Mwakoro 138
Te mii ni burabeti ae anganaki Beretitenti Joseph F. Smith i Salt Lake City, Utah, n Okitobwa 4, 1918. N ana taeka ni kaukuki n Ana Ka-89 ni Maungatabu ni Kabuta te Ekaretia ae Uatai Taina n te Ririki, n Okitobwa 4, 1918, Beretitenti Smith e taekinna bwa e a tia ni karekea te reitaki ma te Atua n taai aika mwaiti i nanon namwakaina aika nako. Teuana mai buakoia, e kaineti ma kawaraia tamneia ake a tia ni mate iroun te Tia Kamaiu ngke e mena rabwatana n te ruanimate, e karekea n te bong are mai i mwaina Beretitenti Smith. E bon waekoa ni koreaki i mwin kainan te maungatabu. N Okitobwa 31, 1918, e uotakirake nakoia kauntira n te Moan Beretitentii, te Kauntira n te Tengaun ma Uoman, ao te Tamanuea, ao e butimwaeaki irouia ma te nano teuana.
1–10, Beretitenti Joseph F. Smith e iangoi ana koroboki Betero ao kawaran te aonaba n tamnei iroun te Uea; 11–24, Beretitenti Smith e noria maate aika raoiroi ni botaki n te bwaretaiti ao ana mwakuri ni ibuobuoki Kristo i buakoia; 25–37, E nora aron bairean tataekinan te euangkerio i buakoia tamnei; 38–52, E nora Atam, Ewa, ao burabeti aika tabu aika mwaiti n te aonaba n tamnei ake a baireia bwa aroia n tamnei i mwain mangautiia bwa te tautoronaki; 53–60, Maate ake a raoiroi n te tai aei a reitanako aia mwakuri n te aonaba n tamnei.
1 N tenua n Okitobwa, n te ririki tenga ruabubua tebwi ma waniua, I tekateka n au ru ni iangoi koroboki aika tabu;
2 Ao ni iangoa te karea ni kamaiu ae korakora are e karaoaki iroun Natin te Atua, ibukin kaboakin te aonaba.
3 Ao te tangira ae korakora ao n rianako tamaroana are kaotaki iroun te Tama ao te Nati n rokon te Tia Kabooira nakon te aonaba;
4 Bwa rinanon ana mwakuri ni kamaiu, ao man te ongeaba nakon tuua n te euangkerio, a na kona botanaomata ni kamaiuaki.
5 Ngke I tabe ni karaoa aei, e okirikaaki au iango nakon ana koroboki te abotoro ae Betero, nakoia aomata aika itiaki n taai ake ngkoa ake a maeanako n aaba i Bonto, Karatia, Kabatokia, ao mwakoron Atia tabeua, ike e a tia n tataekinaki iai te euangkerio i mwin taurakin te Uea.
6 I kauka te Baibara ao I wareka te katenua ao te kaaua ni mwakoro n ana moan reta Betero, ao ngke I wareware e korakora rotakiu, e korakora riki nakon ake mai mwaaina, ma mwakorona aika kaotaki ikai:
7 “Bwa e tia ni maraki naba Kristo ibukin buure, ae raoiroi ibukiia akana a buakaka, bwa e aonga ni kairiira nakon te Atua, e kamateaki n rabwatana, ma E kamaiuaki n Tamneina:
8 “Are e nako naba iai n reireia tamnei ake n te ne ni kaikain;
9 “Ake a aki ongeaba ngkoa, ngke e tataningaia aomata taotaonan nanon te Atua n ana bong Noa, ngke e kumeaki ni katauraoaki te ake, are a kamaiuaki i nanona ti tabeman te aomata, aika waniman, n te ran.” (1 Betero 3:18–20.)
10 “Bwa e tataekinaki naba te euangkerio nakoia akana mate ibukin aei, bwa a aonga ni motikaki taekaia n ai aroia aomata n rabwataia, ma a aonga ni maiu n ai aron te Atua n tamneia.” (1 Betero 4:6.)
11 Ngke I iangoi bwaai aikai ake a koreaki, a kaukaki matan ootau, ao Tamnein te Uea e tiku i aou, ao I nooriia maate aika uanao, aika mangori ao aika a kakannato naba.
