1 Kedekedeo rien Sared ohlo, (met uwen tohtohn wahr akan me irail kaunopada meh waluh) ahpw kohdahla pohn nahnahu, me re kahdaniki nahna Selem, pwehki eh ileile mehlel, oh e ahpw inimasang ni paip ieu takai tikitik eisek weneu; oh takaiko pwetepwet oh marain, duwehte klahs me ke kak kilengla pwar; oh e ahpw wahda kohdahla pohn nahnahu, oh pwurehng eker Kauno, ndinda:

2 Maing Kaun, komwi ketin mahsaniher me se pahn kin duhla wasa loal kan. Oh kilang, maing Kaun, oh komw dehr engiengda pahn sapwellimomwi ladu pwehki eh luwet mwohmwi; pwe se wehwehki me komwi sarawi oh kin ketiket nanleng, oh me se sohte warohng mwohmwi; pwehki pwupwidio, aht mour kin kalapw wiahda me suwed; ahpw, Maing Kaun, komwi ketikihongehr kiht kosonned ehu me se pahn kin eker komwi, pwe sang komwi se en kak alehdi nin duwen aht ineng kan.

3 Kilang, maing Kaun, komwi ketin kalokeikihtehr pwehki aht wiewia suwed, oh ketin kamwakamwakid kiht kohdo, oh erein sounpar tohtoh pwukat se wie mihmihki nan sapwtehn; ahpw, komwi kin ketin kupwurei kiht. Maing Kaun, komw mahsanih ie oh kupwureiehla, oh ketikihsang sapwellimahr engieng rehn sapwellimahr aramas pwukat, oh dehr mweidehng irail en kotehla wasa loal oh angin nan rotorot; ahpw kilang mepwukat me I inimasang ni paip.

4 Oh I ese, maing Kaun, me komwi sapwellimaniki manaman koaros, oh kak ketin wia soahng koaros me komw kupwuriki ong kamwahupen aramas; eri, maing Kaun, komw ketin doahkehki sapwellimahr rekenleng takai pwukat, oh kaunopada pwe re en kak kamarainih nan rot; oh re pahn wia mehn ser marain ong kiht nan wahr akan me se kaunopadahr, pwe sen kak ahneki marain ni ahnsou me se pahn kotehla sehdo.

5 Kilang, maing Kaun, komwi kak ketin wia met. Se ese me komwi kak ketin kasalehda manaman lap, me pahn mwomwen tikitik ong marain en aramas akan.

6 Kedekedeo ahnsou me rien Sared ohlo mahsaniher mahsen pwukat, kilang, Kauno ahpw ketikihwei limehu oh ketin doahkehki rekenlenge ehu ehu takai ko. Oh kahdengo ahpw kohsang ni mesen rien Sared ohlo, oh e ahpw kilangada rekenleng en Kauno; oh e mwomwen sendinpehn aramas, duwehte mie uduk oh nta; oh rien Sared ohlo ahpw pwupwidi mwohn Kauno, pwehki e masepwehngkihda eh pwuriamwei.

7 Oh Kauno ahpw mahsaniada me rien Sared ohlo pwupwidi nan pwehlo; oh Kauno ahpw mahsanihong ih: Kesihnenda, dahme ke pwupwikihdi?

8 Oh e ahpw ndaiong Kauno: I kilangada rekenleng en Kauno, oh I masakada pwe e de kaloke ie; pwe I sohte ese me Kauno sapwellimaniki paliwar uduk oh nta.

9 Oh Kauno ahpw mahsanihong ih: Pwehki ahmw pwoson ke kilangehr me I pahn alehda paliwar uduk oh nta; oh sohte pak ehu aramas men kohdo mwohi oh ahneki soang pwoson mehlel me ke ahneki; pwe ma soh ke sohte pahn kak kilang sendinpehi. Ke kilang laudsang met?

10 Oh e sapengki: Soh; maing Kaun, komw ketin kasalehiong ie pein komwi.

11 Oh Kauno ketin mahsanihong ih: Ke kamehlele mahsen kan me I pahn koasoia?

12 Oh e sapengki: Ei, maing Kaun, I ese me komwi kin mahsanih me mehlel, pwehki komw Koht en mehlel, oh sohte kak likamw.

13 Oh ahnsou me ketin mahsanih mahsen pwukat, kilang, Kauno ahpw ketin kasalehiong pein ih reh, oh mahsanih: Pwehki ahmw esehier mepwukat ke poadoandoarsangehr pwupwidio; eri ke kopwurupwurdohngehr mwohi; eri I kasalehionguhk pein ngehi.

