Sehluko 7
Kuniketwa kwesimemo sekungena ekuphumuleni kweNkhosi—Thandaza ngenhloso yangempela—Moya waKhristu wenta kutsi bantfu bati lokuhle kulokubi—Sathane ukholisa bantfu kutsi baphike Khristu baphindze bente bubi—Baphrofethi babonakalisa kuta kwaKhristu—Ngelukholo, timangaliso tiyenteka futsi tingilosi tiyasita—Bantfu kufanele betsembele ekuphileni kwaphakadze baphindze babambisise kulo lutsandvo. Cishe ngemnyaka weNkhosi wa 401 kuya kuwa 421.
1 Manje mine, Moroni, sengibhala emavi lambalwa ababe Mormon, lawakhuluma mayelana nelukholo, litsemba, nelutsandvo; ngoba wakhuluma ngalendlela kubantfu, ngesikhatsi abafundzisa esinagogeni lebebayakhele kutsi kube yindzawo yekukhonta.
2 Manje mine, Mormon, ngikhuluma kini, bomnaketfu labatsandzekako; futsi kungumusa waNkulunkulu Babe, kanye neNkhosi yetfu Jesu Khristu, kanye nentsandvo yakhe lengcwele, ngenca yesipho selubito lwakhe kimi, kutsi ngivunyelwe kutsi ngikhulume kini ngalesi sikhatsi.
3 Ngaloko-ke, ngitawukhuluma nani nine lenibelibandla, nine lenibalandzeli labanekuthula baKhristu, lenitfole litsemba lelenele leningangena ngalo ekuphumuleni kweNkhosi, kusukela kulesi sikhatsi kuya phambili nite niphumule naye ezulwini.
4 Manje bomnaketfu, ngibona letintfo ngani ngenca yekuhamba kwenu lokunekuthula nebantfwana bebantfu.
5 Ngoba ngiyalikhumbula livi laNkulunkulu lelitsi ngemisebenti yabo niyawubati; ngoba uma imisebenti yabo imihle, kanjalo nabo bahle futsi.
6 Ngoba bukani, Nkulunkulu utse umuntfu lomubi angeke akwente loko lokuhle; ngoba uma apha sipho, noma athandaza kuNkulunkulu, ngaphandle akwente ngenhloso yangempela akumsiti ngalutfo.
7 Ngoba bukani, akwemukelwa kuye kutsi kulungile.
8 Ngoba bukani, uma umuntfu lomubi aniketa sipho, ukwenta loko ngekungakhululeki; ngaloko-ke kwemukelwa ngalokufanako nekutsi usibambile sipho; ngaloko-ke wemukelwa njengalomubi embikwaNkulunkulu.
9 Kanjalo kwemukelwa njengebubi kumuntfu, uma athandaza kodvwa abe ete inhloso yangempela yenhlitiyo; yebo, futsi akumsiti ngalutfo, ngoba Nkulunkulu akabemukeli labanjalo.
10 Ngaloko-ke, uma umuntfu amubi angeke akwati kwenta loko lokuhle; noma aphe sipho lesihle.
11 Ngoba bukani, umtfombo lobabako angeke ukwati kukhipha emanti lamahle; noma umtfombo lomuhle ukhiphe emanti lababako; ngaloko-ke, umuntfu loyinceku yadeveli angeke akwati kulandzela Khristu; futsi uma alandzela Khristu angeke akwati kutsi abe yinceku yadeveli.
12 Ngaloko-ke, tonkhe tintfo letinhle tivela kuNkulunkulu, kantsi loko lokubi kuvela kudeveli; ngoba develi usitsa kuNkulunkulu, ulwa naye njalo, futsi ulinga aphindze ahehe bantfu kutsi bone, nekutsi bente loko lokubi njalo.
13 Kodvwa bukani, loko lokukwaNkulunkulu kumema kuphindze kuhehe bantfu kutsi bente lokuhle njalo; ngaloko-ke, yonkhe intfo lelinga iphindze ihehe kutsi wente lokuhle, futsi utsandze Nkulunkulu, umsebentele, iphefumulelwe nguNkulnkulu.
14 Ngaloko-ke, caphelani, bomnaketfu labatsandzekako, kutsi anehluleli loko lokubi nitsi kwakaNkulunkulu, noma loko lokuhle lokukwakaNkulunkulu kutsi kwakadeveli.
15 Ngoba bukani, bomnaketfu, niniketiwe kutsi nikwati kwehlulela, kute nati lokuhle kulokubi; futsi indlela yekwehlulela icacile, kute nati ngelwati loluphelele, njengoba nati kukhanya kwemini uma nikucatsanisa nebumnyama bebusuku.
16 Ngoba bukani, Moya waKhristu uniketiwe kuwo wonkhe umuntfu, kutsi ati lokuhle kulokubi; ngaloko-ke, nginikhombisa indlela yekwehlulela, ngoba yonkhe intfo lekumema kutsi wente lokuhle, futsi lekukholisa kutsi ukholwe kuKhristu, itfunyelwe ngemandla kanye nesipho saKhristu; ngaloko-ke ningati ngelwati loluphelele kutsi kwakaNkulunkulu.