12 Ao a uaia ni ikoikotaki n te tabo ae ti teuana kurubu n tamnei aika raoiroi aika aki kona ni warekaki mwaitiia, ake a tia ni kakakonimaki n ana koaua Iesu ngke a maiu n te maiu ae mamate;
13 Ao ake a tia n anga karea ni katootongan ana karea ae korakora Natin te Atua, ao n rinanon karawawata i bukin aran te Tia Kaboia.
14 Naakai ni kabane a tia ni kitana te maiu ae mamate, ni matoatoa n te kantaninga i bukin te mangauti ae mimitong, rinanon ana akoi te Atua te Tama ao Natina ae te Rikitemanna, Iesu Kristo.
15 I nooria bwa a kaonaki n te kimwareirei ao te kukurei, ao a uaia ni kimwareirei ibukina bwa e a kaan roko aia bong ni kamaiuaki.
16 A botaki ni kaantaninga rokon Natin te Atua nakon te aonaba n tamnei, n taekina kaboakia man ana kabaebae te mate.
17 Bubuia ake a matu e na manga kaokaki nakon arona ae kororaoi, te ri nakon riina, ao iana ma irikona i aoia, te tamnei ao te rabwata a na katiteuanaki n aki manga karaureaki, bwa a aonga ni karekea bwaninin te kimwareirei.
18 Ngke te botanaomata ae rangi ni korakora aei a tataninga ao a marooro, ni kimwareirei n aoan kamaiuakiia man ana kabaebae te mate, e kaoti Natin te Atua, ni katanoata te inaomata nakoia ake a tautoronaki ake a tia ni kakaonimaki;
19 Ao ikekei e taekina nakoia te euangkerio ae akea tokina, te reirei ibukin te mangauti ao kaboakia botanaomata man te bwaka, ao man aia bure n tatabemaniia nako ngkana a raira nanoia.
20 Ma nakoia ake a buakaka e aki nako, ao i buakoia ake a buakaka ao ake aki rairi nanoia ake a kabarekaia i nanon maiuia, e aki taetae.
21 Naake a kaitaraa ake aki butimwaea aia koaua ao aia kauring burabeti ake ngkoa a aki nooria, ke n noora ubuna.
22 Ike a mena iai naakai, e tautaeka te rotongitong, ma i buakoia ake a raoiroi bon iai te rau;
23 Ao aomata aika itiaki a kimwareirei ni kaboakia, ao a katorobubua ao a butimwaea Natin te Atua bwa aia Tia Kaboia ao te Tia Kamaiuia man te mate ao taurekereken moone.
24 E oota moaia, ao te raneanea man rokon te Uea e tiku i aoia, ao a anene ni kamoamoa arana ae tabu.
25 I miimi, bwa I ataia ae te Tia Kamaiu e kabanea ae kaniia teniua te ririki n ana mwakuri ni ibuobuoki i buakoia Iutaia ao naake n te bata are Iteraera, ni kataia n reireiniia te euangkerio ae akea tokina ao ni weteia nakon te rairannano;
26 Ao, e ngae ngke a korakora ana mwakuri, ao kakai, ao katanoataakin te koaua, n te mwaaka ae korakora ao te kariaiakaki, bon ti tabeman ae a ongo bwanaana, ao a kimwareirei n rokona, ao a karekea te kamaiuaki ni baina.
27 Ma ana mwakuri ni ibuobuoki i buakoia naake a tia ni mate e bon toki n te tai ae kimototo are riki i marenan taurakina n te kaibangaki ao mangautina;
28 Ao I iangoi ana taeka Betero—ike e taekinna bwa Natin te Atua e kabwarabwara nakoia tamnei n te nne ni kaikain, ake n te tai teuana a aki ongeaba ngkoa, ngke n te taina e tataningaia aomata taotaonan nanon te Atua n ana bong Noa—ao e kanga ni kona n reke irouna bwa e na kabwarabwara nakoia tamnei akekei ao ni karaoi mwakuri aika kainnanoaki i buakoia n te tai ae uarereke.
