Alma

Il‑Ktieb ta’ Mormon

Werrej
Introduzzjoni u Xhieda
1 Nefi
2 Nefi
Ġakobb
Enos
Ġarom
Omni
Kliem ta’ Mormon
Mosija
Alma
Ħelaman
3 Nefi
4 Nefi
Mormon
Għeter
Moroni
Gwida ta’ Referenza għall‑Ktieb ta’ Mormon

Alma

Kapitlu 1
Neħor jgħallem duttrina falza, iwaqqaf knisja, jintroduċi l‑frodi saċerdotali, u joqtol lil Gidgħon—Neħor jingħata l‑mewt minħabba r‑reati tiegħu—Tikber il‑frodi saċerdotali u l‑persekuzzjoni fost il‑poplu—Il‑qassisin imantnu lilhom infushom, in‑nies jieħdu ħsieb il‑foqra, u l‑Knisja tissaħħaħ. Madwar 91–88 Q.K.
Kapitlu 2
Amliċi jipprova jsir sultan iżda n‑nies jivvutaw kontrih—Is‑segwaċi tiegħu jagħmluh sultan—L‑Amliċiti jmorru għall‑gwerra kontra n‑Nefiti u jiġu megħluba—Il‑Lamaniti u l‑Amliċiti jingħaqdu flimkien u jiġu megħluba—Alma joqtol lil Amliċi. Madwar 87 Q.K.
Kapitlu 3
L‑Amliċiti mmarkaw lilhom infushom skont il‑kelma profetika—Il‑Lamaniti spiċċaw insteħtu minħabba r‑ribelljoni tagħhom—Il‑bnedmin iġibu s‑saħta fuqhom infushom—In‑Nefiti jegħlbu armata oħra Lamanita. Madwar 87–86 Q.K.
Kapitlu 4
Alma jgħammed eluf ta’ konvertiti—Il‑Knisja tinħakem mill‑ħażen, u tinżamm milli tkompli miexja ’l quddiem—Nefija jinħatar prim imħallef—Alma, bħala qassis il‑kbir, jiddedika ħajtu għall‑ministeru. Madwar 86–83 Q.K.
Kapitlu 5
Biex jiksbu s‑salvazzjoni, il‑bnedmin jeħtieġ li jindmu u jħarsu l‑kmandamenti, jitwieldu mill‑ġdid, inaddfu lbieshom permezz ta’ demm Kristu, ikunu umli u jwarrbu minn fuqhom kull kburija u għira, u jwettqu għemejjel tajba—Ir‑Ragħaj it‑Tajjeb isejjaħ lill‑poplu tiegħu—Dawk li jwettqu għemejjel ħżiena huma wlied ix‑xitan—Alma jixhed dwar il‑verità tad‑duttrina tiegħu u jordna lill‑bnedmin sabiex jindmu—L‑ismijiet tal‑ġusti se jinkitbu fil‑ktieb tal‑ħajja. Madwar 83 Q.K.
Kapitlu 6
Il‑Knisja f’Żaraħemla tiġi mnaddfa u organizzata—Alma jmur ixandar f’Gidgħon. Madwar 83 Q.K.
Kapitlu 7
Kristu se jiġi mwieled minn Marija—Huwa se jħoll l‑irbit tal‑mewt u se jitgħabba bid‑dnubiet tal‑poplu tiegħu—Dawk li jindmu, jitgħammdu, u jħarsu l‑kmandamenti jkollhom il‑ħajja ta’ dejjem—Il‑ħmieġ ma jistax jiret is‑saltna ta’ Alla—Bniedem jeħtieġ li jippossedi l‑umiltà, il‑fidi, it‑tama, u l‑karità. Madwar 83 Q.K.
Kapitlu 8
Alma jxandar u jgħammed ġewwa Melek—Huwa ma jkunx milqugħ f’Għammonija u jitlaq—Anġlu jordnalu biex imur lura u jxandar l‑indiema lill‑poplu—Huwa jiġi milqugħ minn Amuleki, u t‑tnejn li huma jxandru f’Għammonija. Madwar 82 Q.K.
