1 Chex’ab’inq, ex choxa, ut k’e aaxik, at ruchich’och’, ut chisaho’q eech’ool ex li wankex chi sa’, xb’aan naq li Qaawa’ a’an li Dios, ut maak’a’ chik junaq Kolonel chiru a’an.

2 Nim xchaab’ilal lix na’leb’, sachb’a-ch’oolej lix b’e, ut lix najtil lix b’aanuhom maajun taaruuq chixtawb’al xyaalal.

3 Li rajom moko na’oso’ ta, chi moko wan anihaq li naru chi ramok re li ruq’.

4 A’an juntaq’eet chalen chaq junelik q’e kutan toj junelik q’e kutan chik, ut maajo’q’e na’oso’ xchihab’.

5 Xb’aan naq jo’ka’in naxye li Qaawa’—Laa’in, li Qaawa’, aj uxtaanin ut aj usilanelin reheb’ li neke’xuwank wu, ut nasaho’ inch’ool chixnimankil ruheb’ li ani neke’k’anjelak chiwu sa’ tiikilal ut sa’ li yaal toj sa’ roso’jik.

6 Nimaq ru lix q’ajkamunkileb’ ut chi junelik taawanq lix loq’aleb’.

7 Ut chiruheb’ a’an tink’utb’esi chixjunil li muqmuukil na’leb’; relik chi yaal, chixjunil li tz’apb’il ru muqmuukil na’leb’ re lin awa’b’ejihom chalen chaq najter kutan, ut chiruheb’ li q’e kutan chalel, ut tink’e chixnaweb’ li chaab’il ajom li na’alan sa’ inch’ool chirix chixjunil li k’a’aq re ru re lin awa’b’ejihom.

8 Relik chi yaal, a’ li sachb’a-ch’oolej re junelik q’e kutan te’xnaw, ut li k’a’aq re ru chalel tink’utb’esi chiruheb’, a’ li k’a’aq re ru re k’iila tasal tenamit.

9 Ut nimaq ru lix na’leb’eb’, ut lix tawomeb’ ru toj sa’ choxa taawulaq; ut chiruheb’ a’an taa’oso’q xna’leb’eb’ li ninqeb’ xna’leb’, ut lix tawomeb’ ru li seeb’eb’ chi na’leb’ank maak’a’ taa’ok wi’.

10 Xb’aan naq rik’in lin Musiq’ teb’inkutanob’resi, ut rik’in lin wankilal tink’e chi nawmank chiruheb’ li muqmuukil na’leb’ re li rajom inch’ool—relik chi yaal, li k’a’aq re ru ajwi’ a’an li moko ilb’il ta xb’aan xnaq’ uhej, chi moko ab’inb’il xb’aan xikej, chi moko okenaq sa’ xch’ool li winq.

11 Laa’o, aj Jose Smith, alalb’ej, ut aj Sidney Rigdon, naq koowan sa’ li Musiq’ej sa’ li waqlaju xb’e li po Febrero, sa’ jun mil ut waqxaqib’ cient rik’in kab’laju xka’k’aal xchihab’il li Qaawa’—

12 Xb’aan lix wankil li Musiq’ej kiteeman xnaq’ qu ut kikutanob’resiik li qanawom, re kooru chirilb’al ut chixtawb’al ru li k’a’aq re ru re li Dios—

13 A’ li k’a’aq re ru li kiwan chalen chaq sa’ xtiklajik rub’elaj naq kiwan li ruchich’och’, li k’ojob’anb’il chaq xb’aan li Yuwa’b’ej, rik’in li Ralal Junaj Chirib’il, li kiwan chire xch’ool li Yuwa’b’ej chalen ajwi’ chaq sa’ xtiklajik;

14 A’an li naqach’olob’ wi’ xyaalal, ut li yaal naqach’olob’ a’an xtz’aqalil lix evangelio li Jesukristo, a’an li K’ajolb’ej, li kiqil ut li koo’aatinak rik’in sa’ li choxahil matk’.