17 Kodvwa noma ngabe yini lekholisa umuntfu kutsi ente lokubi, angakholwa kuKhristu, amphike, futsi angamsebenteli Nkulunkulu, uma kunjalo ningati ngelwati loluphelele kutsi loko kungekwadeveli; ngoba develi usebenta ngalendlela, ngoba yena akamkholisi umuntfu kutsi ente lokuhle, cha, namunye nje umuntfu; kanjalo netingilosi takhe, futsi kanjalo nalabo labangaphansi kwakhe.
18 Manje, bomnaketfu, ngekubona kutsi niyakwati kukhanya leningehlulela ngako, lokukukhanya kwaKhristu, bonani kutsi anehluleli ngalokungasiko; ngoba ngaloko kwehlulela lenehlulela ngako, nani niyawukwehlulelwa ngako.
19 Ngaloko-ke, ngiyanincenga, bomnaketfu, kutsi nihlolisise ngekukhutsala kuko kukhanya kwaKhristu kute nati lokuhle kulokubi; futsi uma ningabambelela kuyo yonkhe intfo lenhle, ningayilahli, niyawuba bantfwana baKhristu noma kanjani.
20 Manje, bomnaketfu, kungenteka kanjani kutsi nibambelele kuyo yonkhe intfo lenhle na?
21 Manje sengita kulolo kholo, lengitsite ngitawukhuluma ngalo; futsi ngitawunitjela indlela leningabambelela ngayo kuyo yonkhe intfo lenhle.
22 Ngoba bukani, Nkulunkulu wati tonkhe tintfo, kusukela phakadze kute kube phakadze, bukani, watfumela tingilosi kutsi tisite bantfwana bebantfu, kute tivete kukhanya mayelana nekuta kwaKhristu, nekutsi kuKhristu kuyawuvela yonkhe intfo lenhle.
23 Futsi Nkulunkulu ngetulu kwaloko washo kubaphrofethi, ngemlomo wakhe lucobo, kutsi Khristu utawukuta.
24 Bukani, bekukhona tinhlobonhlobo tetindlela laveta ngato tintfo kubantfwana bebantfu, letatitinhle, futsi tonkhe tintfo letinhle tivela kuKhristu; kungenjalo bantfu bebawile, futsi bekungeke kube khona intfo lenhle leta kubo.
25 Ngaloko-ke, ngekusitwa tingilosi, nangemavi onkhe laphuma emlonyeni waNkulunkulu, bantfu bacala kusebentisa lukholo kuKhristu; ngako-ke ngelukholo, babambelela kuto tintfo letinhle; futsi kwabanjalo kwate kwefika Khristu.
26 Emvakwekufika kwakhe bantfu nabo basindziswa ngelukholo egameni lakhe; futsi ngelukholo, baba ngemadvodzana aNkulunkulu. Njengoba ngempela Khristu aphila wawakhuluma lamavi kubobabe betfu, watsi: Noma ngabe yini lenitawuyicela kuBabe egameni lami, lenhle, ninelukholo kutsi nitawuyitfola, bukani, niyawukwentelwa yona.
27 Ngako-ke, bomnaketfu labatsandzekako, ngabe timangaliso setaphela yini ngenca yekutsi Khristu sewenyukele ezulwini, wahlala phansi esandleni sangesekudla saNkulunkulu, kute afune kuBabe emalungelo akhe emusa lanawo kubantfwana bebantfu na?
28 Ngoba utenelisile tinhloso temtsetfo, futsi ufuna bonkhe labo labanelukholo kuye; futsi labo labanelukholo kuye batawubambisisa kuto tonkhe tintfo letinhle; ngaloko-ke umemele simiso sebantfwana bebantfu; futsi uhlala phakadze emazulwini.
29 Futsi ngenca yekutsi sewukwentile loku, bomnaketfu labatsandzekako, ngabe timangaliso setaphela na? Bukani ngitsi kini, Cha; futsi netingilosi atikayekeli kusita bantfwana bebantfu.
30 Ngoba bukani, tingephansi kwakhe, kutsi tisite ngekwelivi lekuyaleta kwakhe, titibonakalise kulabo labanelukholo lolucinile kanye nemcondvo logcilile kuso sonkhe simo sekulunga.
31 Futsi umsebenti webufundisi bato kubitela bantfu ekuphendvukeni, nekugcwalisa kanye nekwenta umsebenti wetivumelwano taBabe, latenta kubantfwana bebantfu, kute alungise indlela emkhatsini webantfwana bebantfu, ngekumemetela livi laKhristu etitjeni letikhetsiwe teNkhosi, kute tifakaze ngaye.
32 Ngekwenta njalo, iNkhosi Nkulunkulu ilungiselela indlela yekutsi labasele bantfu babe nelukholo kuKhristu, kute Moya loNgcwele abe nendzawo etinhlitiyweni tabo, ngekwemandla awo; futsi ngalendlela Babe ugcwalisa tivumelwano latenta kubantfwana bebantfu.
