1 Incwadzi yababe Mormon, langibhalela yona mine, Moroni; wangibhalela yona masinyane nje emvakwekubitelwa kwami ebufundisini. Futsi wangibhalela ngalendlela, watsi:

2 Ndvodzana yami letsandzekako, Moroni, ngiyajabula kakhulu kutsi iNkhosi yakho Jesu Khristu beyiloku ikukhumbula, yaphindze yakubitela ebufundisini bayo, kanye nasemsebentini wayo longcwele.

3 Ngiyakukhumbula njalo emithandazweni yami, njalo ngithandaza kuNkulunkulu Babe egameni leMntfwana wakhe loNgcwele, Jesu, kutsi, ngebuhle bakhe lobungapheli kanye nemusa, akugcine ekubeketeleni kwelukholo egameni lakhe kute kube sekugcineni.

4 Manje ndvodzana yami, sengikhuluma kuwe mayelana naloko lokungikhatsata kakhulu; ngoba kuyangikhatsata kutsi kube khona imphikiswano lecubukako emkhatsini wenu.

5 Ngoba, uma ngifundze liciniso, bekuloku kukhona imphikiswano emkhatsini wenu mayelana nekubhajatiswa kwebantfwana benu labancane.

6 Manje, ndvodzana yami, ngifisa kutsi nisebente ngekukhutsala, kute leliphutsa lelibi lisuswe emkhatsini wenu; ngoba, kungalesi sizatfu ngibhale lencwadzi.

7 Ngoba masinyane emvakwekutsi sengitivile letintfo ngani ngibute eNkhosini mayelana naloludzaba. Futsi livi leNkhosi lifike kimi ngemandla aMoya loNgcwele, latsi:

8 Lalela lamavi aKhristu, uMhlengi wakho, iNkhosi yakho kanye naNkulunkulu wakho. Buka, ngeta emhlabeni hhayi kutawubita labalungile kodvwa toni kutsi tiphendvuke; labaphilako abayidzingi inyanga, kodvwa labo labagulako; ngaloko-ke, bantfwana labancane bamsulwa, ngoba abakwati kona; ngaloko-ke sicalekiso sa-Adamu sisusiwe kubo ngenca yami, kutsi singabi nemandla etikwabo; futsi umtsetfo wekusoka sewuyekelwe ngenca yami.

9 Futsi ngalendlela Moya loNgcwele wembula livi laNkulunkulu kimi; ngaloko-ke, ndvodzana yami letsandzekako, ngiyati kutsi kuyinhlamba lembi phambi kwaNkulunkulu, kutsi nibhabhatise bantfwana labancane.

10 Buka ngitsi kuwe ngulentfo loyawuyifundzisa—kuphendvuka kanye nekubhajatiswa kulabo lekufanele batiphendvulele kanye nakulabo lasebakwati kwenta sono; yebo, fundzisa batali kutsi kufanele baphendvuke baphindze babhajatiswe, batitfobe njengebantfwana babo labancane, futsi bonkhe bayawusindziswa kanye nebantfwana babo.

11 Bantfwana babo labancane abakudzingi kuphendvuka, noma kubhajatiswa. Buka, kubhajatiswa kwekuphendvuka kugcwalisa imiyaleto ngalokwenele kutsi kutsetselelwe tono.

12 Kodvwa bantfwana labancane bayaphila kuKhristu, kusukela ekusekelweni kwemhlaba; uma kungasinjalo, Nkulunkulu unguNkulunkulu welubandlululo, naNkulunkulu logucukako, lobuka buso bebantfu; ngoba bangakhi bantfwana labancane lasebafa ngaphandle kwekubhajatiswa!

13 Ngaloko-ke, uma bantfwana labancane bangenakusindziswa ngaphandle kwekubhajatiswa, laba-ke kufanele kutsi baya esihogweni lesingapheli.

14 Buka ngitsi kuwe, loyo locabanga kutsi bantfwana labancane badzinga kubhajatiswa, usenyongweni lebabako kanye nasetibopheni tebubi; ngoba akanalo lukholo, litsemba, noma lutsandvo; ngaloko-ke, uma angafa asakholelwa kuloko, kufanele aye phansi esihogweni.

15 Ngoba kububi lobesabekako kucabanga kutsi Nkulunkulu angasindzisa umntfwana munye ngenca yekubhajatiswa, bese kutsi lomunye kufanele alahlwe ngenca yekutsi akakutfolanga kubhajatiswa.

