1 Wanlōntak eo an Kabun̄ eo an Kraist ilo raan kein āliktata, im kiiō ej juon to̧ujin ruwalitōkbukwi im jiln̄uul jilu iiō jān kar itok eo an ad Irooj im Rilo̧mo̧o̧r Jisōs Kraist ilo kanniōk, eo kar karōk kobban im kajutake ilo wōt errā eo n̄an kien ko an laļ in am̧, jān ankilaan im kien ko an Anij, ilo allōn̄ eo kein kāāmen, im ilo raan eo kein kajiljino in allōn̄ etan Eprōļ—

2 Kien ko kar liļo̧k n̄an Josep Smith, Jun., eo Anij eaar kūri, im kar kapit e juon rijjilōk an Jisōs Kraist, bwe en elder eo kein kajuon an kabun̄ in;

3 Im n̄an Oliver Cowdery, eo Anij eaar barāinwōt kūr e, juon rijjilōk an Jisōs Kraist, bwe en elder eo kein karuo an kabun̄ in, im kar kapit e ium̧win pein;

4 Im men in ekkar n̄an jouj an ad Irooj im Rilo̧mo̧o̧r Jisōs Kraist, eo n̄an E en aiboojoj otemjej, jim̧or kiiō im indeeo. Amen.

5 Ālikin kar lukkuun kaalikkare n̄an elder in kein kajuon ke eaar bōk jeorļo̧k bōd eo jān jero̧wiwi ko an, eaar bar lokjak ilo wōjwaan ko an laļ in;

6 Ak ālikin ukeļo̧k, im kōttāik e make ilo m̧ool, kōn tōmak, Anij eaar jipan̄ e jān juon enjeļ ekwōjarjar, eo paotokin eaar āinwōt jarom, im eo ballin rekar erreo im mouj ilōn̄in aolep mouj otemjeļo̧k;

7 Im leļo̧k n̄an e kien ko me raar kōkejakļo̧kjeņ e;

8 Im leļo̧k n̄an e kajoor jān ijo eutiej, jān wāween ko kar kōpooji m̧oktaļo̧k, n̄an ukōte Bok in Mormon eo;

9 Eo ie ej ļo̧o̧k eo kōn juon armej raar wōtlo̧k, im tarlep in gospel eo an Jisōs Kraist n̄an ro riAelōn̄ ko im n̄an riJu barāinwōt;

10 Eo kar leļo̧k jān unoojdikdik an jetōb, im ej kapen e n̄an ro jet jān lotok in enjeļ raņ, im ej bun̄bun̄ļo̧k n̄an laļ in jān er—

11 Kam̧oole n̄an laļ in bwe jeje ko rekwōjarjar rej m̧ool, im bwe Anij ej kōkejakļo̧kjeņ armej raņ im kūr er n̄an jerbal eo ekwōjarjar An ilo tōre in im epepen in, barāinwōt ilo epepen ko etto;

12 Ilo jekjek in kwaļo̧k bwe E ej juon wōt Anij inne, rainin, im indeeo. Amen.

13 Kōn menin, kōnke rekanooj eļap kam̧ool kein, jāni naaj ekajete laļ, em̧ool jon̄an wōt oran ro renaaj tokālik itok n̄an jeļāļo̧kjeņ eo kōn jerbal in.

14 Im ro renaaj bōk e ilo tōmak, im jerbale jim̧we, naaj bōk juon kūrawūn in mour indeeo;

15 Ak ro rej kapen burueer ilo jab tōmak, im joļo̧k e, e naaj ro̧o̧l n̄an kein liaakeļo̧k eo aer make—

16 Bwe Irooj Anij eaar kōnono men in; im kōm, elder ro an kabun̄ in, kōm ar ron̄ im jeje kam̧ool kōn naan ko an Kiin̄ in ijo eutiej ewōj, eo n̄an E en aiboojoj indeeo im indeeo. Amen.