14 Kilang, Ih ngehi me kaunopdahr sangehte ni kepikipikdahn sampah pwe en doarehla nei aramas akan. Kilang, ngehi me Sises Krais. Ngehi me Sahmo oh Sapwellimehu. Aramas koaros pahn alehdi mour pwehki ngehi, oh me mour soutuk ong irail kan me pahn kamehlel mwahrei; oh iral pahn wiahla nei pwutak kan oh serepein kan.

15 Oh saikinte pak ehu I kasalehiong pein ngehi rehn aramas me I wiahda, pwe saikinte pak ehu aramas kamehlele ie duwehte kowe. Ke kilang me ke wiawihda rasehng ie? Iei, ni tapio aramas koaros wiawihda rasehng ie.

16 Kilang, paliwar wet, me ahnsou wet ke kilang, iei paliwar en ngeni; oh I wiahda aramas rasehng paliwar en ngeni; oh iei nin duwen ei sansalehnguhk ni ngehn I pahn mwomwen ei pahn sansalehng aramas ni paliwar.

17 Oh met, pwehki ngehi, Moronai, nda me I sohte kak wiahda ni unsek poadepen mepwukat me ntingdi, eri e pahn itar I en ndahte me Sises kasalehiong pein ih ohl menet ni ngehn, iei ni wiepen mour wet oh mwohmw en paliwarohte duwehte e kasalehiong pein ih ong Mehn Nihpai kan.

18 Oh e ketin papah ih duwehte e ketin papah Mehn Nihpai kan; oh [e wia] mepwukat koaros, pwe ohl menet e ese me iei ih Koht, pwehki doadoahk lap tohto me Kauno ketin kasalehiong ih.

19 Oh pwehki marain en ohl menet e sohte kak irairdihsang kilang palio kahdengo; oh e kilangada rekenleng en Sises, oh ahnsou me e kilangada, e pwupwikihdi eh masepwehk; pwe e esehda me iei rekenleng en Kauno mwo; oh e sohla anahne pwoson, pwe e wehwehkier, ni sohte peikasal.

20 Eri, pwehki e alehdier marain unsek en Koht, e sohte kak irairdihsang palio kahdengo; eri e kilangada Sises; oh e ahpw ketin papah ih.

21 Kedekedeo Kauno ahpw mahsanihong rien Sared ohlo: Kilang, ke sohte pahn mweidehng mepwukat me ke kilangehr oh rongehr en kohwei nan sampah, lao lel ahnsou me I pahn kalinganahla edei nan paliwar; eri, ke pahn kesempwaliki oh nekidala soahng kan me ke kilangehr oh rongehr, oh sohte kasalehiong emen aramas.

22 Oh kilang, ahnsou me ke pahn kohdo rehi, ke pahn ntingihdi oh katengepene, pwe sohte me pahn kak kawehwehda; pwe ke pahn ntingihdi ni lokaia me irail sohte pahn kak wadek.

23 Oh kilang, takai riau wet I pahn kihienguhk, oh ke pil pahn katengehdi iangahki soahng kan me ke pahn ntingihdi.

24 Pwe kilang, lokaia me ke pahn ntingkio I kapingadahr; eri I pahn wiahda ni ahnsou me I pahn koasonehdi me takai pwukat pahn kasalehda ong mesen aramas akan mepwukat me ke pahn ntingihdi.

25 Oh ahnsou me Kauno ketin mahsaniher mahsen pwukat, e ahpw kasalehiong rien Sared ohlo aramas koaros pohn sampah me ipwidier, oh me pil pahn ipwidi koaros; oh e sohte koledihsang en kilang, lao lel ni imwin sampah.

26 Pwe e ketin mahsanihong ih mwowe, ma e pahn kamehlele ih e pahn ketin kasalehiong ih soahng koaros—e pahn kasansal ong ih; eri Kauno sohte kak koledihsang ih ehu mehkot, pwe e ese me Kauno kak kasalehiong ih soahng koaros.

27 Oh Kauno ahpw mahsaniong ih: Ntingihdi mepwukat oh katengepene; oh I pahn kapwarehda ni ahnsou me I pahn koasonehdi ong aramas akan.

28 Kedekedeo Kauno ahpw mahsanihong ih me e pahn katengepene takai riauo me alehdi, oh dehr kasalehda, lao lel ahnsou me Kauno pahn ketin kasalehiong aramas akan.