Galulue Faatasi
Sa uu e Kalepo lana suo. Ua oo i le taimi e galue ai i le togalaau!
Sa ia fesoasoani ia Tina e ave ia meafaigaluega. Sa i ai se lako laitiiti. Ma sa i ai foi se suo mo Tina. Ua saunia i laua e amata ona galulue.
Sa savavali atu Tina ma Kalepo i le togalaau. Auoi, leai! Ua faatumulia i vao! Sa i ai vao pupuu matuituia. Ma sa i ai vao uumi mimiti. E tele naua vao!
Ae sa iloa e Kalepo le mea e fai. Sa amata loa ona galue. Sa eli e Kalepo pito i lalo o vao. Ona se’i ese lea e Tina o vao mai le palapala. Sa maoae le la vaega! E lei umi ae i ai se la faaputuga tele o vao.
Ua oo i le taimi mo se malologa. Sa tele le inu a Kalepo i le vai.
“O le a le mea o le a ta faia pe a leai ni vao?” Na fesili ai Kalepo.
Sa tafi ese e Tina ni palapala mai ona lima. “O le taimi lava e uma ese ai le vao, ua mafai loa ona ta toto fatulaau. E pei o tamato ma pi ma — ”
“Ma sana?” Na fesili ai Kalepo. E fiafia tele o ia i sana.
“Ma sana,” o le tala lea a Tina. “E le mafai ona galo ia i taua lena mea!”
Na tu i luga Kalepo. “Ua lelei. Ta toe foi e galulue. ” Sa ia siiina i luga lana suo. Sa tatau ona ia faia se avanoa mo sana.
Sa eli ma eli Kalepo. O se galuega faigata. Ae o Kalepo o se tagata galue malosi. Na te mafai ona faia mea faigata. Sa la faia faatasi ma Tina se isi faaputuga o vao. Sosoo ai ma le isi. Sosoo ai ma le isi. E tele naua vao!
Sa iu ina uma lelei vao na vele e Kalepo ma Tina. Sa faapalasi atu Kalepo i luga o le mutia. Sa matuai le lavā lava o ia! Sa faapalasi atu Tina i ona autafa.
“O oe o se tagata galue malosi tele,” o le tala lea a Tina. “Semanu e alu lo’u aso atoa i vao la. Na vave ma manaia ona o oe.”
Sa ataata Kalepo. O ia o se tagata galue malosi. “E lelei lava pe a ta galulue faatasi.”
Ata na tusia e Christine Grove