Kapitlu 9
Alma jordna lin‑nies ta’ Għammonija biex jindmu—Il‑Mulej se jkun ħanin mal‑Lamaniti fl‑aħħar żminijiet—Jekk in‑Nefiti jabbandunaw id‑dawl, huma jispiċċaw jinqerdu mil‑Lamaniti—L‑Iben ta’ Alla se jiġi dalwaqt—Huwa se jifdi lil dawk li jindmu, u jitgħammdu, u jkollhom il‑fidi f’ismu. Madwar 82 Q.K.
Kapitlu 10
Leħi ġej min‑nisel ta’ Manassi—Amuleki jitkellem dwar il‑kmand tal‑anġlu biex huwa jieħu ħsieb Alma—It‑talb tat‑twajbin iwassal biex il‑poplu ma jinqeridx—Avukati u mħallfin ħżiena jħejju l‑pedament tal‑qerda tal‑poplu. Madwar 82 Q.K.
Kapitlu 11
Deskrizzjoni tas‑sistema monetarja tan‑Nefiti—Amuleki jargumenta ma’ Żeżrom—Kristu mhuwiex se jsalva lin‑nies fi dnubiethom—Huma biss dawk li jirtu s‑saltna tas‑smewwiet li se jsalvaw—Il‑bnedmin kollha se jqumu għall‑immortalità—M’hemmx mewt wara l‑Qawmien. Madwar 82 Q.K.
Kapitlu 12
Alma jitkellem ma’ Żeżrom—Il‑misteri ta’ Alla jistgħu jingħataw biss lill‑fidili—Il‑bnedmin se jsir ħaqq minnhom skont ħsibijiethom, twemminhom, kliemhom, u għemilhom—Il‑ħżiena se jesperjenzaw mewt spiritwali—Din il‑ħajja mortali hija stat ta’ prova—Il‑pjan ta’ fidwa jġib fis‑seħħ il‑Qawmien mill‑imwiet u, permezz tal‑fidi, maħfra tad‑dnubiet—Dak li jindem għandu jedd għall‑ħniena permezz tal‑Iben il‑Waħdieni. Madwar 82 Q.K.
Kapitlu 13
L‑irġiel li jissejħu bħala qassisin il‑kbar jissejħu minħabba l‑fidi kbira u l‑opri tajba tagħhom—Huma għandhom jgħallmu l‑kmandamenti—Huma jitqaddsu permezz tas‑sewwa u jiksbu l‑mistrieħ tal‑Mulej—Melkisedek kien wieħed minnhom—L‑anġli jxandru l‑bxara t‑tajba madwar il‑pajjiż—Huma se jxandru l‑vera miġja ta’ Kristu. Madwar 82 Q.K.
Kapitlu 14
Alma u Amuleki jinxteħtu l‑ħabs u jiġu msawta—Il‑fidili u l‑iskrittura mqaddsa tagħhom jinħarqu bin‑nar—Dawn il‑martri jintlaqgħu mill‑Mulej fil‑glorja—Il‑ħitan tal‑ħabs jitfarrku u jaqgħu—Alma u Amuleki jinħelsu, u l‑persekuturi tagħhom jinqatlu. Madwar 82–81 Q.K.
Kapitlu 15
Alma u Amuleki jmorru Sidom u jwaqqfu knisja—Alma jfejjaq lil Żeżrom, li jingħaqad mal‑Knisja—Ħafna jitgħammdu, u l‑Knisja tissaħħaħ—Alma u Amuleki jmorru Żaraħemla. Madwar 81 Q.K.
Kapitlu 16
Il‑Lamaniti jeqirdu lin‑nies ta’ Għammonija—Żoram imexxi lin‑Nefiti għal rebħa fuq il‑Lamaniti—Alma u Amuleki u ħafna oħrajn ixandru l‑kelma—Huma jgħallmu li wara l‑Qawmien tiegħu Kristu se jidher lin‑Nefiti. Madwar 81–77 Q.K.
Kapitlu 17
Ulied Mosija għandhom l‑ispirtu tal‑profezija u tar‑rivelazzjoni—Kull wieħed minnhom jerħilha f’direzzjoni differenti biex ixandar il‑kelma lil‑Lamaniti—Għammon jerħilha lejn l‑art ta’ Ismagħel u jsir il‑qaddej tas‑Sultan Lamoni—Għammon isalva l‑merħliet tas‑sultan u joqtol lill‑għedewwa tiegħu fl‑ilma ta’ Sebu. Versi 1–3, madwar 77 Q.K.; vers 4, madwar 91–77 Q.K.; u versi 5–39, madwar 91 Q.K.
