Ko Hono Maʻu e Fakamoʻoni ʻa Sapuliná
ʻOku nofo ʻa e taha naʻá ne faʻú ʻi Kalolaine Tokelau, USA.
Na‘e ʻikai fakapapauʻi ʻe Sapulina pe naʻe ʻi ai haʻane fakamoʻoni.
“ʻOkú ma ʻilo ʻi he ngaahi meʻá ni ʻoku ʻi ai ha ʻOtua ʻi he langí” (Tokāteline mo e Ngaahi Fuakava 20:17).
Na‘e huke ʻe Sapulina mo Mami ʻa e ngaahi peesi ʻi he tohi papitaiso ʻa Sapuliná. Naʻe toki hokosia pē e taʻu valu ʻo Sapuliná, pea naʻe toe pē ʻa e uike ʻe ua peá ne papitaiso. Naʻá ne fiefia—pea mo kiʻi manavasiʻi—ke papitaiso.
“Sio ki he fuʻu meʻa lahi kuó ta ʻosi fakahokó!” Ko e lea ange ia ʻa Mamí. Na‘á ne huke hake ʻa e ʻū lauʻi pēsí. Naʻe tokoni ʻa e tohí ke teuteu ʻa Sapulina ki he papitaisó. Na‘á na fakafonu ʻa e ngaahi peesi fekauʻaki mo e ngaahi meʻa naʻá ne saiʻia taha aí pea mo ha peesi ʻe taha fekauʻaki mo hono fāmilí. Naʻá na aʻu leva ki ha peesi naʻe tohi ʻi ʻolunga “Ko ʻEku Fakamoʻoní.”
Na‘e talaange ʻe Sapulina, “ʻOku ʻikai ke u fie fakafonu ia ʻe au.”
Naʻe talaange ʻe Mami mo ʻene huke ki he peesi hono hokó, “Sai pē ia. Te ta lava ʻo fakafonu ia ʻamui ange.”
Naʻe tali ange ʻe Sapulina, “ʻOku ʻikai ke u tui te u fie fakafonu ia.”
“Ko e hā hono ʻuhingá?” Ko e fehuʻi ange ia ʻa Mamí.
“Koeʻuhí ʻoku ʻikai ke u ʻiloʻi ʻe au pe ko e hā ʻa e fakamoʻoní.” Na‘e ongoʻi ʻe Sapulina naʻe kula pea vela hono fofongá.
Na‘e kiʻi fakalongolongo ʻa Mami. “‘Oku ʻuhinga ia ʻoku ʻofa ʻa e Tamai Hēvaní ʻiate koe.”
“Ka kuo te‘eki ai ke tali mai ʻe he Tamai Hēvaní ʻeku lotú.” Ne fakatē loʻimata ʻa Sapulina. “Kuó u lotu ʻi ha māhina kakato ke maʻu hoku kafú, ka ʻoku teʻeki pē ke u maʻu ia!”
Na‘e saiʻia ʻaupito ʻa Sapulina ʻi hono kafú. Naʻe molū mo lanu pingikī. Naʻe ngaohi ia ʻe heʻene kui-fefiné maʻana ʻi he taimi ne fanauʻi aí. Na‘á ne mohe pē mo ia he pō kotoa kimuʻa pea puliá.
Naʻe kuku mai ʻe Mami ʻa Sapulina. “Ko e taimi ʻe niʻihi ʻoku ʻikai ke tali mai “ʻe he Tamai Hēvaní ʻetau lotú he taimi pē ko iá. Pea taimi ‘e niʻihi ko ʻEne talí ko e ʻikai. Ka ‘oku ʻikai ʻuhinga ia ʻoku ʻikai ke Ne ongoʻi ʻetau lotú pe ʻoku ʻikai ke Ne ʻofa ʻiate kitautolu.”
Naʻe mihimihi pē ʻa Sapulina. “Mahalo pē.”
ʻI he ʻaho Sāpaté, naʻe lau ʻe Sisitā Lī, ko e faiako Palaimeli ʻa Sapuliná, ha talanoa mei he Kaumeʻá. Na‘e fekauʻaki ia mo ha kiʻi tamasiʻi naʻe loto-mamahi koeʻuhí naʻá ne fanongo ki ha ngaahi lea taʻefeʻunga ʻi he pasí. Na‘á ne lotua ʻene palopalemá. Hili iá naʻá ne maʻu e fakakaukau te ne lava ʻo tui ʻene meʻa fanongo hivá (headphones) ʻi he pasí. Ko e fakakaukau ko iá naʻe hoko ia ko e tali ki heʻene lotú.
“ʻOi! Ko ia pē?” Ko e fehuʻi ange ia ʻa Sapuliná. “Ne u fakakaukau au ko e tali ki he lotú naʻe lahi ange ia ai! Hangē ko e fanongo ki ha leʻo pe ko e mamata ki ha ʻāngelo.”
Naʻe pehē ʻe Sisitā Lī, “Ko e taimi ʻe niʻihi ʻoku moʻoni ia. Ka ko e lahi tahá, ʻoku tali mai ʻe he Laumālie Māʻoniʻoní ʻetau ngaahi lotú ʻi ha ngaahi founga fakalongolongo. Hangē ko ha foʻi fakakaukau pe ko ha ongo fakamāfana.”
Na‘e sio ʻa Sapulina ki he tā ʻo e kiʻi tamasiʻi he pasí. Na‘á ne fakakaukau ki he maama mo e ongo fakafiefia naʻá ne maʻu ʻi he ʻamanaki ke ne papitaisó. Mahalo pē ko e fakahā ange ia ʻe he Laumālie Māʻoniʻoní ko ha fili lelei ia.
Mahalo pē naʻe ʻi ai moʻoni haʻane fakamoʻoni.
Na‘e hokosia e ʻaho papitaiso ʻo Sapuliná. Na‘e puke ʻe heʻene tamaí hono nimá, peá ne manga ki loto ki he vai māfaná. ‘I heʻene tuʻu hake mei he vaí, naʻá ne ongoʻi fiefia. Pea ‘i he taimi naʻe hilifaki ai ʻe Teti hono ongo nimá ʻi hono ʻulú ke foaki kiate ia ʻa e meʻafoaki ʻo e Laumālie Māʻoniʻoní, naʻá ne ongoʻi māfana ʻaupito.
Ko e ʻaho Sāpate hono hokó ko e Sāpate ʻaukai. Naʻe tuʻu hake ʻa e kakaí ke vahevahe ʻenau ngaahi fakamoʻoní. Naʻe puna hake ʻa Sapulina mei hono nofoʻangá pea lue ki muʻa ʻi he falelotú. Naʻá ne fakamanava lōloa peá ne malimali. Naʻá ne ʻiloʻi e meʻa te ne lea ʻaki he taimi ní. Pea naʻá ne ʻiloʻi e meʻa te ne tohi ʻi he lauʻi peesi ʻatā ko ia ʻi heʻene tohi papitaisó ʻamui angé.
Na‘e teʻeki ke maʻu hono kafú, ka naʻá ne maʻu ʻene fakamoʻoní.
Tā fakatātā ʻa Amanda Smith