1 Kedekedeo ahnsou me Koriandumer maiaudahsang eh ohla kan, e ahpw tepida tamanda mahsen kan me Ihder mahsanihong ih.

2 E kilangehr me nah aramas akan me kamakamkihlahr kedlahs kereniongehr lel aramas riarar, oh e tepida pahtou nan eh mohiong; iei, ohl kehlail akan, oh arail pwoud kan, oh neirail seri kan me kamakamala meh riarar.

3 E tepida koluhkihla suwed me e wiahdahr; e tepida tamanda mahsen kan me soukohp kan koaros mahsaniher, oh e kilangehr me pwonte pweidahr, ni pisetikpe; oh palingeni mwahieiki oh sohte men nsanamwahla.

4 Kedekedeo e ahpw ntingihda kisin likou ehu ong Sihs, ni eh inangih en kamourala aramas kan, oh en mweidala wehio pwe en doarehla ehn aramas kan mour.

5 Kedekedeo ahnsou me Sihs alehdier nah kisin likouo e ahpw ntingihda ehu kisin likou ong Koriandumer, ma e pahn mweidala pein ih, pwe en kak kemehkihla ih pein nah kedlahs, ih met me e pahn mweidikihla aramas akan en mourla.

6 Kedekedeo aramas akan sohte koluhkihla diparail akan; oh nein Koriandumer aramas akan mwekidikihda arail lingeringer pahn nein Sihs aramas akan; oh nein Sihs aramas akan mwekidikihda arail lengeringer pahn nein Koriandumer aramas akan; eri, nein Sihs aramas akan mahwiniong nein Koriandumer aramas akan.

7 Oh ahnsou me Koriandumer kilangada me e pahn kereniongehr pwupwidi e ahpw pwurehng tangasang mwohn nein Sihs aramas akan.

8 Kedekedeo e ahpw kohdo ni pihl akan en Riplienkum, me, wehwehki, lapala, de lapalahsang koaros; eri, ahnsou me irail kohdo ni pihl pwukat irail kauwada imwarail impwal akan; oh Sihs pil kauwada impwal akan karanih irail; oh eri mandahsang rahno irail ahpw kohdo mahwin.

9 Kedekedeo irail pei nan mahwin doar mehlel ehu, me kahrehda Koriandumer pwurehng alehdi ohla, oh e lupungmaskihla nta e kerasang.

10 Kedekedeo nein Koriandumer sounpei kan ahpw nantihong mahwin kehlailiong nein Sihs sounpei kan kahrehda irail keme irail, kahrehda arail tangasang mwohrail; oh irail tang kohla palieir, oh ahpw kauwada imwarail impwal kan wasa me adaniki Okad.

11 Kedekedeo nein Koriandumer sounpei kan ahpw kauwada imwarail impwal akan karanih ni dohl en Rama; oh iei ih dohlo me ei pahpa Mormon ekihla poadoapoad kan ong Kauno, me sarawi.

12 Kedekedeo irail ahpw kihpene aramas koaros me mih pohn sahpwo pwon, me saikinte kamakamala, ihte Ihder me soh.

13 Kedekedeo Ihder ahpw kilang wiewia kan koaros en aramas akan; oh e kilang me aramas akan me uhki Koriandumer kohpene iangala nein Koriandumer sounpei kan; oh aramas akan me uhki Sihs kohpene iangala nein Sihs sounpei kan.

14 Eri, erein sounpar pahieu me ira kihkihpene aramas akan, pwe ira en kak alehdi koaros me mih pohn sahpwo, oh pwe ira en kak alehdi kakehlail koaros me ira kak alehdi.

15 Kedekedeo ahnsou me irail koaros kohpene, emen emen ong pwihn en sounpei me irail men iang, iangahki arail pwoud kan oh neirail seri kan—koaros ohl akan, lih akan, oh seri kan alehda dipwisou en mahwin kan, mehn sansar kan, tehtehn mwarmware kan, lisoarop kan, oh likouki likoun mahwin kan—irail ahpw emente karihsehng emen pwe en mahwin; oh irail mahwin rahno pwon, oh sohte me pweida.

16 Kedekedeo ahnsou me e nihpwongdi irail pwangada, oh pwuralahng wasahn arail komoal; oh mwurin arail pwuralahng wasahn arail komoal kan irail kin weriwer oh sengisengki neirail aramas me mehla kan; oh arail weriwer kan me kehlail mehlel, oh sengiseng oh mwahiei kan, kahrehda re katohrepeseng nan wehwe ni mehlel.