15 Xb’aan naq chiru naq yooko chaq chixb’aanunkil li k’anjel re jaltesink ru aatin, li kixxaqab’ chaq li Qaawa’ choq’ qe, koowulak sa’ li xb’ele xka’k’aal raqal li ro’ xch’ool laj Jwan, li kik’eeman qe chi jo’ka’in—

16 Li na’aatinak chirix lix waklijikeb’ li kamenaq chi yo’yo, chirixeb’ li te’ab’inq re lix yaab’ xkux li Ralal li Winq:

17 Ut te’elq chaq, eb’ li ke’b’aanunk re li us, sa’ xwaklijikeb’ chi yo’yo li tiikeb’, ut eb’ li ke’b’aanunk re li ink’a’ us, sa’ xwaklijikeb’ chi yo’yo li moko tiikeb’ ta.

18 Anajwan a’in kixk’e xsachik qach’ool, xb’aan naq k’eeb’il qe xb’aan li Musiq’ej.

19 Ut naq yooko chi k’oxlak chirix li k’a’aq re ru a’in, li Qaawa’ kixch’e’ rilob’aal li qanawom, ut kiteeli, ut lix loq’al li Qaawa’ kilemtz’un sa’ qasutam.

20 Ut kiqil lix loq’al li K’ajolb’ej, sa’ xnim uq’ li Yuwa’b’ej, ut kiqak’ul xkomon lix tz’aqalil ru;

21 Ut ke’qil li santil anjel, ut eb’ li santob’resinb’ileb’ chiru lix k’ojarib’aal, li wankeb’ chixloq’oninkil li Dios, ut li Karneer, li neke’loq’onink re chi junelik q’e kutan.

22 Ut anajwan, chirix li k’iila ch’olob’ank xyaalal li k’eeb’il chaq chirix a’an, a’in li ch’olob’ank xyaalal, xraqikeb’ chixjunil, li naqak’e chirix: Naq yo’yo!

23 Xb’aan naq kiqil, sa’ ajwi’ lix nim uq’ li Dios; ut kiqab’i lix yaab’ kuxej chixch’olob’ankil xyaalal naq a’an li Junaj Yo’lajenaq chiru li Yuwa’b’ej—

24 Naq xb’aan a’an, ut rik’in a’an, ut sa’ xk’ab’a’ a’an, neke’yiib’aman ut ke’yiib’aman chaq li ruchich’och’, ut li ani wankeb’ chi sa’ yo’lajenaqeb’ choq’ alalb’ej ut rab’inb’ej chiru li Dios.

25 Ut a’in ajwi’ kiqil, ut naqach’olob’ xyaalal, naq jun lix anjel li Dios, li kiwan chaq chi k’eeb’il xwankil chiru li Dios, li kixpo’resi xch’ool chiru li K’ajolb’ej Junaj Chirib’il li raaro xb’aan li Yuwa’b’ej ut li kiwan chire xch’ool li yuwa’b’ej, kitz’eqman taq’a chiru chaq li Yuwa’b’ej ut li K’ajolb’ej,

26 Ut Sachenaq kiyeeman re, xb’aan naq eb’ li choxa ke’yaab’ak chirix—a’an chaq laj Lucifer, jun alalb’ej re li saqew.

27 Ut kiqak’e reetal, ut ilomaq, t’anenaq a’an! t’anenaq, jun alalb’ej re li saqew!

28 Ut naq toj koowan sa’ li Musiq’ej, li Qaawa’ kixtaqla qe naq taqatz’iib’a li k’utb’esinb’il matk’; xb’aan naq kiqil laj Satanas, li najter aj k’anti’ a’an, a’ ajwi’ laj tza, li kixpo’resi xch’ool chiru li Dios, ut kixsik’ xchapb’al lix awa’b’ejihom li qaDios ut lix Kristo—

29 Jo’kan ut, naxb’aanu li pleetik rik’ineb’ laj santil paab’anel re li Dios, ut naxsutiheb’ rix.

30 Ut kiqil jun k’utb’esinb’il matk’ re li rahilal neke’xk’ul li ani kixb’aanu wi’ li pleetik ut kinumta sa’ xb’eeneb’, xb’aan naq jo’ka’in kichal lix yaab’ xkux li Qaawa’ qik’in:

31 Jo’ka’in naxye li Qaawa’ chirix chixjunileb’ li neke’nawok re lin wankilal, ut k’eeb’ileb’ chi tz’aqonk rik’in, ut ke’xkanab’ rib’ xb’aan lix wankilal laj tza chi q’axe’k ru, ut chixtz’eqtaanankil li yaal ut chixyalb’al ru rik’in lin wankilal—

