1 O yótʼááh hinooláii, índa O nahasdzáán nílíinii, daʼíísínółtsʼą́ą́ʼ, áádóó nihokááʼ bikááʼ kéédahohtʼíinii díí baa nihił dahózhǫ́ǫ doo, háálá Diyin Bóhólníihii éí Diyin God nilį́, áádóó doo łaʼ Yisdánááʼiiʼníił da.

2 Bibee hódzáanii ayóó átʼé, bihoogááł éí bikʼedaʼayóí, áádóó tʼáá ałtsóní áyiilaaígíí doo łaʼ ałtso yíhodoołʼááł da.

3 Bí biniyéí éí ałtso íídoolííł, áádóó doo nááná łaʼ nabidoołtłah da.

4 Hoolʼáádę́ę́ʼ dóó ahoolʼáágóó tʼááłáhígi átʼé, dóó binináháháahii doo nidootʼih da.

5 Háálá Diyin Bóhólníihii kóní—Shí, Diyin Bóhólníihii, dashídósinígíí baa aa aʼááh nisin áádóó baa dajiinishbaʼ, áádóó diyinkʼehgo deiyíkááhgo shíkáʼanájahígíí dóó beʼiinaʼ ndahaztiʼjįʼ shikééʼ naazínígíí shił yáʼátʼééhgo bá dahodíínísin doo.

6 Ayóó átʼáo bikʼidahojidoodliił dóó hoolʼáágóó hoogáłígíí bił ayóó átʼée doo.

7 Áádóó tʼáá aaníinii tʼahdoo béndahoozįįhígíí bił ííshją́ą́ ádeeshłííł, aooʼ, ałkʼidą́ą́ʼyę́ęgi átʼáo shił hazʼą́ądi tʼáá ałtso tʼáá aaníinii tʼahdoo béndahoozįįhígíí nídadeesʼį́ʼę́ę, áádóó náásdi béndahodoozįįłígíí ałdóʼ, shił hazʼą́ądi tʼáá ałtsoní bídadéétiʼígíí shí íinísinígíí bikʼehgo baa shił hózhónígíí bił ííshją́ą́ ádadeeshłííł.

8 Aooʼ, hoolʼáágóó bikʼedaʼayóiiígíí ndi bił béédahózin doo, áádóó ádahodooníłígíí bił ííshją́ą́ ádadeeshłííł, łą́ągo náásgóó daʼíchíhígíí bídadéétiʼígíí ndi.

9 Áádóó ayóó átʼéego bił éédahózin doo, dóó yáʼąąsh hazʼą́ądiígíí yikʼihdaʼdiitįįh doo; áádóó nahasdzáán bikááʼ éédahózinée ádadoodįįł, dóó kweʼé bił éédahózinii bibee hódzáaniiyę́ę ádadoodįįł.

10 Háálá shi Iiʼ Sizį́ Diyinii bee bił éédahodoozįįł, áádóó shibee adziilii bee shinahatʼá doo bił bee dahózinée bił ííshją́ą́ ádadeeshłííł—aooʼ, azhą́ anááʼ tʼahdoo dayiiłtséhígíí ndi, éí doodago ajaaʼ tʼahdoo deidiitsʼį́hígíí ndi, éí doodago tʼahdoo diné bijéí biiʼ dahaleehígíí ndi.

11 Nihí, Joseph Smith, Jun., dóó Sidney Rigdon, Atsá Biyáázh hastą́ʼáadah yoołkaałgo, dóó Jesus náádiidzáádóó mííl yázhí dóó biʼąą tseebídiin dóó biʼąą tádiin dóó biʼąą naaki yihahgo—

12 Iiʼ Sizį́ Diyinii beʼadziilii binahjįʼ nihinááʼ ąą ádaalyaa dóó akʼidaʼdiitą́ągo nihił chʼídaʼdeezdláád, áko Diyin God bitsʼą́ą́dééʼ ádaatʼéii deidiiltsééł dóó bikʼidadiʼdiitį́į́ł—

13 Nahasdzáán tʼahdoo álnéhę́ędą́ą́ʼ dahólónée, éí NihiTaaʼ yiyíísį́į́ʼ, biYeʼ Tʼáá Éí Tʼéiyá Bá Yizhchíinii binahjįʼ, éí aTaaʼ ádíyóltąʼ, tʼáá ńléí hahooyáádééʼ ndi;

14 Éí baa hwiilneʼ; éí baa hwiilneʼígíí Jesus Christ binahatʼá bee yisdáʼiildéehii tʼáá átʼé átʼé, éí aYeʼ nilį́, yáʼąąshdę́ę́ʼ nihił áhoodzaago yiiltsą́ dóó bił ahił dahwiilneʼ.

