1 Kedekedeo Ses, me wia kadaudoken Ehd—pwehki Ehd mehla sang ni lehko, oh tohn imwe kan koaros ihte Ses me soh—eri, Ses pwurehng tepida kakehlakahla aramas luwetala kan.

2 Kedekedeo Ses ahpw tamataman kamwomwalahn eh pahpa ko, oh e ahpw wiahda wehi mwahu; pwe e tamataman dahme Kauno ketin wiahiong Sared oh rie ohlo ni e eh ketin wairail oh kotehla wasa loal; oh e ahpw kin idawehn sapwellien Kauno ahl akan; oh e nainikihda pwutak oh serepein tohto.

3 Oh nah pwutak me keieu laud, adaniki Ses, e ahpw uhwongada ih; ahpw, lipirap men kaloke Ses, pwehki e kepwehpwe mehlel, me kahrehda eh pahpao pwurehng alehdi popohl.

4 Kedekedeo eh pahpao ahpw wiahda kahnihmw tohto pohn sahpwo, oh aramas akan pwurehng kohpeseng pohn sahpwo pwon. Oh Ses ahpw momour lao e mahla mehlel; oh e nainikihda Riplakis. Oh e ahpw pwoula, oh Riplakish weliandi oh kakaun.

5 Kedekedeo Riplakis ahpw sohte wia me mwahu mwohn silangin Kauno, pwehki e pwoudiki lih tohto oh pekehi tohto, oh ahpw kihong pohn aramas akan dahme irail kin kalongkio; ei, e kihong irail en pwain daksis me katoutou; oh sang ni daksiso e ahpw wiahda ihmw lapala tohto.

6 Oh e ahpw wiahda mwoale me kaselel mehlel; oh e ahpw wiahda imweteng tohto, oh oh mehmen me sohte pahn kapwaiada koasondi en daksis, e kin lakidelong nan imweteng; oh mehmen me sohte kak pwain arail daksis kan, e ahpw kin lakidelong nan imweteng; oh e wiahiongirail en doadoahk ahnsou koaros ong sawaseparail; oh mehmen me sohte pahn doadoahk, e ahpw kin elehda irail en kamakamala.

7 Eri e ahpw alehdi pai en doadoahk kaselel koaros, iei, kohl kaselel e wiahda en wiawihda nan imweteng; oh soangen doadoahng lingan koaros e wiahda en wiawihda nan imweteng. Kedekedeo e ahpw kaloke nah aramas kan sang ni eh mour en kamwahl kan oh tiahk suwed kan.

8 Oh ahnsou me e kakaunikier erein sounpar pahisek riau aramas akan ahpw uhwongada ih; oh mahwin tepida wiawi nan sahpwo, lao Riplakis kamakamala, oh kadaudoke kan ahpw pwepwekihsang nan sahpwo.

9 Kedekedeo erein mwurin erein sounpar tohto kei, Moriandon, (ni eh wia kadaudoken Riplakis) kihpene sounpei kei sang irail me pokousla kan, oh kohla oh mahwiniong aramas akan; oh e kalowehdi kahnimw tohto; oh mahwino kahrehda kahpwal laud mehlel, oh wiwiawihki erein sounpar tohto kei; oh e ahpw alehdi manaman nan sahpwo pwon, oh koasonehdi en wiahla nanmwarki en sahpwo pwon.

10 Oh mwurin eh koasonehdi en wiahla nanmwarki, e ahpw kamarahrahda toutou en aramas akan, me kahrehda e kenikenla nan mesen aramas akan, oh irail keiehdi en wiahla arail nanmwarki.

11 Oh e ahpw kapwung pahrek aramas akan, ahpw kaidehn ong pein ih pwehki eh kamwahl tohto; eri e lipasang mwohn silangin Kauno.

12 Kedekedeo Moriandon ahpw wiahda kahnihmw tohto, oh aramas akan kepwehpwehla mehlel nan eh mwehi, ong wiahda ihmw kan, oh nainiki kohl oh silper, oh poadokedi werentuhke, oh oh nainiki pelin sihpw kan, oh kou kan, oh soang kan me kopwurupwuriong irail.

13 Oh Moriandon ahpw momour lao e mahla mehlel, oh e ahpw nainikihda Kim; oh Kim ahpw weliandi eh pahpa oh kakaun; oh e kakauniki sounpar waluh, oh eh pahpao ahpw mehla. Kedekedeo Kim ahpw sohte kakauniki mour pwung, eri e sohte keniken rehn Kauno.

14 Oh rie ohlo ahpw uhwongadi ih, me kahrehda eh kalowehdi ih nan kalidu; oh mihmi nan kalidu erein eh rahn akan koaros; oh e nainikihda pwutak oh serepein tohto nan eh kalidu, oh nan eh mahlahr e ahpw nainikihda Lihpai; oh e ahpw mehla.

