Բաժին 54
Հայտնություն՝ տրված Ջոզեֆ Սմիթ Մարգարեի միջոցով, Նյուել Նայթին, Կիրթլենդում, Օհայո, 1831թ. հունիսին (History of the Church, 1.180–181): Թոմսոնում, Օհայո, ճյուղի անդամները տարակարծիք էին ունեցվածքի նվիրաբերմանը վերաբերող հարցերում: Եսասիրություն և ժլատություն էր դրսևորվել, և Լեման Քոփլին խախտել էր իր ուխտը՝ նվիրաբերելու իր մեծ ագարակը, որպես ժառանգության վայր, Քոլսվիլից, Նյու Յորք, ժամանող Սրբերի համար: Էզրա Թայրը նույնպես հակաճառողների մեջ էր: Արդյունքում, Նյուել Նայթը (ճյուղի նախագահը Թոմսոնում) և այլ երեցներ եկել էին Մարգարեի մոտ՝ հարցնելու, թե ինչպես վարվել: Մարգարեն հարցրեց Տիրոջը և ստացավ այս հայտնությունը: (Տե՛ս 56-րդ բաժինը, որն այս հարցի շարունակությունն է):
1–6՝ Սրբերը պետք է պահեն ավետարանի ուխտը, որպեսզի ողորմություն ձեռք բերեն. 7–10՝ Նեղության մեջ նրանք պետք է համբերող լինեն:
1 Ահա, այսպես է ասում Տերը, այսինքն՝ Ալֆան և Օմեգան՝ սկիզբը և վերջը, այսինքն՝ նա, ով խաչվել է աշխարհի մեղքերի համար,–
2 Ահա, ճշմարիտ, ճշմարիտ ասում եմ քեզ, իմ ծառա՛ Նյուել Նայթ, դու պետք է անխախտ կանգնես այն պաշտոնում, որին քեզ նշանակել եմ:
3 Եվ եթե քո եղբայրները ցանկանում են խույս տալ իրենց թշնամիներից, թող նրանք ապաշխարեն իրենց բոլոր մեղքերից և արդարև խոնարհ լինեն իմ առաջ և զղջացող:
4 Եվ քանի որ ուխտը, որը նրանք կապել էին ինձ հետ, դրժվել է, ճիշտ այդպես էլ այն դարձել է զուր և ապարդյուն:
5 Եվ վայ նրան, ում միջոցով գալիս է այս հանցանքը, քանզի նրա համար ավելի լավ կլիներ, որ նա ծովի անդունդում խեղդվեր:
6 Բայց օրհնված են նրանք, ովքեր պահել են ուխտը և հետևել են պատվիրանին, քանզի նրանք ողորմություն ձեռք կբերեն:
7 Ուստի, գնացեք այժմ և փախեք այս հողից, չլինի թե ձեր թշնամիները գան ձեր վրա. և ճամփա ընկեք ու նշանակեք ում կամենում եք, որ լինի ձեր առաջնորդը և գումար վճարողը ձեզ համար:
8 Եվ այսպես, դուք պետք է ճամփա ընկնեք դեպի արևմտյան շրջաններ՝ դեպի Միսսուրիի հողը և Լամանացիների սահմանները:
9 Եվ ճամփորդությունն ավարտելուց հետո, ահա, ասում եմ ձեզ. Ապրուստ փնտրեք, ինչպես մարդիկ, մինչև որ ես տեղ կպատրաստեմ ձեզ համար:
10 Եվ բացի այդ, համբերող եղեք նեղության մեջ, մինչև որ ես գամ. և ահա, ես շուտով գալիս եմ, և իմ վարձքն ինձ հետ է, և նրանք, ովքեր կանուխ փնտրել են ինձ, հանգստություն պիտի գտնեն իրենց հոգիների համար: Ճիշտ այդպես: Ամեն: