O Paionia i Atunuu Uma
Augusto Lim
Uluai Pulega Aoao mai Filipaina
Sa mafaufau pea Augusto i le fesili a lona afafine.
O se Aso Sa mafanafana manaia. Na nofo Augusto i lona poletito ma fiafia i le susulu o le la. Sa oso atu i luga o ona vae lona afafine o Mylene.
“Tatay (Tama),” na ia fai mai ai, “aisea tatou te le o ai i le lotu e pei o a’u uo?”
Sa le mautonu Augusto i se tala e fai atu.
“Ia,” sa ia fai mai ai, “na eseese lotu na ma auai ai ma lou tina ae ma te lei faaipoipo. Ae ina ua mae’a (le faaipoipoga) sa ma le toe o. E ui lava i lea, o loo ma talitonu pea i le Atua ma suesue i le Tusi Paia.”
Na luelue le ulu o Mylene. Ae sa mafaufau pea Augusto i lana fesili. Atonu sa manaomia lona aveina o lona aiga i le lotu.
Sa tonu ia Augusto e tatalo. “Afai e te manao ou te auauna atu i se lotu pe fai soo se mea mo oe, ia faailoa mai ia te a’u,” na ia tau atu ai i le Tama Faalelagi.
I ni nai aso mulimuli ane, sa tuitui mai se tasi i le faitotoa. O ni alii talavou se toalua i ofutino papae ma ni pineigoa lanu uliuli. Sa la fai mai o i laua e o mai mai Le Ekalesia a Iesu Keriso o le Au Paia o Aso e Gata Ai.
Sa tele ni fesili a Augusto mo i laua. Mo le iva masina, sa ia faalogologo ia i laua o aoao atu. Na iu lava ina filifili o ia e papatiso. Sa ia folafola atu i le Atua o le a ia faia pea le mea sili e usitai ai ma fesoasoani atu i isi. Sa papatiso i le tasi le masina mulimuli ane, lona toalua o Myrna. Ma sa fiafia le teineititi o Mylene e alu i le lotu!
Sa fesoasoani Augusto ma lona aiga i le Ekalesia ina ia tuputupu ae. Na latou fesoasoani e fausia le uluai falelotu a le Ekalesia i Filipaina. Sa auauna atu foi Augusto o se peresitene o le paranesi mo ni nai taimi. E ui lava sa faigata, ae na manatua e Augusto le folafolaga na ia faia i lona papatisoga e faia le mea sili na te mafaia.
Na mavae tausaga. Sa tuputupu ae le aiga o Augusto, ma na faapena foi le Ekalesia. Ina ua faatulagaina le uluai siteki i Filipaina, sa avea Augusto ma peresitene o le siteki. Sa oo ina matua Mylene ma faaipoipo i le malumalu. Na faapena foi isi fanau a Augusto. O nisi foi sa faamisiona.
Mulimuli ane, na valaauina ai Augusto e avea ma se peresitene o le misiona i Filipaina. Sa ia fesoasoani i faifeautalai ia faatuatua ma faasoa atu le talalelei, e pei lava o faifeautalai na aoaoina o ia.
I se tasi aso, na maua ai e Augusto se valaau mai le perofeta. Sa ia talosagaina Augusto e auauna atu o se Pulega Aoao. O le uiga o lena mea o le a aoao atu e Augusto isi taitai i totonu o le Ekalesia. O lona uiga foi o le a ia tuuina atu se lauga i le konafesi aoao!
Ina ua oo i lona taimi e lauga ai, na laa atu Augusto i luga o le pulelaa. Sa manava loloa o ia. Na ia talanoa e uiga i tagata faamaoni o le Ekalesia i Filipaina. Sa ia talanoa e uiga i faifeautalai iina o e sa matua galulue malosi. Ma sa ia faasoa atu lana molimau e uiga i le alofa o le Atua.
A o ia toe saofai ifo i lalo, sa lagona e Augusto le fiafia. Sa ia iloa na fesoasoani le Tama Faalelagi ia te ia e tausia le folafolaga na ia faia i le papatisoga. Ma e tusa lava po o le a le mea na tupu, na iloa lava e Augusto o le a ia tausia lena folafolaga i lona olaga atoa.
O Elder Augusto Lim sa avea ma Peresitene o le Malumalu o Manila Filipaina.
E lua malumalu i Filipaina, faatasi ma le isi lima faaopoopo fuafuaina.
O Filipaina o se atunuu o motu e i le Sautesasae o Asia.
Sa galue o ia o se loia.
O i laua ma lona faletua, o Myrna, o ni matua o se fanau e toavalu.
O Filipaina e tusa ma le 805,200 tagata o le Ekalesia e i ai.
Ata na tusia e Emily Lui