32 A’aneb’ a’an li wankeb’ choq’ alalb’ej re li sachk, li kinye wi’ chirixeb’ naq q’axal us raj choq’ reheb’ naq ink’a’ raj ke’yo’la;

33 Xb’aan naq a’aneb’ k’uleb’aal re li josq’il, xk’ulumaqeb’ xnumsinkil lix josq’il li Dios, rochb’een laj tza ut eb’ lix anjel sa’ li junelik q’e kutan;

34 Chirixeb’ li kinye wi’ naq maak’a’ xkuyb’al lix maakeb’ sa’ li ruchich’och’ a’in chi moko sa’ li ruchich’och’ toj chalel—

35 Rik’in naq ke’xtz’eqtaana xyaalal li Loq’laj Musiq’ej chirix xk’ulb’al, ut ke’xtz’eqtaana xyaalal li K’ajolb’ej Junaj Chirib’il chiru li Yuwa’b’ej, ut ke’xke’ chiru krus choq’ reheb’ xjunes, ut ke’xk’e sa’ jun xutaanal chi k’utk’u.

36 A’ineb’ li te’xik sa’ li palaw re xam ut chuhil pek, rochb’een laj tza ut eb’ lix anjel—

37 Ut ka’ajwi’ sa’ xb’eeneb’ a’an taawanq xwankil li xkab’ kamk;

38 Relik chi yaal, ka’ajeb’ wi’ a’an ink’a’ te’toje’q rix sa’ li kutan k’oxlanb’il xb’aan li Qaawa’, chirix xnumsinkil xrahil lix josq’il.

39 Xb’aan naq chixjunil li jun ch’ol chik te’k’ame’q chaq xb’aan lix waklijikeb’ li kamenaq chi yo’yo, xb’aan lix q’axom ru ut lix loq’al li Karneer, li kikamsiik, li kiwan chire xch’ool li Yuwa’b’ej rub’elaj naq ke’yiib’aman li ruchich’och’.

40 Ut a’in li evangelio, li sahil esilal, li kixch’olob’ wi’ xyaalal li xyaab’ kuxej chalen chaq sa’ choxa chiqu—

41 Naq a’an kichal sa’ li ruchich’och’, a’ li Jesus, re taak’ehe’q chiru krus choq’ re li ruchich’och’, ut re riiqankil lix maak li ruchich’och’, ut re xsantob’resinkil li ruchich’och’, ut re xch’ajob’resinkil chiru chixjunil li maa’usilal;

42 Re naq sa’ xk’ab’a’ a’an taaruuq te’kole’q chixjunileb’ li kixk’e li Yuwa’b’ej rub’el xwankil ut kixyiib’ rik’in ruq’ ajwi’ a’an;

43 Li naxnimob’resi xloq’al li Yuwa’b’ej, ut naxkol chixjunil lix yiib’ahom li ruq’, ka’ajeb’ wi’ li alalb’ej a’an re li sachk ink’a’, li neke’tz’eqtaanank xyaalal li K’ajolb’ej chirix naq li Yuwa’b’ej kixk’utb’esi a’an.

44 Jo’kan ut, naxkol chixjunil, ka’ajeb’ wi’ a’an ink’a’—eb’ a’an te’xik sa’ li tojb’a-maak li junelik taakanaaq, a’an li tojb’a-maak maak’a’ roso’jik, a’an li tojb’a-maak chi junelik, re awa’b’ejink rochb’een laj tza ut eb’ lix anjel sa’ li junelik q’e kutan, b’ar wi’ ink’a’ nakam lix motz’o’il, ut moko nachup ta li xam, a’an ajwi’ lix rahob’tesinkileb’—

45 Ut li roso’jik a’an, malaj lix na’aj, malaj li rahob’tesinb’ileb’ wi’, maajun winq nanawok re;

46 Chi moko kik’utb’esiman, chi moko wan chi moko taawanq chi k’utb’esinb’il chiru li winq, ka’ajwi’ chiruheb’ li k’eeb’ileb’ chi tz’aqonk rik’in;

47 A’b’anan laa’in, li Qaawa’, nink’ut sa’ k’utb’esinb’il matk’ chiru naab’al, a’b’an tikto nintz’ap wi’chik ru;

48 Jo’kan naq li roso’jik, lix nimal ru, lix teram ut lix chamal, ut lix rahil a’an, moko neke’xtaw ta ru, chi moko ani junaq winq, ka’ajeb’ wi’ li k’ojob’anb’ileb’ choq’ re li tojb’a-maak a’in.

