1 Oh met ngehi, Moronai, pahn uhsehla kanekehla ei ntingih duwen kamwomwalahn aramas akan me I ntintingih.

2 Pwe kilang, irail kasohwehier ehn Ihder mahsen kan koaros; pwe e ndahiong irail soahng koaros ni mehlel, sangete ni tepin aramas; oh me mwurin pihl akan eh pwuredihsang pohn sahpw koaros e wiahla sahpw pilipilda ehu sang sahpw koaros, sahpw me Kauno ketin pilada; eri Kauno ketin kupwuriki me aramas koaros me pahn kousoan pohn sahpwo pahn papah ih;

3 Oh me e pahn wia wasa me Serusalem Kapwo pahn mih, me pahn kohdihdo sang nanleng, oh pahn wia sapwellimen Kauno tehnpas sarawi.

4 Kilang, Ihder kilangada sapwellimen Krais rahn akan, oh e koasoia duwen Serusalem Kapwo pohn sahpwet.

5 Oh e pil koasoaia duwen peneinei en Israel, oh Serusalemo wasa me Lihai pahn kohsang ie—mwurin e pahn kamwomwala e pahn pwurehng wiawihda, kahnihmw sarawi ong Kauno; eri, e sohte kak wia Serusalem kapw pwehki e sang mahs; ahpw e pahn pwurehng wiawihda, oh wiahla kahnihmw sarawi ong Kauno; oh e pahn wiawihda ong peneinei en Israel—

6 Oh me Serusalem Kapw pahn wiawihda pohn sahpwet, ong luhwen kadaudok en Sosep, me soahng pwukat wia karasepe ehu.

7 Pwe nin duwen Sosep eh wahlahng semehu nan sahpw en Isip, iei e ahpw kepinsalehdala wasahu; eri, Kauno ketin wahdosang luhwen kadaudok en Sosep sang nan sahpw en Serusalem, pwe en kak ketin kupwurehla kadaudoken Sosep kan pwe irail en dehr mehla, duwehte e ketin kupwurehla semen Sosepo pwe e dehr mehla.

8 Eri, luhwen peneinei en Sosep kan pahn kokouda pohn sahpw wet; oh e pahn wia sahpwarail sahpw en sohso; oh irail pahn wiahda kahnihmw sarawi ehu ong Kauno, duwehte Serusalem en mahso; oh irail sohla pahn namenekla, lao lel ni imwilahn ahnsou me sampah pahn imwisekla.

9 Oh e pahn mie nanleng kapw ehu oh sampah kapw ehu; oh re pahn duwehte mehn mahso ahpw mehn mahso pahn imwisekla, oh soahng koaros pahn kapwala.

10 Oh Serusalem Kapwo ahpw pahn kohdo; oh meid pahi irail me pahn kousoan wasahu, pwe iei irail me arail likou karmend kan pwetepwetala sang ni ntahn Sihmpwulo; oh irail me pahn wadawadiong rehn luhwen kadaudok en Sosep kan, me wia kisehn peneinei en Israel.

11 Oh Serusalem en mahso ahpw pil pahn kohdo; oh toweh kan, meid pai irail, pwe irail kamwakeldahr nan ntahn Sihmpwulo; oh irail iei me mwerpesengehr oh kopwurupwurpenehr sang ni keimw pahieu en sampah, oh sang ni wehi kan en paliepeng, oh alehdier pweidahn inouo me Koht ketin inoukihong samarail, Eipraam.

12 Oh ahnsou me soahng pwukat pahn kohdo, pwuhk sarawio pahn pweida me ketihtihki, me irail kan me pahn tiheng, pahn mwurihla; oh me pahn mwurih kan, pahn tihengla.

13 Oh I ahptehn pahn ntingih ekei, ahpw I sohte mweimweiong; ahpw ehn Ihder kokohp kan me kesempwal oh kapwuriamwei; ahpw re sohte kin wiahki ih mehkot, oh kausala ih; oh e kin rukuruk nan pwoar en paip ehu ni rahn, oh nihpwong e kin kowei oh kilikilang soahng kan me pahn kohdohng aramas akan.

