Wóltaʼii 17
Diyin Yá Yáłtiʼí Joseph Smith díí diyingo bił ííshją́ą́ ályaa dóó díí éí Oliver Cowdery, David Whitmer, dóó Martin Harris bił béédahodoozįįł biniyé, Fayette, New Yorkdi, Yaʼiishjááshchilí 1829 yihahgo, béésh tʼą́hí bikááʼ naʼasdzoh tʼáhdoo deinéłʼį́į́góó éí Naaltsoos Mormon Wolyéhígíí bahaneʼ biyiʼ silá. Joseph dóó bá naʼazooí, Oliver Cowdery, Naaltsoos Mormon Wolyéhígíí béésh tʼą́hí ataʼ haneʼ ályaaígíí bitsʼą́ą́dóó yaa ákóniizį́į́ʼ hózhǫ́ tʼáá sahdii tááʼgo daʼooʼíinii bikʼihodidoonih (Ether 5:2–4; 2 Nephi 11:3; 27:12 yídííłtah). Oliver Cowdery, David Whitmer, dóó Martin Harris hózhǫ́ tʼáá sahdii tááʼgo daʼooʼíínii íiyisíí ádeinízingo dabidiisnááʼ. Diyin Yá Yáłtiʼí Diyin Bóhólníihii neiyídéíłkid, dóó díí ííshją́ą́ ályaaígíí Urim dóó Thummim biníkááʼ góneʼ bił hóóneʼ.
1–4, Tááʼgo Daʼooʼíinii bidaʼoodląʼ bee béésh tʼąhí bikááʼ nídaháasdzooʼígíí dóó nááná łaʼ dadílzinígíí deidoołtsééł; 5–9, Christ Naaltsoos Mormon Wolyéhígíí tʼáá aaníigo bá hodílzinii átʼé níigo yaa hoolneʼ.
1 Áko shooh, Shí ánhidishní, yéego shizaad badaʼíínohłí, éí tʼáá átʼéé ńtʼę́ę́ʼ nihijéí bee ádaohtʼį́įgo, béésh tʼąhí bikááʼ nídaháasdzooʼígíí deidoołtsééł, áádóó ayidgi dasiʼání, Laban bibéésh hał, Urim dóó Thummim ałdóʼ, éí Jared bínaaí dził bikááʼdi beiyíʼnil, Diyin Bóhólníihii yidááhdóó yił yááłtiʼyę́ędą́ą́ʼ, áádóó Lehi diyingo dah atsihí diné doo kééhatʼínídi beiyítʼánée ałdóʼ éí Tónteel Łichííʼ binaagóó ádahóótʼįįd.
2 Áádóó niheʼoodląʼ bee díí dadínóołʼįįł, ałkʼidą́ą́ʼ Diyin yá yádaałtiʼí bedaʼoodląʼ bee dahólónéegiʼ átʼáo ndi.
3 Áádóó niheʼoodląʼ dahazlį́įgo, dóó nihinááʼ bee daołtsʼą́ągo, tʼáá aaníigo Diyin God bibeʼadziilii bee, baa dáhodoołnih;
4 Áádóó díí ádadoołííł áko shánaalʼaʼí Joseph Smith, Jun., doo diyoolyééł da, áko díí naanish biyiʼ nihokááʼ dineʼé baʼáłchíní shiyáʼátʼéehgo iiná biniyéhígíí bá hólǫ́ǫgo ádeishłííł.
5 Áádóó tʼáa aaníigo daníílʼį́į́ʼ dadohníigo baa dahodoołnih, shánaalʼaʼí Joseph Smith, Jun., yinééłʼį́į́ʼyę́ęgiʼ átʼáo; háálá shibeʼadziilii yee yinééłʼį́į́ʼ, háálá oodląʼ, bee hólónígíí biniinaa.
6 Áádóó naaltsoos yá ataʼ hoolne, łahdóó ádíílííł bidííniidyę́ę ndi, áádóó nihiDiyin Bóhólníihii dóó nihiDiyin God hiinánígiʼ átʼáo díí tʼáá aaníí átʼé.
7 Ákohgo, tʼáá éí adziilii, dóó tʼáá éí oodląʼ, dóó tʼáá éí aʼiilyéii niheiyílyá bí bee yílyáhígíí átʼáo;
8 Áádóó akéeʼdi shibee ndahazʼáaniii, éí nihaa níláhígíí, bikʼeh dahonołʼį́įgo, chʼį́įdiitah bidáńdítį́hí doo nihikʼindookǫs da; háálá sheʼajoobaʼ éí bííghahgo nihá hólǫ́ǫ doo, áádóó nihóníyáadi yisdáʼdahidoohkah.
9 Áádóó Shí, Jesus Christ, nihiDiyin Bóhólníihii dóó nihiDiyin God, éí yee nihichʼįʼ haadzííʼ, áko shiyáʼátʼéehii iiná biniyéhígíí nihokááʼ dineʼé baʼáłchíní bitahgóó hadideeshłííł. Amen.