49 Ut kiqab’i lix yaab’ kuxej chixyeeb’al: Tz’iib’ahomaq li k’utb’esinb’il matk’, xb’aan naq ilomaq, a’in xraqik li k’utb’esinb’il matk’ chirix li rahilal te’xnumsi li moko useb’ ta.

50 Ut jo’kan wi’chik naqach’olob’ xyaalal—xb’aan naq koo’ilok ut koo’ab’ink, ut a’in li yaal ch’olob’anb’il sa’ lix evangelio li Kristo chirixeb’ li te’elq chaq sa’ xwaklijikeb’ chi yo’yo li tiikeb’—

51 A’aneb’ a’an li ke’k’uluk re li yaal ch’olob’anb’il chirix li Jesus, ut ke’paab’ank re lix k’ab’a’ ut ke’kub’e xha’ jo’ chanru lix muqlajik, chi muqb’ileb’ sa’ li ha’ sa’ lix k’ab’a’, ut a’in jo’ chanru li taqlahom li kixk’e—

52 Re naq rik’in xpaab’ankileb’ li taqlahom taaruuq te’ch’aje’q ut te’ch’ajob’resiiq chirix chixjunil lix maakeb’, ut te’xk’ul li Loq’laj Musiq’ej rik’in xk’eeb’al li ruq’ li ani k’ojob’anb’il ut tz’apb’il choq’ re li wankilal a’in;

53 Ut neke’q’axok-u rik’in paab’aal, ut neke’k’ehe’ xtz’apb’aleb’ xb’aan li Loq’laj Musiq’ej re li yeechi’ink, li naxhir li Yuwa’b’ej sa’ xb’eeneb’ chixjunil li tiikeb’ xna’leb’ ut tiikeb’ chi paab’ank.

54 A’aneb’ a’an li wankeb’ choq’ iglees re li Xb’een Yo’lajenaq.

55 A’aneb’ a’an li kixk’e wi’ li Yuwa’b’ej sa’ ruq’eb’ chixjunil li k’a’aq re ru—

56 A’aneb’ a’an li wankeb’ choq’ aj tij ut rey, li ke’k’uluk re xkomon lix tz’aqalil ru, ut xkomon lix loq’al;

57 Ut aj tijeb’ chiru li Q’axal Taqenaq Xwankil, jo’ chanru xk’anjelil laj Melkisedek, li kiwan jo’ chanru xk’anjelil laj Enok, li kiwan jo’ chanru xk’anjelil li K’ajolb’ej Junaj Chirib’il.

58 Jo’kan ut, jo’ tz’iib’anb’il, dioseb’ a’an, ralaleb’ ajwi’ li Dios—

59 Jo’kan ut, reheb’ a’an chixjunil li k’a’aq re ru, ma li yu’am malaj li kamk, malaj li k’a’ru wan, malaj li k’a’ru chalel, chixjunil reheb’ a’an, ut a’aneb’ re li Kristo, ut li Kristo a’an re li Dios.

60 Ut eb’ a’an te’numtaaq sa’ xb’een chixjunil li k’a’aq re ru.

61 Jo’kan ut, maajun winq chixnima xloq’al rik’in li winq; chixnima b’an xloq’al rik’in li Dios, li taak’ehoq rub’el roq chixjunileb’ li xik’ neke’ilok re.

62 Eb’ a’in te’wanq chiru rilob’aal li Dios ut lix Kristo chi junelik q’e kutan.

63 A’aneb’ a’in li tixk’ameb’ rochb’een, naq taachalq sa’eb’ li choql re choxa, re awa’b’ejink sa’ li ruchich’och’ sa’ xb’een lix tenamit.

64 A’aneb’ a’in li te’tz’aqonq sa’ li xb’een wakliik chi yo’yo.

65 A’aneb’ a’in li te’elq chaq sa’ lix waklijikeb’ chi yo’yo li tiikeb’.

66 A’aneb’ a’in li wulajenaqeb’ sa’ li Tzuul Sion, ut sa’ lix tenamit li yo’yookil Dios, li choxahil na’ajej, li q’axal sant chiru chixjunil.

