1 Toy izao marina tokoa no nolazain’ny Tompo aminao ry Thomas mpanompoko: Efa nandre ny fivavakao Aho; ary ny fanampianao dia efa tafakatra ho fampahatsiahivana eo anoloako amin’ny anaran’ireo rahalahinao izay efa nofinidy sy natokana tamin’ny alalan’ireo mpanompoko, mba ho vavolombelona manambara ny anarako ary handefa izany any ivelany, any anivon’ny firenena, ny foko sy ny samy hafa fiteny ary ny mponina rehetra.

2 Lazaiko anareo marina tokoa, fa nisy ihany zavatra vitsivitsy tao am-ponao sy taminao izay tsy nankasitrahako.

3 Kanefa, noho ianao efa nanetry ny tenanao, dia hasandratra ianao; koa voavela ny fahotanao rehetra.

4 Aoka hatoky eo anoloan’ny tavako ny fonao; ary ianao dia ho vavolombelona manambara ny anarako, tsy amin’ny Jentilisa ihany fa amin’ny Jiosy koa; ary handefa ny teniko hatrany am-paran’ny tany ianao.

5 Koa mifandahara isa-maraina isa-maraina; ary isan’andro isan’andro, dia aoka hivoaka ny feo fampitandremanao; ary rehefa tonga ny alina, dia aza avela hatory ny mponin’ny tany noho ny lahateninao.

6 Aoka hampahafantarina ao i Ziona ny fonenanao ary aza afindra ny tranonao; fa Izaho Tompo dia manana asa lehibe hataonao, amin’ny fitoriana ny anarako eo anivon’ny zanak’olombelona.

7 Koa sikino ho amin’ny asa ny valahinao. Aoka hikiraro koa ny tongotrao fa efa voafidy ianao, ary ny lalanao dia handalo any anivon’ny tendrombohitra sy any anivon’ny firenena maro.

8 Ary noho ny teninao, dia olona manandra-tena maro no haetry, ary noho ny teninao, dia olona manetry tena maro no hasandratra.

9 Ny feonao dia ho fananarana ho an’ny mpandika lalàna; ary amin’ny fananaranao no aoka hampitsaharan’ny lelan’ny mpanendrikendrika ny faharatsiany.

10 Aoka ianao hanetry tena; ary ny Tompo Andriamanitra dia hitarika anao amin’ny tanana sy hanome anao ny valin’ny fivavakao.

11 Fantatro ny fonao ary efa reko ny fivavakao ho an’ny rahalahinao. Aza iangarana izy ireo ka hotiavina mihoatra noho ireo hafa, fa aoka ny fitiavanao azy ireo ho tahaka ny fitiavanao ny tenanao; ary aoka ny fitiavanao hitosaka amin’ny olon-drehetra sy amin’ireo rehetra izay tia ny anarako.

12 Ary mivavaha ho an’ireo rahalahinao ao amin’ny Roambinifololahy. Ampitandremo mafy tokoa izy ireo noho ny anarako, ary aoka hanarina izy ireo noho ny fahotany rehetra, ary aoka ianao ho mahatoky eo anoloako amin’ny anarako.

13 Ary aorian’ny fakana fanahy azy ireo sy ny fahoriany be, dia indro, Izaho Tompo no hitady azy ireo, ary raha tsy manamafy ny fony izy ireo ary tsy manenjana ny hatony Amiko dia hovana fo ary hositraniko.

14 Ankehitriny dia lazaiko aminao ary izay lazaiko aminao dia lazaiko amin’ny Roambinifololahy rehetra: Mitsangàna dia sikino ny valahanareo, alaovy ny hazofijalianareo, manaraha Ahy ary fahano ny ondriko.

15 Aza manandratra ny tenanareo; aza mikomy amin’i Joseph mpanompoko, fa lazaiko aminareo marina tokoa, momba azy Aho ary ho eo aminy ny tanako; ary ireo fanalahidy izay efa nomeko azy, ary anareo koa, dia tsy hoesorina aminy mandra-piveriko.