15 Nááná łahjí saad bee nááhíídzóóhgo, éí Diyin Bóhólníihii yee nihikʼidiilniiʼ, John ashdlaʼ wóltaʼígi naadiin-náhástʼéí saad dashijaaʼgi, éí díígiʼ átʼáo bee nihił hóóneʼ—

16 Daneeznánígíí náádahidooʼnaałgo baa yáʼátiʼ, éí Diyin God biYeʼ bizaad deididootsʼį́į́łgo bídadéétiʼ:

17 Éí náádidoojah; éí yáʼátʼéehgo dahiináa ńtʼę́ę́ʼígíí, tʼáá ákogi átʼéego ádaʼiilaaígíí náádahiináa doo; áádóó doo yáʼáshǫ́ǫ́go ádaʼiilaaígíí éí, doo tʼáá ákogi átʼéego ádaʼiilaaígíí yił náádahiidooʼnaał.

18 Áko díí Iiʼ Sizį́ Diyinii nihił ííshją́ą́ áyiilaaígíí, baa nihił hóóyóí.

19 Áádóó díí yéego baa ntsííkeesgo, Diyin Bóhólníihii nihíniʼ yidiilchidgo ąą áyiilaago akʼiʼdiitą́, dóó Diyin Bóhólníihii biʼayóó átʼéii bitsʼádiʼnílíídgo nihinaagóó hazlį́į́ʼ.

20 Áádóó Diyin aTaa nilíinii binishnáájígo, aYe nilíinii biʼayóó átʼéii yiiltsą́, dóó tʼáá ałtso yee ayóó átʼéii niheenílá;

21 Áádóó diyingo yá ndaalʼaʼí dahodísinii ałdóʼ yiiltsą́, áádóó bikááʼdóó nahatʼáii bidáahgi hadaałtʼé ádabiʼdiilyaaígíí ałdóʼ, éí Diyin God, dóó Dibé Yázhí Wólyéii yá dahodísin, éí hoolʼáágóó dóó ahoyéelʼáágóó bá dahodísin.

22 Áádóó áko, áádóó díí ląʼígo tʼáá aaníigo yaa nidahasneʼ, áko nihí tʼáá aaníí ádiiʼní, tʼáá ałtsoní bikééʼdóó éí, nihí kódiiʼní: Éí tʼáá aaníí hiiná!

23 Háálá Diyin God binishnáájí, yiiltsą́; áádóó tʼáá aaníigo bízhí sidiitsʼą́ą́ʼ aTaaʼ Tʼáá Éí Tʼéiyá Bá Yizhchíinii nilį́ níigo—

24 Áko bí biniinaa, dóó bí binahjįʼ, dóó bí bitsʼą́ą́dóó, nahasdzáán ádaatʼéii haidiilaa dóó dahazlį́į́ʼ, áádóó yikááʼ kéédahatʼíinii éí Diyin God biyeʼké dóó bitsiʼké danilį́.

25 Áádóó díí ałdóʼ yiiltsą́, dóó tʼáá aaníigo baa hwiilneʼ, Diyin God bá naalʼaʼí łaʼ Diyin God bidááhdóó ádíhóosnííʼ, éí nihiTaaʼ Nilíinii biYeʼ Tʼáá Éí Tʼéiyá Bá Yizhchíinii yikʼijįʼ silį́į́ʼgo Diyin God dóó biYeʼ bił hazʼą́ą́dóó chʼíbidiʼnoolchą́ą́ʼ, nihiTaaʼ nilíinii biYeʼ ayóóʼáyóní dóó ádíyóltąʼ,

26 Áádóó Perdition bee wóójiʼ, dóó yáʼąąshiidi kéédahatʼíinii bá dááchah—éí Lucifer átʼį́, éí hayoołkááł yiyeʼ nilį́.

27 Áádóó yiiltsą́, dóó niníílʼį́, adadzííłhaal! adadzííłhaal, hayoołkááł yiyeʼ nilíinii!