67 A’aneb’ a’in li wulajenaqeb’ sa’ jun teep chi anjel maak’a’ rajlankileb’, sa’ li jolomil ch’utlajik ut li iglees re laj Enok, ut re li Xb’een Yo’lajenaq.

68 A’aneb’ a’in li tz’iib’anb’ileb’ xk’ab’a’ sa’ choxa, b’ar wi’ li Dios ut li Kristo wankeb’ choq’ aj raqol aatin sa’ xb’een chixjunil.

69 A’aneb’ a’in li winq tiikeb’ xna’leb’ li tz’aqob’resinb’ileb’ re ru sa’ xk’ab’a’ li Jesus, aj b’aanunel uuchil re li ak’ sumwank, li kik’anjelank re li xtojb’al rix maak a’in li tz’aqal re ru, rik’in lix hoyonik tz’aqal lix kik’el.

70 A’aneb’ a’in li choxahil lix tib’eleb’, lix loq’al wi’ a’an xloq’al li saq’e, a’ lix loq’al li Dios, li taqenaq sa’ xb’een chixjunil, li tz’iib’anb’il wi’ naq lix loq’al li saq’e chiru li heelam chanchan ajwi’ xloq’al.

71 Ut jo’kan wi’chik, kiqil li terrestil ruchich’och’, ut k’ehomaq reetal ut ilomaq, a’aneb’ a’in li ani terrestileb’, li jalan wi’ xloq’aleb’ rik’in xloq’al li iglees re li Xb’een Yo’lajenaq li ke’k’uluk re xtz’aqalil ru li Yuwa’b’ej, jo’ chanru ajwi’ naq lix loq’al li po jalan wi’ rik’in xloq’al li saq’e sa’ li heelam.

72 K’ehomaq reetal, a’aneb’ a’in li ke’kam chi maak’a’ chaq’rab’;

73 Ut jo’kan ajwi’ eb’ lix musiq’eb’ li winq tz’aptz’ookeb’ sa’ tz’alam, li kirula’ani li K’ajolb’ej, ut kixjultika li evangelio chiruheb’, re taaraqmanq aatin chirixeb’ jo’ chanruheb’ li winq sa’ li tz’ejwalej;

74 Li moko ke’k’uluk ta re li yaal ch’olob’anb’il chirix li Jesus sa’ li tz’ejwalej, a’ut moqon ke’xk’ul.

75 A’aneb’ a’in li winq chaab’ileb’ xch’ool re li ruchich’och’, li ke’mutz’ob’resiik ru xb’aan xb’alaq’eb’ li winq.

76 A’aneb’ a’in li neke’k’uluk re xkomon lix loq’al, a’b’an lix tz’aqalil ru ink’a’ neke’xk’ul.

77 A’aneb’ a’in li neke’k’uluk re wank chiru li K’ajolb’ej, a’b’an lix tz’aqalil ru li Yuwa’b’ej ink’a’ neke’xk’ul.

78 Jo’kan ut, a’aneb’ li terrestil tz’ejwalej, ut moko choxahil tz’ejwalej ta, ut jalaneb’ xloq’al jo’ chanru naq li po jalan wi’ rik’in li saq’e.

79 A’aneb’ a’in li moko kaweb’ ta xch’ool rik’in li yaal ch’olob’anb’il chirix li Jesus; jo’kan ut, moko neke’xk’ul ta li koroon sa’ xb’een li awa’b’ejihom re li qaDios.

80 Anajwan ut a’in xraqik li k’utb’esinb’il matk’ kiqil chirix li terrestil, li kixtaqla li Dios chiqatz’iib’a naq toj koowan sa’ li Musiq’ej.

81 Ut jo’kan wi’chik, kiqil lix loq’al li teleestil, ut a’ loq’al a’an xloq’al li kub’enaq xwankil, jo’ chanru naq lix loq’aleb’ li chahim jalan wi’ rik’in lix loq’al li po sa’ li heelam.

82 A’aneb’ a’in li moko ke’k’uluk ta re lix evangelio li Kristo, chi moko li yaal ch’olob’anb’il chirix li Jesus.

83 A’aneb’ a’in li moko neke’xtz’eqtaana ta xyaalal li Loq’laj Musiq’ej.

84 A’aneb’ a’in li tz’eqb’ileb’ taq’a sa’ xb’alb’a.

85 A’aneb’ a’in li ink’a’ te’toje’q rix chiru chaq laj tza toj reetal lix raqikil wakliik chi yo’yo, toj reetal naq li Qaawa’, a’ li Kristo li Karneer, akaq xchoy lix k’anjel.