Kapitlu 18
Is‑Sultan Lamoni jaħseb li Għammon huwa l‑Ispirtu l‑Kbir—Għammon jgħallem lis‑sultan dwar il‑Ħolqien, dwar l‑interazzjoni ta’ Alla mal‑bnedmin, u dwar il‑fidwa li tinkiseb permezz ta’ Kristu—Lamoni jemmen u jaqa’ mal‑art bħallikieku mejjet. Madwar 90 Q.K.
Kapitlu 19
Lamoni jirċievi d‑dawl tal‑ħajja ta’ dejjem u jara lill‑Feddej—In‑nies ta’ daru jidħlu f’estasi, u ħafna jaraw l‑anġli—Għammon jiġi mħares b’mod mirakoluż—Huwa jgħammed lil ħafna u jwaqqaf knisja fosthom. Madwar 90 Q.K.
Kapitlu 20
Il‑Mulej jibgħat lil Għammon ġewwa Middoni biex jeħles lil ħutu li ġew mitfugħin il‑ħabs—Għammon u Lamoni jiltaqgħu ma’ missier Lamoni, li hu s‑sultan tal‑art kollha—Għammon iġiegħel lis‑sultan ix‑xiħ japprova l‑ħelsien ta’ ħutu. Madwar 90 Q.K.
Kapitlu 21
Aron jgħallem lill‑Għamalekin dwar Kristu u l‑Espjazzjoni tiegħu—Aron u ħutu jintefgħu l‑ħabs f’Middoni—Wara l‑ħelsien tagħhom, huma jgħallmu fis‑sinagogi u jikkonvertu lil ħafna—Lamoni jagħti l‑libertà reliġjuża lin‑nies fl‑art ta’ Ismagħel. Madwar 90‑77 Q.K.
Kapitlu 22
Aron jgħallem lil missier Lamoni dwar il‑Ħolqien, il‑ Waqgħa ta’ Adam, u l‑pjan tal‑fidwa permezz ta’ Kristu—Is‑sultan u n‑nies kollha ta’ daru jikkonvertu—Spjegat kif ġiet imqassma l‑art bejn in‑Nefiti u l‑Lamaniti. Madwar 90–77 Q.K.
Kapitlu 23
Titħabbar il‑libertà reliġjuża—Il‑Lamaniti f’seba’ artijiet u bliet jikkonvertu—Huma jsejħu lilhom infushom Anti‑Nefi‑Leħiti u jeħilsuha mis‑saħta—L‑Għamalekin u l‑Amuloniti jiċħdu l‑verità. Madwar 90–77 Q.K.
Kapitlu 24
Il‑Lamaniti jqumu kontra l‑poplu ta’ Alla—L‑Anti‑Nefi‑Leħiti jithennew fi Kristu u jżuruhom l‑anġli—Huma jippreferu li jġarrbu l‑mewt milli jiddefendu lilhom infushom—Aktar Lamaniti jikkonvertu. Madwar 90–77 Q.K.
Kapitlu 25
L‑aggressjoni tal‑Lamaniti tinfirex sew—Jinqered nisel il‑qassisin ta’ Noè kif ħabbar Abinadi—Bosta Lamaniti jikkonvertu u jingħaqdu man‑nies ta’ Anti‑Nefi‑Leħi—Huma jemmnu fi Kristu u jħarsu l‑liġi ta’ Mosè. Madwar 90–77 Q.K.
Kapitlu 26
Għammon jithenna fil‑Mulej—Il‑fidili jissaħħu permezz tal‑Mulej u jingħataw l‑għarfien—Permezz tal‑fidi l‑bnedmin jistgħu jwasslu eluf ta’ erwieħ għall‑indiema—Alla għandu kull qawwa u jifhem kull ħaġa. Madwar 90–77 Q.K.
Kapitlu 27
Il‑Mulej jordna lil Għammon biex imexxi lill‑poplu ta’ Anti‑Nefi‑Leħi ’l bogħod mill‑periklu—Hekk kif Għammon ltaqa’ ma’ Alma, hu ħass ġismu jiddgħajjef bil‑hena—In‑Nefiti jagħtu l‑art ta’ Ġerson lill‑Anti‑Nefi‑Leħiti—Huma jissejħu l‑poplu ta’ Għammon. Madwar 90–77 Q.K.
