Iralaud 8
Mie akamai oh pingiping nan wehio—Akis wiahda pwihn suwed rir ehu me ehukipene arail kauhla en kemehla nanmwarikio—Pwihn suwed rir kan iei ehn tepilo oh kin elehiong kamwomwalahn wehi kan—Mehn Liki kan en mwei wet pahn kaparikin irail pwihn suwed rir me pahn song en kawehla saledek en sahpw koaros, wehi kan, oh wehin sahpw koaros.
1 Kedekedeo e ahpw nainikihda Omer, oh Omer weliandi oh kakaun. Oh Omer nainikihda Sared; oh Sared nainikihda pwutak oh serepein kei.
2 Oh Sared uhwongada eh pahpao, oh kohla oh kousoanla nan sahpw en Ehd. Kedekedeo e ahpw ketewehdi aramas tohto, pwehki e koasoi en widing kan, lao elep en tohn wehio idawehnla.
3 Oh ahnsou me e kalowedier elep en wehio e ahpw mahwiniong eh pahpao, oh e ahpw kalowehdi oh wahsang eh pahpao, oh wiahiong en papah nan kalidu;
4 Oh met, nan erein rahn akan en mwein Omer e mihmihki nan kalidu elepin eh rahn akan. Kedekedeo e ahpw nainikihda pwutak oh serepein kei, sang nan pwungarail Esrom oh Koriandumer;
5 Oh irail udahn lingeringer pwehki wiewiahn kan en riarail ohl Sared, kahrehda irail kihpene pwihn en sounpei ehu oh kohla mahwiniong Sared. Kedekedeo irail ahpw mahwiniong ih nihpwong.
6 Kedekedeo ahnsou me irail kemehla nein Sared sounpei kan oh ni ahnsou me irail pahn pil kemehla ih; e ahpw peki rehrail me irail en dehr kemehla ih, oh e pahn mweidala wehio ong eh pahpao. Kedekedeo irail ahpw mweidehng en mourla.
7 Oh met Sared pahtoula mehlel pwehki lohdi en eh wehio, pwe eh mohngiong inangih kolokolete eh wehio oh lingan en sampah.
8 Met nein Sared serepein me koaiek mehlel, oh pwehki e kilang pahtou me eh pahpa tungoaleniki, e ahpw medewehda en wiahda koasoandi ehu me e pahn kak kapwurehiong wehio rehn eh pahpao.
9 Met nein Sared serepeino me lingan mehlel. Kedekedeo e ahpw koasoieng eh pahpao, oh ndaiong ih: Dahme kahrehda ei pahpa pahtouki? E saikinte wadek poadoapoad kan me atail pahpa ko wa kohdo kotehkihdo wasa loal? Kilang, e sou mie poadepen irail mehn mahs oko, me sang ni arail koasondi rir kan irail kin kalowehdi wehi kan oh ling lap?
10 Oh met, eri, ei pahpa pahn lukehdo Akis, nein Kimnor pwutak; oh kilang, I me kaselel, oh I pahn kahlek mwowe, oh kapereniada, kahrehda e pahn inangih I en wiahla eh pwoud; eri ma e pahn inangih me ke pahn mweidada I en wiahla eh pwoud, a ke pahn ndaiong: I pahn mweidehnguhk ma ke pahn wahdo mongen ei pahpa, nanmwarikio.
11 Oh met Omer wia kepoakepahn Akis; eri, ahnsou me Sared lukehdo Akis, nein Sared serepeino ahpw kahlek mwowe oh e kapereniada, kahrehda e inangiada me en wiahla eh pwoud. Kedekedeo e ahpw ndaiong Sared: Mweidehng en wiahla ei pwoud.
12 Oh Sared ndaiong ih: I pahn mweidehng uhk, ma ke pahn wahdo moangen ei pahpao, nanmwarikio.
13 Kedekedeo Akis ahpw kapokonepene peneinei en Sared, eh peneinei koaros, oh ndaiong irail: Kumwail kahukihong ie me kumwail pahn loaloapwoatohng dahme I pahn anahne sang kumwail?
14 Kedekedeo irail koaros ahpw kahukihong ih, sang Koht en nanleng, oh pil sang nanleng kan, oh pil sang sampah, oh sang moangerail kan, me mehmen me pahn kasapwungehla koasondi me Akis inangih e pahn lupsang moange; mehmen me pahn kadila sohte lipilipil dahme Akis kasalehiong irail, e pahn kamasang eh mour.
