1 Oh met ngehi, Moronai, pwurehng uhsehla ei nting kan. Eri, kilang, kedekedeo pwehki pwihn suwed rir en Akis oh kepoakepah kan, kilang, irail kawehla wehin Omer.

2 Ahpw, Kauno ketin kupwur kalahngan ong Omer, oh pil sapwellime pwutak kan oh sapwellime serepein kan me sohte rapahki re en kemehla.

3 Oh Kauno ketin kapariki Omer nan eh ouraman me e pahn mweselsang nan sahpwo; eri Omer ahpw ketin mweselsang nan sahpwo iangahki eh peneinei, oh seiloangki erein rahn kei, oh kohdo oh daulih dohl en Sim, oh kohdo wasa me Mehn Nihpai kan kamwomwala ie, oh sang wasahu re ahpw kohla palimese, oh kohdohng wasa me kahdaniki Aplom, ni oaroahro, oh wasahu e kawada imwe impwalo, oh pil nah pwutak kan oh serepein kan, oh pil tohn imwe koaros, ihte Sared oh e peneinei me soh.

4 Kedekedeo Sared ahpw keidi en wiahla nanmwarki en aramas akan, sang ni wiewia suwed kan; oh e ahpw kihong Akis nah serepeino en wiahla eh pwoud.

5 Kedekedeo Akis ahpw song en kemehla ehn eh pwoud pahpa; oh e wiahiong irail ko me me kahukihla sang ni kahulahn mahso, oh irail alehdi moangen ehn eh pwoud pahpa, ni eh wie mwomwohd nan mwoale, mahmahseniong sapwellime aramas kan.

6 Tohtohlahn pwihn suwed oh rir wet me lap mehlel kahrehda e kawehla nan mohngiong en aramas koaros; ihme kahreda Sared kamakamala nan mwoale, oh Akis weliandi oh kakaun.

7 Kedekedeo Akis ahpw tepida luwangki nah pwutako, kahrehda e saliedi nan imweteng, oh kin kamwengehki kisin mwenge de sohte douluhl lao e mehkihla.

8 Oh met rien pwutako me mehlao, (oh ede iei Nimrah) udahn lingeringer pahn eh pahpao pwehki dahme eh pahpao wiahiong rie pwutako.

9 Kedekedeo Nimrah kihpene kisin pwihn en ohl kei, oh sepohsang nan sahpwo, oh kohla oh koukousoan rehn Omer.

10 Kedekedeo Akis nainkihda pwutak kei, oh aramas akan koapworopworikin irail, mehndahte arail kahukihong ih me irail pahn kin wia soangen wiewia suwed koaros nin duwen me pahn mwahuki.

11 Met nein Akis aramas akan kin inangih irail en kepwehpwehla, duwehte Akis e inangih kolokol manaman; eri, nein Akis pwutangkan kin kihong irail mwohni, me kahrehda irail kahluwahsang pali laud en aramas en idawehn irail.

12 Oh mahwin tepida wiawi nan pwungen nein Akis pwutak kan oh Akis, me reireiki erein pahr tohto kei, ei, me kahrehda kereniong aramas koaros en wehio re en kamwomwala, iei, koaros, ihte meh siliakan me luhwehdi, oh irail me iangala peneinei en Omer.

13 Eri, Omer pwurehng pwuralahng nan sapwe sahpw en sohsou.

14 Kedekedeo Omer tepida mahla; ahpw, nan eh mahlahr e ahpw nainikihda Emer; oh e ahpw keiehdi Emer en wia nanmwarki oh wiliandi kakaun.

15 Oh mwurin eh keiehdi Emer en wiahla nanmwarki e ahpw kilang popohl nan sahpwo erein sounpar riau, oh ih ahpw mehla, ni eh momourikier rahn tohto, me direki pahtou. Kedekedeo Emer ahpw weliandi oh kakaun, oh ahpw idawehnte wiewiahn pwukoahn eh pahpao.

16 Oh Kauno pwurehng tepida kihsang keriao pohn sahpwo, oh peneinei en Emer ahpw pweida mehlel pahn kaweid en Emer; oh nan erein sounpar weneisek riau irail ahpw kehlailla mehlel, kahrehda irail kepwehpwehla mehlel—

17 Oh irail ahneki soangsoangen wahn tuhke, oh werentuhke, oh silik kan, oh likou kaselel, oh kohl, oh silper, oh soang kesempwal koaros;

18 Oh pil soangen pelin akan, oh kou lekelek kan, oh kou kan, oh sihpw, oh pwihk, oh kuht kan, oh pil ekei soangen mahn tohto me kin mwahu ong en doadoahngki.

19 Oh irail pil naineki oahs kan, oh ahs kan, oh mie elepant kan oh kiurelem kan oh kumom kan; koaros kin mwahu ong aramas en doadoahki, ahpw mehlel elepant kan oh kiurelem kan oh kumom kan.