Kapitlu 28
Il‑Lamaniti jiġu megħluba f’battalja mill‑aktar kbira—Għexieren ta’ eluf jisfaw maqtula—Il‑ħżiena jgħaddu għal stat ta’ gwaj bla tmiem; il‑ġusti jiksbu ferħ bla tmiem. Madwar 77–76 Q.K.
Kapitlu 29
Alma jixtieq ixandar l‑indiema b’ħeġġa tal‑anġli—Il‑Mulej jagħti għalliema lill‑ġnus kollha—Alma jeżulta fil‑ħidma tal‑Mulej u fis‑suċċess ta’ Għammon u ħutu. Madwar 76 Q.K.
Kapitlu 30
Koriħor, l‑anti‑Krist, iwaqqa’ għaċ‑ċajt lil Kristu, l‑Espjazzjoni, u l‑ispirtu tal‑profezija—Huwa jgħallem li m’hemm l‑ebda Alla, l‑ebda waqgħa tal‑bniedem, l‑ebda piena għad‑dnub, u l‑ebda Kristu—Alma jixhed li Kristu għandu jiġi u li kull ħaġa tindika li hemm Alla—Koriħor jitlob li jara sinjal u jintlaqat mill‑inabbiltà li jitkellem—Koriħor deherlu x‑xitan forma ta’ anġlu u għallmu x’għandu jgħid—Koriħor jispiċċa mgħaffeġ u mejjet. Madwar 76–74 Q.K.
Kapitlu 31
Alma jmexxi missjoni biex jirriforma liż‑Żoramiti li kienu waqgħu f’apostasija—Iż‑Żoramiti jiċħdu lil Kristu, jemmnu f’kunċett falz ta’ għażla, u jqimu permezz ta’ talb imħejji minn qabel—Il‑missjunarji huma mimlija bl‑Ispirtu s‑Santu—Hemmhom jinbela’ fil‑hena ta’ Kristu. Madwar 74 Q.K.
Kapitlu 32
Alma jgħallem lill‑foqra li umiljaw ruħhom minħabba hemmhom—Il‑fidi hija tama f’dak li ma jidhirx iżda hu veru—Alma jixhed li l‑anġli jaqdu lill‑irġiel, lin‑nisa, u lit‑tfal—Alma jqabbel il‑kelma ma’ żerriegħa—Jeħtieġ li niżirgħuha u mmantnuha—Imbagħad hija tikber u ssir siġra li minnha naqtgħu l‑frott tal‑ħajja ta’ dejjem. Madwar 74 Q.K.
Kapitlu 33
Żenos għallem li l‑bnedmin għandhom jitolbu u jqimu f’kull post, u li minħabba l‑iben jiġi evitat il‑kastig—Żenok għallem li l‑ħniena tissawwab minħabba l‑Iben—Fid‑deżert Mosè għolla ’l fuq raffigurazzjoni ta’ Iben Alla. Madwar 74 Q.K.
Kapitlu 34
Amuleki jixhed li l‑kelma li twassal għas‑salvazzjoni tinsab fi Kristu—Jekk ma jkunx hemm espjazzjoni, l‑umanità kollha tispiċċa tinqered—Il‑liġi kollha ta’ Mosè tidderiġina lejn is‑sagrifiċċju tal‑Iben ta’ Alla—Il‑pjan etern tal‑fidwa hu bbażat fuq il‑fidi u l‑indiema—Itolbu għal barkiet temporali u spiritwali—Dil‑ħajja hija ż‑żmien li fih il‑bnedmin għandhom iħejju ruħhom biex jiltaqgħu ma’ Alla—Ħabirku għas‑salvazzjoni tagħkom bil‑biża’ quddiem Alla. Madwar 74 Q.K.
Kapitlu 35
Ix‑xandir tal‑kelma jġib fix‑xejn l‑għemejjel qarrieqa taż‑Żoramiti—Huma jkeċċu lil dawk li kkonvertew, li mbagħad jingħaqdu man‑nies ta’ Għammon ġewwa Ġerson—Alma jitnikket minħabba l‑ħażen tal‑poplu. Madwar 74 Q.K.
