Tohi Fakahinohino Feimeʻatokoni Fo‘ou ʻa Uinifeletí
Naʻe hoko ʻa e talanoa ko ʻení ʻi Kampala, Uganda.
“Naʻa mau nofo ʻi he fiefia” (2 Nifai 5:27).
Ko e hā ha meʻa ʻe lava ke fakahū ʻe Uinifeleti ʻi heʻene tohi fakahinohino feimeʻatokoní ?
Naʻe tokoni ʻa Uinifeleti kia Sasa (kui fefine) ke ngaohi e meʻatokoni efiafí.
Ne pehē ʻe Sasa, “Mmm, ‘oku ou saiʻia he matoke,.”
Ne pehē atu ʻe Uinifeleti, “Mo au pē. Ko e taha ia ʻo e meʻatokoni ʻoku ou saiʻia taha aí! ʻOku ou saiʻia he siaine matá. Pea mo e poló mo e tematá. Ka ko e konga lelei tahá ko e sōsí.”
Naʻe pehē ange ʻe Sasa, “Ko hono ʻuhingá he ʻoku fakatahaʻi kotoa ʻi he sōsí e ngaahi meʻa fakaifoifó.”
Ne hoko atu pē ʻena tofi vesitapoló. Na‘e māpuhoi leva ʻa Uinifeleti.
Naʻá ne pehē ange, “Sasa, ʻoku anga fēfē hoʻo nofo fiefia he taimi kotoa peé?”
Naʻe tali ange ʻe Sasa, “‘Oku ou feinga pē.” “Ka ‘oku ʻikai ke u fiefia he taimi kotoa pē. Ko e loto mamahí ko ha konga ia ʻo e moʻuí. ‘Okú ke loto-mamahi he taimí ni?”
Na‘e kamo pē ʻa Uinifeleti. “‘Oku ou ʻofa kia Teti koeʻuhi ʻokú ne ngāue mamaʻo. Pea ʻoku ou fakakaukauloto ki he akó he ʻoku ʻikai ke mau lava ʻo ʻalu he taimí ni. Pea ʻoku ou ʻofa ki hoku ngaahi kaungāmeʻa mei he lotú.”
Naʻe pehē ʻe Sasa, “ʻOku sai pē ke ongoʻi loto mamahi he ngaahi meʻa ko iá. ʻOku ʻikai faingofua maʻu pē ʻa e moʻuí. Ka ʻi he taimi ʻoku ou loto mamahi aí, ʻoku ou feinga ke muimui ʻi heʻeku tohi fakahinohino ki he fiefiá.”
“Tohi fakahinohino?”
“Hangē pē ko e ʻi ai ʻeku tohi fakahinohino feimeʻatokoni matoké, ʻoku ʻi ai ʻeku tohi fakahinohino ki he fiefiá. Taimi ʻe niʻihi ʻoku fuʻu lahi ʻa e mamahí ke mole atu ʻi he taimi pē ko iá. Ka ʻoku faʻa hoko maʻu pē ʻeku kiʻi tohi fakahinohinó ko e meʻa ia ʻoku ou fie maʻu ke u ongoʻi lelei ange aí”
“Ko e hā hoʻo tohi fakahinohinó?”
Na‘e malimali pē ʻa Sasa. “Ko e hā ʻoku ʻikai ke ke vakai ai pe te ke lava ʻo faʻu ha tohi fakahinohino maʻau pē? Hili iá peá ke toki talanoa mai.”
ʻI he lotu ʻa Uinifeleti ʻi he pō ko iá, naʻá ne ʻiloʻi naʻe fanongo mai ʻa e Tamai Hēvaní. Naʻá ne ʻilo naʻe fakafiefiaʻi ia ʻe he lotú! Naʻá ne toʻo mai ha laʻipepa peá ne tohi, Ko e Tohi Fakahinohino ʻa Uinifeleti ki he Fiefiá. 1. Lotu. Hili iá naʻá ne ʻalu leva ʻo mohe.
