1 Ngan ine nahitabo nga ginsugo ni Jesus an iya mga disipolo nga magdara hin tinapay ngan bino ngada ha iya.

2 Ngan samtang nga hira in nakadto pagkuha hin tinapay ngan bino, iya ginsugo adton kadam-an nga lumingkod hira dida ha tuna.

3 Ngan han pag-abot han mga disipolo nga may tinapay ngan bino, kinuha hiya hin tinapay ngan ginpinit-pinit ngan ginbendisyonan ine; ngan kahuman ine iya iginhatag ngadto han mga disipolo ngan ginsugo hira nga kumaon hadto.

4 Ngan kahuman nira kumaon ngan nabusog, hiya in nagsugo nga ighatag ngadto ha kadam-am.

5 Ngan han an kadam-an in makakaon ngan nabusog, hiya in nagsiring ngadto han mga disipolo: Pamati kinahanglan nga may-ada usa ha iyo nga maordinahan, ngan hiya in akon tatagan hin gahum nga magpinit-pinit ngan magbendisyon hito nga tinapay agud maihatag ito ha mga tawo han akon simbahan, ngan ngadto ha ngatanan nga mga natuod ngan mabubunyagan pinaagi ha akon ngaran.

6 Ngan ine in permi niyo bubuhaton, sugad han akon ginhimo, bisan han pagpinit-pinit han tinapay ngan pagbendisyon agud ighatag ko ha iyo.

7 Ngan ine in hihimoon niyo nga hinumduman han akon lawas, nga iginpakita ko ha iyo. Ngan ine in magigin testigos ha Amay nga permi niyo ako mahinunumduman. Ngan kun permi niyo ako mahinumduman an akon Espiritu in mahingangada ha iyo.

8 Ngan ine nahitabo nga han maluwas ni Jesus ine nga mga tugon, iya ginsugo an mga disipolo nga ira kuhaon an tasa han bino ngan uminom, ngan ira liwat angay pagtagan adton kadam-an agud hira liwat in makainom hine.

9 Ngan ine nahitabo nga ginbuhat adton sugad hine, nga hira in uminom ngan nabusog; ngan ginhatag ngadto han kadam-an, ngan hira liwat in uninom, ngan nabusog.

10 Ngan han katapos han mga disipolo hine, hi Jesus nagsiring ha ira: Bulahan kamo hine nga buruhaton nga iyo ginbuhat, kay amo ine an pagtuman han akon mga sugo, ngan ine in nagpapamatuod ngadto han Amay nga kamo in naabuyon nga buhaton adton akon mga iginsugo ha iyo.

11 Ngan ine in iyo permi bubuhaton ngadto hadton nagbasul ngan nabunyagan han akon ngaran; ngan iyo ine bubuhaton ha paghinumdum hadton akon dugo, nga Akon ginpaagos hiunong ha iyo, ngan kamo in magpamatuod ha Amay nga iyo ako permi mahinunumduman. Ngan kun iyo ako permi panunumdumon an akon Espiritu in mahingangada ha iyo.

12 Ngan naghahatag ako ha iyo hin kasugoanan nga iyo bubuhaton ine nga mga buruhaton. Ngan kun iyo ine permi bubuhaton nga mga buruhaton, bulahan kamo, kay kamo in igintukod pinaagi han akon bato.

13 Kundi kun hin-o man ha iyo nga magbubuhat hin sobra o kulang kontra hine in dire igintukod pinaagi han akon bato, kundi igintukod pinaagi han pundasyon nga baras; ngan kun pumusdak an uran, ngan umabot an baha, ngan humuyop an hangin, ngan umpagan hira, ine in matutumba, ngan an purtahan han empiyerno in andam pagkarawat ha ira.

14 Sanglit bulahan kamo kun iyo pagsusundon an akon mga kasugoanan, nga iginsugo han Amay ha akon nga akon ighatag ha iyo.

15 Kamatuoran, kamatuoran, nasiring ako ha iyo, nga angay kamo magbantay ngan permi magampo, kay bangin kamo masulay han yawa, ngan kamo in madara nga bihag niya.

16 Ngan ha sugad han akon pag-ampo ha mga hugpo niyo magin sugad nga kamo in mag-ampo ha akon simbahan, ha butnga han akon mga tawo nga nagbasul ngan nagpabunyag han akon ngaran. Kamatuoran ako an lamrag; iginhatag ko an usa nga sosbaranan para ha iyo.

17 Ngan ine nahitabo nga han igyakan ni Jesus ine nga mga tugon hadton iya mga disipolo, umatubang liwat hiya han kadam-an ngan sumiring:

18 Pamati, kamatuoran, kamatuoran, nga nasiring ako ha iyo, nga kinahanglan kamo nga magbantay ngan permi mag-ampo kay bangin kamo in sumulod ha pagsulay; kay karuyag ni Satanas nga kamo in magin iya, agud matahop niya kamo sugad hin trigo.

19 Sanglit angay kamo nga permi mag-aampo ha Amay ha akon ngaran;

20 Ngan ano man nga aro-on niyo ha Amay pinaagi ha akon ngaran, kun ito in tama, ngan natuod nga iyo kakarawaton, kamatuoran ine in ighahatag ha iyo.