Kapitlu 36
Alma jixhed ma’ Ħelaman dwar il‑konverżjoni tiegħu wara li huwa kien ra anġlu—Huwa ġarrab it‑tbatija ta’ ruħ indannata; hu sejjaħ isem Ġesù, u wara ġie mwieled minn Alla—Ruħu mtliet b’hena mill‑aktar ħelwa—Huwa ra qtajja’ ta’ anġli jfaħħru ’l Alla—Bosta konvertiti daqu dak li daq hu u raw dak li ra hu. Madwar 74 Q.K.
Kapitlu 37
Il‑pjanċi tar‑ram u skrittura oħra ġew imħarsa biex iwasslu l‑erwieħ għas‑salvazzjoni—Il‑Ġarediti nqerdu minħabba ħżunithom—Il‑ġuramenti u l‑patti sigrieti tagħhom jeħtieġ li jinżammu mistura min‑nies—Ħudu parir mingħand il‑Mulej f’kulma tagħmlu—Hekk kif il‑Liahona kienet ta’ gwida għan‑Nefiti, bl‑istess mod il‑kelma ta’ Kristu tmexxi lill‑bnedmin lejn il‑ħajja ta’ dejjem. Madwar 74 Q.K.
Kapitlu 38
Siblon kien ippersegwitat minħabba s‑sewwa—Is‑salvazzjoni tinsab fi Kristu, li huwa l‑ħajja u d‑dawl tad‑dinja—Rażżnu l‑passjonijiet kollha tagħkom. Madwar 74 Q.K.
Kapitlu 39
Id‑dnub sesswali huwa abominazzjoni—Id‑dnubiet ta’ Kurjantun żammew liż‑Żoramiti milli jirċievu l‑kelma—Il‑fidwa ta’ Kristu hija retroattiva fejn tidħol is‑salvazzjoni tal‑fidili li għexu qabel seħħet. Madwar 74 Q.K.
Kapitlu 40
Kristu jġib fis‑seħħ il‑qawmien mill‑imwiet tal‑bnedmin kollha—Wara l‑mewt it‑twajbin imorru l‑ġenna u l‑ħżiena jmorru ’l barra fid‑dlam fejn hemm jibqgħu jistennew il‑jum tal‑qawmien tagħhom—F’jum il‑Qawmien kull ħaġa tiġi rrestawrata għall‑forma xierqa u perfetta tagħha. Madwar 74 Q.K.
Kapitlu 41
Fil‑Qawmien il‑bnedmin se jgħaddu għal stat ta’ hena bla tmiem jew ta’ miżerja bla tmiem—Il‑ħażen qatt ma kien ferħ—Il‑bnedmin karnali qed jgħixu fid‑dinja mingħajr Alla—Fir‑Restawrazzjoni kull persuna tirċievi mill‑ġdid il‑karatteristiċi u l‑kwalitajiet li tkun kisbet fil‑ħajja mortali. Madwar 74 Q.K.
Kapitlu 42
Il‑ħajja mortali hija żmien ta’ prova fejn il‑bniedem għandu ċans jindem u jaqdi lil Alla—Il‑Waqgħa ġabet fuq l‑umanità kollha l‑mewt temporali u spiritwali—Il‑fidwa tasal permezz tal‑indiema—Alla nnifsu jpatti għad‑dnubiet tad‑dinja—Il‑ħniena qiegħda hemm għal dawk li jindmu—L‑oħrajn kollha huma suġġett għall‑ġustizzja ta’ Alla—Il‑ħniena tinkiseb minħabba l‑Espjazzjoni—Huwa biss dak li jindem tassew li jsalva. Madwar 74 Q.K.
Kapitlu 43
Alma u wliedu jxandru l‑kelma—Iż‑Żoramiti u dissidenti Nefiti oħra jsiru Lamaniti—Il‑Lamaniti jmorru għall‑gwerra kontra n‑Nefiti—Moroni jarma lin‑Nefiti b’armatura protettiva—Il‑Mulej jiżvela ma’ Alma l‑istrateġija tal‑Lamaniti—In‑Nefiti jiddefendu d‑djar, il‑libertà, il‑familji, u r‑reliġjon tagħhom—L‑armati ta’ Moroni u Leħi jiċċirkondaw lil‑Lamaniti. Madwar 74 Q.K.
Kapitlu 44
Moroni jordna lil‑Lamaniti biex jagħmlu patt ta’ paċi jew jinqerdu—Żeraħemna jirrifjuta l‑offerta, u l‑battalja tkompli—L‑armati ta’ Moroni jegħlbu lil‑Lamaniti. Madwar 74–73 Q.K.
