O Se Piano mo Perofeta
O le tala mai i Greater Accra, Ghana.
Sa i ai i se tamaitiiti e igoa ia Perofeta ni sini taua se lua.
“O le musika o se gagana e mafai e tagata uma ona malamalama i ai” (Tusipese a Tamaiti, iii).
E fiafia Perofeta i musika. Sa sili atu lona fiafia i pese a le Peraimeri ma viiga a le Ekalesia. Na te hamuina fati i le aso atoa. Sa ia vaai faalemafaufau ia te ia o nofo i se piano, ma ta ana pese e fiafia i ai. Sa ia vaai faalemafaufau foi ia te ia o aoao atu isi tagata i le auala e ta ai.
Ae tasi lava le faafitauli. Sa leai sana piano.
I se tasi aso sa faia ai se faatalanoaga o Perofeta ma lana epikopo.
“Ua e faatuina ni sini mo le polokalama a Tamaiti ma le Autalavou?” o le fesili lea a le epikopo.
“Ioe,” o le tala lea a Perofeta. “Ou te manao e aoao e ta le piano.”
“O se sini lelei lena,” na fai atu ai le epikopo.
“Ma pe a ou ausia lena sini,” na fai mai ai Perofeta, “ona i ai lea o se isi a’u sini. Ou te manao e aoao nisi tagata se to’a 20 ia iloa ta piano.”
“Ua ia te oe ni sini lelei se lua,” o le tala lea a le epikopo.
“Ma e i ai lo’u faafitauli,” o le tala lea a Perofeta. “E leai sa’u piano.”
“Ia, sei ta vaai po o le a se mea e mafai ona ta faia.”
I le lotu i le Aso Sa na sosoo ai, sa ta’u atu e le epikopo ia Perofeta ua ia maua se ulugalii faamisiona e mafai ona aoaoina o ia. O le a la aumaia ni piano mo ia ma isi e faataitai i ai. La te mananao e aoao le tele o tagata ia iloa ta piano.
Na talanoa atu le epikopo i tagata. Na talanoa atu Perofeta i tagata. Na talanoa le aiga o Perofeta i tagata. E lei umi ae ua talanoa le uarota atoa e uiga i lesona ta piano. Sa faapena foi isi.
“O le toatele o a’u uo e le o ni tagata o le Ekalesia na mananao foi e aoao,” na tau atu e Perofeta i le epikopo.
“Ioe, e taliaina i latou,” na fai mai ai le epikopo. “O le a tuuina atu e faifeautalai ia te oe se tusi ma fesoasoani ia te oe e aoao lesona. Ma a uma ona e aoao, ona mafai lea ona e fesoasoani ia i la’ua e aoao atu isi tagata uma.”
“O la’u sini lona lua lena!” Na ta’u mai e Perofeta.
E lei umi ae ua faataitai Perofeta faatasi ma faifeautalai. Sa fiafia o ia e aoao i uiga o nota taitasi ma le faalogo atu o o mai faatasi e fau se pese. Sa aoaoina foi ni ana uo se toalua mai le Ekalesia, o Kelvin ma Alexander. Ina ua maea le masina, ua amata foi ona aoao atu tama uma e toatolu.
O aso uma lava, e aoaoina ai e tama ia vasega piano i le falelotu o le Ekalesia. I le taimi muamua sa pe tusa ma le toa 10 tamaiti, ona 20 lea, ona oo lea i le 50!
“O se mea fiafia lenei mea!” Na fai mai Kelvin i se tasi aso ina ua uma le vasega.
“Ou te manatu ua fiafia le Tama Faalelagi aua o loo tatou fesoasoani atu i isi e aoao,” o le tala lea a Alexander.
Sa lue atu le ulu o Perofeta. O lana sini lea ua fesoasoani ai i le toatele o tagata.
Ae sa i ai se isi mea sa avea ma mea fiafia ia Perofeta. A o faataitai e isi tamaiti le taina o pese o le Peraimeri, sa latou aoao foi e uiga i le Tama Faalelagi. Sa fesili nisi o i latou ia Perofeta pe mafai ona latou aoao atili e uiga i le Ekalesia.
Ma o le mea moni, o nisi o tagata o e faatoa aoaoina e uiga i le Ekalesia ona o lesona piano ua iu ina papatisoina.
“O le taimi nei i sauniga,” o le tala lea a Perofeta, “matou te auai faatasi uma ma usu pese matou te fiafia i ai.”
Ata na tusia e Violet Lemay