28 Áádóó tʼahdii Iiʼ Sizį́ Diyinii nihił hólǫ́ǫgo, Diyin Bóhólníihii díí nihił ííshją́ą́ ííshłaaígíí baa naʼíídóosoh nihidííniid; háálá Chʼį́įdii yiiltsą́, tłʼiish sání, azhą́ chʼį́įdii biʼiiníziinii ndi, éí Diyin God yikʼijįʼ silį́į́ʼ, dóó nihiDiyin God índa biChrist bił hazʼą́ chʼééh yighaiyítʼaah ńtʼę́ę́ʼ—

29 Ákohgo, Diyin God yikééʼ naazíinii yił anaaʼ ííłʼį́, áádóó ałhanéiniłkaʼ.

30 Áádóó yił anaaʼ áyiilaaígíí dóó yikʼeh deesdlį́į́ʼ áádóó bichʼįʼ ndahwiiʼnánígíí nihił ííshją́ą́ áyiilaago yiiltsą́, háálá Diyin Bóhólníihii kótʼáo bizhí nihichʼįʼ kóyiilaago sidiitsʼą́ą́ʼ:

31 Diyin Bóhólníihii kónihiłní tʼáá ałtso sheʼadziil bił béédahózinígíí, dóó łahdóó bił dahólǫ́ǫ ńtʼę́ę́ʼígíí, dóó chʼį́įdii bibeʼadziilii hakʼeh didoodleełgo bá dahojiiłʼaʼ, áádóó tʼáá aaníinii nahjįʼ kódajiilaa dóó sheʼadziil doo bikʼeh dahojííłʼįįd da—

32 Éí éíí chʼį́įdii biʼiiníziinii yikééʼ naazíinii danilį́, jó éí ábidishní tʼáadoo nidabiʼdeezchį́į́góó bá yáʼátʼééh doo ńtʼę́ę́ʼ;

33 Háálá bí éí tʼóó báhádzidgo atídabidiʼdoolníiłgo bá nahwiistʼą́, Diyin God atíbidoolííłgo, éí chʼį́įdii biʼiiníziinii dóó bá ndaalʼaʼii hoolʼáágóó yił tiʼdahoonííh doo;

34 Éí kʼad hoolzhishígíí biyiʼ índa náábíkéédę́ę́ʼ hoolzhishígíí biyiʼ, tsʼídá doo bee nihanídiʼdootʼááł da bidííniidígíí—

35 Iiʼ Sizį́ Diyinii baa heesyáa ndi nahjįʼ kódeiyiilaa, dóó aTaaʼ biYeʼ Tʼáá Éí Tʼéiyá Bá Yizhchíinii yitsʼą́ąjįʼ nídaazyiz, tsin ałnáosdzoh bikáaʼjįʼ bił adaʼjiiłkaal nahalingo áádóó tʼóó baa yáhásinígi ánáádajííłʼįįd.

36 Díí éí łeetsoii dookʼą́ą́ł dahsiyį́ biihidooltłʼił, éí chʼį́įdii biʼiiníziinii dóó bá ndaalʼaʼígíí bił—

37 Áádóó éí tʼéiyá iiʼ siziíniikʼeh anoonééł bikʼi bidziil doo;

38 Aooʼ, tʼáá aaníí, Diyin Bóhólníihii kʼad niizį́į́ʼ bikʼehgo éí tʼéiyá doo yá yikʼé nináʼdoodlééł da, éí biʼatíʼdoolnííł bikééʼdóó dooleeł.

39 Háálá łaʼígíí éí anoonééłdę́ę́ náádahiidooʼnaał, Dibé Yázhí Wólyéii anoonééł yikʼeh deesdlį́į́ʼ dóó biʼayóó átʼéii binikááʼ góneʼ, éí biʼdiisyį́, éí tʼahdoo nahasdzáán ádaalnééhyę́ędą́ą́ aTaaʼ ádíyóltąʼ ńtʼę́ę́ʼ.

40 Áádóó díí éí Jesus Christ binahatʼá bee yisdáʼiildéehii átʼé, haneʼ yáʼátʼéehii, éí yáʼąąshiidę́ę́ʼ azhí yee nihił hoolneʼ—

41 Áko éí nahasdzáán yikááʼ níyá, Jesus ndi, nihokááʼ dineʼé bá tsin ałnáozʼá bikáaʼjįʼ bił oʼoolkaalgo biʼdiisyį́, áádóó nihokááʼ dineʼé ádił nidaʼjiisíiʼii há yóóʼiididooʼááł biniyé doogááł, dóó nahasdzáán haałtʼé íídoolííł, áádóó tʼáá ałtso doo yáʼádaatʼéehii yikááʼdóóʼ yidoołdah;

42 Áko bí binahjįʼ tʼáá ałtso yisdáʼhidookah éí aTaaʼ nilíinii adziilii bee nilá dóó ayiilaa;

43 Éí aTaaʼ ayóó átʼéego yaa haniih, dóó tʼáá ałtso naanish bilá yee áyiilaaígíí yisdéídoonił, ákótʼée ndi chʼį́įdii yikééʼ naazíinii éí dooda jó éí aYeʼ yitsʼą́ąjįʼ nídaazyiz éí aTaaʼ bił ííshją́ą́ áyiilaa.

