1 Kedekedeo Oraia ahpw kin wia kopwung ni kadeik pwung nan sahpwo erein eh ahnsou kan, me wia ahnsou reirie mehlel.

2 Oh e nainkihda pwutak oh serepein tohto; ei, e nainkihda meh siliakan emen, sang nan pwungarail nah pwutak meh riehk silimen.

3 Kedekedeo e ahpw pil nainikihda Kip ni eh likeilapalahr. Kedekedeo Kip ahpw weliandi oh kakaun; oh Kip nainikihda Korior.

4 Oh ahnsou me Korior sounpar silihsek riau e ahpw uhwongada semehu, eri ahpw kohla oh kousoanla nan sahpw en Neior; oh e nainikihda pwutak oh serepein tohto, oh irail wiahla aramas lingan mehlel; eri Korior wiahda aramas tohto idawehnla ih.

5 Oh ahnsou me e kihpene pwihn en sounpei ehu e ahpw kohdahdo nan sahpw en Moron wasa me nanmwarikio ketiket ie, oh kalowehdi ih, me elehdahier pweidahn mahsen en rien Sared ohlo me ndahki me irail pahn lohdieng nan kalidu.

6 Met sahpw en Moron, wasa me nanmwarikio kin ketiket ie, karanihte sahpw me Mehn Nihpai kan kin kahdaniki Tehnlahr.

7 Kedekedeo Kip ahpw kin mihmi nan kalidu, oh sapwellime aramas akan pahn manaman en nah pwutak Korior, lao e likeilapalahr mehlel; ahpw Kib nainikihda Suhl nan eh likeilapalahr, ni eh wie mihmihte nan kalidu.

8 Kedekedeo Suhl ahpw lingeringerida pahn rie ohlo; oh Suhl kehlaila, oh rosonla nin duwen roson en aramas; oh e pil koaiek en wia tenek pwung.

9 Eri, e kohdo ni dohl en Ihpram, oh e ahpw inimasang ni aulo mete sdihl, oh wiahkihda kedlahs kei ong irail kan me e kahluwahla re en idawehn ih; oh mwurin eh kihong irailehr kedlahs kan e ahpw pwurala nan kahnihmw en Neior, oh mahwiniong rie ohlo Korior, sang met e ahpw kalowehdier wehio oh kapwurehiong semehu Kip.

10 Oh met pwehki dahme Suhl wiadahro, semehu eri ketikihong ih wehio; eri e ahpw tepida weliandi eh pahpao oh kakaun.

11 Kedekedeo e ahpw kin wia kopwung ni kadeik pwung; oh e katehlapahla eh wehi pohn sahpwo pwon, pwe aramas akan pokonla mehlel.

12 Kedekedeo Suhl pil nainikihda pwutak oh serepein tohto.

13 Oh Korior kaluhkihla wiewia suwed tohto me e wiahda; eri Suhl kihong ih manaman nan eh wehio.

14 Kedekedeo Korior nainikihda pwutak oh serepein tohto. Oh nan nein Korior pwutangkan mie emen me adaniki Noha.

15 Kedekedeo Noha uhwongada nanmwarki Suhl, oh pil eh pahpao Korior, oh kahluwahsang rie ohl me adaniki Kouor, oh pil riehkan oh aramas tohto.

16 Oh e mahwiniong nanmwarki Suhl, me kahrehda e kalowehdi sahpw me irail tepin sohsohkio; oh e wiahla nanmwarki en pali en sahpwo.

17 Kedekedeo e ahpw pwurehng mahwiniong nanmwarki Suhl; oh e kalowehdi nanmwarki Suhl, oh saliedi oh wahlang nan Moron.

18 Kedekedeo ni ahnsou me e pahn kemehla ih, nein Suhl pwutak kan wailong nan imwen Noha nihpwongo oh kemehla ih, oh kawehla wenihmw en imwetengo oh wahieido semerailo, oh kihong ih pohn mwoalehu nan pein eh wehi.

19 Eri, nein Noha pwutak kan ahpw weliandi oh kaukawada eh wehio; ahpw irail sohte powehdi nanmwarki Suhl, oh aramas akan me mih pahn manaman en nanmwarki Suhl ahpw kekeirida mehlel oh kehlaila.

20 Oh wehio pwalpeseng; oh wehi riau mie, wehin Suhl, oh wehin Kouor, nein Noha pwutak.

21 Oh Kouor, nein Noha pwutako, ahpw wiahda nah aramas akan en mahwiniong Suhl, oh Suhl ahpw kemeirail oh ahpw kemehla Kouor.

22 Oh met Kouor naineki pwutak emen me adaniki Nimrod; oh Nimrod mweidala wehin Kouor ong Suhl, oh e ahpw kenikenla rehn Suhl; eri Suhl ahpw ketikihong ih mweimwei laud, oh e ahpw kin kak wia nsene nan wehin Suhl nin duwen eh ineng kan.

23 Oh pil nan mwein Suhlo mie soukohp kei kohdo rehn aramas akan, me Kauno ketin kadaredo, kokohpiki me ehn aramas akan arail wiewia suwed kan oh pwongih dikadiken eni kan kahkahrehdiong keria pohn sahpwo, oh irail pahn kamwomwala ma irail sohte pahn koluhla.

24 Kedekedeo aramas akan ahpw uhwongada soukohp kan, oh kapailoke irail. Kedekedeo nanmwarki Suhl ahpw ketin kadeikada ni pwung irail koaros me uhwongada soukohp kan.

25 Oh e ahpw ketin kamanahla kosonned ehu nan sahpwo pwon, me kihong soukohp kan manaman en kohwei sohte lipilipil wasa me irail men; oh sang wiepe wet aramas akan wisikdohng koluhla.

26 Oh pwehki aramas akan ar koluhkihlahr diparail akan oh arail pwongih dikadiken eni kan, Kauno ahpw ketin kupwureirailla, oh irail pwurehng tepida pweida nan sahpwo. Kedekedeo Suhl nainikihda pwutak oh serepein kei nan eh likeilapalahr.

27 Oh sohla mahwin wiawi nan mwein Suhl; oh e kin tamataman soahng kesempwal akan me Kauno ketin wiahiong eh pahpa ko ni e ketin wairaildo oh kohla wasa loal kohdohng nan sahpw en inou; eri e kin wia kopwung ni kadeik pwung erein eh ahnsou.