O Le Paaga Tusitusi Sili
E alala le tusitala i Midland Sisifo, Egelani.
Sa lei manao Sieni e avea ma se paaga tusitusi. Sa na o lona fia manao lava ia Tinā e sau i le fale.
Tina Pelē, sa tusia e Sieni.
Sa ia taofi ma tatā lana peni i luga o le laulau. Na ia tilotilo atu i le pusa aisa, lea na tautau ai le ata fou o ia ma lona Tina. Sa tutusa lelei o la auvae, tutusa le uli o la lauulu, ma le la ataata lava lea e tasi.
O le a se mea e mafai ona ia fai atu ai? Sa manao Sieni ia maua e ia le fiafia ma le lototele mo Tina, ae na leai se manatu na oo mai i lona mafaufau. Sa tiga tele lona loto lea na faigata ai ona tusia soo se mea lava.
Faatoa foi mai lava Sieni, Tama, ma nai ona tei na asiasi atu ia Tina i le lua vaiaso talu ai. Sa i ia Tina i se falepuipui ma sa toeitiiti lava aso atoa o latou tietie atu e asi o ia. Ona o le umi o le malaga, sa seāseā ai ona latou o atu e asi o ia. Ua silia ma le tausaga talu ona i ai Tina i le falepuipui, ma na o le faalua ona latou vaai ia te ia.
O le taimi lea, ina ua asiasi atu Sieni, sa fautuaina e Tina e avea i laua ma ni paaga tusitusi. Ae sa lei manao Sieni e avea ma ni paaga tusitusi. Sa na o lona fia manao lava ia Tinā e sau i le fale.
O ananafi na taunuu mai ai le tusi muamua lava a Tina ia Sieni, na tusia i se penitala manaia. I le pito i lalo, sa ia tusia ai se ata o i laua o faatasi i se pati ina ua taunuu atu i le fale.
Na tusia e Sieni ni nai laina, ona ia numinumi lea o le pepa. Sa ia tuu lona ulu i luga o le laulau ma moeiini mau ona mata, ma taumafai e taofiofi loimata.
Sa sau i totonu Tama ma le faatau. “Sieni, o OK oe?”
Sa faamimigi tau’au o Sieni.
Na nofo i lalo Tama ma fusi atu o ia. Sa punou ifo Sieni i lona fatafata.
“O le a le umi o totoe?” na ia fesili ai.
“Seia oo i le a?”
“O le a le umi ona mafai lea ona sau Tina i le fale?”
Sa filemu Tama mo se taimi umi. Ona ia fai mai lea, “Sieni, masalo e toe tolu tausaga.”
Sa manatu Sieni o le a pasae lona fatu. Tolu tausaga! O le tausaga na tea nei sa matua umi ma faigata. E mafai faapefea ona ia ola mo le isi tolu tausaga e aunoa ma Tina?
“I aso taitasi, ou te moomoo lava maimau pe ana i ai lou tina iinei,” o le tala lea a Tama. “Ua matuai faigata lava mea uma i lona alu ese ai, a ea?”
Sa luelue atu le ulu o Sieni.
“E leai se afaina o le lagona faanoanoa,” o le tala lea a Tama. “O nisi taimi e fesoasoani ia te au e faamanatu ai ia te au lava ia mea ou te faafetai ai.”
Sa manavanava laitiiti Sieni. “E pei o le a?”
Sa ataata Tama. “E pei o le auala tatou te valaau atu ai ia Tina i vaiaso uma. Ma e mafai ona tatou auina atu ana sapalai o mea e manaomia — ma tusi.” Sa faamafolafola e Tama le pepa i luga o le laulau. “Ma …?”
“Ma … ” Sa mafaufau Sieni. “E toatele o’u faiaoga ma uo e mafai ona ou talanoa i ai. Ma na ave au e le tina o Ashley i se gaoioiga o le Aso Sa o Tina. Ma sa ou aoao e avea ma se uo e sili atu ona lelei ma fesoasoani i isi.”
“Ioe, sa e faia,” na fai atu ai Tama. “Ae a pe a sei fai se ta tatalo, ma e mafai ona e mafaufau pea e uiga i mea e te manao e tusi?”
Sa piilima Sieni. Sa ia faafetai i le Tama Faalelagi ona sa mafai ona ia vaai ia Tina ma sa taunuu mai ma le saogalemu la latou malaga i le fale. Ona ia ole atu lea ia te Ia e fesoasoani mai ia te ia ia iloa le mea e tusi.
Sa nofo o ia i le laulau, mafaufau ma mafaufau. Ona amata lea ona ia tusia se mea na te lei faamoemoeina: o se lisi o mea sa ia faafetai ai. Sa ia lisiina mea uma sa la talanoa ai ma Tama, ma isi mea, e pei o ona tei ma lona pitonuu.
Ina ua uma, sa tusi e Sieni se ata o ia ma Tina o taaalo faatasi i taaloga laupapa. O loo faanoanoa laitiiti pea lona loto, ae sa i ai se mea se tasi na tulimatai i ai—mo le isi tolu tausaga, o le a avea o ia ma se paaga tusitusi sili ona lelei!
Ata na tusia e Alyssa Tallent