1 Oh tohto soukohp kan kohdo nan mwein Kom, oh kohpada kamwomwalahn aramas akan me irail sohte pahn koluhla, oh sohpeilahng Kauno, oh uhdihsang arail kamaramas kan oh wiewia suwed kan.

2 Kedekedeo aramas akan ahpw soikalap soukohp kan, oh irail tangala rehn Kom pwe en doareirail, pwe aramas akan rapahki re en kemehla irail.

3 Oh irail kohpada ong Kom soahng tohto kei; oh e kapaikihda nan erein luhwen eh rahn akan.

4 Oh e momour lao e mahla mehlel, oh nainikihda Siplom; oh Siplom weliandi oh kakaun. Oh rien Siplom uhwongada ih, oh pwurehng tapiada mahwin lap mehlel nan sahpwo pwon.

5 Kedekedeo rien Siplom ohl ahpw kahrehda me soukohp koaros me kohpada kamwomwalahn aramas akan pahn kamakamala;

6 Oh mie kahpwal lap ehu nan sahpwo pwon, pwe irail kadehdehki me kariah lap ehu pahn kohdo nan sahpwo, oh pil ong aramas akan, oh me e pahn mie kamwomwala lap ehu rehrail, me sohte kin wiawi pohn sahpwo, oh tihrail kan pahn koaskoasoakda nan pwehl pohn sahpwo ma irail sohte pahn koluhkihla arail wiewia suwed kan.

7 Oh irail sohte rong mwahu kepitien Kauno, pwehki suwed en arail pwihn suwed kan; eri, mahwin oh pingiping tepida wiawi nan sahpwo pwon, oh pil tohto lehk kan oh soumwahu kan, kahrehda kamwomwala lap ehu wiawi, me sohte kin wiawi pohn sampah; oh mepwukat koaros wiawier nan mwein Siplom.

8 Oh aramas akan tepida koluhkihla diparail akan; oh ni ahnsou me irail wia met Kauno ahpw mahkehng irail.

9 Kedekedeo Siplom ahpw kamakamala, oh Sed ahpw lohdi nan kalidu, oh ahpw momour nan kalidu erein eh rahn akan.

10 Kedekedeo Eiah, nah pwutak, ahpw kalowehdi wehio; oh e ahpw kaunda aramas akan erein eh rahn akan. Oh e ahpw wia soangsoangen suwed koaros nan eh rahn akan, sang met e kakerehda kamaramas laud; oh eh rahn akan me mwotomwot.

11 Oh Ihdem, pwehki e wia kadaudoken Eiah, ahpw alehdi wehio; oh e pil wia me suwed erein eh rahn akan.

12 Kedekedeo nan mwehin Ihdem mie soukohp tohto ahpw kohdo, oh pwurehng kokohp ong aramas akan; ei, irail kohpada me Kauno pahn ketin kamwomwala mehlel irail sang pohn sampah ma irail sohte pahn koluhkihla diparail akan.

13 Kedekedeo mohngiong aramas akan ahpw keptakaila, oh sohte men rong arail mahsen akan; oh soukohp kan mwahieikihla oh pwurasang rehn aramas akan.

14 Kedekedeo Ihdem ahpw wia kopwung suwed erein eh rahn akan; oh e nainikihda Moron. Kedekedeo Moron ahpw weliandi oh kakaun; oh Moron ahpw wia me suwed mwohn Kauno.

15 Kedekedeo mie pingiping ehu wiawihda rehn aramas akan, pwehki pwihn suwed rir kan me wiawihda pwe re en alehdi manaman oh kepwehpwehla; oh ohl suwed kehlail men pwarada nan pwungarail, oh mahwiniong Moron, me kahrehda e kalowehdi elep en wehio; oh kolokol elep en wehio erein sounpar tohto kei.

16 Kedekedeo Moron ahpw kalowehdi ih, oh ahpw pwurehng alehdi wehio.

17 Kedekedeo pil emen ohl kehlail pwarada; oh e wia emen kadaudoken rien Sared ohlo.

18 Kedekedeo e ahpw kalowehdi Moron oh alehdi wehio; eri, Moron momour nan kalidu erein luwen eh rahn akan; oh e nainikihda Koriandor.

19 Kedekedeo Koriandor ahpw momour nan kalidu erein eh rahn akan.

20 Oh nan ahnsou en Koriandor mie pil soukohp tohto me kohdo, oh kohpada duwen soahng kesempwal oh kapwuriamwei kan, oh kalkalohngki koluhla ong aramas akan, oh ma irail sohte pahn koluhla Kauno Koht pahn kadeik irail ong arail pahn kamwomwala mehlel;

21 Oh me Kauno Koht pahn ketin kadaredo de ketin wahdo ekei pwihn me pahn sapwankihla sahpwo, sang ni sapwellime manaman, ni wiepe me e ketin wahkihdo arail pahpahko.

22 Oh irail ahpw kasohwe mahsen koaros en soukohp akan, pwehki arail pwihn rir oh suwed en arail pwihn akan.

23 Kedekedeo Koriandon ahpw nainikihda Ihder, oh e ahpw mehla, ni eh momour nan kalidu erein eh rahn akan.