O Le Malaga i Fafo atu Lava
“Sa e faaaogaina le tapeleti i le taimi atoa lenei?
O se tamai laina o loi eletonika o loo fetolofi solo i luga o le tapeleti a Rylee. Sa ataata Rylee ma amata loa ona faatopetope le faitauina o le aofai. Fitu, valu, iva … O se tasi lenei o ana taaloga matematika e fiafia lava i ai!
“Sa ou faapea sa e valiina lau tusi o tamai manu ninii,” o le tala lea a Tina a o sau o ia i totonu o le potu.
Sa ea ae i luga Rylee. “Oi. Ioe, sa ou faia. Ae sa ou lelava, o lea na amata ai loa ona ou taalo i taaloga.”
“Sa e taalo i le tapeleti i lenei taimi atoa?” Sa fesili atu ai Tina ma se ataata laitiiti.
Sa siaki e Rylee le uati. Sa fai si tuai o le taimi nai lo le mea sa ia manatu ai! “Ia, masalo. Ae o loo fesoasoani ia te au e aoao ai le matematika.”
“O le faia o le matematika e lelei mo lou faiai,” o le tala lea a Tina. “Ae o le tele naua o le taimi i luga o le lau e lē lelei mo lou faiai. Pe mo le vaega uma o lou tino. E manaomia e lou tino le tele o isi mea.”
Sa tu Rylee. “O le uiga o lau tala, e pei o meaai lelei?”
Sa luelue atu le ulu o Tina. “Ioe! Ae ua na o se amataga lena mea. Aisea ta te le o ai e savalivali? Atonu e mafai ai foi ona e vaai i ni loi mo’i.”
“Ua lelei!” Na fai e Rylee ona seevae. Sa faatalitali Tina ma le uso laitiiti o Rylee o Harper mo ia i le faitotoa.
“Ua sauni mo se malaga?” O le fesili lea a Tina.
“Ioe!”
Sa latou savavali atu i le paka e lata ane. Sa susulu le la, ma o laulaau sa i luga o laau sa fetaai i le savili. “Ei, vaai!” Na faasino atu e Rylee se laina o loi o fetolofi i luga o le auala savali. “Sa’o lelei oe, Tina.”
“E fia na e te iloa atu?” O le fesili lea a Tina.
Sa taumafai Rylee e faitau, ae sa matuai tele naua. Sa tamoe atu o ia i luma ma piki i luga se maa felanulanuai. “E pei lava o se ladybug. Vaai i itu uma!”
Sa ia tuuina le maa i totonu o lana taga. “Sei o tatou faafoliga o ni saienitisi,” sa ia fai atu ai ia Harper. “E mafai ona tatou faaali atu i le tasi ma le isi mea tatou te mauaina!”
Sa la mauaina faatasi ma Harper se isi maa manaia, se paina kone, ma se akone. Sa latou vaaia foi ni pepe.
“E sili atu la ona manaia le mea lea nai lo la’u taaloga!” Na fai mai ai Rylee.
“Pe le manaia ea le i ai i fafo?” O le fesili lea a Tina. “Ma e te iloa le vaega sili ona lelei? E lelei tele mo lou faiai.”
Sa faasipa atu e Rylee lona ulu. “Ae sa ou manatu sa tatau ona e suesue i mea ina ia malosi atili ai lou faiai.”
“O se tasi lena o auala. Ae o isi mea e fesoasoani e tuputupu ae ai foi. E pei o le kikiina o le polo soka faatasi ma le tatou aiga. Po o le talanoa ma uo. Po o le faaaluina o se taimi i fafo, e pei o le taimi nei. E manaomia ona tatou tuputupu ae ma atiina ae i soo se ituaiga o auala, e pei ona sa faia e Iesu.”
Na vave lava le alu o le taimi ao savalivali solo Rylee, Tina ma Harper i le paka. E oo atu i le taimi na latou taunuu ai i le fale, ua tumu le taga a Rylee i oa mai la latou savaliga. Sa ia laina ana oa i luga o le fola e faitau ai. Fitu, valu, iva …
Sa ataata o ia. Sa fiafia o ia i le tele o auala faafiafia e tuputupu ae ai ma tausi lelei ai lona tino.
Ata na tusia e Tammie Lyon