14 Oh ni eh wie koukousoan nan pwoar en paip ehu, e ahpw wiahda luhwen poadoapoad wet, kilikilang kamwomwala kan me kohdohng aramas akan, nihpwong.

15 Kedekedeo me nan pahrohte me e pekousang rehn aramas akan mie mahwin lap ehu wiawihda rehn aramas akan, pwe me tohto me uhda, me wia ohl kehlail kei, oh rapahki re en kemehla Koriandumer sang ni arail koasondi en wiewia suwed rir kan, me kosoiepe wiawiher.

16 Oh met Koriandumer, pein onopkier, wiepen mahwin koaros oh widing en sampah pwong, eri e mahwiniong irail kan me rapahki re en kemehla ih.

17 Ahpw e sohte koluhla, pil iangahki nah pwutak oh serepein kaselel kan; de pil nein Kohor pwutak oh serepein kaselel kan; de pil nein Korior pwutak oh serepein kaselel kan; oh ni mehlel, sohte pwutak oh serepein kaselel men pohn sampah me koluhkihla diparail kan.

18 Eri, kedekedeo me ni tepin pahr me Ihder koukousoan nan pwoar en paipo, mie aramas tohto me kamakamala pahn nein pwihn suwed rir kan neirail kedlahs kan, me pepeiong Koriandumer pwe re en kak alehdi wehio.

19 Kedekedeo nein Koriandumer pwutangkan pei kehlail oh nta kusila laud.

20 Oh nan keriau en pahro mahsen en Kauno ahpw kohdohng Ihder, me e pahn kohla oh kohpehng Koriandumer me, ma e pahn koluhla, oh tohn imwe koaros, Kauno pahn ketikihong ih sapwellime wehio oh doarehla aramas akan—

21 Ma soh re pahn kamwomwala, oh tohn imwe pwon ihte ih me pahn luhwehdi. Oh e pahn momour oh kilangidi pweidahn kokohp kan me kohpadahr duwen ekei aramas me pahn alehdi sahpwo pwe en wia arail sohso; oh irail pahn sarepidi Koriandumer; oh koaros pahn kamwomwala ihte Koriandumer.

22 Kedekedeo Koriandumer ahpw sohte koluhla, de pil tohn imwehu, de pil aramas akan; oh mahwino sohte uhdi; oh irail rapahki re en kemehla Ihder, ahpw e kin sepohsang mworail oh pwurehng rukila nan pwoaren paipo.

23 Kedekedeo Sahred ahpw pil uhda, oh e pil mahwiniong Koriandumer; oh e keme ih, kahrehda ni rahn kesiluhwo e ahpw kalowehdi ih nan kalidu.

24 Oh nan pahr kapahieu, nein Koriandumer pwutak kan ahpw keme Sahred, oh ahpw pwurehng alehdi wehio ong arail pahpao.

25 Met mahwing pwurehng tepida wiawi pohn sahpwo pwon, aramas koaros iang eh pwihn mahmahwinki dahme e inangih.

26 Oh mie lipirap kei, oh ni mehlel, soangen wiewia suwed koaros mih pohn sahpwo pwon.

27 Kedekedeo Koriandumer udahn lingeringer pahn Sahred, oh kohlahng mahwinkihong ih nah sounpei kan; oh irail tuhpene nan arail lingeringer laud, oh irail tuhpene nan wahu en Kilkal; oh mahwino doarala mehlel.

28 Kedekedeo Sahred ahpw mahwiniong ih erein rahn siluh. Kedekedeo Koriandumer ahpw kemehda, oh ahpw pwakih ih lao e kohla nan patapat en Eslon.

29 Kedekedeo Sahred ahpw mahwiniong ih nan wasa patapat kan; oh kilang, e ahpw kemehda Koriandumer, oh pwurehng pwakiala ih nan wahu en Kilkal.

30 Oh Koriandumer ahpw pwurehng mahwiniong Sared nan wahu en Kilkal, wasa me e keme Sahred oh kemehla ih.

31 Oh Sahred kauwehla dengen Koriandumero, oh e sohte pwurehng mahwinki erein sounpar riau, nan ahnsou me aramas kan koaros pohn sahpwo wie kamkamaramas, oh sohte emen me kak kauhdi irail.