29 Ao ngke I iangoia, a kaukaki matau, ao e rikirake au atatai, ao I nooria bwa te Uea e aki nako ngaia i buakoia aika buakaka ao ake aki ongeaba ake aki butimwaea te koaua, n reireiniia;
30 Ma nooria, mai i buakoia ake a raoiroi, e baireia ana taanga ao e rineia taan uarongorongo, ni kunikaia n te mwaaka ao te kariaiakaki, ao n anganiia te kariaiakaki bwa a na waaki nako ni uota ootan te euangkerio nakoia ake a mena n te rotongitong, ao nakoia tamneia aomata ni kabaneia; ao aio aron tataekinan te euangkerio nakoia maate.
31 Ao taan uarongorongo ake a rineaki a waaki nako n taekina ana bong te Uea ae butimwaia ao ni katanoata te inaomata nakoia ake a tautoronaki ao a kabaeaki, ao nakoia ni kabane ake a raira nanoia man aia bure ao a butimwaea te euangkerio.
32 Aio aron tataekinan te euangkerio nakoia naake a tia ni mate i buakon aia bure, n akea atakin te koaua, ke i nanon riaoan te tua, bwa a tia n aki butimwaia burabeti.
33 Naakai a reireinaki te onimaki iroun te Atua, te rairannano man te bure, bwabetitoakin temanna ibukiia akeu a tia ni mate ibukin kamaunaan buure, te bwaintituaraoi ae te Tamnei ae Raoiroi man te katoka bai.
34 Ao ni kabane tuua ake tabeua n te euangkeri ake a kainnanoia bwa a na ataia bwa aonga ngaia n tau ni motikaki taekaia n ai aroia aomata n rabwataia, ma ni maiu n ai aron te Atua n tamneia.
35 Ao ngaia are e a kaotaki i buakoia maate, aika a mangori ao a kakannato, aika buakaka ni ikotaki naba ma aika kakaonimaki, bwa kaboakia e a tia ni karaoaki rinanon ana karea Natin te Atua i aon te kaibangaki.
36 E kaotaki bwa te Tia Kabooira e kabanea ana tai ngke tiku n te aonaba n tamnei, n reireiniia ao ni katauraoia tamneia burabeti aika kakaonimaki ake a tia ni kakoaua ibukina i nanon maiuia;
37 Bwa a aonga ni uota rongorongon te kaboaki nakoia ni kabane maate, nakoia ake e aki kona ngaia n roko irouia, ibukin aia kakaaitara ao riaoan te tua irouia, bwa rinanon aia mwakuri ana tia mwakuri a na kona naba ngaiia n ongo ana taeka.
38 I buakoia aike a kakannato ao a korakora ake a botaki n aia botanaomata aika raoiraoi ae korakora aei bon te Karo are Atam, are Iai ma Ngkoa ao tamara ni kabane.
39 Ao Tinara ae mimitong Ewa, ma natina aine aika mwaiti aika kakaonimaki ake a tia ni maiu rinanon rooro nako ao a tia n taromauria te Atua ae koaua ao e maiu.
40 Abera, te moan ni mate ibukin ana koaua, e mena ikekei, ao tarina are Teeta, temanna mai buakoia ake a korakora, are bon katootongan raoi tamana, Atam.
41 Noa, are e anga te kauring ibukin te ieka, Tiem, te ibonga ae rietata ae kakannato; Aberaam, tamaia taan onimaki; Itaaka, Iakobwa, ao Mote, te tia anga te tua ae kakannato i Iteraera;
42 Ao Itaia, are e taekinna n te taeka ni burabeti bwa te Tia Kabooira e kabiraki bwa e na bautia akana a uruaki nanoia, ni katanoata te inaomata nakoia ake a tautoronaki, ao kaukan te nne ni kaikain nakoia ake a kabaeaki, a mena naba ikekei.
43 Ni ikotaki ma anne, Etekiera, are e kaotaki nakoina n te mii ni burabeti te mwarua ae korakora n rii aika mwauteretere, ake a na rabunaki aoia n te iriko, bwa a na manga teirake ni mangautiia maate, bwa aomata aika maiu;
44 Taniera, are e a kaman noora ao n taekina katean uean te Atua ni boong aika kaitira, are e na aki manga kamaunaki ke n aki anganaki aomata tabeman.
