1 Kedekedeo mwehin Ihder e mih nan mwehin Koriandumer; oh Koriandumer me wia nanmwarki en sahpwo pwon.

2 Oh Ihder wia soukohp en Kauno; eri Ihder ahpw kohdo nan mwehin Koriandumer, oh tepida kokohp ong aramas akan, pwe e sohte kak kapweiek pwehki Ngehn en Kauno me ketin ieiang.

3 Pwe e kalkalohk sang nimenseng, lao lel ahnsou me ketipino kikihrla, kangkangoangehki aramas akan en kamehlele Koht ni ar pahn koluhla pwe irail de kamwomwala, ndindahiong irail me sang ni pwoson mehkoaros pahn pweida—

4 Eri, mehmen me pahn kamehlele Koht kak koapworopworiki mehlel ehu sampah mwahu, iei, ni pali maun en Koht, koapworopwor wet kohdo sang ni pwoson, me kin wiahla angkehn palingehn en aramas akan, me kak wiahiong irail en kehlail oh tengeteng, kalapw wiwia doadoahk mwahu kan, oh pahn kaluwahlang en kalingana Koht.

5 Kedekedeo Ihder ahpw kohpada soang kesempwal oh kapwuriamwei kan ong aramas akan, me irail sohte kamehlele, pwehki irail sohte kilang.

6 Oh met, ngehi, Moronai, pahn koasoia ekis duwen mepwukat; I pahn kasalehiong sampah me pwoson iei soahng kan me [kitail] kin koapworopworki oh sohte kilang; eri, dehr peikasal pwehki ke sohte kilang, pwe ke sohte pahn alehdi kadehdehu lao lel mwurin songosong en ahmw pwoson.

7 Pwe sang ni pwoson me Krais ketin kasalehiong pein ih atail pahpa kahlapoko, mwurin eh iasadahsang mehla; oh e sohte ketin kasalehiong irail pein ih lao irail pwoson ih; eri, e udahn anahnepe me ekei pwoson ih, pwe e sohte ketin kasalehiong sampah pein ih.

8 Ahpw pwehki ehn aramas akan ar pwoson me e ketin kasalehiong sampah pein ih, oh kalinganahla maren semehu, oh kaunopada ahlo pwe mehtei kan en kak tungoale kisakis en nanleng, pwe irail en kak koapworopworki soang kan me re sohte kin kilang.

9 Eri, kumwail en pil ahneki koapworopwor, oh tungoale kisakiso, ma kumwail pahn ahneki pwoson.

10 Kilang sang ni pwoson me irail mehn mahs oko malipilipiong nan koasondi sarawi en Kohto.

11 Eri, sang ni pwoson me kosonned en Moseso kohkihdo. Ahpw sang ni kisakis en Sapwellime Iehroso, Koht ketin kaunopadahr ahl me kaselel sang; oh sang ni pwoson me e ketin pwekidahr.

12 Pwe ma sohte pwoson rehn aramas akan, Koht sohte kak wia doadoahk kapwuriamwei rehrail; eri, e sohte kin kasalehiong irail pein ih lao irail pwoson.

13 Kilang, iei sang ni ehn Alma oh Amulek ara pwoson me elehda imwetengo en mweredi nan pwehl.

14 Kilang, iei sang ni ehn Nihpai oh Lihai ara pwoson me kahrehda Mehn Leimen kan wekila, me kahrehda irail papidaiskihla kisiniei oh Ngehn Sarawi.

15 Kilang, iei sang ni ehn Amon oh rieh kan arail pwoson me kahrehiong arail wia doadoahk kapwuriamwei lap akan rehn Mehn Leimen kan.

16 Ei, oh irail koaros me wiahda doadoahk kapwuriamwei kan wia sang ni pwoson, iei irail kan me kohdo mwohn Krais oh pil irail kan me kohdo mwuri.

