Sauniuni mo le Eseta
“Tapuai [ai] i le Tama i lona suafa, ma loto mamā ma lima mamā” (2 Nifae 25:16).
“Ala i luga, Lydia,” o le tala lea a Mama. “O Le Aso Tofi o le Faamamaina o Fale!” I Rusia, lea na nofo ai Lydia, o le Aso Tofi o le Faamamaina o Fale o se aso faapitoa lea e sauni ai mo le Eseta.
Sa taavale mai Lydia ma tilotilo atu i fafo i lona faamalama. Na pogisa lava fafo.
“Mama, ua ou matua lelava lava,” o le tala lea a Lydia. “E mafai ona ou moe umi laitiiti ma faigaluega i se taimi mulimuli?”
Sa ataata Mama ma saofai i luga o le moega. “E i ai le mafuaaga ua ta ala po ai i le asō. E te iloa po o le a?”
Sa mafaufau loloto Lydia, ae na te lei iloaina.
“Tatou te galulue malosi ina ia faamama lo tatou fale i le asō e faamanatu mai ai ia i tatou le taimi na mulumulu ai e Iesu vae o Ona soo. Sa ia alofa ma auauna atu i isi, ma e tatou te mananao e auauna atu faapei ona sa faia e Iesu i lo tatou aiga. O le asō o se aso e manatua ai Iesu! ” O le tala lea a Mama.
Na manao Lydia e auauna atu faapei o Iesu, o lea na ia oso ese ai mai lona moega. O le taimi atoa na totoe o le aso, sa galue malosi ai o ia. Sa ia faamamaina le fola, tatā lavalava, ma fesoasoani e kuka meaai. I le faaiuga o le aso, sa ia lagona le mitamita. Sa sili atu ona mamā mea uma.
O le aso na sosoo ai o le Aso Faraile o le Eseta. Sa faia e Lydia, Mama, ma Papa ia fuamoa o le Eseta. Sa latou faia ni tamai pu laiti i atigifuamoa ma sasaa uma i fafo lega. Sa latou tusia ni mamanu i fuamoa ma ufitia mamanu taitasi i le gaó. Ona latou lolō lea o fuamoa i vali lanumumu sesega, lanuviole, ma le lanumeamata. Sa fiafia Lydia i le aulelei o mamanu faataaliolio.
Ina ua mamago fuamoa, sa taai e Lydia i ni ata laiti o lona aiga ma tuu i totonu o fuamoa taitasi. O lenei Aso Faraile sa o se aso e faatasia ai ma manatua le taulaga a Iesu. O le aso lea o le vaiaso na maliu ai Iesu. O fuamoa na faamanatu atu ai ia Lydia le tuugamau na taoto ai Iesu. Sa fai e le aiga o Lydia le mea sili latou te mafaia e manatua ai o Ia.
I le Aso Toonai Paia, sa faia ai e Mama kulich (falaoa o le Eseta). O le faia o kulich o se tu masani taua o le Eseta i Rusia. Sa taumafai pea lava tagata ina ia migao ao taoina le kulich . Sa mafaufau Lydia i lona aiga, le Toetu o Iesu, ma mea sa ia lotofaafetai ai. Sa faigofie atu ona mafaufau i mea faaleagaga ina ua matua mama ma toafilemu lona fale.
Na iu lava ina oo i le Aso Sa o le Eseta! Sa matuai fiafia lava Lydia. Na o mai ona tausoga e asiasi mai. Sa latou aai uma i meaai mananaia ia sa ia fesoasoani e kuka. Sa i ai pai, kulich, sosisi, ma sisi. A o latou aai, sa latou faasoa atu a latou molimau ma talanoa e uiga i mea sa latou lotofaafetai ai.
Sa latou taaalo i se taaloga faapitoa i le mae’a ai o le ‘aiga o le afiafi. Sa uu e tagata taitasi se fuamoa teuteuina ma sa faafetoai atu i se isi fuamoa. O le tagata na muamua ta’e lana fuamoa o le tagata lena na faiaina. Sa gatete lima o Lydia ao ia oomiina lana fuamoa i le fuamoa a lona tausoga. “Faamalosi, fuamoa!” na ee atu ai o ia. Sa ta’e lana fuamoa lanuviole sesega. Sa i ai iina i totonu o le atigifuamoa ta’e le ata o lona aiga.
Sa ataata Lydia a o tilotilo atu i le ata. Na te lei popole i lona faiaina ai i le taaloga. Sa faatumulia lona loto i se lagona mafanafana ma fiafia. Sa ia galue malosi ina ia saunia mo lenei Eseta e ala i le fesoasoani ma alofa i lona aiga. Ona o le Toetu o Keriso, o le a latou toe ola uma foi!
Ata na tusia e Sofia Cardoso