Kapitlu 45
Ħelaman jemmen kliem Alma—Alma jħabbar il‑qerda tan‑Nefiti—Huwa jbierek u jisħet l‑art—Jista’ jkun li Alma ttieħed mill‑Ispirtu, sewwasew bħal Mosè—Jikber it‑tilwim fil‑Knisja. Madwar 73 Q.K.
Kapitlu 46
Għamalikja jikkonfoffa biex isir sultan—Moroni jgħolli l‑bandiera bit‑titlu tal‑libertà—Huwa jiġbor lin‑nies flimkien biex jiddefendu r‑reliġjon tagħhom—Dawk li tassew jemmnu jissejħu Kristjani—Fdal ta’ Ġużeppi se jiġi ppreservat—Għamalikja u d‑dissidenti jaħarbu lejn l‑art ta’ Nefi—Dawk li ma jappoġġjawx il‑kawża tal‑ħelsien jingħataw il‑mewt. Madwar 73‑72 Q.K.
Kapitlu 47
Għamalikja juża l‑ingann, il‑qtil, u l‑intriċċi biex isir sultan tal‑Lamaniti—Id‑dissidenti Nefiti huma aktar ħżiena u feroċi mil‑Lamaniti. Madwar 72 Q.K.
Kapitlu 48
Għamalikja jxewwex lil‑Lamaniti kontra n‑Nefiti—Moroni jħejji lin‑nies tiegħu biex jiddefendu l‑kawża tal‑Kristjani—Huwa jithenna fil‑libertà u l‑ħelsien u huwa raġel qalbieni ta’ Alla. Madwar 72 Q.K.
Kapitlu 49
L‑invażuri Lamaniti ma jirnexxilhomx jieħdu f’idejhom il‑bliet fortifikati ta’ Għammonija u Noè—Għamalikja jisħet lil Alla u jaħlef li jixrob demm Moroni—Ħelaman u ħutu jkomplu jsaħħu l‑Knisja. Madwar 72 Q.K.
Kapitlu 50
Moroni jiffortifika l‑artijiet tan‑Nefiti—Huma jibnu bosta bliet ġodda—In‑Nefiti jintlaqtu mill‑gwerer u l‑qerda fi żmien il‑ħażen u l‑abominazzjonijiet tagħhom—Morjanton u d‑dissidenti tiegħu jisfaw megħluba minn Teankum—Nefija jmut, u ibnu Paħoran jeħodlu postu fis‑siġġu tat‑tribunal. Madwar 72–67 Q.K.
Kapitlu 51
Nies is‑sultan jippruvaw jibdlu l‑liġi u jaħtru sultan—Paħoran u nies il‑ħelsien jiksbu l‑appoġġ permezz tar‑rieda tal‑poplu—Moroni jġiegħel lil nies is‑sultan biex jiddefendu pajjiżhom jew jingħataw il‑mewt—Għamalikja u l‑Lamaniti jieħdu f’idejhom bosta bliet iffortifikati—Teankum iraġġa’ lura l‑invażjoni Lamanita u joqtol lil Għamalikja fit‑tinda tiegħu. Madwar 67–66 Q.K.
Kapitlu 52
Għammoron jieħu post Għamalikja bħala sultan tal‑Lamaniti—Moroni, Teankum, u Leħi jmexxu lin‑Nefiti lejn rebħa fil‑gwerra tagħhom kontra l‑Lamaniti—Huma jieħdu lura l‑belt ta’ Mulek, u Ġakobb iż‑Żoramita jinqatel. Madwar 66–64 Q.K.
Kapitlu 53
Il‑priġunieri Lamaniti jintużaw biex jiffortifikaw il‑belt ta’ Kotran—Id‑diżgwid li jqum bejn in‑Nefiti jwassal għal rebħiet Lamaniti—Ħelaman jieħu f’idejh il‑kontroll tal‑elfejn żagħżugħ, li huma wlied in‑nies ta’ Għammon. Madwar 64–63 Q.K.
Kapitlu 54
Għammoron u Moroni jinnegozjaw it‑tpartit ta’ priġunieri—Moroni jordna lil‑Lamaniti biex jirtiraw u ma jkomplux bl‑attakki qattiela tagħhom—Għammoron jordna lin‑Nefiti biex iċedu l‑armi tagħhom u jagħtu lilhom infushom f’idejn il‑Lamaniti. Madwar 63 Q.K.
