Pwuhk en Ihder

1 Oh met, ngehi, Moronai, pahn doula kasalehda poadoapoad en irail mehn kawa ko me kousoan ni paliepeng en sahpwet, me kamwomwala sang nin limen Kauno.

2 Oh I pahn kihsang ei poadoapoad sang pileit rieisek pahieu me nein Limai aramas akan diarada, me kahdanihki Pwuhk en Ihder.

3 Oh pwehki I medewe me tepin poadoapoad wet, me koasoia duwen kepikipikdahn sampah, oh pil Adam, oh duwen ahnsouo kohdo lel ni ahnsou en doulik lapo, oh duwen soahng kan me wiawi rehn aramas akan lao lel ahnsouo, mie rehn mehn Suhs akan—

4 Eri I sohte pahn ntingihdi soahng ko me wiawi sang nan mwein Adam lao lao lel ahnsouo; ahpw re ntingdi nan pileit kan; oh mehmen me pahn diarada, e pahn alehdi manaman pwe en kak alehdi ni unsek poadoapoado.

5 Ahpw kilang, I sohte pahn kihda ni unsek poadoapoado, ahpw iengen poadoapoado me I pahn kihwei, sang ni douliko kohdo lao irail kamwomwala.

6 Oh ni wiepe wet me I pahn poadokada. Ihder me ntingihda poadoapoad wet, oh e wia kadaudoken Koriandor.

7 Koriandor nein Moron pwutak.

8 Oh Moron nein Ihdem pwutak.

9 Oh Ihdem nein Eiah pwutak.

10 Oh Eiah nein Sed pwutak.

11 Oh Sed nein Siplon pwutak.

12 Oh Siplon nein Kom pwutak.

13 Oh Kom nein Koriandom pwutak.

14 Oh Koriandon nein Amnikadah pwutak.

15 Oh Amnikadah nein Aron pwutak.

16 Oh Aron wia kadaudoken Ed, me wia nein Erdom pwutak.

17 Oh Erdom nein Lip pwutak.

18 Oh Lip nein Kis pwutak.

19 Oh Kis nein Korom pwutak.

20 Oh Korom nein Lihpai pwutak.

21 Oh Lihpai nein Kim pwutak.

22 Oh Kim nein Moriandon pwutak.

23 Oh Morianton wia kadaudoken Riplakis.

24 Oh Riplakis nein Ses pwutak.

25 Oh Ses nein Ed pwutak.

26 Oh Ed nein Kom pwutak.

27 Oh Kom nein Koriandom pwutak.

28 Oh Koriandom nein Ihmer pwutak.

29 Oh Ihmer nein Omer pwutak.

30 Oh Omer nein Suhl pwutak.

31 Oh Suhl nein Kip pwutak.

32 Oh Kip nein Oraiah pwutak, me wia nein Sared pwutak;

33 Sared me iang rie pwutako oh arail peneinei kan kohdo, iangahki ekei oh arail peneinei kan, sang ni doulik lapo, ni ahnsou me Kauno ketin kapingada ehn aramas lokaia, oh engiengda oh kahkihla me irail pahn mwerpeseng pohn sampah pwon; oh nin duwen mahsen en Kauno aramas akan mwerpeseng.

34 Oh pwehki rien Saredo eh wia ohl lapalahmen oh kehlail, oh ohl keniken rehn Kauno, Sared, rie pwutako, ahpw ndaiong ih: Kapakapiong Kauno, pwe en dehr ketin kapingada kitail pwe kitail de sohla kak wehwehki atail koasoi kan.

35 Kedekedeo rien Saredo ahpw kapakapiong Kauno, oh Kauno ahpw poakehla Sared; eri e sohte kapingada ehn Sared lokaia; oh Sared oh rie pwutako sohte pingida.

36 Eri Sared ahpw ndaiong rie pwutako: Kapakapiong Kauno, oh ma e kak a sapwellime engieng en kohsang irail akan me wia kempoakepahtail, pwe en dehr kapingada arail lokaia.

37 Kedekedeo rien Saredo ahpw kapakapiong Kauno, oh Kauno ahpw poakehla kempoakepahrail kan oh pil arail peneinei kan, kahrehda irail sohte pingida.

38 Kedekedeo Sared ahpw pwurehng koasoiong rie pwutako, ndinda: Kohla oh kalelapak rehn Kauno ma e pahn kihsang kitail nan sahpwet, oh ma e pahn kihsang kitail nan sahpwet, a kalelapak ia wasa me kitail pahn kohla. Oh sohte me ese ahpw Kauno kakete kihkitailahng nan sahpw me keieu kesempwal nan sampah? Oh ma iei met, a kitail loaloapwoatieng Kauno, pwe kitail en alehdi oh wiahla atail sohso.

39 Kedekedeo rien Sared pwutako ahpw kapakapiong Kauno nin duwen me Sared ndaiong sang nan ewe.

40 Kedekedeo Kauno ahpw karonge rien Sared pwutako, oh poakehla ih, oh ndaiong ih:

41 Kohwei oh kihpene noumw soahngen mahn akan koaros, me ohl oh lih; oh pil weren tuhkehn sampah koaros; oh ahmw peneinei kan; oh pil Sared riomw pwutako oh eh peneinei; oh pil kempoakepahmm kan oh arail peneinei kan, oh kempoakepahn Sared oh arail peneinei kan.

42 Oh ahnsou me ke pahn kanekehla met ke pahn kahluwahwei irail nan wahu me mih paliepeng. Oh wasahu I pahn tuhwonguhk, oh I pahn kahluwa kumwail kohla nan sahpw me pilipilda sang sahpw koaros nan sampah.

43 Oh I pahn kapaiada kumwail oh kadaudokemw kan wasahu, oh wiahda wehi kehlail ehu sang ni kadaudokem kan oh kadaudoken riomw pwutako, oh irail akan me pahn iang kumwail. Oh sohte me pahn kehlailsang wehi me I pahn wiahda ong ie sang ni kadaudokemw kan, nan sampah pwon. Oh met I pahn wiahionguhk pwehk ahnsou reirei me ke wie kapakapki ong ie.