44 Ákohgo, tʼáá átʼé yisdáyíínil tʼáá hazhóʼí bí éí ndagaʼ—éí ahoolʼáágóó tiʼdahoonííh doo, éí doo niniitʼééhgóó tiʼhooʼnííh átʼé, éí hoolʼáágóó tiʼhooʼnííh átʼé, éí chʼį́įdii yikééʼ naazíinii hoolʼáágóó yił kéédahatʼį́į doo, ákweʼé hazʼą́ągi chʼosh doo daninée da, índa kǫʼ doo nitsées da, éí bikʼee tiʼdahojoonííh doo—

45 Áádóó nihoolzhíishdi, éí doodago áhodoonííłgi, atídahołʼínígíí, ádin diné doo łaʼ bił bééhózin da;

46 Áádóó ałdóʼ doo ííshją́ą́ ályaa da, doo ííshją́ą́ álnééh da, éí doodago doo łaʼ bił íishją́ą́ ádoolnííł da, tʼáá hazhóʼí bił ndaʼanishígíí tʼéiyá;

47 Ákohgo, Shí, Diyin Bóhólníihii, ląʼí bił ííshją́ą́ ádadeeshłííł, ákondi tʼáá hooshchʼįʼ bitsʼą́ą́ dánídiʼdeeshtʼį́į́ł;

48 Ákohgo, bílátahjįʼ áníłtsoh, naaniigo áníłnééz, áníłnéézdi, ánízáád góyaa, dóó tiʼdahooʼnííh, díí łaʼ diné, doo yikʼi daʼdiitįįh da tʼáá hazhóʼí éí tiʼhooʼnííh bee bá ndahwiistʼánígíí tʼéiyá.

49 Áádóó iinééʼ kóníigo, dasidiitsʼą́ą́ʼ: Nihił ííshją́ą́ ályaaígíí nídahoosóóh, háálá danółʼį́, doo Diyin Godkʼehgo ádajítʼéii tiʼdahooníhígíí éí ałtso ííshją́ą́ ádaalyaa.

50 Áádóó tʼáá aaníigo baa nááhwiilneʼ—háálá yiiltsą́ dóó sidiitsʼą́ą́ʼ, áádóó díí éí tʼáá aaníigo Christ binahatʼá bee yisdáʼiildéehii yaa halneʼ éí diyinkʼehgo deiyíkáhígíí náádahiidooʼnaał—

51 Éí éíí Jesus tʼáá aaníigo deiyoodlą́, dóó bízhiʼ deiyoosdląąd áádóó łééh biʼdooltínígi átʼéego tó bee dabidiʼdoolzį́į́ʼ, bízhiʼ binahjįʼ tó bił dadiilkǫʼ, áádóó díí ádííniidígíí bikʼehgo ádaʼiilaa—

52 Áko bee hazʼáanii yikʼeh dahółʼį́įgo ndaʼiisíʼę́ę tʼáá átʼé bąąh tʼáádadoogis dóó chin bąąh dadooldah, dóó Iiʼ Sizį́ Diyinii atsiitʼááh dah adéesniiʼ binahjįʼ baa dahidoolyééł éí háida adziilii bee bikʼi hodiiniiʼ dóó yiilzį́ʼígíí bá áʼdoolííł;

53 Áádóó oodlą́ yee akʼeh dadeesdlį́ʼígíí, dóó Iiʼ Sizį́ Diyinii yee ádééhaadzííʼii bee yiilzį́į́ʼ, éí nihiTaaʼ tʼáá ákogi ádaatʼéii dóó tʼáá aaníí daʼoosdląądígíí bichʼįʼ kódaalyaa.

54 Éí éíí Áłtsé Yizhchíinii bisodizin bá hooghan daʼatah.

