1 I Le aso tolu o Oketopa, i le tausaga e afe ivaselau sefuluvalu, sa ou nofo ai i lo’u potu ma mafaufau loloto i tusitusiga paia;

2 Ma manatunatu i le taulaga togiola tele na faia e le Alo o le Atua, mo le togiolaina o le lalolagi;

3 Ma le alofa tele ma le ofoofogia na faaali mai e le Tamā ma le Alo i le afio mai o le Togiola i le lalolagi;

4 Ma e ala i lana togiola, ma le usiusitai i mataupu faavae o le talalelei, e mafai ona faaolaina ai o tagata.

5 A’o faapea ona ou mafaufau, sa foi i tua lo’u mafaufau i tusitusiga a le aposetolo o Peteru, i le au paia anamua na salalau lautele i Pono, Kalatia, Kapatokia, ma isi vaega o Asia, sa talai ai le talalelei ina ua mavae le faasatauroga o le Alii.

6 Sa ou susue le Tusi Paia ma faitau le mataupu e tolu ma le fa o le tusi muamua a Peteru, ma a’o ou faitauina sa matua uunaia lava a’u, e sili atu nai lo se isi lava taimi na uunaia muamua ai a’u, i le mau lenei:

7 “Ona na mafatia i se taimi Keriso mo agasala, o le amiotonu mo le amioletonu, ina ia mafai ona ia aumai i tatou i le Atua, ina ua fasiotia i le tino, ae faaolaina i le Agaga:

8 “Lea na maliu atu ai foi o ia ma talai atu i agaga i le falepuipui;

9 “O e na lē faalogo i nisi o taimi, i le taimi na faatalitali ai le talitiga o le Atua i ona po o Noa, a’o saunia le vaa, lea na faasaoina ai se toaitiiti, e toavalu, i le vai.” (1 Peteru 3:18–20.)

10 “Ona o le pogai lenei na talai atu ai foi le talalelei ia te i latou o e ua oti, ina ia mafai ona faamasinoina i latou i la tagata i le tino, ae ola i la le Atua i le agaga.” (1 Peteru 4:6.)

11 A’o o’u mafaufau loloto i nei mea ua tusia, sa tatalaina mata o lo’u malamalama, ma sa afio le Agaga o le Alii i o’u luga, ma sa ’ou vaai i ’au o e ua oti, o e faatauvaa ma e ta’uta’ua.

12 Ma sa faapotopoto faatasi i se nofoaga e tasi se vaega lē mafaitaulia o agaga o e amiotonu, o e na faamaoni i le molimau ia Iesu a’o soifua i latou i la le tino;

13 Ma o e na osi atu taulaga i le faatusa o le taulaga sili a le Alo o le Atua, ma sa mafatia i puapuaga i le suafa o lo latou Togiola.

14 O i latou uma nei ua tuua le olaga i la le tino, ua mautu i le faamoemoe mo se toetu mamalu, e ala i le alofa tunoa o le Atua le Tamā ma lona Atalii Pele e Toatasi, o Iesu Keriso.

15 Sa ou vaai ua faatumulia i latou i le olioli ma le fiafia, ma sa olioli faatasi ona ua oo mai lava le aso o lo latou lavea’iina.

16 Sa latou potopoto e faatalitali le afio atu o le Alo o le Atua i le lalolagi o agaga, e folafola atu le togiolaina o i latou mai noataga o le oti.

17 O o latou efuefu momoe o le a toefuatai i lona autino atoatoa, o le ivi i le ivi, ma uaua ma aano i luga o i latou, o le agaga ma le tino o le a toe faatasia e lē mafai ona toe tuueseeseina, ina ia mafai ona latou maua se atoatoaga o le olioli.

18 A’o faatalitali ma talatalanoa lenei vaega tele o agaga, ma olioli i le itula o lo latou lavea’iga mai filifili o le oti, sa afio atu le Alo o le Atua, ma folafola atu le saolotoga i e na ave faatagataotaua, o e na faamaoni;

19 Ma o iina na talai atu ai e ia ia te i latou le talalelei tumau e faavavau, le aoaoga faavae o le toetutu mai ma le togiolaina o tagata mai le pa’ū, ma mai agasala a le tagata lava ia i luga o tulaga o le salamo.

20 Ae o e amioleaga sa lē afio atu i ai o ia, ma sa lei siia lona siufofoga i e sa lē amioatua ma e sa lē salamo o e sa latou faaleagaina i latou lava a’o i ai i le tino;

21 Pe na vaai foi le au fouvale o e na teena molimau ma lapataiga a perofeta anamua i lona mamalu, pe na vaai i ona fofoga.

22 O le mea na i ai i latou ia, sa nofotupu ai le pouliuli, ae i totonu o e amiotonu, sa i ai le filemu;

23 Ma sa olioli le au paia i lo latou togiolaina, sa tootuli tulivae ma talisapaia le Alo o le Atua o lo latou Togiola ma le Laveai mai le oti ma filifili o seoli.

