1 Ndvodzana yami letsandzekako, ngiyaphindza ngiyakubhalela kute wati kutsi ngisaphila, kodvwa ngibhala ngaloko lokutsite lokungikhatsatako.

2 Ngoba buka, ngibe nemphi lematima nemaLamani, lesingakancobi kuyo; futsi Akhiyanthasi ufile wabulawa ngenkemba, kanjalo naLuramu kanye naEmromi; yebo, futsi silahlekelwe sibalo lesiningi semadvodza etfu lakhetsekile.

3 Manje buka, ndvodzana yami, ngiyesaba hleze emaLamani atawubabhubhisa labantfu, ngoba abaphendvuki, naSathane ubaphehla njalo kutsi batfukutselelane lomunye nalomunye.

4 Buka, ngisebenta nabo njalo; futsi uma ngikhuluma livi laNkulunkulu ngekucina bayatfutfumela baphindze bangitfukutselele; futsi uma ngingasebentisi kucina bacinisa tinhlitiyo tabo ngekumelana nalo; ngaloko-ke, ngiyesaba hleze Moya weNkhosi sewuyekelile kusebenta kubo.

5 Ngoba sebatfukutsele kakhulu ngendlela yekutsi sekubonakala kimi shengatsi abakwesabi kufa; futsi sebalahlekelwe kutsandzana, lomunye kulomunye; bomele ingati kanye nekutiphindziselela njalo.

6 Manje, ndvodzana yami letsandzekako, nanoma kungenca yebulukhuni babo, tsine asisebente ngekukhutsala; ngoba uma siyekela kusebenta, siyawuletfwa ekulahlweni ngelicala; ngoba sinemsebenti lekufanele siwente uma sisekulelidvokodvo lelubumba, kute sincobe sitsa sako konkhe kulunga, futsi siphumute imiphefumulo yetfu embusweni waNkulunkulu.

7 Manje sengibhala lokutsite mayelana netinhlupheko talabantfu. Ngoba ngekwelwati lengilutfolile ku-Amoroni, buka, emaLamani anetiboshwa letiningi, latitsatsa embhoshongweni waSheriza; futsi bekungemadvodza, besifazane, kanye nebantfwana.

8 Emadvodza kanye naboyise balabo besifazane nebantfawana bababulele; futsi bondla labesifazane ngenyama yemadvodza abo, kanye nebantfwana ngenyama yaboyise; futsi kute emanti, ngaphandle kwalamancane nje, lababanika wona.

9 Nanoma kungenca yetinengiso letingaka temaLamani, atitendluli tebantfu betfu labaseMoriyanthumu. Ngoba buka, lamaningi emadvodzakati emaLamani bawatsetse bawenta tiboshwa; futsi emvakwekubemuca loko lokwakutsandzeka kuphindze kuligugu ngetulu kwato tonkhe tintfo, lokubumsulwa nebucotfo—

10 Emvakwekutsi sebente lentfo, bababulala ngesihluku lesikhulu, babavisa buhlungu emitimbeni yabo bate bafa; futsi emvakwekutsi sebakwentile loku, badla inyama yabo njengetilwane tasendle, ngenca yebulukhuni betinhlitiyo tabo; futsi bakwenta loku njengesiboniso sekuba nesibindzi.

11 Awu ndvodzana yami letsandzekako, kungenteka kanjani kutsi bantfu labanjengalaba, labete imphucuko—

12 (Futsi kuseyiminyaka lembalwa nje kuphela leseyendlulile, kantsi bebabantfu labaphucukile nalabatsandzekako)

13 Kodvwa Awu ndvodzana yami, kungenteka kanjani kutsi bantfu labanjengalaba, kutfokota kwabo kungaba setinengisweni letingaka—

14 Singalindzela kanjani kutsi Nkulunkulu angavimbela sandla sakhe ekusehluleleni na?

15 Buka, inhlitiyo yami iyakhala itsi: Maye kulabantfu. Wota ngekwehlulela, Awu Nkulunkulu, ufihle tono tabo, nebubi babo, netinengiso tabo phambi kwebuso bakho!