55 Éí éíí nihiTaaʼ tʼáá ałtsoní yilákʼe yiilé—

56 Éí éíí priest dóó aláahdi naatʼáanii danilį́, tʼáá átʼé yee hadadítʼéii, dóó biʼayóó átʼéii baa dahaasyá;

57 Áádóó Tsʼídá Áláahdi Ayóó Átʼéii bipriest danilį́, éí Melchizedek bił ałkéé dah nahazʼą́ bikʼehgo, éí Enoch bił ałkéé dah nahazʼą́ bikʼehgo, éí nihiTaaʼ biYeʼ Tʼáá Éí Tʼéiyá Bá Yizhchíinii bił ałkéé dah nahazʼánígíí bikʼehgo.

58 Ákohgo, nihibee hazʼáanii biiʼ bee akʼeʼashchį́į, diyin danilį́, Diyin God biyeʼké ndi danilį́—

59 Ákohgo, tʼáá ałtsóní daabí, iiná éí doodago aniné, éí doodago kʼad hólónígíí, índa dahodooleełígíí, éí tʼáá ałtsoní daabííʼ áádóó nihí Christ bííʼ danohłį́, índa Christ éí Diyin God yííʼ nilį́.

60 Áádóó tʼáá ałtsoní yikʼeh dadidoodleeł.

61 Ákohgo, diné doo nááná łaʼ diné ayóó átʼéego yaa haniih da doo, ákondi bíniʼdii Diyin God tʼéiyá ayóó átʼéego yaa dahaniih dooleeł, éí anaʼí tʼáá ałtso yikʼindoogaał.

62 Díí éí Diyin God dóó biChrist yił kéédahatʼíi doo hoolʼáágóó dóó ahoyéelʼáágóó.

63 Díí éí yił dookah, yádiłhił biyiʼdę́ę́ʼ kʼos bił yildohgo beʼayóó átʼéii yee nídoodááł áádóó nahasdzáán bikááʼ bidineʼé yikʼi hooʼááł doo.

64 Díí éí tsʼídá áłtsé daʼneeznáádę́ę́ʼ náádahiidooʼnááłígíí yitah danilį́į doo.

65 Díí éi tʼáá ákogiʼ átʼéii daʼneeznáádę́ę́ʼ náádahiidooʼnááł.

66 Díí éí Dził Ziondi nahidookah, Diyin God hiináanii bikin haaláadi, yáʼąąsh hazʼą́ądi, éí tsʼídá aláahgo hodiyingo hazʼą́.

67 Díí éí Diyin yá ndaalʼaʼí doo wóltaʼ ánéelą́ą́ʼgóó ntsaago áłah azlį́į́ʼdi yił ahííkai, Enoch, dóó Ałtsé Yizhchíinii bisodizin bá hooghanjįʼ.

68 Díí éí dabizhiʼ yáʼąąshdi ndaháásdzoh, áadi Diyin God dóó Christ tʼáá ałtsoní yá nahwiiʼaah.

69 Díí éí nihokááʼ dineʼé tsʼídá tʼáá ákogi ádaatʼínígíí hadadítʼéego ádabiʼdiilyaa éí Jesus diné yá ataʼ sizíinii ániid bibee ałhaʼdeetʼáanii binahjįʼ, díí hadaałtʼéego tiʼhoozniiʼgo tʼáá bí bidiił deeznaʼgo yee nináʼnídlá.

70 Díí éí bitsʼíís celestial yee hadadíłtʼé, éí jóhanaaʼéígiʼ átʼáo ayóó átʼé, éí Diyin God biʼayóó atʼéhígíí átʼáo, éí tʼáá ałtsoní yiláahdi nilį́, éí jóhanaaʼéí yáʼąąshiidi bitsʼádinílídígi átʼáo baa ndaʼíísdzoh.

71 Áádóó ałdóʼ, terrestrial hazʼą́ yiiltsą́, áko shooh dadínóhʼį́į́ʼ dóó danółʼį́, díí éí terrestrial dóóígíí ádaatʼį́, éí Ałtsé Yizhchíinii bisodizin bá hooghan daʼatah biʼayóó átʼéii bił ałʼąąh átʼé éí aTaaʼ tʼáá ałtso yee atʼéhígíí bił dahazlį́į́ʼ, ooljééʼ dóó jóhanaaʼéí yáʼąąshiidi ałʼąą átʼéhígi átʼáo.