17 Jān men kein kōm jeļā ke ewōr juon Anij ilo lan̄, eo Ej indeeo im ejjeļo̧k jem̧ļo̧kin, jān indeeo n̄an indeeo ej jab Anij in ukoktak, ribooje an lan̄ im laļ, im men ko otemjeļo̧k ilowaer;

18 Im bwe Eaar kōm̧anm̧an armej, m̧aan im kōrā, ilowaan wōt nememen im ilo jekjekin, Eaar kōm̧anm̧an er;

19 Im kar leļo̧k n̄an er kien ko bwe ren iakwe im jerbal n̄an E, eo wōt ej Anij emour im em̧ool, im bwe E aikuj in eo wōt im ren kabun̄-jar.

20 Ak jān rupi kain̄i kein rekwōjarjar armej eaar erom mennin kanniōk im āinwōt devil, im erom armej em̧ōj an wōtlo̧k.

21 Kōn menin, Anij Ekajoor Bōtata eaar letok Nejin emake Eaar Keotake, āinwōt kar je ilo jeje ko rekwōjarjar ko kar litok kōn E.

22 Eaar iioon kapo ko ak Eaar jab eo̧ron̄ i.

23 Eaar debwāāl, mej, im bar jerkak ilo raan eo kein kajilu;

24 Im wanlōn̄ļo̧k ilo lan̄, n̄an jijet ianbwijmaron̄ in Jemān, n̄an irooj kōn kajoor bōtata ekkar n̄an ankilaan eo Jemān;

25 Bwe jon̄an wōt eo renaaj tōmak im peptaij ilo Etan ekwōjarjar, im niknik ilo tōmak n̄an jem̧ļo̧kin, ren mour—

26 Jab wōt ro rekar tōmak ālikin An kar itok ilo ioļap in iien, ilo kanniōk, ak aolep ro jān jinoin, em̧ool jon̄an wōt oran eo m̧okta jān An kar itok, ro rekar tōmak ilo naan ko an rikanaan ro rekwōjarjar, ro raar kōnono āinwōt kar kabab-laļ er jān mennin letok eo an Jetōb Kwōjarjar, ro raar lukkuun kam̧ool kōn E ilo aolep men, ren bōk mour indeeo,

27 Barāinwōt ro renaaj kar itok tokālik, ro renaaj kar tōmak ilo mennin letok ko im kūr ko an Anij jān Jetōb Kwōjarjar, eo ej kam̧ool kōn Jemān im kōn Nejin;

28 Bwe Jemān, Nejin, im Jetōb Kwōjarjar rej juon Anij, indeeo im indeeo, ejjeļo̧k jem̧ļo̧kin. Amen.

29 Im kōm jeļā bwe aolep armej reaikuj ukeļo̧k im tōmak ioon Etan Jisōs Kraist, im kabun̄-jar n̄an Jemān ilo Etan, im niknik ilo tōmak ioon Etan n̄an jem̧ļo̧kin, ak rejjab maron̄ mour ilo aelōn̄ in Anij.

30 Im kōm jeļā bwe kajejjet kōn jouj an ad Irooj im Rilo̧mo̧o̧r Jisōs Kraist e jim̧we im m̧ool;

31 Im kōm jeļā barāinwōt, bwe kokwōjarjar kōn jouj eo an ad Irooj im Rilo̧mo̧o̧r Jisōs Kraist e jim̧we im m̧ool, n̄an aolep ro rej iakwe im jerbal n̄an Anij kōn aolep maron̄ ko, ļōmņak ko, im kajoor ko aer.

32 Ak emaron̄ waļo̧k bwe armej remaron̄ bun̄ļo̧k jān jouj im eļļo̧k jān Anij eo emour;

33 Kōn menin kabun̄ eo en ron̄jake im jar iien otemjej, n̄e raab wōtlo̧k ilo kapo;

34 Aaet, im em̧ool ro em̧ōj kokwōjarjar er ren ron̄jake barāinwōt.

35 Im kōm jeļā bwe men kein rej m̧ool im ekkar n̄an revelesōn ko an Jon, jab kobaikļo̧k n̄an e, ak kōjenik jān kanaan eo jān bok eo an, jeje ko rekwōjarjar, ak revelesōn ko an Anij me renaaj itok tokālik jān mennin letok im kajoor eo an Jetōb Kwōjarjar, ainikien Anij, ak lotok ko an enjeļ raņ.

36 Im Irooj Anij Eaar kōnono men in; im utiej, kajoor im aiboojoj ren ilo̧k ilo̧k n̄an Etan ekwōjarjar, jim̧or kiiō im indeeo. Amen.