17 Oh iei sang ni pwoson me tohnpadahk silimeno alehdi inou ehu me irail sohte pahn kehndi mehla; oh irail sohte alehdi lao mwurin irail pwosonla.

18 Oh sohte pak ehu me aramas emen wia doadoahk kapwuriamwei kan lao mwurin irail pwosonla; eri irail kamehlele mahs Sapwellimen Kohto.

19 Oh mie me tohto me arail pwoson udahn kehlail, iei mwohn Krais eh ketido, irail sohte kak kolkoldi palie kahdengo, ahpw ni mehlel kilangkihdi mesarail kan soahng kan me irail kilangki arail pwoson, oh irail peren.

20 Oh kilang, se kilangehr nan poadoapoad wet me emen irail iei rien Sared ohlo; pwe e pwoson Koht me lap mehlel, me ni ahnsou me Koht ketikihwei sapwellime rekenlengo e sohte kak ekihsang rien Sared ohlo en kilang, pwehki sapwellime mahsen me e ketin mahsaniong ih, mahseno me e alehdi sang ni pwoson.

21 Oh mwurin rien Sared ohlo e kilangadahr rekenleng en Kauno, pwehki inou me rien Sared ohlo alehdi sang ni pwoson, Kauno sohte kak koledihsang ih en kilang mehkoaros; eri e ketin kasalehiong ih soahng koaros, pwe e sohlahr kak kolokolete palio kahdengo.

22 Oh iei sang ni pwoson me ei pahpa ko alehkihdi inou me mepwukat udahn pahn kohdo rehn riarail kan sang Mehn Liki kan; eri Kauno, Sises Krais, me ketin mahsanihong ie.

23 Oh I patohwanong ih: Maing Kaun, Mehn Liki kan pahn kauwe mepwukat, pwehki aht luwet nan nting; Maing Kaun, pwehki omwi ketin wiahiong kiht sen koaiek nan koasokosoi sang ni pwoson, ahpw komwi sohte ketin wiahiong kiht sen koaiek nan nting; pwe komwi ketin wiahiong aramas pwukat koaros en kak koasoi kehlail, pwehki Ngehn Sarawi me komwi ketikihong irailehr;

24 Oh komwi ketin wiahiong kiht sen kak ekiste nting, pwehki soakoaiek en peht kan. Kilang, komwi sohte ketin wiahiong kiht sen koahiek nan nting duwehte rien Sared ohlo, pwe komwi ketin wiahiong ih en kak ntingihdi soahng kan ni koahiek duwehte pein komwi, kahrehda e kin manaman ong aramas en wadek.

25 Komwi pil ketin wiahiong aht koasoai kan en manaman oh kehlail, iei kahrehda se sohte kak ntingihdi; eri, ahnsou me se kin nting se kin kilang aht luwet, oh sapwungala pwehki koasoanepen aht koasoai kan; oh I periki pwe Mehn Liki kan deh pahn kauwe aht koasoai kan.

26 Oh ahnsou me I ndahier met, Kauno ketin mahsanihong ie, ndinda: Me pweipwei kan me kin kauwe, ahpw irail pahn mwahiei; oh ei kalahngan pahn itarohng me mpai kan, kahrehda arail sohte pahn kak doadoahngki amwail luwet oh kawehkin kumwail;

27 Oh ma aramas akan kohdo rehi, I pahn kasalehiong irail arail luwet kan. I kihong aramas akan luwet pwe irail en kak karakarahkala; oh ei kalahngan itarohng aramas akan koaros me pahn karakarahkala mwohi; pwe ma irail pahn karakarahkala mwohi, oh pwosoniehla, I ahpw pahn wiahiong soahng kan me luwet en wiahla mehkot kehlail ong irail.

28 Kilang, I pahn kasalehiong Mehn Liki kan arail luwet kan, oh I pahn kasalehiong irail pwoson, koapwoaroapwoar oh limpoak unsek me kin wahdohng ie—utuhnpil en mour pwung koaros.