72 Áko shooh, díí éí Diyin beehazʼáanii tʼáadoo nídeidiiláago anídahaaskai;

73 Áádóó ałdóʼ dineʼé biiʼ naazíinii dawótąʼdi, aYeʼ nilíinii baa níyá, dóó binaʼnitin bee yisdáʼiildéehii yee neineeztą́ą́ʼ, áko diné bitsʼíís tʼah dahólónéegi átʼáo bá ndahwiistʼą́;

74 Éí bitsʼíís dahólónéedą́ą́ʼ Jesus tʼáá aaníí bí átʼį́įgo tʼáadoo yaa ákodaniizį́į́ʼ da, ákondi anídahaaskaigo índa bił chʼétʼą́.

75 Díí éí nahasdzáán bikáaʼgi nihokááʼ dineʼé bił danilíinii danilį́, éí nihokááʼ dineʼé biʼanótʼááh biniinaa tʼáadoo akʼidaʼdiitą́ą da.

76 Díí éí biʼayóó átʼéii nídeidiilá, ákondi tʼáá ałtso yee atʼéhígíí doo bił dahazlį́į́ʼ da.

77 Díí éí aYeʼ baa níyáago yéédahoosin, ákondi aTaaʼ tʼáá ałtso yee atʼéhígíí éí doo bił dahazlį́į́ʼ da.

78 Ákohgo, terrestrial yee hadadíłtʼé, áádóó celestial éí doo yee hadadíłtʼée da, ooljééʼ dóó jóhanaaʼéí yáʼąąshiidi ałʼąą átʼéhígi átʼáo.

79 Díí éí Jesus tʼáá aaníígo yéédahosin ndi doo tʼáá íiyisíí yikééʼ naazíi da; ákohgo, nihiDiyin God bidiyingo hazʼą́ądi doo naatʼááh chʼah baa dahidootʼááł da.

80 Áádóó áko díí terrestrial hazʼą́ądi nihił ííshją́ą́ ályaaígíí ałtso, áko Diyin Bóhólníihii BiʼIiʼ Sizíinii tʼahdii nihił hólǫ́ǫgo náhósóóh nihidííniid.

81 Áádóó ałdóʼ, telestial hazʼą́ądi biʼayóó átʼéii nihił ííshją́ą́ ályaa, éí biʼayóó átʼéii tʼáá aʼoh, sǫʼ dóó ooljééʼ éí yáʼąąshiidi ałʼąą átʼéhígi átʼáo.

82 Díí éí Christ binaʼnitin bee yisdáʼiildéehii tʼáadoo deiyoosdląądígíí adaatʼį́, Jesus tʼáá aaníigo bahaneʼii áłdó tʼáadoo deiyoosdląąd da.

83 Díí éí Iiʼ Sizį́ Diyinii tʼáadoo yitsʼą́ąjįʼ nídaazyiz da.

84 Díí éí chʼį́įdiitahgóóyaa adabiʼdiyooltłʼił.

85 Díí éí akéedi nááʼiináadi índá chʼį́įdii biʼiiníziinii dabiʼdótʼądééʼ dabidiʼdoochił, éí éíí Diyin Bóhólníihii, Christ Dibé Yázhí Wólyéii, binaanish ałtso áyiilaajįʼ índa.

86 Díí éí diné iiʼ sizíinii tʼahdp tʼáá ałtso yee atʼéhígíí bił dahaleeh da, ákondi Iiʼ Sizį́ Diyinii terrestrial hazʼą́ądi baa nádaah doo;

87 Áádóó terrestrial hazʼą́ągi éí celestial hazʼą́ą́dééʼ baa nídaakah doo.

88 Áádóó ałdóʼ telestial hadadíłtʼéii éí diyin yá ndaalʼaʼí baa nídaakahgo éí yinahjįʼ nídeidiyiilée doo éí bikáʼanájah doogo bee bikʼidahodiiniiʼ, éí doodago diyingo nidaalʼaʼí háká anájah doo biniyé adabiʼdiisʼaʼ; háálá yisdáʼiildééh hódadooleeł.

89 Áádóó ákótʼáo, yáʼąąshdééʼígíí nihił ííshją́ą́ ályaago, telestial hazʼą́ biʼayóó átʼéii yiiltsą́, éí akʼidiʼyiitįįh tʼáá ałtso biláahdi áhootʼé;

90 Áádóó ádin diné doo łaʼ bił yikʼiʼdiitįįh da tʼáá hazhóʼí Diyin God bił ííshją́ą́ áyiilaago tʼéiyá.

91 Áádóó ákótʼáo terrestrial hazʼą́ biʼayóó átʼéii yiiltsą́ éí telestial hazʼą́ tsʼídá yiláadi átʼé, ayóó átʼéii bee, dóó adziilii bee, dóó atʼéhígíí bee, dóó akʼih bóhólnííhígíí bee.