33 Futsi Khristu utsite: Uma ningaba nelukholo kimi niyawuba nemandla ekwenta noma ngayini intfo lefanele kimi.
34 Futsi utsite: Phendvukani nonkhe nine mikhawulo yemhlaba, nite kimi, nibhajatiswe egameni lami, niphindze nibe nelukholo kimi, kute nisindziswe.
35 Manje, bomnaketfu labatsandzekako, uma kusho kutsi letintfo lengitikhulume kini tiliciniso, futsi Nkulunkulu utawunikhombisa, ngemandla kanye nangenkhatimulo lenkhulu ngelusuku lwekugcina, kutsi tiliciniso, uma tiliciniso ngabe lusuku lwetimangaliso luphelile na?
36 Noma ngabe tingilosi setiyekelile yini kuvela kubantfwana bebantfu na? Noma ngabe uwagodlile yini emandla aMoya loNgcwele kubo na? Noma ngabe utawuwagodla yini, uma nje sikhatsi sisachubeka, noma uma nje umhlaba usemile, noma kusekhona umuntfu munye kuwo kutsi asindziswe na?
37 Bukani, ngitsi kini, Cha, ngoba kungenca yelukholo kutsi kwenteke timangaliso; futsi kungenca yelukholo kutsi tingilosi tivele tiphindze tisite bantfu; ngaloko-ke, uma letintfo setiyekelile maye kubantfwana bebantfu, ngoba kungenca yekungakholwa, futsi konkhe kulite.
38 Ngoba kute umuntfu longasindziswa, ngekwemavi aKhristu, ngaphandle kwekutsi abe nelukholo egameni lakhe; ngaloko-ke, uma letintfo setiyekelile, kanjalo nalo lukholo alusekho; futsi siyesabeka simo semuntfu, ngoba kuba shengatsi akutange kube khona kuhlengwa lokwentiwa.
39 Kodvwa bukani, bomnaketfu labatsandzekako, ngibona tintfo letincono kini, ngoba ngibona kutsi ninalo lukholo kuKhristu ngenca yekutfobeka kwenu; ngoba uma ningenalo lukholo kuye anikafaneli kutsi nibalwe nebantfu belibandla lakhe.
40 Ngetulu kwaloko, bomnaketfu labatsandzekako, sengitawukhuluma kini mayelana nelitsemba. Kungenteka kanjani kutsi nibe nelukholo, ngaphandle kwekutsi nibe nelitsemba na?
41 Futsi yini lena lenitawuyetsemba na? Bukani ngitsi kini niyawuba nelitsemba ngenhlawulo yaKhristu kanye nangemandla ekuvuka kwakhe, kutsi nivuselwe ekuphileni lokuphakadze, futsi loku kuyawuba ngenca yelukholo lwenu kuye njengekwesetsembiso.
42 Ngaloko-ke, uma umuntfu anelukholo kufanele kutsi abe nelitsemba; ngoba ngaphandle kwelukholo angeke libe khona litsemba.
43 Ngetulu kwaloko, bukani ngitsi kini angeke abe nelukholo kanye nelitsemba, ngaphandle kwekubamnene, futsi abe ngulotfobekile ngenhlitiyo.
44 Uma kungenjalo, lukholo lwakhe nelitsemba lakhe kulite, ngoba kute namunye lowemukelekako embikwaNkulunkulu, ngaphandle kwalabamnene nalabatfobekile ngenhlitiyo; futsi uma umuntfu amnene aphindze atfobekile ngenhlitiyo, avuma ngemandla aMoya longcwele kutsi Jesu unguKhristu, kufanele abe nelutsandvo; ngoba uma ete lutsandvo akasilo lutfo; ngaloko-ke kufanele abe nelutsandvo.
45 Futsi lutsandvo luyabeketela, lumnene, lute umona, alutikhukhumeti, alutifuneli kwalo, alucansuki kalula, alukucabangi lokubi, alukujabuleli lokubi kodvwa lujabulela liciniso, lubeketelela tonkhe tintfo, lukholwa tonkhe tintfo, lwetsemba tonkhe tintfo, lubeketelela tonkhe tintfo.
46 Ngaloko-ke, bomnaketfu labatsandzekako, uma nite lutsandvo, aninalutfo, ngoba lutsandvo alusoze luphele. Ngaloko-ke, bambelelani kulo lutsandvo, lolukhulu kunako konkhe, ngoba tonkhe tintfo titawuphela—
47 Kodvwa lutsandvo lweliciniso lutsandvo lolumsulwa lwaKhristu, lubeketela ingunaphakadze; futsi noma ngubani lotfolwa analo ngelusuku lwekugcina, kuyawuba kuhle kuye.
48 Ngaloko-ke, bomnaketfu labatsandzekako, thandazani kuBabe ngemandla onkhe enhlitiyo, kute nigcwaliswe ngelutsandvo, lalunike bonkhe labo lababalandzeli beliciniso beNdvodzana yakhe, Jesu Khristu; kute nibe ngemadvodzana aNkulunkulu; kute kutsi ngesikhatsi achamuka siyawuba njengaye, ngoba siyawumbona njengoba anjalo; kute sibe nelitsemba; kute sentiwe sibe msulwa njengoba naye amsulwa. Amen.