21 Pag-ampo ha iyo mga pamilya ngadto ha Amay, nga permi ha akon ngaran, nga mabendisyonan an iyo mga asawa ngan mga anak.

22 Ngan kamatuoran, kamo in magkatitirok hin sukot; ngan ayaw niyo pagdid-i an hin-o man nga tawo nga umupod ha iyo kun kamo in nagkakaurosa hin pagkatitirok, kun dire pabay-i niyo nga hira in kumada ha iyo ngan ayaw niyo pagdid-i;

23 Kundi kun kamo in mag-aampo para ha ira, ayaw hira paiwasa hin tipagawas; ngan kun mahinabo nga hira in maupod ha iyo hin masukot ig-ampo niyo hira ha Amay, pinaagi ha akon ngaran.

24 Sanglit, alsaha adton iyo mga suga agud ine in makalamrag ha kalibutan. Kitaa Ako an lamrag nga iyo aalsahon — adton iyo nakita nga akon ginbuhat. Tan-awa nakita niyo nga nagampo ako ha Amay, ngan ngatanan kamo in nakakita.

25 Ngan nakita niyo nga ginsugo ko nga waray usa man nga maiwas, kun dire ginsusugo ko nga kamo in angay dumaop ha akon, nga iyo maabat ngan makita; sugad man iyo bubuhaton ha kalibutan; ngan hin-o man nga tumalapas hine nga kasugoanan in ginpapabay-an an iya kalugaringon nga madara ha pagsulay.

26 Ngan yana ine nahitabo nga han igluwas ni Jesus ine nga mga tugon, sumiplat liwat hiya han iya mga disipolo ngan iya ginpili, nga sumiring ha ira:

27 Pamati kamatuoran, kamatuoran, nagsiring ako ha iyo, gintatagan ko kamo hin usa pa nga kasugoanan, ngan kahuman ako in kinahanglan nga pumakadto ha akon Amay agud akon matuman an iba nga mga kasugoanan nga iya iginhatag ha akon.

28 Ngan yana pamati, amo ine an kasugoanan nga ighahatag ko ha iyo, nga dire niyo tugotan nga hin-o man nga kumaon han akon unod ngan dugo nga dire kaangayan, kun iyo igdudurot ine;

29 Kay hin-o man nga kumaon ngan uminom han akon unod ngan dugo nga dire angay in makaon ngan mainom ha karat-an han iya kalag; sanglit kun maaram kamo nga hin-o man nga tawo an makaon ngan mainom han akon unod ngan dugo nga dire angay iyo hiya pagdid-an.

30 Kun sugad man, ayaw niyo hiya paiwasa tipagawas ha iyo hugpo, kundi iyo hiya pagserbihan ngan ig-ampo hiya ngadto ha Amay, pinaagi han akon ngaran; ngan kun masugad nga hiya in magbasul ngan mabunyagan ha akon ngaran, iyo hiya kakarawaton, ngan igdudurot ha iya adton akon unod ngan dugo.

31 Kun dire hiya magbabasul dire hiya mahiuupod hadton akon mga tawo, nga dire niya mabungkag adton akon mga tawo, kay kitaa maaram ako han akon mga karnero, ngan ine in akon inihap.

32 Masugad man, ayaw niyo hiya pagpaiwasa tipagawas han iyo mga sinagoga, o ha iyo mga lugar han pag-ampo, kay ha ira in padayon kamo nga magseserbi; kay dire kamo maaram kun hira in mabalik ngan magbabasul, ngan madaop ha akon nga may bug-os nga panuyo, nga paguupayon ko hira; ngan kamo in magigin dalan han pagdara han katalwasan ngadto ha ira.

33 Sanglit, pagtipigi ine nga mga pulong nga iginsugo ko ha iyo agud kamo in dire mailarum ha paghukom hin sirot; kay kairo niya nga paghuhukman hin sirot han Amay.

34 Ngan iginhahatag ko ha iyo ine nga mga kasugoanan tungod han paglalantugi ha butnga niyo. Ngan bulahan kamo kun waray paglalantugi ha butnga niyo.

35 Ngan yana ako in mapakadto ha Amay, tungod kay ine in kinahanglan nga ako in pumakadto ha Amay mahitungod ha iyo.

36 Ngan ine nahitabo nga kahuman ni Jesus magyakan hine nga mga pulong, iya ginbutang adton iya kamot ha ulo hadton mga disipolo nga iya ginpili, kada usa, bisan ngada han kaubos, nga hiya in nagyayakan ha ira samtang nga gintulpok hira.

37 Ngan an kadam-an in waray makabati hadton mga tugon nga iya ginyakan, sanglit waray ine igsurat; kundi adton mga disipolo in nagpamatuod nga hiya in naghatag ha ira hin gahum paghatag han Espiritu Santo. Ngan akon igpapakita ha iyo kahuman hine nga ine nga mga sinurat in matuod.

38 Ngan ine nahitabo nga han kahuman ni Jesus gintulpok hira ngatanan, may umabot nga dampog nga nagpasirum hadton kadam-am sugad nga waray na nira mahikit-i hi Jesus.

39 Ngan samtang nga hira nasisidman hiya in lumakat tikang ha ira, ngan sumaka ngadto ha langit. Ngan an mga disipolo in nakakita ngan nagpamatuod nga hiya in sumaka na liwat ngadto ha langit.