92 Áádóó ákótʼáo celestial hazʼą́ biʼayóó átʼéii yiiltsą́, éí tʼáá ałtsoní yiláahdi átʼé—áádi Diyin God, nihiTaaʼ, éí bikááʼdóó nahatʼáii hoolʼáágóó bóhólníihgo ahóyéelʼáa doo;

93 Tʼáá ałtsoní joobaʼgo bá dahodísingo bikááʼdóó nahatʼáii bidááhdóó bichʼįʼ yaa ádadoonííł, dóó hoolʼáágóó dóó ahoyéelʼáágóó baa dahaniih doo.

94 Ałtsé Yizhchíinii yáʼąąshdi bił kéédahatʼínígíí éí bisodizin daʼatah; dóó Diyin God dabooínígiʼ átʼéego daʼooį́į doo, tʼáá Diyin God béédahósinígi átʼéego bił éédahózin doo, tʼáá átʼé hadadítʼéii dóó biʼayóó átʼéii baa dahaasyá;

95 Áádóó tʼáá ałtso tʼáá aheełtʼéego adziilii, adaatʼéhígíí, dóó yikʼih bee bídahólníihgo íídoolííł.

96 Áádóó celestial hiníláii hólónígíí yee ayóó ánóolnin, ákótʼáo jóhanaaʼéí hólónígíí yee ayóó ánóolnin.

97 Áádóó terrestrial hiníláii hólónígíí yee ayóó ánóolnin, ákótʼáo ooljééʼ hólónígíí yee ayóó ánóolnin.

98 Áádóó telestial hiníláii hólónígíí yee ayóó danóolnin, ákótʼáo sǫʼ dahólónígíí yee ayóó ádanóolnin; háálá sǫʼ łaʼ éí nááná sǫʼ yee ayóó ádanóolninígíí doo ahedaałtʼée da, biʼayóó ánóolninii ałʼąą átʼéhígi átʼéego, telestial hazʼą́ądi ayóó ádanoolinígíí ndi ałʼąą ádaatʼé;

99 Háálá díí éí Paul yíhoołʼaahii danilį́, áádóó łaʼ éí Apollos yíhoołʼaahii danilį́, áádóó łaʼ éí Cephas yíhoołʼaahii danilį́.

100 Díí éí łaʼ bíhooshʼaahii nishłį́ daaní áádóó nááná łaʼ éí bíhooshʼaahii nishłį́ daaní—łaʼ éí Christ yíhoołʼaahii nishłį́ daaní áádóó nááná łaʼ éí John, áádóó nááná łaʼ éíyá Moses, áádóó nááná łaʼ éí Elias, áádóó nááná łaʼ éí Esaias, áádóó nááná łaʼ éí Isaiah, áádóó nááná łaʼ éí Enoch;

101 Ákondi Christ binaʼnitin bee yisdáʼiildéehii tʼáadoo deiyoosdląąd da, Jesus tʼáá aaníigo bahaneʼii ałdóʼ tʼáadoo deiyoosdląąd da, Diyin yá yádaałtiʼí ndi, hoolʼáágóó diyingo bee ahaʼdeetʼáanii ndi tʼáadoo nídeidiiláa da.

102 Tʼáá ałtsoní bikééʼdóó, díí tʼáá ałtso Diyin yikééʼ naazíinii doo bił ahíídootʼish da, yáʼąąshdi Ałtsé Yizhchíinii bisodizinjįʼ nahidookah, wótʼááhgóó kʼos biyiʼjįʼ dookah.

103 Díí éí dabiyoochʼídígíí, dóó tʼóó nichxǫ́ʼígo éédahósinii, dóó aadaʼdiléí, naʼageh yee tsiʼnidaakaii, índa yoochʼį́į́d ayóóʼádayóʼníinii.

104 Díí éí nahasdzáán bikááʼ Diyin God biʼatíʼálʼį́ yikʼee tiʼdahwiidoonih.

105 Díí éí hoolʼáágóó hodookʼą́ą́ł bee atíʼílʼį́įgo tiʼdahodoonih.

106 Díí éí chʼį́į́diitahgóó ahidiyooltłʼił dóó Diyin God Ayóóʼábóodziilii biʼatíʼálʼį́ yikʼee tiʼdahwiidoonih, nihoolzhiizhjįʼ índa, áadi Christ hweʼanaʼí tʼáá ałtso yikʼi déesʼeez áhoolʼáajįʼ, dóó áajįʼ binaanish ałtso hadaałtʼé áyiilaa doo;

107 NihiTaaʼ Diyin bidiyingo hazʼą́, yaa néídooʼááł, hadaałtʼéego, kóníigo: Diné doo łaʼ shił naaʼaashgóó tʼáá sáhí chʼil naʼatłʼoʼii habíʼííłʼeez, éí Diyin God Ayóóʼábóodziilii tʼóó báhádzidgo biʼáháchįʼ ndi bee bikʼi nideeshʼááł.