Kapitlu 55
Moroni jirrifjuta t‑tpartit ta’ priġunieri—L‑għassiesa Lamaniti jiġu mħajra jixorbu sakemm jiskru, u jinħelsu l‑priġunieri Nefiti—Il‑belt ta’ Gid tittieħed mingħajr tixrid ta’ demm. Madwar 63–62 Q.K.
Kapitlu 56
Ħelaman jibgħat ittra lil Moroni, fejn jiddeskrivilu l‑istat tal‑gwerra mal‑Lamaniti—Antipu u Ħelaman jiksbu rebħa kbira fuq il‑Lamaniti—L‑elfejn żagħżugħ ta’ Ħelaman jiġġieldu b’qawwa mirakoluża, u ħadd minnhom ma jinqatel. Vers 1, madwar 62 Q.K.; versi 2–19, madwar 66 Q.K.; u versi 20–57, madwar 65–64 Q.K.
Kapitlu 57
Ħelaman jitkellem dwar il‑konkwista ta’ Antipara u ċ‑ċediment u aktar tard id‑difiża ta’ Kumeni—Il‑ġuvintur Għammonin tiegħu jiġġieldu b’kuraġġ; ilkoll jispiċċaw midruba, iżda ħadd minnhom ma jinqatel—Gid jirrapporta l‑qtil u l‑ħarba tal‑priġunieri Lamaniti. Madwar 63 Q.K.
Kapitlu 58
Ħelaman, Gid, u Teomner jieħdu f’idejhom il‑belt ta’ Manti permezz ta’ strataġemma—Il‑Lamaniti jirtiraw—L‑ulied subien tan‑nies ta’ Għammon jiġu mħarsa hekk kif huma jibqgħu sodi fid‑difiża tal‑libertà u l‑fidi tagħhom. Madwar 63–62 Q.K.
Kapitlu 59
Moroni jitlob lil Paħoran biex isaħħaħ il‑forzi ta’ Ħelaman—Il‑Lamaniti jieħdu f’idejhom il‑belt ta’ Nefija—Moroni jinkorla għall‑gvern. Madwar 62 Q.K.
Kapitlu 60
Moroni jilmenta ma’ Paħoran li l‑gvern ma tax kas l‑armati—Il‑Mulej jippermetti li t‑twajbin jinqatlu—In‑Nefiti jeħtieġ jużaw il‑qawwa u l‑mezzi tagħhom kollha biex jeħilsu lilhom infushom mill‑għedewwa tagħhom—Moroni jhedded li jeħodha kontra l‑gvern jekk ma tintbagħatx l‑għajnuna lill‑armati tiegħu. Madwar 62 Q.K.
Kapitlu 61
Paħoran jgħid lil Moroni dwar it‑tixwix u r‑rewwixta kontra l‑gvern—Nies is‑sultan jieħdu f’idejhom Żaraħemla u jissieħbu mal‑Lamaniti—Paħoran jitlob l‑għajnuna militari għal kontra r‑ribelli. Madwar 62 Q.K.
Kapitlu 62
Moroni jitlaq fi triqtu biex imur jgħin lil Paħoran fl‑art ta’ Gidgħon—Nies is‑sultan li jirrifjutaw li jiddefendu pajjiżhom jingħataw il‑mewt—Paħoran u Moroni jerġgħu jieħdu lura f’idejhom Nefija—Bosta Lamaniti jingħaqdu man‑nies ta’ Għammon—Teankum joqtol lil Għammoron u konsegwentement jinqatel hu ukoll—Il‑Lamaniti jiġu mkeċċija mill‑pajjiż, u tibda ssaltan il‑paċi—Ħelaman jerġa’ lura għall‑ministeru u jibni l‑Knisja. Madwar 62–57 Q.K.
Kapitlu 63
Siblon u warajh Ħelaman jieħdu għandhom l‑annali sagri—Bosta Nefiti jerħulha lejn l‑art tat‑tramuntana—Ħagot jibni iġfna li jbaħħru fil‑baħar tal‑punent—Moronija jegħleb lil‑Lamaniti waqt battalja. Madwar 56–52 Q.K.