16 Lazaiko aminao marina tokoa ry Thomas mpanompoko, ianao no lehilahy izay efa nofinidiko hihazona ireo fanalahidin’ny fanjakako, momba ny Roambinifololahy, any ivelany, anivon’ny firenena rehetra—

17 Mba ianao no ho mpanompoko hamoha ny varavaran’ny fanjakako amin’ny toerana rehetra izay tsy hahatongavan’i Joseph mpanompoko sy i Sidney mpanompoko ary i Hyrum mpanompoko;

18 Fa tamin’izy ireo no nametrahako ny enta-mavesatry ny fiangonana rehetra mandritra ny fotoana fohy.

19 Koa na aiza na aiza no hanirahany anao, dia mandehana ianao ary momba anao Aho; ary na inona na inona toerana hitorianao ny anarako, dia varavarana mahomby no hovohana ho anao mba hahazoany mandray ny teniko.

20 Na zovy na zovy no mandray ny teniko dia mandray Ahy, ary na zovy na zovy mandray Ahy dia mandray ireo ao amin’ny Fiadidiana Voalohany izay efa nirahako, izay efa nataoko ho mpanolotsaina ho anareo amin’ny anarako.

21 Ary ankoatra izany, dia lazaiko aminareo fa na zovy na zovy no hirahinareo amin’ny anarako, amin’ny alalan’ny feon’ny rahalahinareo, ny Roambinifololahy, feperanareo sy nomenareo fahefana ara-dalana, dia hanan-kery hanokatra ny varavaran’ny fanjakako ho an’ny firenena rehetra izay hanirahanareo azy—

22 Araka izay hanetreny tena eo anoloako sy hitoerany eo amin’ny teniko ary hihainoany ny feon’ny Fanahiko.

23 Lazaiko aminareo marina dia marina tokoa, ny haizina mandrakotra ny tany, ary haizina matevina no mandrakotra ny sain’ny olona, ary efa nanjary ratsy ny nofo rehetra eo anoloako.

24 Indro, avy faingana tokoa amin’ny mponin’ny tany ny famaliana, ny andron’ny fisafoahana, ny andron’ny fandoroana, ny andron’ny faharavana, ny an’ny fitomaniana, ny an’ny fidradradradrana, ny an’ny fitarainana; ary toy ny tadio no hahatongavan’izany eran’ny tany manontolo, hoy ny Tompo.

25 Ary eo amin’ny tranoko no hanombohan’izany, ary avy amin’ny tranoko no handehanan’izany, hoy ny Tompo;

26 Amin’ireo izay eo anivonareo aloha, hoy ny Tompo, ireo izay efa nilaza ho mahafantatra ny anarako ary tsy nahafantatra Ahy sy efa nanevateva Ahy teo afovoan’ny tranoko, hoy ny Tompo.

27 Koa ataovy izay tsy hanahian’ny tenanareo ny amin’ny raharahan’ny fiangonako eto amin’ity toerana ity, hoy ny Tompo.

28 Fa diovy eo anoloako ny fonareo; ary rehefa izany dia mandehana ianareo eran’izao tontolo izao, ary mitoria ny filazantsarako amin’ny mananaina rehetra izay tsy nandray izany;

29 Ary izay mino sy hatao batisa no hovonjena, ary izay tsy mino sy tsy hatao batisa no hohelohina.

30 Fa ianareo Roambinifololahy sy ireo ao amin’ny Fiadidiana Voalohany, izay tendrena miaraka aminareo ho mpanolotsaina sy ho mpitondra anareo, no omena ny herin’ity fisoronana ity, ho an’ny andro farany sy ho an’ny fotoana farany izay ao amin’ny fitantanan’ny fotoam-pahafenoana,

31 Dia fahefana izay hazoninareo miaraka amin’ireo rehetra izay efa nandray fotoampitantanana, na inona na inona izany fotoana izany, hatramin’ny fiandohan’ny fahariana;

32 Fa lazaiko aminareo marina tokoa, ireo fanalahidin’ny fotoampitantanana izay efa noraisinareo, dia nidina avy tamin’ireo ray ary nalefa farany indrindra avy any an-danitra ho anareo.

33 Lazaiko aminareo marina tokoa, indro, lehibe ny antso anananareo. Diovy ny fonareo sy ny fitafianareo, fandrao hotakiana eo an-tananareo ny ran’ity taranaka ity.

34 Aoka ho mahatoky mandra-piaviko fa avy faingana Aho; ary miaraka Amiko ny valisoako mba homena valisoa araka ny asany ny olon-drehetra. Izaho no Alfa sy Ômega. Amena.