17 Kedekedeo mandahsang rahno irail ahpw pwurehng pwurala mahwin, oh rahno me kamasepwehk mehlel; ahpw, irail sohte pweida, ahnsou me e nihsoutikdi irail pwurehng katohrehkipeseng nan wehweh arail weriwer kan, oh sengiseng kan, oh mwahiei kan, pwehki kamakamalahn neirail aramas kan.

18 Kedekedeo Koriandumer ahpw pwurehng ntingihda kisin likou ehu ong Sihs, me e inangih en dehr pwurehng kohdo mahwin, ahpw me en ale wehio, oh mweidehng aramas akan en mourla.

19 Ahpw kilang, Ngehn en Kauno uhdihsang ieiang irail, oh Sehdan ahneki manaman unsek pohn mohngiong en aramas akan; pwe irail mweidala mohngiongarail kan en keptakaila, oh maskunlahn arail madamadau kan kahrehda irail pahn kamwomwala; eri irail pwurehng kohla mahwin.

20 Kedekedeo irail pei rahno pwon, oh ahnsou me e nihpwongdi irail meir pohn neirail kedlahs kan.

21 Oh mandahsang rahno irail pei lao lel nihpwong.

22 Oh ahnsou me e nihpwongdi irail sakaukihla arail lingeringer, duwehte aramas men me sakaukihla wain; oh irail meirla pohn neirail kedlahs kan.

23 Oh mandahsang rahno irail pwurehng peipene; oh ahnsou me e nihpwongidi irail koaros mehkihla kedlahs ihte meh limehk riemen nein Koriandumer arams, oh meh wenehk duwemen nein Sihs aramas.

24 Kedekedeo irail meirla pohn neirail kedlahs kan nihpwongo, oh manda rahno irail pwurehng peipene, oh irail peikipene neirail kedlahs kan oh iangahki arail mehn sansar kan ni kehlail ni rahno pwon.

25 Oh ahnsou me e nihpwongidi nein Sihs aramas mehte siliakan riemen, oh nein Koriandumer aramas mehn riehk isimen.

26 Kedekedeo irail ahpw mwonge oh meir, oh kaunopadahng mehla lakapw. Oh irail wia ohl lapalap oh kehlail kei nin duwen kehlail en ohl akan.

27 Kedekedeo irail ahpw peiki erein awa siluh, oh irail lupungmaskihla nta eh kerasang irail.

28 Kedekedeo ahnsou me nein Koriandumer ohl akan alehdi kehlail me itarehng re en kak alu, irail ahpwtehn pahn tang pwe re en mourla; ahpw kilang, Sihs kesihnenda, oh pil nah ohl akan, oh e kahukihla ni eh lingeringer me e pahn kemehla Koriandumer de e pahn mehkihla kedlahso.

29 Eri, e ahpw pwakih irail, oh madahsang rahno e koliraildi; oh irail pwurehng peikipene kedlahs. Kedekedeo ahnsou me irail koaros pwupwikihdier kedlahs, ihte Koriandumer oh Sihs, kilang Sihs lupungmaskihla nta eh kerasang.

30 Kedekedeo ahnsou me Koriandumer idengeklahr pohn nah kedlahso, e ahpw ekis komoal, e ahpw lupukasang moangen Sihs.

31 Kedekedeo mwurin e lupukasangehr moangen Sihs, Sihs ahpw kihda pehko oh pwupwidi; oh mwuri e ahpw song en esingek, e ahpw mehla.

32 Kedekedeo Koriandumer ahpw pwupwidi pohn pwehlo, oh duwehla me sohte eh mour.

33 Oh Kauno ahpw mahsaniong Ihder, oh mahsanihong ih: Kohwei. Oh e ahpw kohla, oh kilang me mahsen kan koaros en Kauno pweidahr; oh e ahpw kanekehla eh ntingih poadoapoad; (oh pali epwiki kei I sohte ntingihdi) oh e ekihla ni mwohmw ehu me nein Limai aramas akan diarada.

34 Met kaimwseklahn mahsen kan me Ihder ntingihdi iei mepwukat: Ma Kauno ketin kupwuriki me I en kiewekla, de I en mihmihte nan paliwar wet oh lokolongki dahme Kauno kupwuriki, e sohte katepe, dahme kesempwal ma I pahn kemourla nan wehin Koht. Ahmen.