16 Ngetulu kwaloko, ndvodzana yami, kukhona bafelokati labaningi kanye nemadvodzakati abo labasele eSheriza; kanye naleyoncenye yemphako emaLamani langayitsatsanga, buka, libutfo laZenefi liyitsetse, labashiya bazulazula baya noma ngukuphi lapho bangaya khona kuyawufuna kudla; futsi labaningi besifazane labadzala bayaculeka endleleni bayafa.

17 Nelibutfo lelinami libutsakatsaka; kanjalo nemabutfo emaLamani asemkhatsini wami naSheriza; futsi ngebuningi balabo lababalekele emphini ya-Aroni babulewe ngesihluku lesikhulu.

18 Awu kukhohlakala kwebantfu bami! Bete kuhleleka nesihawu. Buka, ngingumuntfu nje, futsi nginemandla emuntfu nje, angeke ngisayiphocelela imiyalo yami.

19 Futsi sebacinile ebubini babo; sebagcwele lunya ngalokufanako, kute lonjani, umdzala noma umncane; batfokotela tonkhe tintfo ngaphandle kwaloko lokuhle; nekuhlupheka kwebesifazane betfu kanye nebantfwana betfu eveni lonkhe kwendlula konkhe; yebo, lulwimi angeke lukuchaze, noma kubhalwe.

20 Manje, ndvodzana yami, angeke ngisahlala kulesimo lesibi kangaka. Buka, uyabati bubi balabantfu; uyati kutsi abanatimiso, futsi nemizwa seyitfuntfubetekile; nebubi babo sebendlula lobo bemaLamani.

21 Buka, ndvodzana yami, angeke ngibakhulumele kuNkulunkulu hleze angishaye.

22 Kodvwa buka, ndvodzana yami, wena ngiyakukhulumela kuNkulunkulu, futsi ngiyetsemba kuKhristu kutsi uyawusindziswa; ngiyathandaza kuNkulunkulu kutsi ayisindzise imphilo yakho, kute utibonele kubuyela kwebantfu bakhe kuye, noma kubhujiswa kwabo baphele nya; ngoba ngiyati kutsi kufanele babhubhe ngaphandle kwekutsi baphendvuke babuyele kuye.

23 Futsi uma babhubha kuyawuba njengekwemaJarede, ngenca yekufisa kwetinhlitiyo tabo, bafuna ingati nekutiphindzisela.

24 Futsi nangabe bayabhubha, siyati kutsi liningi labomnaketfu lihlangane nemaLamani, futsi baningi labanye labasetawuhlanganyela nawo; ngaloko-ke, bhala tintfo letitsite letimbalwa, uma kwenteka usindza mine ngifa ngingasakuboni; kodvwa ngiyetsemba kutsi ngitawukubona masinyane; ngoba nginemibhalo lengcwele lengitawuyiletsa kuwe.

25 Ndvodzana yami, tsembela kuKhristu; futsi shengatsi letintfo lengitibhalile tingahlala tingakukhatsati, bese tikudvonsele phansi ekufeni; kodvwa shengatsi Khristu angakuphakamisa, nekuhlupheka kanye nekufa kwakhe, nekukhombisa umtimba wakhe kubobabe betfu, nesihawu sakhe, nekumela bulukhuni kwakhe, nelitsemba lenkhatimulo yakhe kanye nekuphila lokuphakadze, kungahlala engcodvweni yakho ingunaphakadze.

26 Futsi shengatsi umusa waNkulunkulu Babe, lo sihlalo sakhe sebukhosi singetulu emazulwini, kanye neNkhosi yetfu Jesu Khristu, lohleti ngasesandleni sangesekudla semandla akhe, tite tonkhe tintfo tibe ngephansi kwakhe, ungaba nawe, futsi uhlale naye ingunaphakadze. Amen.