Naʻá ne lau ʻene Tohi ʻa Molomoná he pongipongi hono hokó. Naʻá ne fiefia foki ʻi hono lau e folofolá. Naʻá ne maʻu ʻene pepá peá ne tohi, 2. Lau folofolá Hili iá naʻá ne sio ki he potufolofola naʻá ne fakaava ki he: “Tui kia Kalaisi” (2 Nīfai 33: 10).
Naʻe tānaki atu ʻe Uinifeleti mo ha kiʻi tohi ʻe taha: 3. Maʻu ha tui kia Sīsū Kalaisi
Naʻe fakakaukau ʻa Uinifeleti ki he angalelei ʻa Sasa ke tali ʻa ʻene ʻaʻahi angé. Naʻe maʻu e Uinifeleti ʻa Sasa peá ne pehē ange, “Fakamalo atu ʻi hoʻo tali ke u nofo mo koé.”
Naʻe ongoʻi fiefia ʻa Uinifeleti ʻi heʻene fakahoko ʻene fakamāloó. Naʻá ne toe tohi ʻi heʻene pepá. 4. Ke loto houngaʻia.
Hili iá ne kole ʻe Uinifeleti ki hono kaungāʻapí pe ʻe lava ke haʻu e fānau iiki angé ʻo vaʻinga. Naʻá ne ʻomi hono kiʻi tehina ko Milifeletí, mo hono kiʻi tuongaʻane ko ʻAlifeletí. ʻI he ʻosi ʻenau vaʻingá, naʻá ne fakaafeʻi e fānaú ke nau laukonga. Naʻe tofitofi ʻe Sasa ha meleni ke vahevahe ai e tokotaha kotoa.
Naʻe ʻalu ʻa Uinifeleti kimui ange ke ʻaʻahi ki hono kaungāmeʻa ko Hepí. Naʻá na fufulu fakataha ʻa e ʻū peletí maʻá e faʻē ʻa Hepí. Hili iá naʻá na tafi ʻa e falikí. Naʻe fakafiefia e tokoní!
ʻI he hokosia ʻa e efiafí, ne tokoni ʻa Uinifeleti ki hono kiʻi tokouá mo e tuongaʻané ʻi heʻena ngāue fakaako mei ʻapí. Naʻá ne ako ʻa e fakahokohoko fakamotuʻaleá mo Milifeleti. Naʻá ne tokoni kia ʻAlifeleti ʻi heʻene fiká.
ʻI he pō ko iá, ne toe talanoa ʻa Uinifeleti mo Sasa.
“ʻOku ou ongoʻi lelei ange he ʻahó ni! ʻOku ou pehē kuó u maʻu ʻeku founga ki he fiefiá.”
“Fakaʻofoʻofa! Fakamatalaʻi mai,” ko Sasa ange ia.
Naʻá ne lau ʻo pehē, “Ko e Tohi Fakahinohino ʻa Uinifeleti ki he Fiefiá.” “1. Lotu. 2. Lau ‘a e folofolá. 3. Maʻu ha tui kia Sīsū Kalaisi. 4. Loto houngaʻia.”
Ne talaange ʻe Sasa, “Ko ha tohi fakahinohino fakaofo ia.” “Ka ʻoku ou tui ʻoku ʻi ai e meʻa ʻoku ngalo. Ko e hā mo ha toe meʻa naʻá ke fiefia ai he ʻahó ni?”
Naʻe fakakaukau ʻa Uinifeleti ʻi ha kiʻi taimi siʻi. “Sai, naʻá ku fiefia ke vaʻinga mo e fānau īkí. Mo tokoni kia Hepi mo ʻene faʻeé. Pea ako mo Milifeleti mo ʻAlifeleti. ʻOleva angé … ko e meʻá ia! Ko e konga fakaʻosí ʻa hono tokoniʻi ʻo e niʻihi kehé.”
Ne pehē ange ‘e Sasa, “ʻOku tonu ia.” “ʻOku hangē ʻa e tokoni ki he niʻihi kehé ko e sōsí—ʻokú ne fakatahaʻi e ngaahi meʻa lelei kotoa pē.”
“Ko ha tohi fakahinohino lelei ia.” Naʻe mamali ʻa Uinifeleti. “ʻOku ou loto ke toe ʻahiʻahi ia ʻapongipongi.”
Ngaahi tā fakatātā ʻa Hollie Hibbert