86 A’aneb’ a’in li moko neke’k’uluk ta re lix tz’aqalil ru a’an sa’ li junelikil ruchich’och’; re b’an li Loq’laj Musiq’ej rik’in lix k’anjelahom li terrestil;

87 Ut li terrestil rik’in lix k’anjelahom li choxahil.

88 Ut jo’kan ajwi’ eb’ li teleestil neke’xk’ul rik’in lix k’anjelahomeb’ li anjel li xaqab’anb’ileb’ chi k’anjelak choq’ reheb’, malaj li xaqab’anb’ileb’ chi wank choq’ musiq’ej aj k’anjelanel choq’ reheb’; xb’aan naq a’anaqeb’ aj eechanihom re li kolb’a-ib’.

89 Ut chi jo’kan kiqil, sa’ li choxahil matk’, lix loq’al li teleestil, li naq’axok ru chixjunil li natawman ru;

90 Ut maajun winq nanawok re, ka’ajwi’ li ani k’utb’il chiru xb’aan li Dios.

91 Ut chi jo’kan kiqil lix loq’al li terrestil, li naq’axok ru sa’ chixjunil li k’a’aq re ru lix loq’al li teleestil, sa’ ajwi’ loq’alil, ut wankilal, ut kawil metz’ew, ut awa’b’ejil.

92 Ut chi jo’kan kiqil lix loq’al li choxahil, li naq’axok sa’ chixjunil li k’a’aq re ru—b’ar wi’ li Dios, a’ li Yuwa’b’ej, na’awa’b’ejin sa’ xb’een lix k’ojarib’aal chi junelik q’e kutan;

93 Chiru lix k’ojarib’aal wi’ chixjunil li k’a’aq re ru naxkub’si rib’ sa’ tuulanil oxloq’ink, ut naxk’e xloq’al chi junelik q’e kutan.

94 Eb’ li neke’wan chiru, a’aneb’ li iglees re li Xb’een Yo’lajenaq; ut neke’ilok jo’ chanru naq ilb’ileb’, ut neke’nawok jo’ chanru naq nawb’ileb’ ru, rik’in naq ak xk’ulumeb’ xkomon lix tz’aqalil ru ut xkomon li rusilal;

95 Ut a’an naxk’eheb’ chi juntaq’eet sa’ wankilal, ut sa’ kawil metz’ew, ut sa’ awa’b’ejil.

96 Ut lix loq’al li choxahil jun wi’, jo’ chanru naq lix loq’al li saq’e jun wi’.

97 Ut lix loq’al li terrestil jun wi’, jo’ chanru naq lix loq’al li po jun wi’.

98 Ut lix loq’al li teleestil jun wi’, jo’ chanru ajwi’ naq lix loq’aleb’ li chahim jun wi’; xb’aan naq jo’ chanru naq jun chahim jalan wi’ rik’in jalan chahim sa’ xloq’al, jo’kan ajwi’ li jun jalan wi’ xloq’al rik’in li jun chik sa’ li teleestil ruchich’och’;

99 Xb’aan naq a’aneb’ a’in li wan re laj Pablo, ut re laj Apolo, ut re laj Sefas.

100 A’aneb’ a’in li neke’xye, wan naq re jun ut wan naq re junaq chik—wan re Kristo ut wan re Jwan, ut wan re Moises, ut wan re Eliyah, ut wan re Esaias, ut wan re Isaias, ut wan re Enok;

101 A’b’an moko neke’xk’ul ta li evangelio, chi moko li yaal ch’olob’anb’il chirix li Jesus, chi moko eb’ li profeet, chi moko li sumwank li junelik nakana.

102 Ut sa’ xraqik chixjunil, a’aneb’ chixjunil a’in li ink’a’ te’ch’utub’amanq rik’ineb’ laj santil paab’anel, re te’xoke’q chaq toj sa’ li iglees re li Xb’een Yo’lajenaq, ut te’k’ule’q sa’ li choql.

