INcwadzi yaMoroni
Sehluko 1
Moroni ubhalela kutsi kuzuze emaLamani—EmaNefi langeke amphike Khristu ayabulawa. Cishe ngemnyaka weNkhosi wa 401 kuya kuwa 421.
1 Manje mine, Moroni, emvakwekutsi sengicedzile kufinyeta indzaba yebantfu baJarede, bengingacabangi kutsi ngitawubuye ngibhale lokunye, kodvwa ngisengakafi kwamanje; futsi angitiveti kumaLamani hleze angibulale.
2 Ngoba bukani, timphi tawo tiyesabeka kakhulu emkhatsini wawo lucobo; futsi ngenca yenzondo yawo abulala onkhe emaNefi langeke amphike Khristu.
3 Mine, Moroni, angeke ngimphike Khristu; ngaloko-ke, ngizulazula noma ngukuphi lapho ngingaya khona kute ngisindzise imphilo yami.
4 Ngaloko-ke, ngibhala letinye tintfo letimbalwa, lokungasiko lebengikucabanga; ngoba bengingacabangi kutsi ngitawubuye ngibhale lokunye; kodvwa ngibhala letinye tintfo letimbalwa, kute mhlawumbe tibe lusito kubomnaketfu emaLamani, ngalolunye lusuku lolutako, ngekwentsandvo yeNkhosi.