37 Im bar juon alen, jān iaļan kien n̄an kabun̄ in kōn wāween peptaij—Aolep ro rej kōttāik er im̧aan Anij, im kōņaan peptaij, im wōnm̧aantak kōn bōro ko rerup im jetōb ko rettā, im kam̧ool im̧aan kabun̄ in ke raar lukkuun ukeļo̧k jān aolep jero̧wiwi ko aer, im rem̧ōņōņō in bōk ioer etan Jisōs Kraist, kōn juon pen in bōro n̄an jerbal n̄an E n̄an jem̧ļo̧k in, im kanooj kwaļo̧k jān jerbal ko aer bwe rekar bōk jān Jetōb eo an Kraist n̄an jeorļo̧k in jero̧wiwi ko aer, naaj bōk er ilo kabun̄ eo An jān peptaij.

38 Jerbal ko an elder ro, pris ro, rikaki ro, tikōn ro, im ro uwaan kabun̄ eo an Kraist—Juon rijjilōk ej juon elder, im ej kūr eo an in n̄an peptaij;

39 Im n̄an kapit elder ro, pris ro, rikaki ro, im tikōn ro jet;

40 Im n̄an kōjeraam̧m̧an pilawā im wain eo—kakōļļe ko in ānbwinnin im bōtōktōkin Kraist—

41 Im n̄an kapen ro rej peptaij tok ilo kabun̄ in, jān likūt pā ko ioon n̄an peptaij an kijeek im Jetōb Kwōjarjar, ekkar n̄an jeje ko rekwōjarjar;

42 Im n̄an katakin, kōmmeļeļeik, kōketak, peptaij, im emmejraake kabun̄ eo;

43 Im n̄an kapen kabun̄ in jān likūt ioon pā ko, im leļo̧k an Jetōb Kwōjarjar;

44 Im n̄an bōk tōl eo ilo aolep kwelo̧k ko.

45 Elder ro ren kajeikik kwelo̧k ko āinwōt an Jetōb Kwōjarjar tōl er, ekkar n̄an kien im revelesōn ko an Anij.

46 Jerbal an pris ej n̄an kwaļo̧k naan, katakin, kōmmeļeļeik, kōketak, im peptaij, im kōjeraam̧m̧an kwōjkwōj eo,

47 Im loļo̧k m̧weo im̧ōn kajjojo uwaan, im kōketak er n̄an jar ilo ainikier im ilo ittino im kōm̧m̧ani aolep jerbal ko an baam̧le.

48 Im e maron̄ barāinwōt kapit pris ro, rikaki ro, im tikōn ro jet.

49 Im e ej aikuj bōk tōl ilo kwelo̧k ko n̄e ejjeļo̧k eldere pād;

50 Ak n̄e ewōr juon elder epād, e eaikuj wōt kwaļo̧k naan, katakin, kōmmeļeļeik, kōketak, im peptaij,

51 Im loļo̧k m̧weo im̧ōn kajjojo uwaan, kōketak er n̄an jar ilo ainikier im ilo ittino im kōm̧m̧ani aolep jerbal ko an baam̧le.

52 Ilo aolep jerbal kein pris eo eaikuj jipan̄ elder eo eļan̄n̄e emennin aikuj.

53 Jerbal eo an rikaki eo ej n̄an emmejraake kabun̄ in iien otemjej, im pād ippāer im kōkajoor er;

54 Im lale bwe en ejjeļo̧k nana ilo kabun̄ in, ak ļōkatip ippen doon, ak riab, ruruwe, ak kōnono nana;

55 Im lale bwe kabun̄ eo en kuktok ippān doon emmakijkij, im barāinwōt lale bwe aolep ro uwaan rej kōm̧m̧ani jerbal ko aer.