103 A’aneb’ a’in li wankeb’ choq’ aj tik’ti’, ut aj tuul, ut aj muxul sumsu, ut aj ko’b’eet, ut yalaq ani narahok re ut nayoob’ank re li tik’ti’.

104 A’aneb’ a’in li neke’xnumsi lix josq’il li Dios sa’ li ruchich’och’.

105 A’aneb’ a’in li neke’xnumsi li eeqajunk re li xam re junelik.

106 A’aneb’ a’in li neke’kutman taq’a sa’ xb’alb’a ut neke’xnumsi lix josq’il li Nimajwal Dios, toj reetal lix tz’aqalil ru li kutan, naq li Kristo akaq xk’e rub’el roq chixjunileb’ li xik’ neke’ilok re, ut akaq xtz’aqob’resi ru lix k’anjel;

107 Naq tixq’axtesi chaq li awa’b’ejihom, ut tixk’e re li Yuwa’b’ej chi maak’a’ xtz’ajnil, ut tixye: Laa’in kinq’axok-u ut kinyeq’i injunes li yatz’leb’aal uva, a’ li yatz’leb’aal uva re lix nimal xjosq’il li Nimajwal Dios.

108 Toja’ ut naq taak’ehe’q xkoroon rik’in lix loq’al choq’ koroon, re taak’ojlaaq sa’ xb’een li k’ojarib’aal re lix wankilal, re taa’awa’b’ejinq chi junelik q’e kutan.

109 A’ut k’ehomaq reetal, ut ilomaq, kiqil lix loq’al ut li ani wankeb’ sa’ li teleestil ruchich’och’, naq maak’a’ rajlankileb’ jo’ li chahim sa’ xheelam li choxa, malaj jo’ li samahi’ chire li palaw;

110 Ut kiqab’i lix yaab’ xkux li Qaawa’ chixyeeb’al: Chixjunileb’ a’in te’xb’as lix b’een raqeb’, ut li junjunq chi ru’uj aq’ej taach’olob’anq chiru li ani k’ojk’o sa’ xb’een li k’ojarib’aal chi junelik q’e kutan;

111 Xb’aan naq taaraqmanq aatin chirixeb’ jo’ chanru lix k’anjeleb’, ut li junjunq chi winq tixk’ul jo’ chanru xk’anjel a’an, tz’aqal li rawa’b’ejil, sa’eb’ li ochoch li kawresinb’ileb’;

112 Ut te’wanq choq’ xmoos li Q’axal Taqenaq Xwankil; a’b’an b’ar wan wi’ rochoch li Dios ut li Kristo ink’a’ te’ruuq chi chalk, chi maak’a’ roso’jikeb’ li ruchich’och’.

113 A’in xraqik li k’utb’esinb’il matk’ li kiqil, li kootaqlaak chixtz’iib’ankil naq toj wanko sa’ li Musiq’ej.

114 A’b’anan ninq ru ut sachol ch’oolej lix k’anjel li Qaawa’, ut eb’ li muqmuukil na’leb’ re lix awa’b’ejihom li kixk’ut chiqu, li neke’q’axok ru chixjunil li natawman ru, sa’ loq’alil, ut sa’ kawil metz’ew, ut sa’ awa’b’ejil;

115 Li kixtaqla naq ink’a’ taqatz’iib’a naq toj wanko sa’ li Musiq’ej, ut ramro xb’aan li chaq’rab’ naq taa’aatinaq li winq chirix;

116 Chi moko naru li winq chixk’eeb’al chi nawmank, xb’aan naq ka’ajwi’ naru rilb’al ut xtawb’al ru xb’aan lix wankil li Loq’laj Musiq’ej, li naxk’e li Dios sa’ xb’eeneb’ li neke’rahok re, ut neke’xsaqob’resi rib’ chiru;

117 Reheb’ li naxk’e wi’ li chaab’ilal a’in re rilb’al ut xnawb’al xjuneseb’ rib’;

118 Re naq rik’in lix wankil ut xk’utb’esihom li Musiq’ej, naq wankeb’ sa’ li tz’ejwalej, te’ruuq chixkuyb’al wank chiru a’an sa’ li ruchich’och’ re loq’alil.

119 Ut re li Dios ut li Karneer chiwanq taxaq li loq’alil, li nimank-u, ut li awa’b’ejil chi junelik q’e kutan. Amen.