20 Oh met Kauno ahpw ketin kamwerehdi kapai kan pohn sahpwo, me wia sahpw pilipilda nan pwungen sahpw koaros; oh e mahsanih me mehmen me pahn kousoan nan sahpwo pahn kousoanki ong Kauno, ma soh irail pahn kamwomwala ahnsou me irail pahn wiewia suwed laudla; pwe soahng wet, Kauno ketin mahsanih: I pahn kamwerehdiong ei engieng ni unsek.

21 Oh Emer ahpw kin wia kopwung ni kadeik pwung erein eh rahn akan, oh e nainekihda pwutak oh serepein tohto; oh e nainkihda Koriandom, oh e ahpw keiehdi Koriandom en weliandi oh kakaun.

22 Oh mwurin eh keiehdi Koriantom en weliandi oh kakaun e ahpw momouriki sounpar pahieu, oh e kilang popohl nan sahpwo; ei, oh e pil kilangidi Sapwellimen Mourpwungo, oh e ahpw pereperen oh lapalapala nan eh ahnsou; oh e ahpw mehla nan popohl.

23 Kedekedeo Koriantom ahpw ideidawehn pwukoahn eh pahpao, oh ahpw kauada kahnihmw kehlail tohto, oh ahpw kihong sapwellime aramas me mwahu erein eh ahnsou. Kedekedeo e sohte nainikihda seri lao e likeilapala mehlel.

24 Kedekedeo eh pwoudo ahpw kepinsalehdala, ni eh sounpar epwiki riau. Kedekedeo Koriantom ahpw pwoudkihda peinakapw pwulopwul men, nan eh likeilapalahr, oh nainikihda pwutak oh serepein tohto; eri e momour lao e sounpar epwiki pahisek riau.

25 Kedekedeo e ahpw nainkikihda Kom, oh Kom ahpw weliandi oh kakaun; oh e ahpw kakauniki sounpar pahisek duwahu, oh e nainikihda Ehd; oh e pil nainikihda ekei pwutak oh serepein kei.

26 Oh aramas akan pwurehng tohtohla pohn sahpwo pwon, oh suwed pwurehng tepida wie kehkehlaila pohn sahpwo pwon, oh Ehd pwurehng tepida perenikihda koasondi rir kan en mahs, pwe en kawehla eh pahpao.

27 Kedekedeo e ahpw kihsang eh pahpao nan dowe, pwehki e kemehkihla pein nah kedlahs; oh e weliandi oh kakaun.

28 Oh mie soukohp kei ahpw pwurehng pwurodo nan sahpwo, kalkalohngkihong irail koluhla—me irail en kaunopada Mwohn Kauno, ma soh, keriah ehu pahn kohdo pohn sahpwo; iei, e pahn mie lehk lapalap ehu, me irail pahn kamwomwkihla ma irail sohte pahn koluhla.

29 Ahpw aramas akan sohte kamehlele mahsen en soukohp kan, ahpw irail kausirailla; oh ekei kesehlong nan pwoahr oh lao irail mehla. Kedekedeo irail wia soahng pwukat koaros nin duwen pahngok en nanmwarki, Ehd.

30 Kedekedeo lehk lapalap eh tepida wiawi nan sahpwo, oh aramas akan tepida kamwomwala mwadang sang nan sahpwo pwehki lehko, pwe sohte kotou pohn sahpwo pwon.

31 Oh sineik pwoisin kei ahpw kohdo pohn sahpwo pwon, oh pwoisiniedi aramas tohto. Kedekedeo neirail pelin mahn akan ahpw tepida tangasang sineik pwoisin kan, kohlahng nan sahpw en palieir, me Mehn Nihpai kan kin kahdaniki Saraemla.

32 Kedekedeo mie tohto irail me mehla nan ahlo; ahpw, mie ekei me tang kohdihla nan sahpw en palieir.

33 Kedekedeo Kauno ahpw elehda sineik kan re en uhdisang pwakih irail, ahpw re en irehdi ahlo sang aramas akan re en dehr daulih, me mehmen me pahn song en daulih e pahn mehla sang ni pwoisin en sineik kan.

34 Kedekedeo aramas akan ahpw dauwih lipwen mahn akan, oh ahpw kangala me kin mehla kan nan ahlo, lao irail kangala koaros. Met ahnsou me aramas akan kilangada me irail pahn mehla irail ahpw tepida koluhkihla arail wiewia suwed kan oh kapakap ong Kauno.

35 Kedekedeo ahnsou me irail karakarahkala mehlel mwohn Kauno, e ahpw ketin kamwerehdi kotou pohn sahpwo; oh aramas ahpw tepida pwurehng kehlailda, oh tepida pwurehng miehda wahn sahpw nan wehin paliepeng kan, oh nan wehi kan koaros kapilpene. Oh Kauno ahpw kasalehiong irail sapwellime manaman ong doarehsang irail lehko.