16 Maye kulabo labayawugucula tindlela teNkhosi ngalendlela, ngoba bayawulahlwa ngaphandle kwekutsi baphendvuke. Buka, ngikhuluma ngesibindzi, ngineligunya lelivela kuNkulunkulu; futsi angesabi kutsi umuntfu angentani; ngoba lutsandvo loluphelele lucosha konkhe kwesaba.

17 Futsi ngigcwele lutsandvo, lokulutsandvo lwaphakadze; ngaloko-ke, bonkhe bantfwana bayafana kimi; ngaloko-ke, bantfwana labancane ngibatsandza ngelutsandvo loluphelele; bonkhe bayafana futsi babahlanganyeli ensindzisweni.

18 Ngoba ngiyati kutsi Nkulunkulu akasuye Nkulunkulu lobandlululako, noma umuntfu logucukako; kodvwa akagucuki kusuka kulo lonkhe liphakadze kuya kulo lonkhe liphakadze.

19 Bantfwana labancane abakwati kuphendvuka; ngaloko-ke, kububi lobesabekako kuphika umusa lomsulwa waNkulunkulu kubo, ngoba bonkhe bayaphila kuye ngenca yemusa wakhe.

20 Loyo lotsi bantfwana labancane badzinga kubhajatiswa uphika umusa waKhristu, futsi uyenta ibe lite inhlawulo yakhe kanye nemandla ekuhlenga kwakhe.

21 Maye kulabanjalo, ngoba basengotini yekufa, yesihogo, kanye nekuhlushwa lokungapheli. Ngikukhuluma ngesibindzi; Nkulunkulu ungiyaletile. Walaleleni lamavi niphindze niwanake, uma kungenjalo ayawumelana nani esihlalweni sekwehlulela saKhristu.

22 Ngoba buka bonkhe labantfwana labancane bayaphila kuKhristu, futsi kanjalo nabo bonkhe labo labangenamtsetfo. Ngoba emandla ekuhlenga eta kubo bonkhe labo, labete umtsetfo; ngaloko-ke, loyo longakalahlwa ngelicala, noma loyo longekho ngaphansi kwekulahlwa ngelicala, angeke aphendvuke; futsi kulabanjalo kubhajatiswa akusiti ngalutfo—

23 Kodvwa kuyinhlamba phambi kwaNkulunkulu, kuphika umusa waKhristu, kanye nemandla aMoya wakhe loNgcwele, kanye nekubeka litsemba emisebentini lefile.

24 Buka, ndvodzana yami, lentfo akukafaneli ibe khona; ngoba kuphendvuka kwalabo labangephansi kwekulahlwa ngelicala kanye nalabangephansi kwesicalekiso semtsetfo lowephuliwe.

25 Futsi titselo tekucala tekuphendvuka kubhajatiswa; kubhajatiswa kuta ngelukholo ekugcwaliseni imiyaleto; futsi kugcwalisa imiyaleto kuletsa kutsetselelwa kwetono;

26 Futsi kutsetselelwa kwetono kuletsa bumnene, kanye nekutfobeka kwenhlitiyo; ngenca yebumnene kanye nekutfobeka kwenhlitiyo kuta kuvakashelwa nguMoya loNgcwele, uMdvudvuti logcwalisa ngelitsemba kanye nangelutsandvo loluphelele, lutsandvo lolubeketela ngekukhutsala ekuthandazeni, kute kufike sikhatsi sekugcina, lapho bonkhe labangcwele bayawuhlala naNkulunkulu.

27 Buka, ndvodzana yami, ngitawuphindze ngikubhalele uma ngingeke ngiphume masinyane kuyawukulwa nemaLamani. Buka, kutikhukhumeta kwalesi sive, noma bantfu bemaNefi, sekubangele kubhujiswa kwabo ngaphandle kwekutsi baphendvuke.

28 Bathandazele, ndvodzana yami, kute kuphendvuka kute kubo. Kodvwa buka, ngiyesaba hleze Moya sewuyekelile kusebenta kubo; futsi kulencenye yelive bafuna kubeka phansi onkhe emandla kanye neligunya lelivela kuNkulunkulu; futsi baphika Moya loNgcwele.

29 Emvakwekulahla lwati lolukhulu kangaka, ndvodzana yami, kufanele babhubhe masinyane, kute kugcwaliseke tiphrofetho letakhulunywa baphrofethi, kanjalo nemavi eMsindzisi wetfu lucobo lwakhe.

30 Sala kahle, ndvodzana yami, ngite ngikubhalele, noma sihlangane futsi. Amen.