Ko e Tulamá
‘Oku ou saiʻia he polokalama foʻou ʻa e Fānaú mo e Toʻu Tupú ʻi hono tuku mai ke u fokotuʻu haʻaku ngaahi taumuʻa pea ngāueʻi ia mo hoku fāmilí. Ko e taha ‘o ʻeku ngaahi taumuʻá ke fakahoko ha tulama fakafolofola he ʻaho Sāpate kotoa pē mo hoku kiʻi tehina ko Samú.
Ko e taimi ʻe taha naʻá ma fili ai ʻa Taniela ʻi he ʻana ʻo e fanga laioné. Na‘e fakafiefia hono palaniʻi iá. Ka naʻe pehē mai ʻe homa kiʻi tehina ko Maikoló, ʻa ia naʻe taʻu 4, “ʻE lava ke u kau mo au he tulamá?”
Naʻá ma tomuʻa talaange ʻikai.
Ka na‘e kamata ke tangi ʻa Maikolo.
Ko ia naʻá ku pehē ange, “Samu! Haʻu ki he loki ʻi laló.”
Naʻá ku hifo mo Samu ki he loki ʻi laló. Na‘e pehē ʻe Samu, “He ʻikai lava ʻa Maikolo ʻo kau he tulamá. He ʻikai ke ne lava ʻo maʻuloto ʻene leá!”
Ka ne u maʻu ha fakakaukau. Na‘á ku talaange, “Tuku ke ne kau he tulamá. Fanongo, te ne lava ʻo hoko ko ha laione! He ʻikai lava ke ʻi ai ʻa Taniela mo e ʻana ʻo e fanga laioné taʻe ʻi ai ha laione. Ta ʻalu ʻo ʻomai ia!”
‘I he ʻaho Sāpaté, ko e ʻaho ʻo e fakaʻaliʻalí, naʻa mau takitaha tuʻu ki hono tuʻunga pea kamata e fakaʻaliʻalí. Naʻe lelei ʻaupito ʻemau tulamá. Na‘e lelei ʻaupito e ngungulu ʻa Maikoló.
‘Oku ou ʻiloʻi naʻe nofoʻia au ʻe he Laumālié ʻi heʻeku talaange ʻe lava ʻa Maikolo ʻo kau he tulamá. Naʻe akoʻi mai ʻe he aʻusiá ni kapau ʻoku ngali lotomamahi pe tuenoa ha tokotaha, ʻoku totonu ke tau fakakau mai ia. ‘Oku ou fakatauange te ke ʻahiʻahi e polokalama foʻou ʻa e Fānaú mo e Toʻu Tupú. ‘Oku ou ʻilo ʻe tokoni foki ia ke ke hangē ange ko Sīsuú!