Haʻu, ʻo Muimui ʻIate Au
Taimi Fiefia ‘i he Folofolá
ʻOku ʻalu fakatatau ʻa e ngaahi fakakaukau ko ʻení mo e Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí ʻi he uike kotoa pē.
Ko e Palani ‘o e Fakamo‘uí
Ki he Tokāteline mo e Ngaahi Fuakava 76
-
Hiva‘i ʻa e “ʻOku Moʻui Hoku Huhuʻí,” (Ngaahi Himi, fika 68)
-
Na‘e fakahā ʻe Sīsū Kalaisi kia Siosefa Sāmita ha meʻa-hā-mai ʻo e palani ʻa e ʻOtuá maʻatautolú (vakai Tokāteline mo e Ngaahi Fuakava 76). ʻOku tau ui ʻa e palani ko ʻení ko e palani ʻo e fakamoʻuí pe ko e palani ʻo e fiefiá. ʻE lava ke ke lau ha meʻa lahi ange kau ki ai ʻi he peesi 2.
-
Va‘inga he taimí ni ʻi he peesi 24 mo ho fāmilí. Tokoniʻi e tokotaha kotoa pē ke aʻu ki he puleʻanga fakasilesitialé!
Va‘inga ‘o e Loto-Hounga‘iá
Ki he Tokāteline mo e Ngaahi Fuakava 77–80
-
Hiva‘i ʻa e “Tānaki Ho Ngaahi Tāpuaki,” (Ngaahi Himí, fika 148).
-
Na‘e akoʻi kitautolu ʻe Sīsū ke “maʻ[u] e meʻa kotoa pē ʻi he loto fakafetaʻi” (Tokāteline mo e Ngaahi Fuakava 78:19). ʻOku ʻuhinga ia ke tau houngaʻia ʻi he meʻa ʻoku tau maʻú.
-
Fai ha vaʻinga ʻo e loto-houngaʻiá! Tuʻu ha toko taha kae tangutu fuopotopoto ʻa e toengá. ʻE paasi ʻe kinautolu ʻi he siakalé ha meʻa (hangē ha meʻavaʻingá) ʻi he vave taha te nau lavá. ʻI he taimi ʻe pehē ai ʻe he tokotaha vaʻinga tuʻu maʻú, “Taʻofi!” ʻE lea ʻaki ʻe he tokotaha ʻokú ne pukepuke ʻa e meʻá ha meʻa ʻoku houngaʻia ai. Pea ʻe tuʻu leva e tokotaha ko iá ʻi he takai hono hokó.
Ngaahi Lea ‘o e Fakafiemālié
Ki he Tokāteline mo e Ngaahi Fuakava 81–83
-
Hiva‘i ʻa e “Kuó u Fai ha Lelei?” (Ngaahi Himí, fika 129).
-
Na‘e akonaki ʻa Sīsū ʻoku totonu ke tau “hiki hake ʻa e nima ʻoku tautau ki laló” (Tokāteline mo e Ngaahi Fuakava 81:5). ʻOku ʻuhinga ia ke tokoniʻi mo poupouʻi e niʻihi kehé ʻi he taimi ʻoku nau lotomamahi pe helaʻia aí.
-
Tā ha nima fietokoni! Tā ho laʻinimá ʻi ha laʻipepa pea kosiʻi ʻo toʻo. Hiki ha faʻahinga meʻa te ke fai ke tokoniʻi e niʻihi kehé pea tautau ia ʻi ha feituʻu te ke lava ʻo sio ki ai. ʻO ka fie maʻu, ʻe lava ke ke tautau e nima homou fāmilí fakataha ke faʻu ha fuʻu ʻakau nima fietokoni!
Ngaahi Matala‘i‘akau Lili Ngaohi mei he Pepá
Ki he Tokāteline mo e Ngaahi Fuakava 84
-
Hiva‘i e “ʻOku Ongo ʻa e ʻOfá” (Tohi Hiva ʻa e Fānaú, 42–43).
-
Na‘e folofola ʻa Sīsū ke “fakakaukau ki he ngaahi lile ʻo e ngoué” (Tokāteline mo e Ngaahi Fuakava 84:82). Kapau ʻoku tokangaʻi ʻe he Tamai Hēvaní ʻa e matalaʻiʻakaú, ʻe lava ke tau falala te Ne tokangaʻi kitautolu! (Vakai, Tokāteline mo e Ngaahi Fuakava 84:83–85.)
-
Ngaohi ha matalaʻi lile mei he laʻipepá ke ne fakamanatu atu ʻa e ʻofa mo e tokanga ʻa e Tamai Hēvaní. Tā ho laʻinimá ʻi ha laʻipepa pea kosiʻi ʻo toʻo. Takatakai e fōtunga ʻo e nimá ki ha kouni. Hili ia pea takaiʻi leva ʻa e “foʻi tuhu” takitaha ʻi ha penivahevahé ke vilo ʻa e laʻipepá ki tuʻa ke ngaohi e matalaʻiʻakaú. ʻO ka fie maʻu, te ke lava ʻo fakapipiki hoʻo matalaʻiʻakaú ki ha vaʻakau ke faʻu ʻaki ha vaʻa.
Ngaahi tā fakatātā ʻa Katy Dockrill