45 Eriati, are raon Mote i aon te Maunga ni Bitaki;
46 Ao Maraki, te burabeti are kakoaua ibukin rokon Eria—are e taekinaki naba iroun Moronaai nakon te Burabeti Iotebwa Timiti, ni katanoata bwa e na roko i mwain rokon ana bong ae kakannato ma ni kakamaaku te Uea—a mena naba ikekei.
47 Te Burabeti ae Eria e na unika i nanoia naati berita ake a karaoaki nakoia aia bakatibu,
48 Are e a kaman kaotaki i mwain te mwakuri ae korakora are e na karaoaki n ana tembora te Uea n te mwioko n tararua ni kororaoin bongina, ibukin kaboakia maate, ao kabaeakiia naati nakoia aia karo, bwa mwina te aonaba ae bwanin e na karawawataki ma te maraia ao a na bane ni kamaunaaki n rokona.
49 Ni kabane naakai ao a mwaiti riki, ao burabeti naba ake a maeka i buakoia Nibwaite ao a taekina kakoauaan rokon Natin te Atua, a mena i buakon te botaki ae korakora ao a tataninga kamaiuakiia,
50 Bwa maate a tara buan tamneia n te tai ae maan man rabwataia bwa te tautoronaki.
51 Naakai ake e reireiniia te Uea, ao e anganiia te mwaaka bwa a na uti, i mwin mangautina mai buakoia maate, n rin i nanon abanuean Tamana, ike a na baunaki iai ma te aki mamate ao te maiu ae akea tokina,
52 Ao a na reitanako aia mwakuri man te tai arei n aron ana berita te Uea, ao n riki bwa taan katoong kakabwaia ni kabane ake a kawakinaki ibukiia ake a tangiria.
53 Te Burabeti Iotebwa Timiti, ao tamau, Hyrum Smith, Brigham Young, John Taylor, Wilford Woodruff, ao tabeman riki tamnei aika a tau n rineaki ake a kawakinaki bwa a na roko ni koron bong bwa a na ira te mwakuri ni kawenea aan te mwakuri ae korakora ni boong aika kaitira,
54 Ni ikotaki ma katean tembora ao karaoan taian otenanti i nanona ibukin kaboakia maate, a mena naba n te aonaba n tamnei.
55 I nooria bwa a mena naba i buakoia tooka ao ake a kakannato ake a rineaki n te moan tai bwa a na riki bwa taan tautaeka n ana Ekaretia te Atua.
56 I mwaain naba bungiakiia, ngaiia, ma tabeman riki, a karekei aia moan reirei nako n te aonaba n tamnei ao a katauraoaki bwa a na roko n te tai ae riai iroun te Uea bwa a na mwakuri n ana nne ni kurebe ibukin kamaiuan tamneia aomata.
57 I nooria bwa unimwaane aika kakaonimaki n te mwioko n tararua aei, ngkana a kitana te maiu ae mamate, a reitaanako aia mwakuri n tataekina te euangkerio ibukin te rairannano ao te kaboaki, rinanon ana karea Natin te Atua ae te Rikitemanna, i buakoia naake a mena n te rotongitong ao i aan te tautoronaki n te bure n te aonaba ae korakora ibukin tamneia maate.
58 Maate ake a raira nanoia a na kabooaki, rinanon te ongeaba nakon otenanti n ana auti te Atua,
59 Ao i mwin ae a tia ni kabwakaa tuaaia ibukin riaoan te tua irouia, ao a tebokaki ni kaitiakaki, a na karekea te kaniwanga ni kaineti ma aia mwakuri, bwa bon ngaiia taan bwaibwai n te kamaiuaki.
60 Bon aio te mii ni burabeti ibukin kaboakia maate ae kaotaki nakoiu, ao I kakoaua, ao I ataia bwa te rongorongo aei e bon koaua, rinanon ana kakabwaia ara Uea ao ara Tia Kamaiu, Iesu Kristo, eng. Amen.