15 Kedekedeo irail ahpw pwungkihda ehn Akis koasoandio. Oh Akis ahpw kihong irail kahula kan me kin kohieng irail mehn mahs oko me kin rapahki manaman, me kin wie pepeusdo sang rehn Kein, me wia en sounkamaramas sangete ni tapio.
16 Oh irail kin wie kolokol sang ni manaman en tepilo pwe en kihong kahula pwukat rehn aramas akan, pwe en kolokol irail nan rotorot, pwe en sowese me rapahki manaman en alehdi manaman, oh kamaramas, oh kulih, oh likamw, oh wiahda soangen wiewia suwed kan oh nenek koaros.
17 Oh iei nein Sared serepeino me karehda e kihong nan eh mohngiong en rapahkihda mepwukat sang mehn mahs oko; oh Sared kihong nan mohngiong en Akis; eri, Akis kihong eh peneinei oh kepoakepah kan, kakahluwahsang irail sang ni eh inou kan pwe en wia sohte lipilipil dahme e inangih.
18 Kedekedeo irail ahpw wiahda pwihn suwed rir ehu, duwehte irail mehn mahs oko; me wia pwihn me keieu sakanakan oh suwed sang koaros, mwohn silangin Koht;
19 Pwe Kauno sohte kin ketin doadoahk ni wiepen pwihn suwed rir kan, de pil mahsanih me aramas en kakerehdi nta, ahpw nan soahng koaros e kin ketin irehdi, sangete ni tepin aramas.
20 Oh met ngehi, Moronai, sohte pahn ntingihdi mwomwen arail kahula kan oh wiepen arail pwihn, pwe e sansalohng ie me e mie rehn aramas koaros, oh e pil mih rehn Mehn Leimen kan.
21 Oh e kahrehda kamwomwalahn aramas pwukat me ahnsou wet I wie kosokosoia, oh pil kamwomwalahn araman en Nihpai.
22 Oh sohte lipilipil wehi me pahn utungada soangen pwihn suwed rir wet, pwe re en alehdi manaman oh kekeirki, loa irail doupeseng nan wehio pwon, kilang, re pahn kamwomwala; pwe Kauno sohte pahn mweidehng ntahn sapwellime souleng kan, me pahn kamakamala pahrail, en ahnsou koaros eker ih sang nan pwehl pwe en dupukiong irail oh ahpw e sohte kin dupukiong irail.
23 Eri, Kumwail Mehn Liki kan, e wia sapwellimen Koht eripit me mepwukat en sansalohng kumwail, pwe kumwail en kak koluhkihla dipamwail kan, oh dehr mweidehng mwekid en pwihn en kamaramas pwukat en kohla pohmwail, me kin wiawihda pwe en alehdi manaman oh kekeirki—oh doadoahko, iei, doadoahk en kamwomwala kohieng kumwail, iei, kedlahs en kopwung en Koht Soutuk pahn pwupwidi pohmwail, pwe en keseikumwaildi oh kamwomwkumwailla ma kumwail pahn mweidehng mepwukat en pweida.
24 Eri, Kauno ketin mahsanihonguhk, ahnsou me ke pahn kilang mepwukat wiawihong kumwail pahn kehnda irair keper me kumwail mih loale, pwehki pwihn suwed rir wet me mih rehmwail; oh meid suwediong, pwehki ntahn irail me kin kamakamala; pwe re kin sengiseng sang nan pwelpar pwe en dupukiong, oh pil irail kan me poahsonkihda.
25 Pwe ahnsou pahn kohdo me mehmen me pahn poahsonkihda pahn rapahki en kawehla saledek en sahpw koaros, wehi koaros, oh wehin sahpw koaros; oh e kin elehda kamwomwalahn aramas koaros, pwe tepilo me wia poahsonpe, me iei pahpahn likamw koaros; iei ihte soun wie likamw me ketewehdi tepin atail pahpa oh nohno, iei, ihte ihte soun wie likamw me kahrehda aramas e kamaramas sangete ni tapio; me kahrehda mohngiong en aramas akan keptakaila oh kemehla soukohp kan, oh kostakaih irail, oh keseirailla sangete ni tapio.
26 Eri, ngehi, Moronai, alehdier kehkehlik me I pahn ntingihdi mepwukat pwe suwed en kak imwisekla, oh me ahnsouo pahn kohdo me Sehdan sohte pahn ahneki manaman nan mohngiong en aramas akan, ahpw irail pahn ngoangki wiewia mwahu ahnsou koaros, pwe irail en kak kohdo ni pwarer en mour pwung koaros oh komourla.