108 Áko índa tʼáá bí biʼayóó átʼáo naatʼá chʼah bąąh nidootʼááł, bikááʼdóó nahatʼáii bibeʼadziilii bee yikááʼ dahsidáago hoolʼáágóó bóhólníihgo ahóyéelʼáá doo.

109 Ákondi shooh, dóó danółʼį́, telestial hazʼą́ągi hiníláii yee ayóó ánóolninígíí yiiltsą́, yádiłhił biyiʼdi sǫʼígi ánéelą́ąʼgo, índa tónteel bibąąhgóó séíígi ánéelą́ąʼgo ánéelą́ą́ʼ;

110 Áádóó Diyin Bóhólníihii bizhí kóníigo sidiitsʼą́ą́ʼ: Éí tʼááłáʼí jinítínígo shichʼįʼ nitsidazhdidoogohgo, bikááʼdóó nahatʼáii dahsidáhígíí bichʼįʼ tʼáá ádzíłtso hazééʼ bee ádee hadazhdoodzih hoolʼáágóó dóó ahóyéelʼáágóó;

111 Háálá binaanish ádayiilaayę́ę bikʼehgo bá ndahodiyootʼááł, nihokááʼ diné tʼááłáʼí nízínígo binaanish, dóó daabí, ádeiyiilaaígíí bikʼehgo badaʼdoolyééł, éí hoghan daʼílíinii bá hashtʼedaalyaaígíí baa dahididootʼááł;

112 Áádóó Tsʼídá Áláahdi Ayóó Átʼéii yá ndaalʼaʼ doo; ákondi Diyin God dóó Christ hiinánídi éí doo nihidookah da, nahasdzáán doo bee nohonítʼiʼgóó.

113 Díí yiiltsánígíí kʼad ałtso nihił ííshją́ą́ ályaa, éí tʼáh Iiʼ Sizį́ Diyinii nihił hólǫ́ǫ́dą́ą́ʼ náhidoosoh nihiʼdooniid.

114 Ákondi Diyin Bóhólníihii binaanish éí tsʼídá ayóó átʼé dóó ayóó ánoolnin, áádóó bił hazʼą́ądi tʼáá aaníinii tʼahdoo béndahoozįįhígíí ałdóʼ nihił ííshją́ą́ áyiilaa, éí akʼidiʼyiitįįh tʼáá ałtso biláahdi áyóó ánoolninii, dóó ayóó adaatʼéhígíí, dóó yikʼih bee bídahólníihgo íídoolííł;

115 Eí tʼahdii Iiʼ Sizį́ Diyinii nihił hólǫ́ǫgo náhósóóh lágo nihiłní, dóó éí diné yee hadoodzihgo doo yee hasʼą́ą da;

116 Áádóó ałdóʼ nihokaaʼ dineʼé yaa dahodoolnihgo doo yídeiyííghah da, háálá Iiʼ Sizį́ Diyinii bibeʼadziilii binahjįʼ tʼéiyá yidooltsééł dóó bikʼidiʼdootį́į́ł, éí Diyin God ayóó áyóónínígíí, dóó bidááhdóó bąąhági ádaatʼéii bá nahjįʼ kódaalyaaígíí tʼéiyá yeidoolééł;

117 Díí tʼáá bí daʼooį́į doo dóó bił éédahózin doogo yee yikʼihojisdliʼgo yaa yiizlá;

118 Áko Iiʼ Sizį́ Diyinii bibeʼadziilii dóó binahjįʼ ííshją́ą́ éʼélʼíinii, tʼah bitsʼíís dahólǫ́ǫgo, éí ayóó átʼáo hiináadi yidááhdóó deiziʼgo yídaneilʼą́ą doo.

119 Áádóó ayóó éʼétʼé, dóó bá hodílzin, dóó hoolʼáágóó dóó ahoyéelʼáágóó akʼih bóhólnííh doogo Diyin God dóó Dibé Yázhí Wólyéii bííʼ dooleeł. Amen.