Ko e Fehu‘i ‘o e Faitotonú
ʻOku nofo ʻa e tokotaha naʻá ne faʻú ʻi Utah, USA.
Ko e hā e meʻa ʻoku mahuʻinga angé: ko ha pale pe ko e moʻoní?
“Fai ʻe kimoutolu ʻa ia ʻoku angatonú” (2 Kolinitō 13:7).
Naʻe pehē ange ʻe heʻene faiakó ko Mīsisi Tēvini, “Kulisitī, ko e meʻa ʻeni maʻau”. Naʻá ne ʻoange kia Kulisitī ha sila.
“Mālō,” ko Kulisitī ange ia. Naʻá ne fakaava e silá ʻo lau e kiʻi tohi ʻi lotó.
Talamonū atu! Ko e taha koe ʻo e fānau ako ʻe toko ono naʻe fili ʻe ho kaungā-akó ke maʻu ha pale Tangataʻi Fonua Makehe ki he kalasi nimá. Kātaki ʻo tali e ngaahi fehuʻi ʻi laló pea fakahū kinautolu ki he ʻōfisí ʻi he fakaʻosinga ʻo e ʻahó ke toe vakaiʻi ʻe heʻetau kau fakamāú.
Naʻe kukuʻi ʻe Kulisitī ʻa e silá ʻi heʻene fiefiá. Naʻe ʻikai ke ne faʻa tatali ke fakaʻaliʻali ange ki hono ngaahi kaungāmeʻá!
“Ke ‘ilo ha meʻa!” na‘á ne talaange kia Kepiela ‘i he kai hoʻataá. “Mahalo te u maʻu ha fakalangilangi.”
“Sai moʻoni!” ko Kepiela ange ia.
“Ko e meʻa pē ʻoku fie maʻú ke u ʻuluaki tali kotoa e ngaahi fehuʻi ko ʻení,” ko Kulisitī ange ia. “Ka ʻoku ou ongoʻi ʻo hangē kuo ʻosi e ngaahi meʻa fakamānako ia ke u tohi fekauʻaki mo iá. ʻOku pehe ʻe he taha ko ʻeni, ʻKuó ke fakahoko fēfē ha liliu ʻi homou koló?’ ʻOku faingataʻa ke u fakakaukau ki ha faʻahinga meʻa.”
“Mahalo pē te ke lava ʻo hiki ha meʻa ʻokú ke fakakaukau ‘e lelei ke fakahoko,” ko Kepuela ange ia. “ʻOku ʻikai ko ha meʻa lahi ia. ʻOku nau fie ʻilo pe ko e faʻahinga tokotaha fēfē koe.”
Naʻe ʻikai ke ongoʻi fiefia ʻa Kulisitī ke faʻu hake ha meʻa. Kae mahalo pē te ne lava ʻo hiki ha meʻa te ne lava ʻo palani ke fakahoko ʻi he kahaʻú. Naʻá ne tataaʻi ʻene penivahevahé he pēsí lolotonga ʻene fakakaukaú.
Pea naʻá ne manatuʻi leva ha fakaʻilonga naʻá ne fakatokangaʻi ʻi he laipeli fakapuleʻangá: “Fiemaʻu ha kau faiako ki he kau kamata laukongá.” Naʻá ne saiʻia ke tokoni ki hono ngaahi tokouá mo e tuongaʻané ke laukongá. ʻE lava pē ke fakafiefia hono tokoniʻi e fānau kehé. Ne teʻeki kau ki ai … ka naʻá ne fie fakahoko ia! Na‘á ne hiki, “Ngāue tokoni ʻi he laipelí ke tokoniʻi e fānaú ke nau ako laukonga.”
Naʻe sio ʻa Kulisitī ki he meʻa naʻá ne tohí. Naʻá ne ongoʻi hangē ʻoku loʻoá peá ne feinga ke folo hifo ia. Ka naʻe hangē ne fakaʻau pē ke kovi ange ʻene ongoʻi taʻefiemālié ʻi heʻene lue atu ki he ʻōfisí ke fakahū ʻene ngaahi talí.
ʻI he lue ʻa Kulisitī ki ʻapi mei he akó, naʻá ne ongoʻi e mamafa ʻo ʻene lué. ʻI he maʻu meʻatokoni efiafí naʻe ʻikai ke ne ongoʻi fie kai.
Ne ʻeke ange ʻe he Fineʻeikí, “ʻOkú ke sai pē, ʻofaʻanga?”
Naʻe mapuhoi leʻolahi ʻa Kulisitī. “ʻIkai.”
Ne ʻeke ange ʻe he Tangataʻeikí, “ʻOkú ke fie talanoa nai ki ai?”
Naʻe fakamatalaʻi ʻe Kulisitī ʻa e meʻa naʻá ne fakahokó. “Talu mei ai mo e ʻikai ke u ongoʻi lelei ʻi hoku lotó.” Naʻá ne kūnima peá ne tangutu hifo ʻi hono seá.
“ʻOku ou fiefia hoʻo talamai kiate kimauá.” Naʻe kukuʻi ʻe he Fineʻeikí e nima ʻo Kulisitií. “Ko e ʻuluaki sitepu ia ki hono fakahoko e ngaahi meʻa ʻoku totonú.”
Naʻe malimali pē ʻa Kulisitī mo pehē ange, “ʻOku ou ʻilo ʻa e sitepu hono hokó.” Naʻá ne ongoʻi fiemālie ange ʻi heʻene fakakaukau ki he meʻa te ne faí.
Lolotonga ʻene lotu he pō ko iá, naʻá ne fakahā ki he Tamai Hēvaní ʻokú ne fakamolemole ʻi he ʻikai ke ne faitotonú. Naʻá ne ʻiloʻi te Ne tokoniʻi ia ke fakatomala pea fakaleleiʻi e ngaahi meʻá.
‘I he pongipongi hono hokó, naʻe lue atu ʻa Kulisitī ki he ʻōfisi ʻo e akó. Naʻá ne fakaava hake e matapaá pea hū ki loto …
Ngaahi tā fakatātā ʻa Morgan Bissant