56 Im e ej aikuj tōl kwelo̧k ko ilo jako an elder ak pris eo—

57 Im ej aikuj bōk jipan̄ iien otemjej, ilo aolep jerbal ko an ilo kabun̄, jān tikōn ro, eļan̄n̄e emennin aikuj.

58 Ak jaab rikaki ro ak tikōn ro ewōr aer maron̄ n̄an peptaij, kōjeraam̧m̧an kwōjkwōj eo, ak likūt pā ko ioon;

59 Ijoke, rej, aikuj kakkōl, tipdiki, kōketak, im katakin, im karuwainenetok aolep n̄an itok n̄an Kraist.

60 Aolep elder, pris, rikaki, ak tikōn ej aikuj ekkapit ekkar n̄an mennin letok ko im kūr ko an Anij n̄an e; im eaikuj ekkapit ekkar n̄an kajoor eo an Jetōb Kwōjarjar, eo ej ilo eo ej kapit e.

61 Jet elder ro rej booje kabun̄ eo an Kraist ren kwelo̧k ilo juon kwelo̧k juon alen ilo jilu allōn̄, ak jān iien n̄an iien āinwōt naaj ilo kwelo̧k ko kōmlet ak jitōn̄e;

62 Im kwelo̧k kein ba kaki ren kōm̧m̧ani jabdewōt jerbal ko an kabun̄ im reaikuj in kōm̧m̧an ilo iien eo.

63 Elder ro ren bōk peba in mālim ko aer jān elder ro jet, jān errā eo an jarlepju eo rej jar ippān, ak jān kwelo̧k ko.

64 Kajjojo pris, rikaki, ak tikōn, eo kar ekkapit jān juon pris, emaron̄ bōk peba eo an jān e ilo iien eo, peba eo me, n̄e kwaļo̧k n̄an juon elder, enaaj kōmaron̄ e n̄an juon mālim, eo enaaj kōmālim e n̄an kōm̧m̧ani jerbal ko an kūr eo an, ak e maron̄ bōk e jān juon kwelo̧k.

65 Ejjeļo̧k juon armej en ekkapit n̄an jabdewōt opij ilo kabun̄ in, ijo ewōr juon branch em̧ōj karōk ņa kobban an ejja kabun̄ in wōt, eļan̄n̄e ejjab kōn errā eo an kabun̄;

66 Ak elder ro rej tōl, bisop ro rej ito-itak, ro uwaan ko̧o̧njeļ eo eutiej, pris utiej ro, im elder ro, remaron̄ bōk utiej eo n̄an ekkapit, ijo ejjeļo̧k branch an kabun̄ in ie im juon errā emaron̄ jab kūri.

67 Kajjojo president an priesthood eo eutiej (ak elder in tōl), bisop, eo uwaan ko̧o̧njeļ eo eutiej, im pris eutiej, en ekkapit jān tōl an juon ko̧o̧njeļ eo eutiej ak kwelo̧k eo eļap.

68 Jerbal eo an ro uwaan ālikin bōk er jān peptaij—Elder ro ak pris ro en bwe aer iien n̄an tipdiki men otemjej kōn kabun̄ eo an Kraist n̄an aer meļeļe, m̧okta jān aer bōk kwōjkwōj im kapen er jān likūt pā ko ioon jān elder ro, bwe men otemjej ren maron̄ kōm̧m̧an ilo koņ.

69 Im ro uwaan ren kwaļo̧k im̧aan kabun̄ eo, im barāinwōt im̧aan elder ro, jān etetal im em̧m̧ao jim̧we, bwe remaron̄ tōllo̧ke, bwe en maron̄ wōr jerbal ko im tōmak rej errā n̄an jeje ko rekwōjarjar—etetal ilo weeppān im̧aan Irooj.

70 Aolep uwaan kabun̄ eo an Kraist ro ewōr nejier ren bōktok er n̄an elder ro im̧aan kabun̄ eo, ro ren likūt peier ioer ilo etan Jisōs Kraist, im kōjeraam̧m̧an er ilo Etan.

71 Ejjeļo̧k juon naaj bōke ilo kabun̄ eo an Kraist m̧ae an tōpar iiō ko in bōk eddo im̧aan Anij, im ejeļā wāween ukeļo̧k.

72 Peptaij en kōm̧m̧an ilo jekjek in ilaļ n̄an aolep ro rej ukeļo̧k—

73 Armej eo Anij eaar kūr e im ewōr an maron̄ jān Jisōs Kraist n̄an peptaij, en wanlaļļo̧k ilo dān eo ippān ļeo ak lio eaar jakem̧aantak e make n̄an peptaij, im naaj ba, kūr ļeo ak lio kōn etan: Bwe em̧ōj an Jisōs Kraist kōmāron̄ eō, ij peptaij eok ilo etan Jemān, im Nejin, im Jetōb Kwōjarjar. Amen.