24 Sa susulu o latou fofoga, ma sa i o latou luga le malamalama o le mamalu o le Alii, ma sa latou pepese atu viiga i lona suafa paia.

25 Sa ou ofo, aua sa ou malamalama sa faaaluina e le Faaola le tusa o le tolu tausaga i lana auaunaga i totonu o tagata Iutaia ma i latou o le aiga o Isaraelu, i le taumafai e aoao atu ia te i latou le talalelei tumau e faavavau ma valaau ia te i latou ina ia salamo;

26 Ma peitai, e ui i ana galuega tetele, ma vavega, ma le folafolaga o le upumoni, i le mana tele ma le pule, sa toaitiiti lava e na faalogo i lona siufofoga, ma olioli i le i ai i ona luma, ma maua le olataga mai ona aao.

27 Ae o lana auaunaga i totonu o i latou o e ua oti sa faatapulaaina i se taimi puupuu i le va o le faasatauroga ma lona toetu mai;

28 Ma sa ou fesilisili ifo e uiga i upu a Peteru—lea na fai mai ai o ia e faapea na talai atu le Alo o le Atua i agaga i le falepuipui, o e sa lē usiusitai i se taimi, a’o faatalitali i se taimi le tali-tiga o le Atua i ona po o Noa—ma le ala na mafai ai e ia ona talai atu i ia agaga ma faia le galuega e tatau ai i totonu o i latou i se taimi puupuu lava.

29 Ma a’o ou fesilisili ifo, sa tatalaina o’u mata, ma sa faavaveina lo’u malamalamaaga, ma sa ou vaai sa lei afio atu le Alii lava ia i totonu o e amioleaga ma lē usiusitai o e na teena le upumoni, e aoao atu ia te i latou;

30 Ae faauta, sa faatulaga e ia mai totonu o e amiotonu, ana ’au ma tofia avefeau, ua faaofuina i le mana ma le pule, ma sa valaauina i latou e o atu ma avatu le malamalama o le talalelei ia te i latou o e sa i ai i le pouliuli, i agaga o tagata uma lava; ma sa faapea ona talai atu o le talalelei i e ua oti.

31 Ma sa o atu avefeau filifilia e talai atu le aso e talia ai e le Alii ma folafola atu le saolotoga i e ua faatagataotauaina o e ua noanoatia, e oo lava ia i latou uma o e o le a salamo mai ia latou agasala ma talia le talalelei.

32 Sa faapea ona talai atu o le talalelei ia te i latou o e na oti ia latou agasala, e aunoa ma se malamalama e uiga i le upumoni, po o le solitulafono, ona ua latou teena perofeta.

33 Sa aoao atu ia te i latou le faatuatua i le Atua, le salamo mai agasala, le papatisoga sui mo le faamagaloina o agasala, le meaalofa o le Agaga Paia e ala i le faaee atu o lima,

34 Ma isi mataupu autu uma o le talalelei sa tatau ia te i latou ona iloa ina ia latou agavaa ina ia mafai ona faamasino i latou e tusa ma tagata i le tino, ae ola i le Atua i le agaga.

35 Ma sa faapea ona faailoa atu i totonu o e ua oti, o e faatauvaa ma e ua ta’uta’ua, o e amioletonu faapea foi ma e ua faamaoni, ua aumai le togiolaina e ala i le taulaga a le Alo o le Atua i luga o le satauro.

36 Sa faapea ona faailoa mai sa faaalu e lo tatou Togiola lona taimi a o afio o ia mo sina taimi i le lalolagi o agaga, i le aoaoga ma le sauniuniga o agaga faamaoni o perofeta o e na molimau ia te ia i la le tino;

37 Ina ia mafai ona latou avatu o le savali o le togiolaina i e uma ua oti, ia i latou o e sa lē mafai ona afio atu i ai o ia lava, ona o lo latou fouvale ma soligatulafono, ina ia mafai e i latou e ala atu i le auaunaga a ana auauna, ona faalogo foi i ana afioga.

38 Sa i ai i totonu o e ta’uta’ua ma malolosi sa potopoto i lenei faapotopotoga tele o e amiotonu, o le Tama ia Atamu, o le Anamua o Aso ma le tamā o tagata uma,

39 Ma lo tatou Tinā mamalu o Eva, faatasi ma le toatele o ana fanau tamaitai faamaoni o e na soifua i vaitausaga ma tapuai atu i le Atua moni ma soifua.

40 O Apelu, le uluai maturo, sa i ai iina, ma lona uso o Setu, o se tasi o e malolosi, o lē sa foliga tonu lava i lona tamā, o Atamu.

