan waray ako nira mahisaboti, kay kasiring nira nga adto amo an mga Gentil; kay waray nira mahisaboti nga an mga Gentil in angay makombertir pinaagi han pagpasamwak nira.

23 Ngan waray nira ako mahisaboti nga ako nagsiring nga hira makakabati han akon tingog; ngan waray nira ako mahisaboti nga an mga Gentil in dire makakabati han akon tingog bisan san-o — nga ako dire magpapakita han akon kalugaringon ngadto ha ira labot la pinaagi han Espiritu Santo.

24 Kundi pamati, iyo nabati an akon tingog, ngan nakita ako; nga kamo in akon mga karnero, nga kamo in igin-api didto hadto nga hugpo nga iginhatag han akon Amay ha akon.