15 Kedekedeo Lihpai ahpw wie papah nan kalidu mwurin eh pahpao eh mehla, erein sounpar pahisek riau. Oh e ahpw mahwiniong nanmwarki en sahpwo, me kehrehda e pein kalowehdiong ih wehio.

16 Oh mwurin eh kalowehdiong pein ih wehio e ahpw wia dahme mwahu mwohn silangin Kauno; oh aramas akan ahpw pweida nan sahpwo; oh e ahpw momour lao e mahla mehlel, oh e nainikihda pwutak oh serepein tohto; oh e pil nainikihda Korom, me e keiehdi en weliandi ih wiahla nanmwarki.

17 Kedekedeo Korom ahpw wia dahme mwahu mwohng silangin Kauno erein eh rahn akan koaros; oh e nainikihda pwutak oh serepein tohto; oh mwurin eh kilangehr rahn tohto e ahpw mehla, oh duhwehte koaros me mih pohn sampah; oh Kis ahpw weliandi ih oh kakaun.

18 Kedekedeo Kis ahpw pil mehla, oh Lip weliandi ih oh kakaun.

19 Kedekedeo Lip ahpw pil wia me mwahu mwohn silangin Kauno. Oh nan mwein Lipo sineik pwoisin kan kamwomwala. Eri irail kohdihla nan sahpw en palieir, pwe re en rapahki kenerail mwonge ong aramas en sahpwo, pwe sahpwo direkihla mahn en nanwelo. Oh pein Lip pil wiahla emen mai en sounkesik.

20 Oh irail wiahda kahnihmw ehu limwahn sahpw tehtiko, wasa me sehdo irepeseng sahpwo.

21 Oh irail wiahkihla sahpw en palieiro en wia sapwtehn, ong kesik mahn. Oh pohn sahpw en paliepeng pwon direkihla kousoan en aramas akan.

22 Oh irail pwersek en doadoahk mehlel, oh irail kin pwainda oh netikihla oh kin netinetpene nanpwungarail, pwe irail en kak kepwehpwehla.

23 Oh irail ahpw koadoahke soangen pwehl en mete koaros, oh irail wiahda kohl, oh silper, oh mete, oh prahs, oh soangen mete koaros; oh irail weiradahsang nan pwehl; eri, irail weirada pwehl laud pwe re en kak alehdi pwehl en mete, en kohl, oh silper, oh mete, oh kapa. Oh irail koadoahkehda soangen doadoahk kaselel koaros.

24 Oh mie arail likou sililik kan, oh likou kaselel kan; oh irail koadoahke soang likou koaros, pwe irail en kak perehkihla paliwararail akan.

25 Oh irail wiahda soangen dipwisou en doadoahk koaros pwe re en kamwakidki pwehl, ong uhpwel oh poadoak [wahn sahpw], ong mehn nahk [wahn sahpw] oh ong popoki pwehl, oh pil mehn kamwakelehki werentuhke kan.

26 Oh irail wiahda soangen dipwisou en doadoahk koaros sang ni arail doadoahngki neirail mahn lapala kan.

27 Oh irail wiahda soangen dipwisou en mahwin koaros. Oh irail wiahda soangsoangen dipwisou en doadoahk kaselel kei.

28 Oh sohte pwihn en aramas me pai mehlel duwehte irail, oh pweida sang nin limen Kauno. Oh irail mihmi nan sahpw me pilipilda sang sahpw koaros, pwe Kauno ketin mahsaniher.

29 Kedekedeo Lip ahpw momouriki pahr tohto kei, oh nainikihda pwutak oh serepein tohto; oh e ahpw pil nainikihda Ardom.

30 Kedekedeo Ardom ahpw weliandi eh pahpao oh kakaun. Oh ahnsou me Ardom kakaunikier sounpar rieisek pahieu, kilang, wehio kohsang ih. Oh e papah erein pahr tohto nan kalidu, iei, erein luhwen eh rahn akan.

31 Oh e nainikihda Ehd, oh Ehd momour nan kalidu erein eh mour. Oh Ehd nainikihda Aron, oh Aron momour nan kalidu erein eh mour; oh e nainikihda Amnikada, oh Amnikada pil momour erein eh mour nan kalidu; oh e nainikihda Koriandom, oh Koriandom momour nan kalidu erein eh mour; oh e nainikihda Kom.

32 Kedekedeo Kom ahpw kahluwahsang elep tohn wehio. Oh e kaunda elep tohn wehio erein pahr pahisek riau; oh e ahpw kohla mahwiniong nanmwarki, Amkid, oh irail pepeiki erein sounpar tohto kei, me kahrehda Kom powehdi Amkid, oh alehdi manaman en kaunda luhwen wehio pwon.

33 Oh nan mwein Kom e tepida mie pwihn lipirap nan sahpwo; oh irail kapwurehda koasondi en mahso, oh wiahda kahula kan duwehte mehn mahsoko, oh pwurehn rapahki re en kawehla wehio.

34 Met Kom ahpw kehlail en peiong irail; ahpw, e sohte kak powehdi irail.