1 Ngan pagkahuman adton mga iginsurat in mahinanabo: Pagkanta, O baog, ikaw nga waray pagaanak; tikangi an pagkanta, panginyupo hin makusog, ikaw nga waray umabat panganak; kay darodamo an mga anak han binayaan kontra hadton mga anak han babaye nga may asawa, siring han Ginoo.

2 Padakoa an lugar han imo tolda, ngan ipaunat ha ira an mga biray han imo puroy-anan; ayaw paghipos, pahalabaa an imo higot ngan pakusga an imo mga stake;

3 Kay ikaw in magtitikang ha too nga kamot ngan ha wala, ngan an imo tulin in manununod han mga Gentil ngan hihimoon an binayaan nga mga siyudad nga maokyan.

4 Ayaw kahadlok, kay dire ka maawod; kay dire ka malilipong, ikaw in dire pakakaalohan; kay imo hingangalimtan an pagkaalo han imo pagkabatan-on, ngan dire mo hinunumduman an pagsusun han imo kabatan-on, ngan dire mo hinunumduman an kaalohan han imo pagkabalo.

5 Kay an imo maghirimo, an imo asawa, an Ginoo han mga Kasundaluhan in amo an iya ngaran; ngan an iyo Manurubos, an Usa nga Baraan ha Israel — An Diyos ha bugos han kalibutan in hiya tatawagon.

6 Kay gintawag kamo han Ginoo sugad han babaye nga binayaan nga nagmamabido ha espiritu, ngan asawa han pagkabatan-on, han kamo in pagdireon, siring han iyo Diyos.

7 Tungod kay ha halipot nga panahon ginsikway ko kamo, kundi ha kadako nga kaluoy in titirokon ko kamo.

8 Ha gutiay nga kasina gintago ko an akon kahimo ha kadaliay, kundi ha waray katapusan nga kaluoy ako in mapaid ha iyo, siring han Ginoo nga iyo Manurubos.

9 Tungod hine, an tubig ni Noe in para ha akon, kay nagsumpa ako nga an tubigan ni Noe in dire na malapwas ha tuna, kun sugad ako in magsasaad nga dire na masisina ha iyo.

10 Tungod kay an mga bukid in mababalhin ngan an mga tayod in makukuha, kundi an akon kaluoy in dire maharayo tikang ha iyo, bisan an kauyonan han kamurayaw in dire mababalhin, siring han Ginoo nga may kaluoy ha iyo.

11 O ikaw nga sinasakitan, nga ipinaled han unos, nga waray kaliaw! Kamatuoran, ipapahimutang ko ha imo an mga bato nga may mahapsay nga kolor, ngan ipapahimutang adton tukuran nga may lakip nga mga sapiro.

12 Ngan akon hihimoon an imo mga bintana nga agata, ngan an mga purtahan han karbonkulo, ngan an ngatanan nga pag-ultan han mag-upay nga mga bato.

13 Ngan an ngatanan nga imo mga anak in pagtututdoan hiunong han Ginoo; ngan dako an magigin kamurayaw han imo mga anak.

14 Ngan ha pagkamatadong ikaw in pagtutukuron; ngan ikaw in mahihirayo tikang han pagtalumpigos kay ikaw in dire mahadlok, ngan ha kalisang kay dire ine maabot ha imo.

15 Kamatuoran, hira in piho nga magtitirok kontra ha imo, kundi dire ha akon; an hin-o man nga magtitirok kontra ha imo in mapupukan para ha imo kaupayan.

16 Kamatuoran, ako an naghimo han panday nga naghuhuyop han baga han kalayo, nga nagdadara han garamiton ha iya buruhaton; ngan akon ginhimo an pagkarag agud magruba.

17 Waray hinagiban in ginhimo kontra ha imo in mauswag; ngan an tagsa-tagsa nga dila magpaparaot ha imo ha paghukom in pagsasayupon. Amo ine an panorondon han mga suruguon han Ginoo, ngan an ira pagkamatadong in matikang ha akon, nasiring an Ginoo.