41 O Noa, o lē na lapatai atu e uiga i le lolo; ma Semu, le faitaulaga sili ta’uta’ua; o Aperaamo, le tamā o le au faatuatua; o Isaako, Iakopo, ma Mose, le faitulafono ta’uta’ua o Isaraelu;

42 Ma Isaia, o lē na folafola mai e ala i valoaga e faapea sa faauuina le Togiola e fusifusi i e ua loto-momomo, e folafola atu le saolotoga i e ua ave faatagataotaua, ma le tatalaina o le falepuipui ia te i latou o e ua noanoatia, sa i ai foi iina.

43 E le gata i lea, o Esekielu, o lē na faaali i ai i se faaaliga vaaia le vanu tele o ivi mamago, o le a faaoofuina i aano, ia toetutu mai i le toetutu o e ua oti, o ni tagata ola;

44 O Tanielu, o lē na mua’i vaai ma valoia le faatuina o le malo o le Atua i aso e gata ai, e lē toe faaumatia pe tuuina atu i ni isi tagata;

45 O Elaia, o lē sa faatasi ma Mose i le Mauga o Liua;

46 Ma Malaki, le perofeta na molimau e uiga i le oo mai o Elia—o lē foi na fetalai i ai Moronae i le Perofeta o Iosefa Samita, ma folafola mai e tatau ona sau o ia a’o lei oo mai le aso tele ma le mata’utia o le Alii—sa i ai foi iina.

47 O le Perofeta o Elia na te totoina i loto o fanau folafolaga na faia i o latou tamā,

48 Ua faaataata mai ai le galuega tele o le a faia i malumalu o le Alii i le tisipenisione o le atoaga o taimi, mo le togiolaina o e ua maliliu, ma le faamauina o fanau i o latou matua, ina ne’i taia le lalolagi atoa i se fetuu ma faama’umauina uma ai i lona afio mai.

49 O i latou uma nei ma isi e toatele, e oo i perofeta na soifua i totonu o tagata sa Nifaē ma molimau e uiga i le afio mai o le Alo o le Atua, sa feofoofoa’i i totonu o lenei faapotopotoga tele ma faatalitali mo lo latou lavea’iga,

50 Aua sa vaai e ua maliliu i le umi o le tuuesea o o latou agaga mai i o latou tino, o se pologa.

51 O i latou ia na aoaoina e le Alii, ma tuu atu ia te i latou le mana e tutulai mai ai, pe a mavae lona toetu mai i le oti, e ulu atu i le malo o lona Tamā, e faapaleina iina i le tino ola pea ma le ola e faavavau,

52 Ma faaauau pea mai le taimi lena ma le agai i luma a latou galuega e pei ona sa folafolaina e le Alii, ma avea ma e e tofusia i faamanuiaga uma sa faapolopolo mo i latou o e alolofa ia te ia.

53 O le Perofeta o Iosefa Samita, ma lo’u tamā, o Ailama Samita, Brigham Young, Ioane Taylor, Wilford Woodruff, ma isi agaga filifilia o e sa faapolopolo e o mai i le atoaga o taimi e auai i le faataootoina o faavae o le galuega tele o aso e gata ai,

54 E aofia ai le fausiaina o malumalu ma le faia ai o sauniga i totonu mo le togiolaina o e ua oti, sa i ai foi i le lalolagi o agaga.

55 Sa ou vaai foi sa i ai i latou i totonu o e mamalu ma ta’uta’ua o e na filifilia i le amataga e avea ma pule i le Ekalesia a le Atua.

56 I le taimi lava ae lei fananau mai i latou, o i latou, faatasi ma le toatele o isi, sa latou maua a latou lesona muamua i le lalolagi o agaga ma sa saunia e o mai i le taimi e tatau ai a le Alii e galulue i lona tovine mo le faaolataga o agaga o tagata.

57 Sa ou vaai o toeaina faamaoni o lenei tisipenisione, pe a tuua e i latou lenei olaga faaletino, e faaauau a latou galuega i le talaiga o le talalelei o le salamo ma le togiolaina, e ala i le taulaga a le Atalii Pele e Toatasi o le Atua, i totonu o e o loo i le pouliuli ma o loo i lalo o le pologa o le agasala i le lalolagi tele o agaga o e ua oti.

58 O e e salamo o e ua oti o le a togiolaina, e ala i le usiusitai i sauniga o le maota o le Atua,

59 Ma a uma ona latou totogi o le sala o a latou solitulafono, ma ua mulumuluina mamā, o le a latou maua se taui e tusa ma a latou galuega, aua o i latou o ni suli o le faaolataga.

60 Sa faapea ona faaali mai ia te a’u o le faaaliga vaaia o le togiolaina o e ua oti, ma ou te molimau atu, ma ua ou mautinoa ua moni lenei molimau, e ala i le faamanuiaga a lo tatou Alii ma le Faaola, o Iesu Keriso, ua faapea lava. Amene.