29 Oh ngehi, Moronai, mwurin ei rongehr mahsen pwukat, alehdier popohl, oh nda: Maing Kaun, kupwuromwi me pwung en pweida, pwe I ese me komwi kin ketin wia sapwellimomwi doadoahk ong aramas akan nin duwen arail pwoson;

30 Pwe rien Sared ohlo mahsanihong nahnahn Serin, Mwekid—oh e ahpw mwekida. Oh ma e sohte ahneki pwoson e sohte pahn kak mwekida; eri komwi kin ketin doadoahk mwurin aramas akan arail kin ahneki pwoson.

31 Pwe ih mwomwen omwi kasalehiong pein komwi ong sapwellimomwi tohnpadahk kan; pwe mwurin arail pwoson, oh ahpw koasoaiki mwaromwi, komwi ahpw ketin kasalehiong irail pein komwi ni manaman laud.

32 Oh I pil tamataman me komwi ketin mahsanih me komwi kaunopadahr wasahn kousoan ong aramas, iei, sang nan tehnpas akan en Sahmo, wasa me aramas akan kak koapwoaroapwoariki mehlel; eri aramas anahne koapwoaroapwoar, ma soh e sohte kak alehdi sohsohn wasa me komwi ketin kaunopadahr.

33 Oh pil, I tamataman me komwi ketin mahsani me komwi ketin poakehng sampah, me kahrehda omwi ketin pwilikihdier omwi mour pwehki sampah, pwe komwi en kak pwurehng alehda ong kaunopada dowen aramas akan.

34 Oh met I ese me limpoak wet me komwi sapwellimaniki ong aramas akan iei limpoak unsek; eri, ma aramas akan sohte pahn ahneki limpoak unsek irail sohte pahn kak sohsohki wasa me komwi ketin kaunopadahr nan tehnpas akan en Sememwio.

35 Eri, I ese sang met me komwi ketin mahsani, ma mehn Liki kan sohte pahn ahneki limpoak unsek, pwehki aht luwet, komwi pahn ketin song irail, oh ketikihsang irail arail koaiek, iei, dahme irail alehdiero, oh ketikihong irail akan me pahn ahneki laud.

36 Kedekedeo I ahpw kapakap ong Kauno pwe en ketikihong Mehn Liki kan kupwur kalahngan, pwe irail en kak ahneki limpoak unsek.

37 Kedekedeo Kauno ahpw mahsanihong ie: Ma irail sohte pahn ahneki limpoak unsek e sohte pahn katapan ong komwi, pwehki kowe ke loaloapwoat; eri, ahmw likou karmend pahn mwakelekela. Oh pwehki ahmw kilangehr ahmw luwet ke pahn kehlaila, kahrehda ke pahn mwomwohd wasa me I kaunopadahr nan tehnpas akan en Semeio.

38 Oh met ngehi, Moronai, rahnmwahuihala Mehn Liki kan, ei, oh pil riei kan me I poakpoake, lao lel ahnsou me kitail pahn tuhpene mwohn mwoalen kopwung en Krais, wasa me aramas koaros pahn ese me ei likou karmend sohte mwahi en amwail nta powe.

39 Oh kumwail ahpw pahn ese me I kilangehr Sises, oh me e ketin koasoai ong ie ni aht kilengpene, oh me e ketin mahsanihong ie ni sansal oh karakarahk, mehlel duwehte aramas eh koasoaieng emen nan pein ei lokaia, duwen mepwukat;

40 Oh ekeite me I ntingihdi, pwehki ei luwet nan nting.

41 Oh met, I pahn kangoangehkin kumwail en rapahki Sises menet me soukohp kan oh wahnpoaron kan ntingihdier, pwe kalahngan en Koht Sahmo, oh pil Kauno Sises Krais, oh Ngehn Sarawio, me kadehdehki ira, en kak oh ieianguhk kohkohlahte. Ahmen.