Mai le Au Peresitene Sili

Ua Toetu o Ia!

Saunia e Peresitene Henry B. Eyring

Fesoasoani Lua i le Au Peresitene Sili

Sii mai le “Ua Toetu o Ia,” Ensign po o le Liahona, Aperila 2013, 4–5.

O le Toetu o Iesu Keriso e aumaia ai ia i tatou le faamoemoe. Na aumaia ai ia te a’u le faamoemoe i le aso o le taumafanafana i le 1969 ina ua maliu lo’u tina. Sa ou faanoanoa ona sa ou valavala ma ia mo se taimi le tumau.

Ae sa ou lagona le fiafia ina ua tau mai e le Agaga Paia ia te a’u e moni le Toetu. E mafai ona ou vaai faalemafaufau atu pe o le a faape’ī le toe vaai atu i lo’u tina ma isi o e pele i se aso.

Na toetu Iesu Keriso. Ona o Ia, o fanau uma a le Tama Faalelagi e fananau mai i le lalolagi o le a toetutu i se tino o le a le toe oti lava.

Toetu: Ina ua toe foi mai le Agaga o Iesu i Lona tino ina ua mavae Lona maliu. Ona o Iesu, o tagata uma ua maliliu o le a toetutu foi i se aso.

“Ou te molimau atu o Iesu o le Keriso toetu, o lo tatou Faaola, ma o lo tatou faataitaiga atoatoa ma le taiala i le ola faavavau.”

Peresitene Henry B. Eyring

O Le Tala o le Eseta

‘Oti ese ia kata ma faapipii i se pepa. Faapūpū ma nonoa faatasi i se manoa. O lea la ua i ai sau tusi o tala o le Eseta!

1. 

   Sa tietie atu Iesu Keriso i le aai o Ierusalema i luga o se asini. Sa viia e tagata o Ia ma fola le ala i laupama. (Tagai i le Mareko 11:1-11.)

2. 

   Na asiasi Iesu i le malumalu. Na Ia faamaloloina tagata o e sa pipili ma tauaso. (Tagai i le Mataio 21:12–14.)

3. 

   Sa totogi e faitaulaga sili lotoleaga se tasi o soo o Iesu Keriso, o Iuta le Sekara, ni tupe siliva e 30 e tuuina atu ai o Ia ia i latou. (Tagai i le Mataio 26:14–16.)

4. 

   Sa talisua faatasi Iesu ma Ona soo i le tausamaaga o le Paseka. Na Ia tuuina atu ia i latou le faamanatuga e fesoasoani latou te manatua ai o Ia. (Tagai i le Mataio 26:19–20, 26–28.)

5. 

   Sa afio atu Iesu i Ketesemane e tatalo i le Tama Faalelagi. O iina na puapuagatia ai o Ia mo a tatou agasala. Na o mai tagata ma pelu ma pue o Ia. (Tagai i le Mataio 26:36–50.)

6. 

   Na puapuagatia ma maliu Iesu i luga o le satauro. Ua taoto Lona tino i se tuugamau ma se maa tele i luma o le faitotoa. (Tagai i le Mataio 27:27–35, 57–60.)

7. 

   Sa fuli ese e agelu le maa. Sa latou ta’u atu ia Maria le Makatala ma isi fafine ua toetu Iesu. Sa faaali atu Iesu i fafine, ma sa latou ifo atu ia te Ia. (Tagai i le Mataio 28:1–10.)

8. 

   Na faaali atu Iesu i Ona soo. Sa latou pa’i atu i Lona tino toetu. Sa Ia ta’u atu ia i latou e aoao atu i tagata uma Lana talalelei. Ua toetu Iesu Keriso, e faapena foi i tatou! (Tagai i le Luka 24:36–43; Mataio 28:16–20.)

Tagai Sau, Mulimuli mai ia te Au mo le Mataupu Faavae ma Feagaiga 29 ma le Eseta.

Ata na tusia e Steliyana Doneva