Ngaahi Fakapulipulí mo e Meʻa Faka‘ohovalé
ʻOku nofo ʻa e tokotaha naʻá ne faʻú ʻi Iowa, USA
Naʻe totonu nai ʻa hono tukulotoʻi e fakapulipuli ʻa Keití?
“ʻOku foaki ʻa e Laumālie ʻo Kalaisí ki he tangata kotoa pē, koeʻuhi ke ne ʻiloʻi ʻa e leleí mei he koví ” (Molonai 7:16).
“Hei, sio!” Na‘e toʻo hake ʻe Keiti ha ki‘i tamapua pepa kuo ʻosi nusinusi‘i mei he faliki ʻi he falekoloá. “Ko ʻeni, faʻo ia ki ho kató.”
“Ke loto ke u ʻalu au mo ia?” Ko e fehuʻi ange ia ʻa Matí.
Ne pehē ange ʻe Keiti, “He ʻikai lava ke fakatau atu ia ʻe he falekoloá.” Te nau lī ʻe kinautolu ki he kapa vevé. Ko ha misiona fakahaofi ʻeni. ‘Okú ta fakahaofi ʻe kitaua e tamapua ko ‘eni!”
Na‘e malimali ʻa Keiti kia Mati. Naʻe malimali ange ʻa Mati.
“Sai.” Naʻe faʻo ʻe Mati ʻa e ki‘i tamapua pepá ki hono kató. Na‘e ongo makehe ʻene pehē ʻokú ne ʻi ha misiona fakahaofí!
Ka, ‘i heʻena hū ki tu‘a mei he falekoloá, ne ongo ʻo hangē ʻa e kiʻi tamapua pepá ha foʻi maka fōlahi ‘i hono kató. ʻOku totonu nai ke ongo pehē ʻa e misiona fakahaofí?
‘I heʻenau a‘u ki he ʻapi ʻo Matí, naʻe fakapipiki fakalelei mo fakatokalelei ʻe Keiti ʻa e ki‘i tamapua pepá ki he lelei taha naʻá ne lavá.
“Ko e ha e fa‘ahinga vala ʻoku totonu ke u ‘ai ki ai?” naʻá ne ʻekeange mo to‘o hake ha foʻi kala. “Fēfē ha fo‘i kofu polo fakaʻofo‘ofa?”
Naʻe kamokamo ʻa Mati ‘i he loto vēkeveke. “Peá ta toki lava ʻo fakaʻaliʻali ia ki he‘eku mamí!”
Ne pehē ange ʻe Keiti, “ʻIkai! He ʻikai lava ke ta tala ki ha taha. He ʻikai ʻaupito. Ko e fakapulipuli pē ʻeni ʻa kitauaa, MAHINO? Palōmesi mai he ʻikai ke ke tala.”
Ne pehē ange ʻe Mati, “ʻIo, SAI, palōmesi atu. Ka ko e hā ‘oku ʻikai lava ai ke ta talá?”
“Kapau te ke tala, ʻe ‘ita ʻa ho‘o faʻeé, pea mahalo he ʻikai loto ke ta toe va‘inga fakataha.”
“Ko e hā ka ‘ita aí?” Ko Mati ange ia. Naʻe ongoʻi manavasiʻi mo tailiili.
Na‘e tuku hifo ‘e Keiti ʻene kalá. “Kapau he ʻikai te ke tala, te u tuku ke ke tauhi ʻa e ki‘i tamapuá pea mo e fanga kiʻi vala kotoa naʻá ku tā maʻaná.”
Ne ʻilo leva ʻe Mati e ‘uhinga ʻene ongo‘i manavasiʻí. Naʻá ne fanafana ange, “Ne ta kaihaʻasi ia, ko ia?”
“‘Ei, ko koe naʻá ke faʻo ia ‘i ho kató mo hū mo ia ki tuʻa mei he fale koloá.”
“Koeʻuhí ko hoʻo talamaí!”
Ne pehē ange ʻe Keiti, “Halaʻatā! “Te u ʻalu au ki ‘api kimuʻa pea ke ʻai au ke u kau ha palopalema.” Na‘á ne tuʻu ‘o lele ki tuʻa he matapaá.
Taimi ko iá ‘oku haʻu ‘a e fineʻeikí ki he lokí. “Ko e hā na‘e mavahe fakavavevave pehē ai ʻa Keiti?” Na‘á ne fakatokangaʻi ‘a e kiʻi tamapua pepa ‘i he nima ʻa Matí. “Pea ko e meʻa ia mei fē?”
Naʻe fakalongolongo pē ʻa Meti. Naʻe ʻikai te ne ongoʻi fiemālie ʻi hono tauhi ha fakapulipuli mei he Fineʻeikí. Kae fēfē kapau naʻe tonu ʻa Keiti pea ʻita ʻa e fineʻeikí?
Ne ʻikai tuku ʻene ongoʻi manavasiʻí. Naʻá ne mihiʻi lahi ʻene mānavá peá ne fakamatala kotoa ange e foʻi talanoá.
Naʻá ne talaange, “Ne talamai ʻe Keiti ke u palōmesi ke tauhi ia ko ha fakapulipuli. Ka naʻe ongo hala ia.”
Naʻe tangutu hifo e fineʻeikí ʻi hono tafaʻakí ʻi he funga mohengá. “Ko e lahi taha ʻo e ngaahi fakapulipulí ʻoku hala ia. Tautautefito kapau ʻoku talamai ke ʻoua naʻá te teitei tala ki ha taha. ʻI he tafaʻaki ʻe tahá, ʻe lava ke hoko ha meʻa lelei, hangē ko ha meʻaʻofa pe paati fakafiefia. ʻOku ʻuhinga ia ke fakafiefia ki he tokotaha kotoa pē.”
Naʻe kamo pē ʻa Mati. Naʻá ne pehē ange, “Fakamālō atu ʻi he ʻikai ke ke ʻita mai kiate aú. Na‘e talamai ʻe Keiti te ke ʻita.”
Naʻe fāʻofua ki ai ʻa Mami. “ʻOku ou fiefia ʻi hoʻo fakafanongo ki he Laumālie Māʻoniʻoní mo talamai ʻa e moʻoní.”
“Te ke lava ʻo ʻave au ki he falekoloá ke fakafoki ʻa e tamapuá?” Ko e fehuʻi ange ia ʻa Matí.
“Lava lelei!” Naʻe malimali ʻa e fine‘eikí. “Pea ʻi heʻeta foki maí, te ke lava ʻo tokoni mai ke ngaohi ha foʻi keke ke fakaʻohovaleʻi ʻaki ʻa Teti.”
Naʻe kata ʻa Mati. “Ko ha meʻa ʻeni te u lava ʻo ongoʻi fiemālie ai!”
Ngaahi tā fakatātā ʻa Devin McSherry