Haʻu, ʻo Muimui ʻIate Au

Taimi Fiefia ʻi he Folofolá

ʻOku ʻalu fakatatau ʻa e ngaahi fakakaukau ko ʻení mo e Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí he uike kotoa pē.

Ivi Lahi

Hivaʻi e “Te u Loto-toʻa” (Tohi Hiva ʻa e Fānaú, 85).
Naʻe akoʻi ʻe Sīsū ʻe lava ʻe he lotu maʻu peé ʻo tokoniʻi kitautolu ke tau “lava ʻo ikuna” (Tokāteline mo e Ngaahi Fuakava 10:5). ‘Oku ʻuhinga ia ʻe lava ʻe he lotú ʻo tokoniʻi kitautolu ke tau mālohi fakalaumālie!
Fakatukupaa‘i homou fāmilí ki ha feʻauhi pamu fakamālohisino! Ko e fiha te ke lava ʻo fakahokó? Ko e hā ha meʻa te ke lava ʻo fai ke ke mālohi fakalaumālie ai?

MAʻÁ e Tokāteline mo e Ngaahi Fuakava 12–13; Siosefa Sāmita—Hisitōlia 1:66–75

Hivaʻi e “Mafai Kuo Toe ʻOmí” (Tohi Hiva ʻa e Fānaú, 60).
Naʻe hā mai ʻa Sione Papitaiso pea foaki ʻa e lakanga fakataulaʻeikí kia Siosefa Sāmita mo ʻŌliva Kautele. Naʻá na papitaiso leva ʻi he vaitafé (vakai, Siosefa Sāmita—Hisitōlia 1:68–71).
Fili ha talanoa fekauʻaki mo e papitaisó ke lau. (Te ke lava ʻo maʻu ha niʻihi ʻi he peesi 4, 8, 16, mo e 40!) Vahevahe leva ha ngaahi manatu melie ki he papitaisó mei ho fāmilí. Kapau kuo teʻeki ke ke papitaiso, talanoa ki he meʻa ʻokú ke pehē ʻe hangē ko iá!

Hivaʻi e “ʻOku ou Fie Hoko Leva ko ha Faifekau,” (Tohi Hiva ʻa e Fānaú, 90).
Naʻe akonaki ʻa Sīsū ʻo pehē ko hono vahevahe ko ia ʻo e ongoongoleleí ko e taha ia ʻi he ngaahi meʻa mahuʻinga taha te tau lava ʻo fakahokó (vakai, Tokāteline mo e Ngaahi Fuakava 15:6).
Lau e talanoa ʻi he peesi 32 ke ako e founga naʻe vahevahe ai ʻe ha fāmili ʻi Pōsinia ʻa e ongoongoleleí mo honau kaungāmeʻa ko Vikí. Fokotu‘u leva ha taumuʻa ke vahevahe ʻa e ongoongoleleí mo ha taha. Te ke lava ʻo vahevahe ha tatau ʻo e Kaumeʻá pe fakaafeʻi mai kinautolu ki he efiafi ʻi ʻapí he uike ka hoko maí!

Hivaʻi e “ʻOku Fakaofo” (Ngaahi Himí, fika 102).
Naʻe akoʻi ʻe Sīsū “ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10). ‘Oku ʻuhinga ia ko e tokotaha kotoa pē—kau ai koe!—ʻoku mahuʻinga kia Sīsū mo e Tamai Hēvaní. ʻOku founga fēfē hoʻo ongoʻi e ʻofa ʻa e Tamai Hēvaní kiate koé?
Faʻu ha puha meili fakangalingali maʻá e tokotaha takitaha ʻi ho fāmilí. Fetohiʻaki angaʻofa leva ke tokoni ke ongoʻi he tokotaha kotoa ʻoku ʻofaʻi kinautolu!

Tā fakatātā ʻa Katy Dockrill