74 Innām enaaj kattuļo̧k ļeo ak lio ilo dān eo, im waļo̧ktok bar juon alen jān dān eo.

75 Emennin aikuj bwe kabun̄ eo an kuktok ippān doon emmakijkij n̄an bōk m̧ōttan pilawā im wain eo ilo ememeje Irooj Jisōs;

76 Im elder eo ak pris eo enaaj kōm̧m̧ane; im ālikin jekjek in enaaj kōm̧m̧ane—enaaj bukwelōlō ippān jarlepju eo im kūr n̄an Jemān ilo jar em̧ool, im ba:

77 O Anij, Jemām Indeeo, kōmij kajjitōk Ippam̧ ilo etan Nejūm̧, Jisōs Kraist, n̄an kōjeraam̧m̧an im kokwōjarjar pilawā in n̄an jetōb ko an ro otemjej rej bōk m̧ōttan, bwe ren maron̄ m̧ōn̄ā ilo aer ememej ānbwinnin Nejūm̧, im kam̧ool n̄an Kwe, O Anij, Jemām Indeeo, bwe rem̧ōņōņō in bōk ioer etan Nejūm̧, im keememej E iien otemjej, im kōjparok kien ko An ko Eaar liļo̧k n̄an er; bwe Jetōb eo An en maron̄ pād ippāer iien otemjej. Amen.

78 Wāween eo n̄an kōjeraam̧m̧ane wain eo—e naaj bōk kap eo barāinwōt, im ba:

79 O Anij, Jemām Indeeo, kōmij kajjitōk Ippam̧, ilo etan Nejūm̧, Jisōs Kraist, n̄an kōjeraam̧m̧an im kokwōjarjar wain in n̄an jetōb ko an ro otemjej rej idaak jān e, bwe ren maron̄ kōm̧m̧ane ilo ememej bōtōktōkin Nejūm̧, eo eaar to̧o̧rļo̧k kōn er; bwe ren maron̄ kam̧ool n̄an Kwe, O Anij, Jemām Indeeo, bwe ren keememej E iien otemjej, bwe Jetōb eo An en maron̄ pād ippāer. Amen.

80 Jabdewōt uwaan kabun̄ eo an Kraist ej jirilo̧k, ak em̧ōj ibeb e ilo bōd, naaj jerbal ippān āinwōt an jeje ko rekwōjarjar tōl.

81 Enaaj jerbal an jet jarlepju in rijar ko, rej booje kabun̄ eo an Kraist, n̄an jilkinļo̧k juon ak elōn̄ļo̧k ian rikaki ro aer n̄an pād ilo jet kwelo̧k ko kōm̧m̧an jān elder ro an kabun̄ in,

82 Ippān juon laajrak in āt ko etan jet ian ro uwaan rekar koba ippān doon ippān kabun̄ jān kwelo̧k eo ļo̧k; ak jilkinļo̧k ipein juon pris; āindein bwe juon laajrak iien otemjej in āt ko etan ro ilo aolepān kabun̄ in en maron̄ kōm̧m̧an ilo juon bok jān juon ian elder ro, jabdewōt eo elder ro jet renaaj jitōn̄e jān iien n̄an iien;

83 Im barāinwōt, eļan̄n̄e jabdewōt em̧ōj joļo̧ke jān kabun̄ in, bwe etaer ren maron̄ bukweļo̧k jān ļo̧o̧k in āt ko eo eļap an kabun̄.

84 Aolep ro uwaan rej em̧m̧akūt jān jarlepju in jar eo rekar jokwe ie, eļan̄n̄e rej ilo̧k n̄an jarlepju in jar eo jab jeļā kajjier ie, remaron̄ bōk juon lōta eo ej kaalikkar ke rej uwaan im em̧m̧an etaer, peba in kam̧ool in maron̄ in jain jān jabdewōt elder ak pris eļan̄n̄e uwaan e make ejeļā kajjien elderak pris eo, ak emaron̄ in jain jān rikaki ro ak tikōn ro an kabun̄ in.