Kaumeʻa ki he Kaumeʻa
Ko ha Ongo ʻo e Nongá
Mei ha ʻinitaviu mo Lusi Sitīvenisoni ʻIueli.
ʻI ha pongipongi ʻe taha ʻi hoku taʻu 11, naʻá ku ʻā hake ʻo fanongo ki ha ngaahi leʻo ʻi he loki talanoá. Naʻe ʻikai ke fafangu au ʻe ha taha ki he akó ʻo hangē ko e angamahení. ʻI heʻeku feinga ke ʻilo e meʻa naʻe hokó, ne u ʻiloʻi ai kuo mālōlō ʻeku tangataʻeikí.
Lolotonga e talanoa hoku fāmilí ʻi he loki talanoá, ne u lue ki heʻemau ngoue matalaʻiʻakaú. Naʻe lahi ʻemau ngoue matalaʻi ʻakaú, pea naʻá ku tokoni ki heʻeku tangataʻeikí ki hono tokangaʻi iá. Naʻá ku tangutu hifo ʻi he sea ʻi he lalo ʻakaú ʻo tangi. Naʻá ku ongoʻi loto-mamahi mo puputuʻu moʻoni.
Hili ha ngaahi miniti siʻi, ne u sio ki heʻeku faiako Palaimelí ʻokú ne fakaava mai e matapā e ʻāá. Naʻá ne lue mai ʻo tangutu ʻi he seá ofi mai kiate aú ʻo pehē mai, “Soni, ʻokú ke manatuʻi e lēsoni ne tau ako he Sāpate kuo ʻosí fekauʻaki mo e palani ʻo e fakamoʻuí?” Naʻe toe fakamatalaʻi mai ʻe heʻeku faiakó kiate au ko hotau sinó ʻoku ngaohi ia mei ha laumālie mo ha sino. Naʻá ne talamai ʻoku ʻi ha feituʻu lelei ʻa e laumālie ʻo ʻeku tangataʻeikí, pea ʻe ʻi ai e ʻaho te ne toe tuʻu ai. ʻE ʻi ai e ʻaho te u toe feʻiloaki ai mo ia.
Neongo naʻá ku kei loto-mamahi pē, ka naʻá ku ongoʻi nonga. ʻOku ou manatuʻi ʻa e ongoʻi nonga ko iá ʻi he taimi kotoa pē ʻoku ou fakakaukau ai ki he aʻusia ko iá. Naʻe tokoni mai ʻeku faiako Palaimelí, pea naʻe fakafiemālieʻi au ʻe he Laumālie Māʻoniʻoní. Naʻe tokoni ia ke fakatupulaki ʻeku fakamoʻoni ki he ʻofa ʻa e Tamai Hēvaní mo e palani ʻo e fakamoʻuí.
Neongo pe ko e hā e meʻa ʻokú ke fouá, ʻoku tokanga mai ʻa e ʻOtuá kiate koe. ʻOku ʻikai fie maʻu ia ke ke toki fuʻu lahi ke ke ongoʻi e fakamoʻoni ʻa e Laumālié ʻe lelei ʻa e meʻa kotoa pē. Te ke lava ʻo fakatupulaki ha fakamoʻoni ki he palani ʻa e Tamai Hēvaní. ʻOku lava ke ke ʻongoʻi ʻa e nongá.
Tā fakatātā ʻa Arthur Lin