Hē ʻi he Tauhiʻanga Iká
ʻOku nofo ʻa e tokotaha naʻá ne faʻú ʻi Pilītisi Kolomupia, Kānata.
‘Oku saiʻia ʻaupito ʻa Kilisitā ʻi he Paʻake Sitenilií. Naʻá ne saiʻia ʻaupito ʻi he matātahí. ʻA e malaʻe vaʻingá. Feituʻu ʻoku tauhi pea ngofua ke ala ai ki he fanga monumanú. Ko e heka lēlué.
Kae mahulu hake aí, naʻá ne saiʻia ʻaupito he tauhiʻanga ʻo e fanga iká! Na‘e ʻi ai e fanga monumanu kehekehe ʻo e tahí. Na‘á ne siofi ha sila lanu melomelo ne tāpate takatakai.
Ka naʻá ne fanongo ki ha meʻa. Naʻe tangi ha kiʻi taʻahine! Naʻe ʻikai tuʻu ha taha ke tokoni kiate ia.
Naʻe fusi ʻe Kilisitā e nima e kofu ʻo Mamí. “Sio ki hē. ʻOku tangi e kiʻi taʻahine ko eé!”
Naʻe sio ʻa Mami ki ai. Na‘á ne taki e nima ʻo Kilisitaá pea lue ki he kiʻi taʻahiné.
Naʻe pehē ange ʻa Mami, “Mālō e lelei. ʻE lava ke ma tokoni atu?”
“ʻOku ou fiu kumi ʻeku faʻeé.” Ko e homihomi ange ia ʻa e kiʻi taʻahiné.
Naʻe pehē ange ʻe Mami, “Haʻu ke tau tangutu. Te ma talitali mo koe.”
Na‘e tangutu ʻa Kilisitā mo Mami mo e kiʻi taʻahiné. Ko hono hingoá ko Sela.
Naʻe talaange ʻe Mami, “Ko e taimi ʻokú ke hē aí, ko e meʻa lelei taha ke faí ko e nofo he feituʻu ʻokú ke ʻi aí. ʻE ʻilo leva ʻe hoʻo faʻeé ʻa e feituʻu ke kumi koe aí.”
Naʻe fofonga mamahi mo ilifia ʻaupito ʻa Sela. Naʻe fakaʻamu ʻa Kilisitā te ne lava ʻo tokoni. Na‘á ne fai ha kiʻi lotu ʻi heʻene fakakaukaú. Tamai Hēvani, kātaki ʻo tāpuakiʻi ke foki mai e faʻē ʻa Selá.
Na‘e feinga ʻa Kilisitā ke ne fakafiemālieʻi ʻa Sela. Na‘á ne fai ange ha ngaahi fehuʻi. Na‘á ne talaange ha ngaahi meʻa fakalata fekauʻaki mo e fanga silá. Naʻá ne ʻoange foki ha kiʻi foʻi ngeʻesi fingota fakaʻofoʻofa naʻá ne maʻu he matātahí.
Hili ha ki‘i taimi siʻi, naʻe lele mai ha fefine kiate kinautolu. Ko e faʻē ia ʻa Selá! Naʻá ne fāʻofua kia Sela. Naʻá na fakatou fakamālō kia Kilisitā mo Mami.
Naʻe fiefia ʻa Kilisitā naʻá ne lava ʻo tokoniʻi ha taha!